Iok-pek-kì 第 41 章 - 巴克禮全羅

1

Lí ōe ēng kau thoa go̍k-hî khí-lâi mah? Ōe ēng soh liù i ê chı̍h mah?

2

Lí ōe ēng soh kǹg i ê phīⁿ mah? Ōe ēng chhì chha̍k-thàu i ê gê-chô mah?

3

I beh ēng chōe-chōe ōe kiû lí mah? Tùi lí kóng un-jiû ê ōe mah?

4

I kiám beh kap lí lı̍p-iok, Hō͘ lí éng-óan lia̍h i chòe lô͘-po̍k mah?

5

Lí kiám ōe kap i thit-thô, chhin-chhiūⁿ chiáu-á mah? Lí ōe pa̍k--i, hō͘ lí siàu-liân ê lú-chú khan mah?

6

Kui-pang ê thó-hî lâng, kiám thang ēng i chòe bóe-bōe ê mı̍h? Á-sī ōe kā i pun-khui hō͘ seng-lí lâng?

7

Lí ōe ēng khau-liâm piàn-chha̍k i ê phê mah? Ōe ēng hî-chhe piàn-chhe i ê thâu-khak?

8

Lí ê chhiú hōaⁿ tī i ê téng-bīn; Kì-tit kap i kau-chiàn ê sū, chiū m̄-káⁿ koh án-ni chòe.

9

Khòaⁿ ah, lí siàu-siūⁿ i sī khang-khang; Chı̍t-ē khòaⁿ-kìⁿ i, kiám bōe sit-táⁿ mah?

10

Bô chı̍t-lâng hiah hó-táⁿ káⁿ jiá-tio̍h i; Án-ni, chī-chūi ōe khiā tī Góa ê bīn-chêng ah?

11

Chī-chūi tāi-seng hō͘ Góa, hō͘ Góa tio̍h pò-tap i? Thong thiⁿ-ē lóng sī Góa-ê.

12

Lūn-kàu go̍k-hî ê chi-thé, kap i ê tōa-la̍t, Í-kı̍p i súi ê kut-keh, Góa bōe-ōe bô kóng.

13

Chī-chūi ōe pak i ê gōa-saⁿ? Chī-chūi ōe jı̍p i téng-ē ham ê tiong-kan?

14

Chī-chūi ōe khui i ê chhùi? I ê chhùi-khí sì-ûi lóng sī thang kiaⁿ ê.

15

I só͘ khoa-kháu--ê sī i ióng ê lân. Ha̍p-óa chiū chhin-chhiūⁿ hong ba̍t-ba̍t,

16

Chı̍t-ê chı̍t-ê saⁿ-liân, Kàu khì bōe-ōe thàu-jı̍p hí(**hit) tiong-kan.

17

Lóng saⁿ liân-lo̍k, Liâm chòe chı̍t-ê, bōe saⁿ pun-khui.

18

I phah-ka-chhiùⁿ, chiū hoat-chhut kng; I ê ba̍k-chiu chhin-chhiūⁿ chá-khí-sî ê ba̍k-chiu-phê.

19

Tùi i ê chhùi hoat-chhut to̍h ê hé-pé, Kap pe--chhut-lâi ê hé-chhiⁿ.

20

Tùi i ê phīⁿ chhut-ian, Chhin-chhiūⁿ hiâⁿ lô͘-úi ê tiáⁿ teh kún.

21

I ê khì hō͘ hé-thòaⁿ to̍h, Ū hé-iām tùi i ê chhùi chhut.

22

I ê ām-kún ū khùi-la̍t siông-siông tī-hia, Kiaⁿ-hiâⁿ tī i ê bīn-chêng tiô-thiàu.

23

I ām-kui ê bah saⁿ liân-lo̍k, Kha̍h-tiâu i ê seng-khu, bōe-ōe iô-tāng.

24

I ê sim tēng chhin-chhiūⁿ chio̍h-thâu, Chhin-chhiūⁿ ē-tún ê bō-chio̍h hiah-tēng.

25

I chı̍t-ē khí-lâi, ióng-sū lóng kiaⁿ-hiâⁿ, Kiaⁿ kàu sit-sîn.

26

Lâng nā ēng kiàm, ēng khau-liâm, ēng pio, ēng chiam-chhiuⁿ, Chha̍k i lóng bōe jı̍p.

27

I khòaⁿ thih chòe ta-chháu, Khòaⁿ tâng chòe po͘ ê chhâ.

28

Keng-chìⁿ bōe-ōe hō͘ i tô-cháu; Ēng soh hìⁿ chio̍h, i chún-chòe tiū-chháu.

29

Thûi-á i sǹg chòe tiū-chháu; Lâng bú-lāng chhiuⁿ, i chiū thí-chhiò.

30

I ê pak-tó͘-ē chhin-chhiūⁿ lāi ê chhù-hiā-phè; I chhin-chhiūⁿ thih-pē thoa-kè thô͘.

31

I hō͘ chhim-ian kún chhin-chhiūⁿ tiáⁿ; Hō͘ hái chhin-chhiūⁿ tiau-hô iû ê poah.

32

I hō͘ i āu-bīn ê lō͘ hoat-kng; Hō͘ lâng phah-sǹg chhim-ian sī pe̍h-thâu-mn̂g.

33

Chôan-tōe bô chı̍t-ê ōe pí-tit i; I siū-chō chòe bô kiaⁿ-hiâⁿ-ê.

34

Kìⁿ-nā kôaiⁿ-tōa--ê i khòaⁿ-khin i; I tī it-chhè kiau-ngō͘ ê cho̍k-lūi chòe-ông.