Lī-bī-kì 第 16 章 - 巴克禮全羅

1

A-lûn nn̄g ê kiáⁿ kūn-óa Iâ-hô-hoa ê bīn-chêng lâi sí; in sí-liáu Iâ-hô-hoa hoan-hù Mô͘-se, tùi Mô͘-se kóng,

2

Tio̍h kā lí ê hiaⁿ A-lûn kóng, m̄-thang sûi-piān-sî jı̍p sèng-só͘ ê tiùⁿ-lî-lāi, kàu iok-kūi-téng si-un-só͘ ê bīn-chêng, bián-tit sí; in-ūi Góa beh tī hûn-tiong hián-hiān tī si-un-só͘ ê téng-bīn.

3

A-lûn beh jı̍p sèng-só͘ tio̍h án-ni; tio̍h tòa chı̍t-chiah gû-káng-á-kiáⁿ chòe sio̍k-chōe-chè, chı̍t chiah mî-iûⁿ-káng chòe sio-chè.

4

I tio̍h chhēng iù-tōe-pò͘ sèng ê lāi-saⁿ, iā tio̍h chhēng iù-tōe-pò͘ ê khò͘ tī seng-khu-nı̍h, io hâ iù-tōe-pò͘ ê tòa, thâu tì iù-tōe-pò͘ ê bō; che lóng sī sèng ê i-ho̍k; i tio̍h ēng chúi sóe seng-khu, jiân-āu chhēng i.

5

I tio̍h tùi Í-sek-lia̍t lâng ê hōe-tiong chhú nn̄g chiah soaⁿ-iûⁿ-káng, chòe sio̍k-chōe-chè, chı̍t-chiah mî-iûⁿ-káng chòe sio-chè.

6

A-lûn tio̍h hiàn ūi pún-sin chòe sio̍k-chōe-chè ê gû-káng, ūi-tio̍h pún-sin kap i ê ke sio̍k-chōe.

7

Iā tio̍h ēng hit nn̄g chiah soaⁿ-iûⁿ-káng an-tì tī hōe-bō͘ mn̂g-kháu, Iâ-hô-hoa ê bīn-chêng.

8

A-lûn tio̍h ūi-tio̍h hit nn̄g chiah soaⁿ-iûⁿ liam-khau, liam chı̍t-chiah kui Iâ-hô-hoa, liam chı̍t-chiah kui A-sat-sià-le̍k.

9

A-lûn tio̍h ēng hit-chiah liam-khau kui Iâ-hô-hoa ê soaⁿ-iûⁿ, hiàn chòe sio̍k-chōe-chè.

10

Nā-sī hit-chiah liam-khau kui A-sat-sià-le̍k ê soaⁿ-iûⁿ, tio̍h o̍ah-o̍ah an-tì tī Iâ-hô-hoa ê bīn-chêng, thòe i sio̍k-chōe, pàng i khì khòng-iá, kui tī A-sat-sià-le̍k.

11

A-lûn tio̍h khan ūi ka-kī chòe sio̍k-chōe-chè ê gû-káng-á, ūi-tio̍h ka-kī kap i ê ke sio̍k-chōe, iā tio̍h thâi ūi ka-kī chòe sio̍k-chōe-chè ê gû-káng-á;

12

iā tio̍h the̍h hiuⁿ-lô͘, tùi Iâ-hô-hoa ê bīn-chêng tôaⁿ-téng tóe to̍h ê hé-thòaⁿ móa-móa, iā tio̍h ēng phang ê hiuⁿ-bo̍ah chı̍t-phóng tòa-jı̍p tiùⁿ-lî-lāi;

13

iā tī Iâ-hô-hoa ê bīn-chêng chiong hiuⁿ hē tī hé-nı̍h, hō͘ hiuⁿ-ian jia-iám iok-kūi-téng ê si-un-só͘, bián-tit i sí.

14

Iā tio̍h the̍h tām-po̍h gû-káng-á ê huih, ēng chńg-thâu-á hiù tī si-un-só͘ ê tang-sì; koh ēng chńg-thâu-á tī si-un-só͘ ê bīn-chêng hiù-huih chhit-pái.

15

Koh tio̍h thâi hit-chiah ūi-tio̍h peh-sìⁿ chòe sio̍k-chōe-chè ê soaⁿ-iûⁿ-káng, tòa i ê huih jı̍p tiùⁿ-lî-lāi, ēng i ê huih hiù tī si-un-só͘ kap si-un-só͘ ê bīn-chêng, chhin-chhiūⁿ hiù gû-káng-á ê huih chı̍t-iūⁿ.

16

Koh tio̍h in-ūi Í-sek-lia̍t lâng ê ù-òe, kè-sit, kap in it-chhè ê chōe-ok thòe sèng-só͘ sio̍k-chōe; iā tio̍h ūi-tio̍h tī in ù-òe ê tiong-kan saⁿ-kap tòa ê hōe-bō͘ chiàu án-ni kiâⁿ.

17

A-lûn jı̍p sèng-só͘ sio̍k-chōe ê sî, hōe-bō͘-lāi m̄-thang ū lâng tī-teh, thèng-hāu i ūi-tio̍h pún-sin kap i ê ke kap Í-sek-lia̍t ê hōe-chiòng í-keng sio̍k-chōe chhut-lâi.

18

I tio̍h chhut-lâi kàu Iâ-hô-hoa bīn-chêng ê tôaⁿ hia, thòe i sio̍k-chōe; iā tio̍h the̍h tām-po̍h gû-káng-á ê huih kap soaⁿ-iûⁿ-káng ê huih, boah tī tôaⁿ-téng hiah ê kak ê sì-ûi.

19

Iā tio̍h ēng i ê chńg-thâu-á hiù-huih tī tôaⁿ-nı̍h chhit-pái, hō͘ i chheng-khì, lī-khui Í-sek-lia̍t lâng ê bô chheng-khì, hun-piat i chòe-sèng.

20

I ūi-tio̍h sèng-só͘, hōe-bō͘, chè-tôaⁿ sio̍k-chōe bêng-pe̍k, tio̍h khan hit-chiah o̍ah ê soaⁿ-iûⁿ-káng lâi;

21

A-lûn tio̍h ēng nn̄g-chhiú hōaⁿ tī o̍ah ê soaⁿ-iûⁿ ê thâu-khak, tī i ê téng-bīn jīn Í-sek-lia̍t lâng it-chhè ê pháiⁿ, in it-chhè ê kè-sit, kap in it-chhè ê chōe-kòa; lóng kui tī soaⁿ-iûⁿ ê thâu-khak, kau-tài só͘ phài ê lâng, sàng-khì khòng-iá;

22

hit chiah soaⁿ-iûⁿ beh tam-tng in it-chhè ê pháiⁿ kàu bô lâng tòa ê só͘-chāi; i chiū pàng soaⁿ-iûⁿ tī khòng-iá.

23

A-lûn tio̍h jı̍p hōe-bō͘, thǹg i jı̍p sèng-só͘ ê sî só͘ chhēng iù-tōe ê i-ho̍k, lâu tī-hia;

24

koh tio̍h tī sèng ê só͘-chāi ēng chúi sóe seng-khu, chhēng i ê saⁿ chhut-lâi, hiàn i ê sio-chè kap peh-sìⁿ ê sio-chè, ūi-tio̍h pún-sin kap peh-sìⁿ sio̍k-chōe.

25

Sio̍k-chōe-chè ê iû tio̍h sio i tī tôaⁿ-téng.

26

Hit ê pàng soaⁿ-iûⁿ kui tī A-sat-sià-le̍k ê lâng, tio̍h sóe i ê saⁿ, ēng chúi sóe seng-khu, jiân-āu thang jı̍p iâⁿ-lāi.

27

Chòe sio̍k-chōe-chè ê gû-káng, kap sio̍k-chōe-chè ê soaⁿ-iûⁿ, in ê huih í-keng tòa-jı̍p sèng-só͘ sio̍k-chōe, in ê sin-thé tio̍h tòa-chhut iâⁿ-gōa, ēng hé sio in ê phê, in ê bah, in ê pùn.

28

Sio in ê lâng tio̍h sóe i ê saⁿ, ēng chúi sóe seng-khu, jiân-āu thang jı̍p iâⁿ-lāi.

29

Ta̍k-pái tú-tio̍h chhit-ge̍h chhoe-cha̍p jı̍t, lín tio̍h khek-khó͘ lín ê sim, bô-lūn sī pún-tōe lâng, á-sī kià-kha tī lín tiong-kan ê gōa-lâng, lóng m̄-thang chòe sím-mı̍h kang; che beh chòe lín éng-óan ê lē.

30

In-ūi tī chit-jı̍t beh kā lín sio̍k-chōe, hō͘ lín chheng-khì, lín beh tī Iâ-hô-hoa ê bīn-chêng tit-tio̍h chheng-khì, thoat-lī it-chhè ê chōe-kòa.

31

Chit-jı̍t lín tio̍h siú chòe tōa ê an-hioh-jı̍t; lín tio̍h khek-khó͘ lín ê sim; che sī chòe éng-óan ê lē.

32

Hit ê siū boah-iû lâi siat-lı̍p i tng sèng-chit ê chè-si, chiū-sī sêng-chiap i ê lāu-pē chòe chè-si ê, tio̍h kiâⁿ sio̍k-chōe ê lé, tio̍h chhēng iù-tōe-pò͘ ê saⁿ, chiū-sī sèng-saⁿ.

33

I tio̍h ūi-tio̍h sèng ê sèng-só͘ sio̍k-chōe, iā ūi-tio̍h hōe-bō͘ kap chè-tôaⁿ sio̍k-chōe; koh ūi-tio̍h chèng chè-si kap chôan-hōe ê peh-sìⁿ sio̍k-chōe.

34

Che tio̍h chòe lín éng-óan ê lē, chiū-sī in-ūi Í-sek-lia̍t lâng it-chhè ê chōe, tio̍h chı̍t-nî chı̍t-pái ūi-tio̍h in sio̍k-chōe. A-lûn chiū chiàu Iâ-hô-hoa só͘ bēng-lēng Mô͘-se ê lâi kiâⁿ.