Lī-bī-kì 第 15 章 - 巴克禮全羅

1

Iâ-hô-hoa hoan-hù Mô͘-se A-lûn kóng,

2

Lín tio̍h hoan-hù Í-sek-lia̍t lâng, kā in kóng, Lâng nā hōan-tio̍h hā-siau ê chèng, i in-ūi chit ê hā-siau ê chèng chiū bô chheng-khì.

3

I in-ūi hā-siau ê bô chheng-khì sī chit-khóan; bô-lūn sī tūi-cheng, á-sī se̍k-lîm, lóng sī bô chheng-khì.

4

Kìⁿ-nā hōan-tio̍h hā-siau ê, i só͘ tó ê chhn̂g, lóng sī bô chheng-khì; i só͘ chē ê mı̍h, iā-sī bô chheng-khì.

5

Kìⁿ-nā bong-tio̍h i ê chhn̂g ê, tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

6

Hit ê chē-tio̍h hā-siau ê lâng só͘ bat chē ê mı̍h ê, tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

7

Hit ê bong-tio̍h hā-siau ê lâng ê seng-khu ê, tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

8

Nā hā-siau ê lâng phùi-nōa tī chheng-khì ê lâng ê seng-khu, hit-lâng tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

9

Hā-siau ê lâng só͘ khiâ ê bé-oaⁿ iā-sī bô chheng-khì.

10

I sin-ē só͘ óa-tio̍h ê mı̍h, kìⁿ-nā bong-tio̍h i tek-khak bô chheng-khì kàu ê-hng; the̍h-tio̍h hit ê mı̍h ê tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

11

Hā-siau ê lâng iáu-bē ēng chúi sóe-chhiú i só͘ bong-tio̍h ê lâng tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

12

Hā-siau ê lâng só͘ bong-tio̍h hûi ê khì-kū tio̍h kòng-phòa; chhâ ê khì-kū tio̍h ēng chúi sóe.

13

Hā-siau ê lâng i ê hā-siau í-keng hó, ūi-tio̍h beh chheng-khì ka-kī, tio̍h sǹg chhit-jı̍t, iā tio̍h sóe i ê saⁿ, ēng o̍ah-chúi sóe seng-khu, chiū tit-tio̍h chheng-khì.

14

Kàu tē-poeh jı̍t i tio̍h ūi-tio̍h ka-kī chhú nn̄g chiah ka-chui, á-sī nn̄g-chiah chíⁿ-á-kiáⁿ, kàu hōe-bō͘ mn̂g-kháu Iâ-hô-hoa ê bīn-chêng, kau-tài chè-si;

15

chè-si tio̍h hiàn i, chı̍t-chiah chòe sio̍k-chōe-chè, chı̍t-chiah chòe sio-chè; chè-si tio̍h in-ūi i ê hā-siau ê chèng tī Iâ-hô-hoa ê bīn-chêng kā i sio̍k-chōe.

16

Lâng nā bōng-ûi, tio̍h ēng chúi sóe seng-khu, tek-khak bô chheng-khì kàu ê-hng.

17

Bô-lūn saⁿ-á-khò͘, á-sī phê bak-tio̍h cheng tio̍h ēng chúi sóe, tek-khak bô chheng-khì kàu ê-hng.

18

Nā lâm-lú kau-ha̍p, nn̄g lâng tio̍h ēng chúi sóe, tek-khak bô chheng-khì kàu ê-hng.

19

Hū-jîn-lâng kiâⁿ-keng lâu-huih, tek-khak ù-òe kàu chhit-jı̍t kú; kìⁿ-nā bong-tio̍h i ê, tek-khak bô chheng-khì kàu ê-hng.

20

Tī i ù-òe ê sî-kan, kìⁿ-nā i só͘ tó ê mı̍h lóng sī bô chheng-khì; kìⁿ-nā i só͘ chē ê mı̍h, iā sī bô chheng-khì.

21

Kìⁿ-nā bong-tio̍h i ê bîn-chhn̂g ê, tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

22

Kìⁿ-nā bong-tio̍h i só͘ chē ê mı̍h ê, tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

23

Hit ê mı̍h nā sī tī chhn̂g-nı̍h á-sī tī hū-jîn-lâng só͘ chē ê mı̍h, bong-tio̍h i ê, tek-khak bô chheng-khì kàu ê-hng.

24

Ta-po͘-lâng nā kap hit ê hū-jîn-lâng tâng-pâng, hō͘ i ê lâ-sâm bak-tio̍h, tio̍h chhit-jı̍t kú bô chheng-khì, kìⁿ-nā i só͘ tó ê chhn̂g iā bô chheng-khì.

25

Hū-jîn-lâng nā tī keng-kî í-gōa hōan-tio̍h chōe-chōe jı̍t ê hiat-lāu, á-sī keng-kî í-āu ū hiat-lāu; i chiū in-ūi chit ê hiat-lāu bô chheng-khì ê jı̍t kap i keng-kî ê jı̍t chı̍t-iūⁿ; i sī bô chheng-khì.

26

Tī i hiat-lāu it-chhè ê jı̍t, kìⁿ-nā i só͘ tó ê chhn̂g i tio̍h khòaⁿ chhin-chhiūⁿ keng-kî ê chhn̂g chı̍t-iūⁿ; iā kìⁿ-nā i só͘ chē ê mı̍h tek-khak bô chheng-khì, kap i keng-kî ê sî bô chheng-khì chı̍t-iūⁿ.

27

Kìⁿ-nā bong-tio̍h hiah ê mı̍h-ê chiū bô chheng-khì; tio̍h sóe i ê saⁿ, ka-kī sóe tī chúi-nı̍h, bô chheng-khì kàu ê-hng.

28

Hū-jîn-lâng hiat-lāu nā í-keng hó, tio̍h ūi ka-kī sǹg chhit-jı̍t, jiân-āu chiah chheng-khì.

29

Kàu tē-poeh jı̍t, i tio̍h ūi ka-kī chhú nn̄g chiah ka-chui á-sī nn̄g chiah chíⁿ-á-kiáⁿ, tòa kàu hōe-bō͘ mn̂g-kháu, kau-tài chè-si.

30

Chè-si tio̍h hiàn chı̍t-chiah chòe sio̍k-chōe-chè, chı̍t-chiah chòe sio-chè; chè-si in-ūi hit-lâng hiat-lāu bô chheng-khì tio̍h tī Iâ-hô-hoa ê bīn-chêng ūi-tio̍h i sio̍k-chōe.

31

Lín tio̍h án-ni hō͘ Í-sek-lia̍t lâng kap in ê bô chheng-khì keh-tn̄g; bián-tit in phah lâ-sâm tī in tiong-kan Góa ê hōe-bō͘, tì-kàu sí tī in ê bô chheng-khì.

32

Che sī hōan-tio̍h hā-siau-chèng kap bōng-ûi tì-kàu i bô chheng-khì ê; kap hit-ê ū keng-kî ê pīⁿ ê hū-jîn-lâng, kap hōan-tio̍h hā-siau-ê, bô-lūn lâm-lú, í-kı̍p lâng kap bô chheng-khì ê hū-jîn-lâng tâng-pâng-ê ê kui-lē.