Iok-pek-kì 第 40 章 - 巴克禮全羅

1

Iâ-hô-hoa koh ìn Iok-pek kóng,

2

Hò͘ⁿ-piān-ê, kiám thang kap Chôan-lêng--ê piān-lūn mah? Piān-pok Siōng-tè ê, taⁿ tio̍h ìn i.

3

Iok-pek chiū ìn Iâ-hô-hoa kóng,

4

Khòaⁿ ah, góa sī bî-sòe, góa beh ēng sím-mı̍h ìn-tap Lí? Góa ēng chhiú ng góa ê chhùi.

5

Góa í-keng kóng chı̍t-pái, taⁿ bô beh ìn; Kóng nn̄g-pái, iā bô koh kóng.

6

Iâ-hô-hoa chiū tùi tōa-hong ê tiong-kan ìn Iok-pek kóng,

7

Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí tio̍h ìn Góa.

8

Lí beh hòe-bô Góa ê kong-pêng mah? Lí beh gí-tiāⁿ Góa ū chōe, lâi hián-bêng ka-kī chòe-gī mah?

9

Lí ū chhin-chhiūⁿ Siōng-tè hit-hō ê chhiú-kut mah? Lí ōe chhut-siaⁿ khí-lûi, chhin-chhiūⁿ I mah?

10

Taⁿ lí thang ēng chun-kùi ui-giâm chòe chng-thāⁿ, Ēng êng-kng bí-biāu chòe i-ho̍k.

11

Tio̍h piàⁿ-chhut lí móa-móa ê siū-khì; Khòaⁿ it-chhè kiau-ngō͘ ê lâng, hō͘ i kàng-kē.

12

Khòaⁿ it-chhè kiau-ngō͘ ê lâng, ah-chhı̍h hō͘ i kē, Ta̍h pháiⁿ-lâng tī in só͘ khiā ê tōe.

13

Kā in chòe chı̍t-ē khǹg tī thô͘-hún; Pau-ba̍t in ê bīn tī o͘-àm ba̍t ê só͘-chāi.

14

Án-ni Góa chiū sêng-jīn lí; Chin-chiàⁿ lí ê chiàⁿ-chhiú ōe kiù lí.

15

Taⁿ lí khòaⁿ hô-bé, Góa chō lí, iā chō i; I chia̍h-chháu chhin-chhiūⁿ gû.

16

Khòaⁿ ah, i ê khùi-la̍t chāi-tī i ê io, I ê lêng-le̍k tī i pak-tó͘ ê ki-bah.

17

I iô-bé chhin-chhiūⁿ pek-hiuⁿ-chhiū; I tōa-thúi ê kun saⁿ liân-lo̍k;

18

I ê kut-thâu chhin-chhiūⁿ tâng-kńg, I ê chi-thé chhin-chhiūⁿ thih-tiâu.

19

I sī Siōng-tè chiah ê kang ê tē-it; Chhòng-chō i--ê ōe ēng to chhin-kūn i.

20

Chiah ê soaⁿ sı̍t-chāi kā i chhut chia̍h-mı̍h, Chhân-iá ê pah-siù iā thit-thô tī-hia.

21

I tó tī liân-hoe-hio̍h kha, Khùn tī kui-phō lô͘-tek ê ìm-ńg-ē, kap chúi-khut-lāi.

22

Liân-hoe-hio̍h ê ìm-ńg jia-khàm i; Khoe-piⁿ ê liú-chhiū ûi-se̍h i.

23

Khòaⁿ ah, chiū nā hô-chúi hòan-lām, i iā bô kiaⁿ; Iok-tàn hô tiòng kàu i ê chhùi, i iā an-jiân.

24

Chī-chūi ōe tī i ba̍k-chiu kim-kim ê sî lia̍h-tio̍h i, Á-sī ēng o̍ah-khàu kǹg i ê phīⁿ ah?