Iok-pek-kì 第 35 章 - 巴克禮全羅

1

Í-lī-hō͘ koh ìn kóng,

2

Lí lia̍h chit-ê chòe ū ha̍p-lí, Lí kóng, Góa ê gī iâⁿ-kè Siōng-tè ê gī ah,

3

Lí kéng-jiân kóng, Che ū sím-mı̍h lī-ek lí? Iū-koh, Góa ū sím-mı̍h lī-ek khah-iâⁿ góa bat khì hōan-chōe?

4

Góa beh ìn lí, Í-kı̍p óa-lí ê tâng-phōaⁿ.

5

Lí tio̍h kia̍h-ba̍k khòaⁿ thiⁿ, Khòaⁿ hit ê kiong-chhong, sī pí lí khah-kôaiⁿ.

6

Lí nā hōan-chōe, ōe hāi-tio̍h I sím-mı̍h? Lí ê kè-sit nā ke-thiⁿ, ōe gāi-tio̍h I sím-mı̍h ah?

7

Lí nā kiâⁿ-gī, ū sím-mı̍h hō͘ I ah? Á-sī I tùi lí ê chhiú ū tit-tio̍h sím-mı̍h ah?

8

Lí ê pháiⁿ koan-hē lí tâng-lūi ê lâng, Lí ê gī iā koan-hē sè-kan lâng.

9

Lâng in-ūi siū chōe-chōe pō-gio̍k chiū âu-kiò, In-ūi siū kiông ê lâng ê ap-chè, chiū háu-kiù.

10

Chóng-sī bô lâng kóng, Chhòng-chō góa ê Siōng-tè tī toh-lo̍h? I sī hō͘ lâng mî--sî chhiùⁿ-koa--ê.

11

I sī kà-sī lán iâⁿ-kè tōe-chiūⁿ ê cháu-siù, Hō͘ lán ū tì-hūi, iâⁿ-kè tī khong-tiong ê pe-chiáu ê.

12

In tī-hia âu-kiò, chóng-sī bô ū ìn-tap ê, In-ūi pháiⁿ-lâng kiau-ngō͘ ê iân-kò͘.

13

Hu-kè-ê, Siōng-tè bô beh thiaⁿ, Chôan-lêng--ê iā m̄ khòaⁿ-kò͘ i.

14

Hô-hòng lí kóng, lí bô khòaⁿ-kìⁿ I; Chit ê àn-kiāⁿ tī I ê bīn-chêng, lí tio̍h chhiáⁿ thèng-hāu I ah!

15

Chóng-sī taⁿ in-ūi I bô siū-khì lâi chek-ho̍at, Iā bô put-chí chù-ì bú-bān;

16

Só͘-í Iok-pek khui-chhùi lóng hu-ké, Kóng chōe-chōe bû-ti ê ōe.