Iok-pek-kì 第 32 章 - 巴克禮全羅

1

Tùi án-ni chí(**chit) saⁿ ê lâng chiū thêng-soah, bô koh ìn Iok-pek, in-ūi i ka-kī khòaⁿ-chòe gī.

2

Hit-sî ū Pò͘-se lâng, sio̍k tī Lân ê cho̍k, Pa-la̍h-ka ê kiáⁿ Í-lī-hō͘, chin siū-khì; siū-khì Iok-pek, in-ūi i lia̍h ka-kī pí Siōng-tè khah ū gī.

3

Iā siū-khì i saⁿ ê pêng-iú, in-ūi in siūⁿ bô ōe thang ìn, iáu-kú gí Iok-pek ū chōe.

4

Í-lī-hō͘ beh kap Iok-pek kóng-ōe, iáu teh thèng-hāu; sī in-ūi in pí i khah-chōe hè.

5

Í-lī-hō͘ khòaⁿ-kìⁿ chí saⁿ lâng chhùi-lāi bô ōe thang ìn, chiū tōa siū-khì.

6

Pò͘-se lâng Pa-la̍h-ka ê kiáⁿ Í-lī-hō͘ ìn kóng, Góa siàu-liân, lín nî-lāu; Só͘-í góa thè-niū, m̄-káⁿ tùi lín pâi-lia̍t góa ê ì-kiàn.

7

Góa kóng, Jı̍t-chí chōe-ê tio̍h kóng, Hè-siū kôaiⁿ-ê tio̍h ēng tì-hūi kà-sī lâng.

8

Nā-sī lâng ê lāi-bīn ū sim-sîn, Iā Chôan-lêng--ê ê khì hō͘ lâng chhang-miâ.

9

Khah sī-tōa--ê, bô lóng ū tì-hūi, Khah ló-liân--ê, bô lóng ōe bêng-pe̍k kong-pêng.

10

Só͘-í góa kóng, Lín tio̍h thiaⁿ góa; Góa iā beh pâi-lia̍t góa ê ì-kiàn.

11

Khòaⁿ ah, góa í-keng thèng-hāu lín ê ōe, Koh hī-khang thiaⁿ lín ê lí-lūn; Thèng-hāu lín chhē-tio̍h thang kóng ê ōe.

12

Góa liû-sim thiaⁿ lín. Khòaⁿ ah, lín tiong-kan bô chı̍t-lâng piān-tó Iok-pek, Iā bô chı̍t-ê ìn i ê ōe.

13

Lín bo̍h-tit kóng, Góan tú-tio̍h tì-hūi; Siōng-tè ōe iâⁿ i, lâng bōe-ōe.

14

I bô ēng ōe kap góa piān-lūn; Góa iā bô beh ēng lín ê ōe ìn i.

15

In gāng-gāng bô koh ìn, Bô ōe thang kóng.

16

In bô kóng-ōe, tiāⁿ-tiāⁿ khiā-teh bô koh ìn, Góa kiám tio̍h koh thèng-hāu mah?

17

Góa iā beh chīn góa ê hūn-gia̍h lâi ìn, Pâi-lia̍t góa ê ì-kiàn.

18

In-ūi góa ū ōe móa-móa; Góa lāi-bīn ê sîn kek-tōng góa.

19

Khòaⁿ ah, góa ê pak-lāi chhin-chhiūⁿ hong-ba̍t-ba̍t ê chiú; Iā chhin-chhiūⁿ sin ê phê-tē teh-beh piak-lı̍h.

20

Góa beh kóng-chhut, hō͘ góa tháu-khì; Góa beh khui-chhùi lâi ìn.

21

Góa bô beh khòaⁿ lâng ê sin-hūn; Iā bô beh thiám-mī lâng.

22

In-ūi góa bōe hiáu-tit thiám-mī lâng; Nā ū án-ni, chiū chhòng-chō góa--ê beh kín-kín tû-bia̍t góa.