Iok-pek-kì 第 38 章 - 巴克禮全羅

1

Hit-sî Iâ-hô-hoa tùi tōa-hong ê tiong-kan ìn Iok-pek kóng,

2

Taⁿ chı̍t-ê ēng bû-ti ê ōe, hō͘ só͘ gī-lūn-ê bô bêng, Sī chī-chūi ah?

3

Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí ìn Góa.

4

Góa hē tōe ê tōe-ki, hit-sî lí tī toh-lo̍h? Lí nā chai-iáⁿ chiū kóng i.

5

Chī-chūi tiāⁿ-tio̍h i ê chhùn-chhioh, Chī-chūi khan chîn-soh tī i ê téng-bīn, lí chai mah?

6

I ê tōe-ki chhāi tī sím-mı̍h ê téng-bīn? Á-sī i kak-thâu ê chio̍h, chī-chūi an-tì ah?

7

Tng hit-sî thiⁿ-kng-chá ê chhiⁿ saⁿ-kap chhiùⁿ-koa; Siōng-tè ê chèng-kiáⁿ iā lóng chhut hoaⁿ-hí ê siaⁿ.

8

Tōa-hái chhiong-chhut, chhin-chhiūⁿ tùi thai--nih chhut-lâi, Hit-sî chī-chūi ēng mn̂g koaiⁿ-i?

9

Hit-sî Góa ēng hûn chòe i ê saⁿ, Ēng o͘-àm chòe pò͘ pau i;

10

Kā i tiāⁿ-tio̍h Góa só͘ lı̍p ê kài-hān, Koh kā i siat mn̂g-kông kap mn̂g.

11

Kóng, Lí thang kàu chia, m̄-thang pôaⁿ-kè, Lí kiau-ngō͘ ê éng kàu chia ûi-chí.

12

Tùi lí chhut-sì ê jı̍t í-lâi, lí bat bēng-lēng chá-khí sî, Hō͘ thiⁿ-kng-chá chai i ê só͘-chāi;

13

Hō͘ i khiú tōe ê sì-ke̍k, Chiong pháiⁿ-lâng pōaⁿ--chhut-khì?

14

I chiū piàn-ōaⁿ chhin-chhiūⁿ kè-ìn ê thô͘, In chhut-hiān chhin-chhiūⁿ i-ho̍k.

15

Pháiⁿ-lâng só͘ sǹg-chòe in ê kng, taⁿ tùi in siu tò-tńg, Kia̍h-kôaiⁿ ê chhiú beh at-chı̍h.

16

Lí bat jı̍p hái ê chúi-gôan mah? Á-sī bat kiâⁿ tī chhim-ian pì-bı̍t ê só͘-chāi mah?

17

Sí-bô ê mn̂g ū kā lí khui mah? Sí-ìm ê mn̂g, lí bat khòaⁿ-kìⁿ mah?

18

Tōe ê khoah-tōa, lí ū khòaⁿ-thàu bô? Lí nā it-chīn chai, chòe lí kóng.

19

Kng-bêng khiā-khí ê só͘-chāi, hit tiâu lō͘ tùi toh-lo̍h khì, Koh o͘-àm ê só͘-chāi tī toh-lo̍h;

20

Thang hō͘ lí chhōa i tò-khì i ê kéng-kài? Lí ōe chai-iáⁿ thàu kàu i ê chhù ê lō͘ mah?

21

Lí chai--lah, in-ūi hit-sî lí í-keng chhut-sì, Lí nî-hè ê siàu-gia̍h iā chōe.

22

Lí bat jı̍p seh ê khò͘-pâng, Á-sī khòaⁿ-kìⁿ pha̍uh ê hú-khò͘,

23

Chiū-sī Góa só͘ siu-khǹg lâi thèng-hāu hōan-lān ê kî, Thèng-hāu saⁿ-thâi kau-chiàn ê jı̍t mah?

24

Kng tùi sím-mı̍h lō͘ pun-khui? Tang-hong tùi sím-mı̍h lō͘ sì-kòe chhe tī tōe-chiūⁿ?

25

Chī-chūi kā tōa hō͘-chúi khui lō͘; Á-sī pī-pān lûi-tiān ê lō͘;

26

Lâi lo̍h-hō͘ tī bô lâng ê tōe, Tī bô lâng khiā-khí ê khòng-iá;

27

Hō͘ pha-hng hong-hòe ê tōe tit-tio̍h kàu-gia̍h, Hō͘ chhiⁿ-chháu hoat-siⁿ.

28

Hō͘-chúi ū lāu-pē mah? Lō͘-chúi chı̍t-tiám chı̍t-tiám, chī-chūi siⁿ-ê ah?

29

Peng tùi sím-mı̍h ê thai chhut? Thiⁿ ê sng, sī chī-chūi siⁿ-ê ah?

30

Chiah ê chúi kian-tēng chhin-chhiūⁿ chio̍h-thâu, Chhim-ian ê bīn kiat kui-tè.

31

Báu-chhiⁿ kui-chhok, sī lí pa̍k-ê mah? Chham-chhiⁿ ê tòa sī lí tháu-ê mah?

32

Lí hō͘ cha̍p-jī kiong chiàu i ê sî-hāu chhut lâi? Iā chhōa pak-táu kap i só͘ sio̍k ê chhiⁿ mah?

33

Lí chai thiⁿ ê tēng-lē mah? Á-sī siat i ê kôan kóan-hat tōe mah?

34

Lí ōe chhut-siaⁿ kiò hûn, Hō͘ hō͘-chúi chōe-chōe jia-khàm lí mah?

35

Lí ōe hoat-chhut sih-nà, in chiū khì, tùi lí kóng, Góan tī-chia.

36

Chī-chūi ēng tì-hūi hē tī lāi-bīn? Chī-chūi siúⁿ-sù chhang-miâ tī sim-lāi?

37

Chī-chūi ōe ēng tì-hūi sǹg hûn ê siàu-gia̍h? Chī-chūi ōe piàⁿ thiⁿ ê phûn;

38

Hit-sî tîn-ai chiâⁿ-chòe thô͘-bê, Thô͘ chiū kiat kui-thn̂g?

39

Lí ū kā bú ê sai la̍k-tio̍h chia̍h-mı̍h? Hō͘ sai-á-thûn chia̍h-pá mah?

40

Chiū-sī i tī hia̍t-lāi thìⁿ-kha, Tī ún-ba̍t ê só͘-chāi bih-teh ê sî.

41

Ou-a-kiáⁿ ǹg Siōng-tè ai-kiû; Bô thang chia̍h pe-lâi pe-khì ê sî, Chī-chūi ūi o͘-a pī-pān chia̍h-mı̍h ah?