Iok-pek-kì 第 36 章 - 巴克禮全羅

1

Í-lī-hō͘ koh sòa-chiap kóng,

2

Lí koh iông-ún góa tiap-á-kú, góa chiū beh chí-sī lí, In-ūi iáu ū ōe beh ūi-tio̍h Siōng-tè lâi kóng.

3

Góa beh tùi hn̄g-hn̄g chhú góa ê tì-sek, Ēng gī kui hō͘ chhòng-chō góa--ê.

4

In-ūi góa ê ōe sı̍t-chāi bô pe̍h-chha̍t, Ū tì-sek chiâu-pī--ê kap lí tī-teh.

5

Khòaⁿ ah, Siōng-tè tōa kôan-lêng lóng bô biáu-sī lâng; I ê sim-su lêng-le̍k chin-tōa.

6

I bô pó-hō͘ pháiⁿ-lâng ê sìⁿ-miā, Sī hō͘ khó͘-lān--ê tit-tio̍h kong-pêng.

7

I ê ba̍k-chiu bô lī-khui gī-lâng; Hō͘ in kap kun-ông saⁿ-kap chē-ūi kàu éng-óan; In chiū tit-tio̍h seng-kôaiⁿ.

8

In nā hō͘ só-liān pa̍k-teh, Hō͘ khó͘-lān ê soh liù-tio̍h;

9

I chiū chí-sī in chai in ê só͘-chòe, Í-kı̍p in só͘ hōan ê tāng-chōe.

10

I iā khui in ê hī-khang lâi siū kà-sī, Hoan-hù in o̍at-tńg-lâi, lī-khui chōe-ok.

11

In nā thiaⁿ-thàn lâi ho̍k-sāi, Chiū beh heng-thong kè-jı̍t, Le̍k-nî an-lo̍k.

12

Nā m̄ thiaⁿ-thàn, chiū beh hō͘ to-kiàm thâi, Gōng-gōng lâi sí.

13

Hiah-ê sim bô kèng-khiân ê lâng chek-chū siū-khì, I khún-pa̍k in ê sî, in iā bô háu-kiù.

14

I beh tī siàu-liân ê sî sí, In ê sìⁿ-miā sòng-sit chhin-chhiūⁿ pháiⁿ gín-ná chı̍t-iūⁿ.

15

I ēng khùn-khó͘ lâi kiù khùn-khó͘ ê lâng, Ēng pō-gio̍k lâi khui in ê hī-khang.

16

I ín-chhōa lí chhut gûi-kip, Jı̍p tī khoan-khoah bô o̍eh-to̍eh ê tōe; Pâi tī lí ê toh-téng--ê sī ū iû-jī móa-móa ê.

17

Lí chhiong-móa pháiⁿ-lâng ê gí-gī, Chiū gí-gī kap phòaⁿ-tòan beh lia̍h lí.

18

M̄-thang iông-ún siū-khì kek-tōng lí, tì-kàu lí bú-bān; Iā m̄-thang in-ūi sio̍k-hôe ê kè-chîⁿ tōa, lâi kiâⁿ phian.

19

Lí ê chîⁿ-châi, á-sī lí it-chhè ê sè-le̍k, Kiám ū hāu-giām, hō͘ lí bô tú-tio̍h hōan-lān mah?

20

Bo̍h-tit him-bō͘ hit ê àm-mî, Chiū-sī peh-sìⁿ tī in ê só͘-chāi tú-tio̍h tû-bia̍t ê sî.

21

Lí tio̍h kín-sīn, m̄-thang ì-hiòng chōe-ok; In-ūi lí kéng chit-ê, iâⁿ-kè khó͘-lān.

22

Khòaⁿ ah, Siōng-tè ēng I ê lêng-le̍k lâi kiâⁿ tōa-sū; Chī-chūi chòe kàu-su chhin-chhiūⁿ I ah?

23

Chī-chūi ōe tiāⁿ-tio̍h I ê lō͘? Chī-chūi ōe kóng, Lí ū kiâⁿ put-gī?

24

Lí tio̍h kì-tit o-ló I só͘ kiâⁿ--ê chòe-tōa, Chiū-sī lâng só͘ chhiùⁿ-koa ê.

25

Lâng lóng khòaⁿ-kìⁿ i; Lâng tùi hn̄g-hn̄g khòaⁿ-kìⁿ i.

26

Khòaⁿ ah, Siōng-tè chì-tōa, lán m̄-bat I; I ê nî ê gia̍h bōe-sǹg-tit.

27

In-ūi I khip-ín chı̍t-tih chı̍t-tih ê chúi, Chiū tùi i ê sip-khì piàn-chiâⁿ hō͘;

28

Chiū-sī thiⁿ só͘ lo̍h ê, Lâi ak chèng-lâng.

29

Chī-chūi ōe bêng-pe̍k hûn cháiⁿ-iūⁿ thí-khui, Kap I hêng-kiong khū-khū-háu ê siaⁿ?

30

Khòaⁿ ah, I hoat-chhut I ê kng tī hit téng-bīn; I koh jia-khàm hái ê tóe.

31

In-ūi I ēng chiah-ê sím-phòaⁿ peh-sìⁿ; Koh siúⁿ-sù hong-sēng ê bí-niû.

32

I ēng tiān-kng jia-chhiú, Bēng-lēng i phah-tio̍h tùi-te̍k.

33

I ê siaⁿ sī piáu-bêng I; Iā ēng só͘ beh khí ê tōa hong-hō͘ chí-sī cheng-siⁿ.