Iok-pek-kì 第 34 章 - 巴克禮全羅

1

Í-lī-hō͘ koh ìn kóng,

2

Lín ū tì-hūi ê lâng, tio̍h thiaⁿ góa ê ōe, Ū tì-sek-ê lâng tio̍h àⁿ hī-khang thiaⁿ góa.

3

In-ūi hī-á chhì-giām ōe, Chhin-chhiūⁿ chiūⁿ-kiuⁿ hun-piat chu-bī.

4

Lán tio̍h ūi ka-kī kéng hit ê ha̍p-gî--ê, Iā tio̍h saⁿ-kap chai sím-mı̍h sī hó.

5

In-ūi Iok-pek ū kóng, Góa sī kong-gī, Siōng-tè to̍at góa ê chèng-lí;

6

Góa sui-jiân ū lí, iáu sǹg chòe kóng pe̍h-chha̍t--ê; Góa sui-jiân bô kè-sit, só͘ siū ê siong bōe-i--tit.

7

Chī-chūi chhin-chhiūⁿ Iok-pek móa-chhùi bú-bān, Chhin-chhiūⁿ lim chúi ah?

8

I kap chok-gia̍t--ê chòe-phōaⁿ lâi-óng, Kap pháiⁿ-lâng saⁿ-kap kiâⁿ.

9

In-ūi i bat kóng, Lâng hoaⁿ-hí Siōng-tè, Lóng sī bô lī-ek.

10

Só͘-í lín bêng-lí ê lâng, tio̍h thiaⁿ góa ê ōe. Siōng-tè tòan-tòan bōe kiâⁿ pháiⁿ, Chôan-lêng--ê tòan-tòan bōe kiâⁿ put-gī.

11

In-ūi I beh chiàu lâng só͘-chòe-ê lâi pò-èng i, Chiàu lâng só͘-kiâⁿ--ê lâi hō͘ i tú-tio̍h.

12

Siōng-tè sı̍t-chāi bōe chòe pháiⁿ; Chôan-lêng--ê iā bô phian-su lâi sím-phòaⁿ.

13

Chī-chūi ēng tōe thok-tiōng I ah? Chī-chūi an-tiāⁿ chôan sè-kài ah?

14

I nā choan-sim kò͘ ka-kī, Chiong I ê sîn kap khì siu-hôe kui ka-kī,

15

Kìⁿ-nā ū jio̍k-thé--ê beh chòe chı̍t-ē sí, Lâng iû-gôan beh kui thó͘.

16

Lí nā bêng-lí, chiū tio̍h thiaⁿ chit-ê, Àⁿ hī-khang thiaⁿ góa kóng-ōe ê siaⁿ.

17

Òan-hūn kong-pêng--ê kiám ōe chiáng-kôan mah? Hit-ê ū kong-gī--ê, ū kôan-lêng--ê, lí kiám ōe tēng I ū-chōe mah?

18

I tùi kun-ông kóng, Lí sī bô hē-lo̍h--ê; Tùi kùi-cho̍k kóng, Lí sī siâ-ok--ê.

19

I bô phian-su khóan-thāi ū chiok-ūi-ê, Iā bô khi-pîn tiōng-hù, In-ūi lóng sī I ê chhiú só͘ chō ê.

20

Tiap-á-kú ê tiong-kan, pòaⁿ-mî ê sî, in chiū sí-bô; Peh-sìⁿ siū iô-choah, teh kè--khì; Ióng-béng--ê siū tû-bia̍t m̄-bián ēng chhiú.

21

In-ūi I ê ba̍k-chiu kàm-chhat ta̍k lâng ê lō͘, Khòaⁿ-bêng i ê kha-pō͘.

22

Bô ū o͘-àm, bô ū sí-ìm, Thang hō͘ kiâⁿ-pháiⁿ ê lâng khì bih.

23

In-ūi I bô kā lâng tiāⁿ-tio̍h sî-kî, Hō͘ lâng thang kàu I ê bīn-chêng siū sím-phòaⁿ.

24

I phah-chhùi kiông-béng ê lâng, m̄-bián chhâ-mn̄g, Siat-lı̍p pa̍t-lâng lâi thòe in.

25

In-ūi I kàm-chhat in ê só͘-chòe; Tī mî--sî chhia-tó in, in chiū bia̍t-bô.

26

Tī chèng-lâng teh khòaⁿ ê só͘-chāi I phah in, Chhin-chhiūⁿ phah chòe-pháiⁿ ê lâng chı̍t-iūⁿ.

27

In-ūi in kiâⁿ phian-chho̍ah bô tè I, Iā lóng bô tì-ì I ê lō͘.

28

Tì-kàu hō͘ sòng-hiong lâng âu-kiò ê siaⁿ thàu-kàu I bīn-chêng, I iā thiaⁿ-kìⁿ khùn-khó͘ ê lâng ê âu-kiò.

29

I hō͘ lâng an-chēng, chī-chūi ōe hiâm I m̄-tio̍h ah? I ng-bīn, chī-chūi khòaⁿ I ōe tio̍h ah? I khóan-thāi chı̍t-kok á-sī chı̍t-lâng lóng sī án-ni;

30

Bián-tit bô kèng-khiân ê lâng chòe ông, Bián-tit ū lâng lóng-lo̍k peh-sìⁿ.

31

Kiám ū lâng bat tùi Siōng-tè kóng, Góa í-keng siū chek-ho̍at, bô koh hōan-chōe ah?

32

Góa só͘ bô khòaⁿ-kìⁿ--ê, kiû Lí chí-sī góa, Góa nā bat chòe pháiⁿ, góa bô beh koh chòe i.

33

Kiám sī I só͘ pò-èng, bô chiàu lí ê ì-sù, lí chiah the-sî m̄-siū mah? Taⁿ tio̍h kéng--ê, sī lí, m̄-sī góa; lí só͘ chai-ê chòe lí kóng.

34

Bêng-lí ê lâng, kap thiaⁿ góa ê ōe ê tì-hūi lâng, Beh tùi góa kóng;

35

Iok-pek só͘ kóng-ê bô tì-sek, I ê ōe bô tì-hūi.

36

Gōan Iok-pek siū chhì-giām kàu thàu-tóe, In-ūi i ê ìn-tap chhin-chhiūⁿ pháiⁿ lâng.

37

In-ūi i tī i ê chōe koh ke-thiⁿ pōe-ge̍k; I tī lán tiong-kan phah-chhiú; Koh ēng chōe-chōe ōe hóan-tùi Siōng-tè.