Iok-pek-kì 第 33 章 - 巴克禮全羅

1

Iok-pek ah, taⁿ chhiáⁿ lí thiaⁿ góa ê ōe, Liû-sim thiaⁿ góa it-chhè ê giân-gú.

2

Khòaⁿ ah, góa taⁿ khui góa ê chhùi, Góa ê chı̍h tī chhùi-lāi teh kóng.

3

Góa ê ōe beh kóng-chhut góa sim-lāi ê chèng-tı̍t, Góa ê chhùi-tûn beh láu-sı̍t kóng-chhut só͘ chai ê.

4

Siōng-tè ê Sîn chhòng-chō góa; Chôan-lêng--ê ê khì hō͘ góa tit-tio̍h o̍ah.

5

Lí nā ōe, chiū tio̍h ìn góa, Khí-lâi khiā pâi-lia̍t tī góa ê bīn-chêng.

6

Khòaⁿ ah, góa tī Siōng-tè ê bīn-chêng kap lí chı̍t-iūⁿ, Iā sī ēng thô͘ nı̍h-chiâⁿ-ê.

7

Khòaⁿ ah, góa bô ēng ui-giâm hō͘ lí kiaⁿ, Iā bô ēng góa ê sè-le̍k teh--lí.

8

Lí só͘ kóng-ê, góa sı̍t-chāi ū thiaⁿ-kìⁿ, Iā ū thiaⁿ-kìⁿ lí ê ōe ê siaⁿ, kóng,

9

Góa sī chheng-khì, bô kè-sit, Góa sī chheng-pe̍k, tī góa sim-lāi iā bô chōe.

10

Khòaⁿ ah, I chhē khàng-khiah lâi kong-kek góa, Lia̍h góa chòe I ê tùi-te̍k.

11

I ēng kha-khàu khàu góa ê kha, Tì-ì khòaⁿ góa it-chhè ê lō͘.

12

Khòaⁿ ah, kóng kàu che, lí sī put-gī, góa beh ìn lí; In-ūi Siōng-tè pí lâng khah-tōa.

13

Lí siáⁿ-sū kap I saⁿ-chiⁿ? In-ūi I ê sū I lóng bô kóe-bêng.

14

In-ūi Siōng-tè kóng chı̍t-pái, Iā nn̄g-pái, chóng-sī lâng bô tì-ì.

15

Lâng tó tī bîn-chhn̂g khùn, Kàu i khùn tāng-bîn ê sî, Tī bîn-bāng-tiong, mî--sî ê īⁿ-siōng,

16

I khui in ê hī-khang, Khàm-ìn tī in só͘ siū ê kà-sī.

17

Beh hō͘ lâng kóe-ōaⁿ só͘ kè-e̍k ê sū, At-chí lâng ê kiau-ngō͘.

18

Chó͘-chí i ê o̍ah-miā bô lo̍h chhim-khiⁿ, Iā i ê sìⁿ-miā bô tùi to-kiàm lâi sí.

19

Lâng tī bîn-chhn̂g--nih siū thàng-thiàⁿ ê kéng-kài; Tī i ê kut-lāi chhin-chhiūⁿ kau-chiàn bô soah.

20

Tì-kàu i ê o̍ah-miā iàm-chiān chia̍h-mı̍h, I ê sim-sîn iàm-ò͘ⁿ hó-bī.

21

I ê bah siau-sán, bô thang khòaⁿ-kìⁿ; Pêng-sò͘ bô khòaⁿ-kìⁿ ê kut, taⁿ lóng thóng-chhut.

22

I ê sìⁿ-miā kūn tī chhim-khiⁿ; I ê o̍ah-miā kūn tī hiah ê bia̍t-bô sìⁿ-miā ê.

23

Nā ū chı̍t ê sù-chiá kap i tī-teh, Chiū-sī chı̍t-chheng-tiong ê chı̍t-ê, thòe i kóng-ōe-ê, Chiong lâng só͘ tio̍h-chòe-ê chí-sī i;

24

I chiū si-un hō͘ i, kóng, Kiù i bián-tit lo̍h chhim-khiⁿ, Góa í-keng chhē-tio̍h sio̍k-hôe i ê.

25

I ê bah pí gín-ná ê bah khah iù-nńg; I beh ho̍k-tò siàu-liân ê jı̍t-chí.

26

I beh kî-tó Siōng-tè, Siōng-tè hoaⁿ-hí i; Kìⁿ-tio̍h I ê bīn lâi hoaⁿ-hí; I koh sǹg hit-lâng chòe-gī.

27

I tī lâng ê bīn-chêng chhiùⁿ-koa kóng, Góa ū hōan-chōe, tian-tò sī-hui, bô lī-ek góa.

28

I kiù-sio̍k góa ê sìⁿ-miā, bián-lo̍h chhim-khiⁿ; Góa ê o̍ah-miā iā beh khòaⁿ-kìⁿ kng.

29

Khòaⁿ ah, chiah ê it-chhè ê sū Siōng-tè kiâⁿ tī lâng, Nn̄g-pái, saⁿ-pái.

30

Ūi-tio̍h beh tùi chhim-khiⁿ kiù i ê sìⁿ-miā tò-tńg, Hō͘ i tit-tio̍h o̍ah-miā ê kng chiò i.

31

Iok-pek ah, lí tio̍h àⁿ hī-khang thiaⁿ góa ê ōe, Tio̍h chēng-chēng, góa chiū beh kóng.

32

Lí nā ū ōe thang kóng, chiū ìn góa; Chòe lí kóng, in-ūi góa ài lia̍h lí chòe gī.

33

Nā bô, lí tio̍h thiaⁿ góa kóng, lí tio̍h chēng-chēng, Góa beh kà lí tì-hūi.