Lī-bī-kì 第 22 章 - 巴克禮全羅

1

Iâ-hô-hoa hoan-hù Mô͘-se kóng,

2

Lí tio̍h kā A-lûn kap i hiah ê kiáⁿ kóng, Tio̍h lī-khui Í-sek-lia̍t lâng só͘ hun-piat chòe-sèng kui hō͘ Góa ê sèng-mı̍h, bián-tit siat-to̍k Góa ê sèng-miâ; Góa sī Iâ-hô-hoa.

3

Tio̍h kā in kóng, Lín tāi-tāi ê hō͘-è, kìⁿ-nā seng-khu ū ù-òe, lâi chhin-kūn Í-sek-lia̍t lâng só͘ hun-piat chòe-sèng, kui hō͘ Iâ-hô-hoa chòe sèng-mı̍h ê, hit-lâng tio̍h tī Góa ê bīn-chêng chián-tû; Góa sī Iâ-hô-hoa.

4

A-lûn ê hō͘-è, kìⁿ-nā ū thái-ko-ê, á-sī hā-siau-ê, m̄-thang chia̍h sèng-mı̍h, tio̍h thèng-hāu i chheng-khì; bô-lūn sím-mı̍h lâng bong-tio̍h hit ê tùi sí-si bak-tio̍h lâ-sâm ê mı̍h, á-sī tūi-cheng ê lâng;

5

á-sī bong-tio̍h sím-mı̍h bô chheng-khì ōe pê ê mı̍h, á-sī bong-tio̍h hiah ê hō͘ i bô chheng-khì ê lâng, put-kóan hit-lâng ū sím-mı̍h bô chheng-khì;

6

bong-tio̍h hiah-ê ê lâng, tek-khak bô chheng-khì kàu ê-hng; nā bô ēng chúi sóe seng-khu, chiū m̄-thang chia̍h sèng ê mı̍h.

7

Jı̍t-lo̍h ê sî, i chiū chheng-khì; jiân-āu thang chia̍h sèng-mı̍h; in-ūi che sī i ê chia̍h-mı̍h.

8

Ka-kī sí-ê, á-sī hō͘ iá-siù thiah-lı̍h-ê, i m̄-thang chia̍h, in-ūi chit-ê phah lâ-sâm ka-kī; Góa sī Iâ-hô-hoa.

9

Só͘-í in tio̍h siú Góa só͘ kau-tài ê, bián-tit in siat-to̍k i, tùi án-ni tam-tng chōe lâi sí; Góa sī hō͘ in chiâⁿ-sèng ê Iâ-hô-hoa.

10

It-chhè ê gōa-lâng m̄-thang chia̍h sèng-mı̍h; hioh tī chè-si ê ke-ê, á-sī chòe-kang lâng, lóng m̄-thang chia̍h sèng-mı̍h.

11

Siat-sú chè-si bóe lâng, sī i ēng gûn bóe ê, hit-lâng thang chia̍h i; chhut-sì tī i ê ke-ê iā thang chia̍h i ê bí-niû.

12

Chè-si ê cha-bó͘-kiáⁿ nā kè-chhut gōa-lâng, chiū m̄-thang chia̍h só͘ kú-khí-lâi ê sèng-mı̍h.

13

Chóng-sī chè-si ê cha-bó͘-kiáⁿ nā sī kóaⁿ-hū, á-sī siū lî-chhut-ê, bô kiáⁿ-jî, koh tò-lâi lāu-pē ê ke, kap i siàu-liân ê sî chı̍t-iūⁿ, chiū thang chia̍h i ê lāu-pē ê chia̍h-mı̍h; to̍k-to̍k gōa-lâng m̄-thang chia̍h.

14

Nā ū lâng bô tiuⁿ-tî chia̍h sèng-mı̍h, tio̍h chiàu hiah ê sèng-mı̍h ke gō͘-hūn-chı̍t, kau-hō͘ chè-si.

15

M̄-thang siat-to̍k Í-sek-lia̍t lâng só͘ hiàn hō͘ Iâ-hô-hoa ê sèng-mı̍h;

16

bián-tit in tī chia̍h sèng-mı̍h ê sî, tam-tng kè-sit ê chōe-kòa; in-ūi Góa sī hō͘ in chiâⁿ-sèng ê Iâ-hô-hoa.

17

Iâ-hô-hoa hoan-hù Mô͘-se kóng,

18

Lí tio̍h hoan-hù A-lûn kap i hiah ê kiáⁿ, kap Í-sek-lia̍t ê chèng-lâng, tùi in kóng, Í-sek-lia̍t-ke ê lâng, á-sī tī Í-sek-lia̍t-tiong kià-kha-ê kìⁿ-nā hiàn lé-mı̍h, bô-lūn sī só͘ hē ê gōan, á-sī kam-sim hiàn-ê, chiū-sī hiàn hō͘ Iâ-hô-hoa chòe sio-chè-ê;

19

chiū tio̍h hiàn gû, á-sī mî-iûⁿ, á-sī soaⁿ-iûⁿ, lóng tio̍h ēng kang-ê, bô hâ-chhû-ê, chiah ōe tit-tio̍h hoaⁿ-hí chiap-la̍p.

20

Kìⁿ-nā ū hâ-chhû-ê, lín m̄-thang hiàn; in-ūi che bô beh kā lín chiap-la̍p.

21

Kìⁿ-nā tùi gû-kûn, á-sī iûⁿ-kûn tiong, chiong siā-un-chè hiàn hō͘ Iâ-hô-hoa, ūi-tio̍h beh siā te̍k-pia̍t hē ê gōan, á-sī chòe kam-sim hiàn-ê, só͘ hiàn-tio̍h-ê tio̍h sûn-chôan, bô hâ-chhû, chiah ōe tit-tio̍h chiap-la̍p.

22

Chhiⁿ-mî ê, tio̍h-siong-ê, phòa-siùⁿ-ê, siⁿ-liû-ê, siⁿ-chhng-ê, siⁿ-sián-ê, chiah-ê lóng m̄-thang hiàn hō͘ Iâ-hô-hoa; iā m̄-thang tī tôaⁿ-téng hiàn hō͘ Iâ-hô-hoa chòe hé-chè.

23

Bô-lūn sī gû-káng á-sī iûⁿ-á, nā sī chi-thé ū ke á-sī ū kiám ê, hit-hō thang chòe kam-sim chè lâi hiàn; chóng-sī ēng i lâi siā-gōan chiū bōe tit-tio̍h chiap-la̍p.

24

Gōa-sin sún-siong-ê, á-sī teh-chhùi-ê, á-sī phòa-lı̍h-ê, á-sī iam-ê, m̄-thang hiàn-hō͘ Iâ-hô-hoa; tī lín ê thó͘-tōe iā m̄-thang án-ni kiâⁿ.

25

Chit hō ê mı̍h lín iā m̄-thang tùi gōa-kok lâng ê chhiú chiap-siū hiàn-chòe lín Siōng-tè ê chia̍h-mı̍h; in-ūi chit hō mı̍h lóng ū húi-hōai, ū hâ-chhû ê, bōe thang kā lín chiap-la̍p

26

Iâ-hô-hoa hoan-hù Mô͘-se kóng,

27

Gû, á-sī mî-iûⁿ, á-sī soaⁿ-iûⁿ í-keng siⁿ, chhit-jı̍t tè i ê bú, tùi tē-poeh jı̍t í-āu, thang chòe Iâ-hô-hoa hé-chè ê lé-mı̍h, tit-tio̍h chiap-la̍p.

28

Bô-lūn gû-bú á-sī iûⁿ-bú, lí m̄-thang siâng-jı̍t thâi bú kap kiáⁿ.

29

Lín hiàn siā-un-chè hō͘ Iâ-hô-hoa, tio̍h hiàn thang tit-tio̍h chiap-la̍p ê.

30

Tio̍h chiū hit-jı̍t chia̍h i, m̄-thang lâu chı̍t-tiám-á kàu keh chá-khí; Góa sī Iâ-hô-hoa.

31

Só͘-í lín tio̍h siú Góa chiah ê kài-bēng lâi kiâⁿ i; Góa sī Iâ-hô-hoa.

32

Lín m̄-thang siat-to̍k Góa ê sèng-miâ; in-ūi Góa tī Í-sek-lia̍t lâng ê tiong-kan, beh siū chun lâi chòe-sèng; Góa sī hō͘ lín chiâⁿ-sèng ê Iâ-hô-hoa,

33

chhōa lín chhut Ai-kı̍p tōe, chòe lín ê Siōng-tè ê; Góa sī Iâ-hô-hoa.