Iok-pek-kì 第 42 章 - 巴克禮全羅

1

Iok-pek ìn Iâ-hô-hoa kóng,

2

Góa chai Lí bān-sū lóng ōe. Lí ê chí-ì lóng bōe chó͘-tòng--tit.

3

Chit-ê bû-ti lâi khàm-ba̍t só͘ gī-lūn ê, sī chī-chūi ah? Só͘-í góa ū kóng-chhut góa só͘ bô bêng--ê, Chiū-sī góa só͘ siūⁿ-bōe-chhut ê kî-biāu, góa só͘ m̄-chai.

4

Kiû Lí thiaⁿ, góa beh kóng, Góa mn̄g Lí, Lí ìn góa.

5

Góa chêng hī-khang thiaⁿ-kìⁿ Lí, Taⁿ góa ê ba̍k-chiu khòaⁿ-kìⁿ Lí;

6

Só͘-í góa ka-kī iàm-ò͘ⁿ, Tī tîn-ai kap hé-hu ê tiong-kan hóan-hóe.

7

Iâ-hô-hoa tùi Iok-pek kóng chiah ê ōe í-āu, Iâ-hô-hoa chiū tùi Thê-bān lâng Í-lī-hoat kóng, Góa ê siū-khì tùi lí kap lí nn̄g ê pêng-iú hoat--khí-lâi, in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Iok-pek só͘ kóng ê.

8

Taⁿ lín tio̍h ūi pún-sin chhú chhit chiah gû-káng, chhit chiah iûⁿ-káng, kàu Góa ê lô͘-po̍k Iok-pek hia, ūi pún-sin hiàn sio-chè; Góa ê lô͘-po̍k Iok-pek beh thòe lín kî-tó; in-ūi Góa beh chiap-la̍p i, bián-tit Góa chiàu lín ê gû-gōng lâi khóan-thāi lín; in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Iok-pek só͘ kóng ê.

9

Tùi án-ni Thê-bān lâng Í-lī-hoat, Su-a lâng Pí-le̍k-ta̍t, Ná-má lâng Só-hoat, chiàu Iâ-hô-hoa só͘ bēng-lēng in-ê khì-kiâⁿ; Iâ-hô-hoa iā chiap-la̍p Iok-pek.

10

Iok-pek thòe i ê pêng-iú kî-tó ê sî, Iâ-hô-hoa chiū hō͘ i ê kéng-hóng ho̍k-gôan; koh Iâ-hô-hoa siúⁿ-sù Iok-pek pí í-chêng só͘-ū-ê ka-pē.

11

Hit-sî i ê chèng hiaⁿ-tī, chí-bē, kap í-chêng saⁿ-bat ê lâng lóng lâi kìⁿ i, tī i ê chhù saⁿ-kap chia̍h, ūi-tio̍h Iâ-hô-hoa só͘ kàng-lo̍h tī i it-chhè ê chai-ē, lóng pi-siong lâi an-ùi i; ta̍k-lâng sàng i chı̍t-tè gûn, ta̍k-lâng sàng i chı̍t-ê kim-khôan.

12

Án-ni Iâ-hô-hoa sù-hok Iok-pek ê bé-kéng iâⁿ-kè i ê khí-thâu; i ū iûⁿ chı̍t-bān sì-chheng, lo̍k-tô la̍k chheng, gû chı̍t-chheng tùi, lû-bú chı̍t-chheng.

13

I iā ū chhit ê kiáⁿ, saⁿ ê cha-bó͘-kiáⁿ.

14

I kā tōa cha-bó͘-kiáⁿ miâ-kiò Iâ-bí-má, tē-jī-ê miâ-kiò Ki-sé-a, tē-saⁿ-ê miâ-kiò Ki-liân-hap-phok.

15

Thong hit só͘-chāi ê hū-lú, chhē bô chhin-chhiūⁿ Iok-pek ê cha-bó͘-kiáⁿ hiah--nih súi; in ê lāu-pē hō͘ in tī hiaⁿ-tī tiong tit-tio̍h sán-gia̍p.

16

Chit-tia̍p í-āu Iok-pek koh chia̍h chı̍t-pah sì-cha̍p hè, tit-tio̍h khòaⁿ-kìⁿ i ê kiáⁿ, i ê sun, kàu sì-tāi.

17

Án-ni Iok-pek nî-hè lāu, jı̍t-chí móa, chiū sí.