Sū-su-kì 第 14 章 - 巴克禮全羅

1

Chham-sun lo̍h-khì Têng-ná, tī Têng-ná khòaⁿ-kìⁿ chı̍t ê cha-bó͘-gín-ná, chiū-sī Hui-lī-sū lâng ê cha-bó͘-kiáⁿ.

2

Chham-sun chiūⁿ-khì kā i lāu-pē lāu-bú kóng, Góa tī Têng-ná khòaⁿ-kìⁿ chı̍t ê cha-bó͘-gín-ná, sī Hui-lī-sū lâng ê cha-bó͘-kiáⁿ; gōan lín kā góa chhōa i lâi chòe-bó͘.

3

I ê lāu-pē i ê lāu-bú kā i kóng, Tī lí hiaⁿ-tī tiong ê cha-bó͘-gín-ná, á-sī tī lán peh-sìⁿ tiong, kiám bô chı̍t ê cha-bó͘-gín-ná, tì-kàu lí khì tī bô siū kat-lé ê Hui-lī-sū lâng tiong chhōa-bó͘ ah? Chham-sun kā i ê lāu-pē kóng, Gōan lí kā góa chhōa i; in-ūi i sī góa kah-ì ê.

4

Chóng-sī i ê lāu-pē i ê lāu-bú m̄-chai chit ê sū sī chhut tī Iâ-hô-hoa; in-ūi I chhē ki-hōe kong-kek Hui-lī-sū. Hit-sî Hui-lī-sū lâng kóan-hat Í-sek-lia̍t.

5

Chham-sun kap i ê pē-bú lo̍h-khì Têng-ná, kàu Têng-ná ê phû-tô-hn̂g; tú-tn̄g ū chı̍t chiah sai-á-thûn háu lâi óa i.

6

Iâ-hô-hoa ê Sîn tōa-tōa lîm-kàu Chham-sun, i ê chhiú bô ke-si, iā thiah-lı̍h i, chhin-chhiūⁿ thiah-lı̍h soaⁿ-iûⁿ-á chı̍t-iūⁿ; i iā bô kā i ê pē-bú kóng i só͘ kiâⁿ ê sū.

7

I lo̍h-khì kap cha-bó͘-gín-ná kóng ōe; i sī Chham-sun só͘ kah-ì ê.

8

Koh ū hiah-kú, tò-tńg beh lâi chhōa i, oat tùi lō͘-piⁿ beh khòaⁿ sí ê sai, khòaⁿ-kìⁿ ū chı̍t siū phang kap bı̍t tī sai ê sin-si-lāi;

9

chhiú the̍h bı̍t khì kiâⁿ, ná-kiâⁿ ná-chia̍h; kàu i ê pē-bú hia, chiū hō͘ in, in iā chia̍h; chóng-sī bô kā i kóng chit ê bı̍t sī tùi sai ê sin-si the̍h-lâi-ê.

10

I ê lāu-pē lo̍h-khì kàu cha-bó͘-gín-ná hia; Chham-sun tī-hia siat iân-sia̍h; in-ūi pêng-sò͘ siàu-liân lâng lóng ū chit hō ê hong-sio̍k.

11

In khòaⁿ-kìⁿ Chham-sun, chiū chhōa saⁿ-cha̍p ê phōaⁿ lâi pôe i.

12

Chham-sun kā in kóng, Góa taⁿ beh chhut chı̍t ê chhai hō͘ lín; lín tī iân-sia̍h ê chhit-jı̍t-lāi nā ōe chhai-chhut ì-sù lâi kā góa kóng, góa chiū beh hō͘ lín saⁿ-cha̍p niá ê iù-tōe saⁿ, saⁿ-cha̍p thò ê gōa-saⁿ;

13

lín nā bōe-ōe kā góa kóng, lín chiū tio̍h hō͘ góa saⁿ-cha̍p niá ê iù-tōe saⁿ, saⁿ-cha̍p thò ê gōa-saⁿ. In kóng, Chhiáⁿ chhut lí ê chhai hō͘ góan thiaⁿ.

14

I chiū kā in kóng, Tùi chia̍h-ê chhut chia̍h-mı̍h; Tùi kiông-ê chhut tiⁿ.In saⁿ-jı̍t kú chhai bōe chhut.

15

Kàu tē-chhit jı̍t, in kā Chham-sun ê bó͘ kóng, Lí tio̍h làu lí ê tiōng-hu, hō͘ i ēng chhai ê ì-sù kā góan kóng, bián-tit góan ēng hé sio lí kap lí ê lāu-pē ê chhù; lín chhiáⁿ góan lâi, sī beh chhiúⁿ góan á-m̄-sī?

16

Chham-sun ê bó͘ thî-khàu tī i ê bīn-chêng kóng, Lí sī òan-hūn góa, m̄-sī thiàⁿ góa; in-ūi lí chhut-chhai hō͘ góa pún-kok ê lâng, iā bô kā góa kóng-bêng. I ìn i kóng, Liân góa ê lāu-pē lāu-bú to͘ bô kā i kóng, kiám thang kā lí kóng mah?

17

Tī iân-sia̍h ê chhit-jı̍t-lāi, i thî-khàu tī i ê tiōng-hu ê bīn-chêng; kàu tē-chhit jı̍t chiū kā i kóng; in-ūi i pek i chin-thiám; i ê bó͘ chiū kā i pún-kok ê lâng kóng.

18

Kàu tē-chhit jı̍t, jı̍t iáu-bē lo̍h ê tāi-seng, siâⁿ-lāi ê peh-sìⁿ kā Chham-sun kóng, Ū sím-mı̍h pí bı̍t khah-tiⁿ ah? ū sím-mı̍h pí sai khah-kiông ah? Chham-sun kā in kóng, Lín nā m̄-sī ēng góa ê gû-chéng-á lôe-chhân, Góa ê chhai chiū chhai-bōe-chhut.

19

Iâ-hô-hoa ê Sîn tōa-tōa lîm-kàu Chham-sun, i chiū lo̍h-khì kàu A-sı̍t-ki-lûn, thâi-sí in tiong-kan saⁿ-cha̍p lâng, chhiúⁿ in, chiong hiah ê saⁿ hō͘ chhai-tio̍h ê lâng. Chham-sun tōa siū-khì, chiū chiūⁿ-khì in lāu-pē ê ke.

20

Chham-sun ê bó͘ chiū kè hō͘ i ê pôe-phōaⁿ, chiū-sī Chham-sun ēng chòe i ê pêng-iú ê.