Sū-su-kì 第 4 章 - 巴克禮全羅

1

Í-hut sí-liáu, Í-sek-lia̍t lâng koh kiâⁿ Iâ-hô-hoa só͘ khòaⁿ-chòe pháiⁿ ê sū.

2

Iâ-hô-hoa bōe in tī Ka-lâm ông Iâ-pin ê chhiú, chiū-sī tī Hā-só chòe-ông-ê; i ê kun-tiúⁿ sī Se-se-la̍h, i khiā-khí tī gōa-pang lâng ê Hā-lô-siat.

3

Iâ-pin ông ū thih-chhia káu-pah tiuⁿ; i tōa-tōa khi-ap Í-sek-lia̍t lâng jī-cha̍p nî; Í-sek-lia̍t lâng chiū kiû-kiò Iâ-hô-hoa.

4

Hit-sî ū chı̍t ê lú sian-ti miâ kiò Tí-pho-la̍h, sī La̍h-pí-to ê bó͘, i chòe Í-sek-lia̍t ê sū-su.

5

I khiā-khí tī Í-hoat-liân soaⁿ-tōe, La̍h-má kap Pek-te̍k-lī ê tiong-kan, tī Tí-pho-la̍h ê chó-chhiū-kha; Í-sek-lia̍t lâng lóng chiūⁿ-khì i hia, siū i phòaⁿ-tòan.

6

I chhe lâng kiò A-pí-lô-am ê kiáⁿ Pa-la̍h tùi Ná-hut-tha-lī ê Ki-te-su lâi, tùi i kóng, Iâ-hô-hoa Í-sek-lia̍t ê Siōng-tè kiám-m̄-sī bēng-lēng kóng, Lí tio̍h khì Tha-po̍k soaⁿ, chhōa Ná-hut-tha-lī kap Se-pò͘-lûn lâng chı̍t-bān kap lí khì?

7

Góa beh hō͘ Iâ-pin ê kun-tiúⁿ Se-se-la̍h kap i ê chhia, i ê chôan-kun, kàu Ki-sūn hô lí hia; Góa beh chiong i kau tī lí ê chhiú.

8

Pa-la̍h kā i kóng, Lí nā kap góa khì, góa chiū beh khì; lí nā m̄ kap góa khì, góa chiū m̄ khì.

9

I kóng, Góa tek-khak beh kap lí khì; chóng-sī lí tī só͘ kiâⁿ ê lō͘; bōe tit-tio̍h êng-hián; in-ūi Iâ-hô-hoa beh bōe Se-se-la̍h tī hū-jîn-lâng ê chhiú. Tí-pho-la̍h chiū khí-lâi, kap Pa-la̍h saⁿ-kap khì Ki-te-su.

10

Pa-la̍h chiū chio-chı̍p Se-pò͘-lûn lâng kap Ná-hut-tha-lī lâng kàu Ki-te-su; tè i chiūⁿ-khì-ê ū chı̍t-bān lâng. Tí-pho-la̍h iā kap i chiūⁿ-khì.

11

Ki-nî lâng Hi-pek bat lī-khui Ki-nî lâng, chiū-sī Mô͘-se ê gōa-chhek Hô-pa ê hō͘-è; chiū tah pò͘-pîⁿ tī Sat-ná-im ê siōng-chhiū-piⁿ, chiū-sī óa-kūn Ki-te-su ê.

12

Ū lâng kā Se-se-la̍h kóng, A-pí-lô-am ê kiáⁿ Pa-la̍h í-keng chiūⁿ-khì Tha-po̍k soaⁿ.

13

Se-se-la̍h chiū chū-chı̍p i lóng-chóng ê chhia, chiū-sī thih-chhia káu-pah tiuⁿ, kap tè i ê chôan-kun, tùi gōa-pang ê Hā-lô-siat, kàu Ki-sūn hô.

14

Tí-pho-la̍h tùi Pa-la̍h kóng, Khí-lâi, kin-á-jı̍t chiū-sī Iâ-hô-hoa chiong Se-se-la̍h kau tī lí ê chhiú ê jı̍t; Iâ-hô-hoa kiám bô tī lí ê thâu-chêng kiâⁿ mah? Tùi án-ni Pa-la̍h tùi Tha-po̍k soaⁿ lo̍h-lâi; tè i ê ū chı̍t-bān lâng.

15

Iâ-hô-hoa ēng to phah-lōan Se-se-la̍h kap i só͘ ū ê chhia, i ê chôan-kun, tī Pa-la̍h ê bīn-chêng; Se-se-la̍h lo̍h-chhia pō͘-kiâⁿ tô-cháu.

16

Chóng-sī Pa-la̍h tui-jip hiah ê chhia kap kun-tūi, kàu gōa-pang ê Hā-lô-siat; Se-se-la̍h ê chôan-kun lóng tó tī to-ē, bô lâu chı̍t ê lâng.

17

Chí-ū Se-se-la̍h pō͘-kiâⁿ tô-cháu, kàu Ki-nî lâng Hi-pek ê bó͘ Ngá-ek ê pò͘-pîⁿ; in-ūi Hā-só ông Iâ-pin kap Ki-nî lâng Hi-pek ê ke hô-hó.

18

Ngá-ek chhut-lâi ngiâ-chih Se-se-la̍h, kā i kóng, Góa ê chú ah, oat--jı̍p-lâi, chhiáⁿ lí oat-jı̍p góa chia, m̄-bián kiaⁿ; Se-se-la̍h chiū oat-jı̍p i ê pò͘-pîⁿ. Ngá-ek chiū ēng thán-á kā i kah--teh.

19

Se-se-la̍h kā i kóng, Góa chhùi-ta, chhiáⁿ lí ēng tām-po̍h chúi hō͘ góa lim; i chiū khui tóe lin ê phê-tē hō͘ i lim; iû-gôan kā i kah--teh.

20

Se-se-la̍h koh kā i kóng, Lí khiā tī pò͘-pîⁿ mn̂g, nā ū lâng lâi mn̄g lí kóng, Ū lâng tī lí chia bô? lí chiū kā i kóng, Bô.

21

Se-se-la̍h ià-siān khùn lo̍h-bîn; Hi-pek ê bó͘ Ngá-ek the̍h pò͘-pîⁿ ê teng, chhiú kia̍h thûi-á, liam-liam-á kiâⁿ kàu i hia, ēng teng tùi i ê pìn-piⁿ tèng-jı̍p, thàu-kè thô͘-kha; i chiū sí.

22

Hit-sî Pa-la̍h tui-jip Se-se-la̍h, Ngá-ek chhut-lâi ngiâ-chih i kā i kóng, Lâi ah, góa ēng lí só͘ chhē ê lâng hō͘ lí khòaⁿ; i chiū jı̍p-khì, khòaⁿ ah, Se-se-la̍h í-keng sí, tó-teh, teng iáu-kú tī i ê pìn-piⁿ.

23

Án-ni hí chı̍t-jı̍t, Siōng-tè hō͘ Ka-lâm ông Iâ-pin khut-ho̍k tī Í-sek-lia̍t lâng ê bīn-chêng.

24

Tùi án-ni Í-sek-lia̍t lâng it-hoat ū sè-le̍k, khah-iâⁿ Ka-lâm ông Iâ-pin, kàu it-chīn bia̍t Ka-lâm ông Iâ-pin.