Sū-su-kì 第 15 章 - 巴克禮全羅

1

Koh ū hiah-kú, kàu koah-be̍h ê sî, Chham-sun tòa chı̍t chiah soaⁿ-iûⁿ-á khì chhē i ê bó͘, kóng, Góa beh jı̍p pâng chhē góa ê bó͘; i ê tiūⁿ-lâng m̄-chún i jı̍p.

2

Tiūⁿ-lâng kóng, Góa àn-sǹg lí sı̍t-chāi òan-hūn i, in-ūi án-ni góa chiong i hō͘ lí ê pôe-phōaⁿ; i ê sió-bē kiám-m̄-sī pí i khah-súi mah? Chhiáⁿ lí chhōa lâi thòe i.

3

Chham-sun kā in kóng, Chit-pái góa siong-hāi Hui-lī-sū lâng, in bô thang chek-chōe góa.

4

Chham-sun chiū khì lia̍h saⁿ-pah chiah hô͘-lî, koh tòa hé-pé, chiong hô͘-lî bé nn̄g-chiah nn̄g-chiah pa̍k saⁿ-liâm, chiong hé-pé pa̍k tī nn̄g-ki bé ê tiong-kan;

5

hé-pé tiám-to̍h chiū pàng hô͘-lî jı̍p Hui-lī-sū lâng iáu-bē siu-koah ê gō͘-kak, sio i kui-khún--ê, kap i bē-koah ê gō͘-kak, í-kı̍p kaⁿ-ná-hn̂g, lóng sio-khì.

6

Hui-lī-sū lâng kóng, Chit ê sū chī-chūi chòe ê ah? In kóng, Sī Têng-ná lâng ê kiáⁿ-sài Chham-sun; in-ūi i ê tiūⁿ-lâng chiong i ê bó͘ hō͘ i ê pôe-phōaⁿ, Hui-lī-sū lâng chiū chiūⁿ-khì, ēng hé sio hū-jîn-lâng kap i ê lāu-pē.

7

Chham-sun tùi Hui-lī-sū lâng kóng, Lín kì-jiân kiâⁿ án-ni, góa beh tùi lín pò-siû, chiah beh soah.

8

Chham-sun chiū tōa-tōa phah-sí in, sin-si saⁿ-tha̍h; chiū lo̍h-khì tiàm tī Í-thán ê chio̍h-thâu-khang.

9

Hui-lī-sū lâng chiūⁿ-khì chat-iâⁿ tī Iû-tāi, hun-sòaⁿ tī Lī-hi.

10

Iû-tāi lâng kóng, Lín siáⁿ-sū chiūⁿ-lâi kong-kek góan ah? In kóng, Góan chiūⁿ-lâi sī beh khún-pa̍k Chham-sun; i khóan-thāi góan cháiⁿ-iūⁿ, góan iā beh án-ni khóan-thāi i.

11

Tùi án-ni Iû-tāi saⁿ-chheng lâng kàu Í-thán ê chio̍h-thâu-khang, tùi Chham-sun kóng, Hui-lī-sū lâng kóan-hat lán, lí m̄-chai mah? lí siáⁿ-sū chòe chit ê sū hō͘ góan ah? Ìn kóng, In cháiⁿ-iūⁿ khóan-thāi góa, góa iā án-ni khóan-thāi in.

12

Iû-tāi lâng kā i kóng, Góan lo̍h-lâi sī beh khún-pa̍k lí, chiong lí kau tī Hui-lī-sū lâng ê chhiú. Chham-sun kā in kóng, Lín tio̍h tùi góa chiù-chōa, lín pún-sin bô beh hāi góa.

13

In tùi i kóng, Bô, chí-ū beh khún-pa̍k lí kau tī in ê chhiú, góan tek-khak bô hāi-sí lí. Chiū ēng nn̄g tiâu sin ê soh khún-pa̍k i, tùi chio̍h-pôaⁿ tòa i chiūⁿ-khì.

14

Chham-sun kàu Lī-hi, Hui-lī-sū lâng tú-tio̍h chiū hoah. Iâ-hô-hoa ê Sîn tōa-tōa lîm-kàu i, i chhiú--nih ê soh chiū chhin-chhiūⁿ kè-hé sio ê môa, só͘ pa̍k i ê soh chiū tùi i ê chhiú lak--lo̍h-khì.

15

I khòaⁿ-kìⁿ lû chı̍t ki sin ê chhùi-phóe-kut, chiū chhun-chhiú khioh i, ēng lâi phah-sí chı̍t-chheng lâng.

16

Chham-sun kóng, Góa ēng lû ê chhùi-phóe-kut, phah-sí lâng chı̍t-tui chı̍t-tui, Góa ēng lû ê chhùi-phóe-kut phah-sí chı̍t-chheng lâng.

17

Kóng soah, chiū chiong chhiú--nih ê chhùi-phóe-kut hiat-ka̍k; hit só͘-chāi chiū kiò La̍h-bo̍at-lī-hi.

18

Chham-sun chhùi-ta kàu-ke̍k, chiū kiû-kiò Iâ-hô-hoa kóng, Lí kì-jiân ēng Lí ê lô͘-po̍k ê chhiú kiâⁿ chiah-tōa ê chín-kiù, chóng-bô góa taⁿ tio̍h chhùi-ta lâi sí, hām-lo̍h tī bô siū kat-lé ê lâng ê chhiú mah?

19

Siōng-tè chiū hō͘ Lī-hi lap-u ê só͘-chāi lı̍h-khui, ū chúi tùi-hia chhèng--chhut lâi, Chham-sun lim-liáu cheng-sîn ho̍k-tò, koh o̍ah-tāng; tùi án-ni hō hit ê chúi-chôaⁿ kiò Ún-hap-ko-lī; hit ê chúi-chôaⁿ kàu kin-á-jı̍t iáu tī Lī-hi.

20

Tng Hui-lī-sū lâng ê sî, Chham-sun chòe Í-sek-lia̍t ê sū-su jī-cha̍p nî.