Lī-bī-kì 第 23 章 - 巴克禮全羅

1

Iâ-hô-hoa hoan-hù Mô͘-se kóng,

2

Lí tio̍h hoan-hù Í-sek-lia̍t lâng kā i kóng, Iâ-hô-hoa ê choeh-kî, lín só͘ tio̍h soan-pò͘ chòe sèng-hōe ê, í-ē chiah-ê chiū-sī Góa ê choeh-kî.

3

La̍k-jı̍t tio̍h chòe-kang, tē-chhit jı̍t sī tōa ê an-hioh-jı̍t; tio̍h chòe sèng-hōe; lín it-chhè ê kang lóng m̄-thang chòe, tī lín it-chhè khiā-khí ê só͘-chāi; che sī chòe Iâ-hô-hoa ê sèng-jı̍t.

4

Iâ-hô-hoa chiah ê choeh-kî, chiū-sī sèng-hōe, lín kàu-kî só͘ tio̍h soan-pò͘-ê, chiū-sī chiah-ê.

5

Chiaⁿ-ge̍h cha̍p-sì-jı̍t hông-hun ê sî, sī Iâ-hô-hoa ê jû-o̍at-choeh.

6

Chit-ge̍h cha̍p-gō͘ jı̍t sī Iâ-hô-hoa ê tû-kàⁿ-choeh; lín tio̍h chia̍h bô-kàⁿ-piáⁿ chhit-jı̍t kú.

7

Thâu-chı̍t-jı̍t tio̍h ū sèng-hōe; lóng m̄-thang chòe sím-mı̍h khó͘-kang.

8

Chhit-jı̍t kú tio̍h hiàn hé-chè hō͘ Iâ-hô-hoa; tē-chhit jı̍t sī sèng-hōe, lóng m̄-thang chòe sím-mı̍h khó͘-kang.

9

Iâ-hô-hoa hoan-hù Mô͘-se kóng,

10

Lí tio̍h hoan-hù Í-sek-lia̍t lâng kā in kóng, Lín kàu Góa siúⁿ-sù lín ê tōe, siu-koah ngó͘-kok ê sî, tio̍h chiong khí-thâu-se̍k ê ngó͘-kok chı̍t-khún, tòa-lâi hō͘ chè-si.

11

I tio̍h ēng chit-khún iô tī Iâ-hô-hoa ê bīn-chêng, hō͘ lín tit-tio̍h chiap-la̍p; chè-si tio̍h tī an-hioh-jı̍t ê keh-jı̍t iô i.

12

Iô chit-khún ê jı̍t, lín tio̍h chiong chı̍t chiah bē-móa-nî bô hâ-chhû ê mî-iûⁿ-káng-á, hiàn hō͘ Iâ-hô-hoa chòe sio-chè.

13

Saⁿ-sòa hiàn ê sò͘-chè, chiū-sī tiau-hô iû ê iù-mī-hún i-hoat cha̍p-hūn ê nn̄g-hūn, chòe phang-phang ê hé-chè hiàn-hō͘ Iâ-hô-hoa; saⁿ-sòa hiàn ê kòan-tiān, tio̍h ēng chiú chı̍t-him ê sì-hūn chı̍t.

14

Bô-lūn sī piáⁿ, á-sī pē ê ngó͘-kok, á-sī sin ê sūi, lín lóng m̄-thang chia̍h, kàu lín tòa lé-mı̍h hiàn-hō͘ lín ê Siōng-tè hit-jı̍t chiah thang; che tī lín it-chhè khiā-khí ê só͘-chāi, chòe lín tāi-tāi éng-óan ê lē.

15

Lín tio̍h tùi an-hioh-jı̍t ê keh-jı̍t, hiàn tiū-khún chòe iô-chè; hit-jı̍t ūi ka-kī sǹg-khí, móa chhit ê an-hioh-jı̍t,

16

kàu tē-chhit ê an-hioh-jı̍t ê keh-jı̍t, lín tio̍h sǹg gō͘-cha̍p-jı̍t, koh tio̍h chiong sin ê sò͘-chè hiàn-hō͘ Iâ-hô-hoa.

17

Tio̍h tùi lín khiā-khí ê só͘-chāi the̍h-chhut iù ê mī-hún i-hoat cha̍p-hūn-nn̄g, chham kàⁿ, pek nn̄g tè iô-chè ê piáⁿ, chòe khí-thâu-se̍k ê mı̍h, hiàn hō͘ Iâ-hô-hoa.

18

Koh tio̍h ēng bē-móa-nî bô hâ-chhû ê iûⁿ-á chhit-chiah, gû-káng-á chı̍t-chiah, mî-iûⁿ-káng nn̄g-chiah, kap hiah ê piáⁿ saⁿ-kap hiàn in chòe sio-chè hō͘ Iâ-hô-hoa, kap in ê sò͘-chè, in ê kòan-tiān, chòe phang-phang ê hé-chè, hiàn hō͘ Iâ-hô-hoa.

19

Lín tio̍h hiàn chı̍t chiah soaⁿ-iûⁿ-káng chòe sio̍k-chōe-chè, nn̄g chiah bē-móa-nî ê mî-iûⁿ-á chòe siā-un-chè.

20

Chè-si tio̍h iô in, kap khí-thâu-se̍k ê be̍h ê piáⁿ, chòe iô-chè tī Iâ-hô-hoa ê bīn-chêng, kap hí nn̄g chiah iûⁿ-á; tio̍h hun-piat in chòe sèng, hiàn hō͘ Iâ-hô-hoa, lâi kui hō͘ chè-si.

21

Siâng hit-jı̍t lín tio̍h soan-pò͘ chòe lín ê sèng-hōe; lóng m̄-thang chòe sím-mı̍h khó͘-kang; che tī lín it-chhè khiā-khí ê só͘-chāi, chòe ta̍k sè-tāi éng-óan ê lē.

22

Lín siu-koah chhân ê ngó͘-kok, chhân ê kak-thâu m̄-thang koah kàu chīn, ka-la̍uh-ê iā m̄-thang khioh; tio̍h lâu hō͘ sòng-hiong lâng kap chhut-gōa-ê khioh; Góa sī Iâ-hô-hoa.

23

Iâ-hô-hoa hoan-hù Mô͘-se kóng,

24

Lí tio̍h hoan-hù Í-sek-lia̍t lâng kóng, Chhit-ge̍h chhoe-it, lín tio̍h siú chòe sèng ê an-hioh-jı̍t, tio̍h pûn hō-thâu chòe kì-liām; tio̍h chòe sèng-hōe.

25

Lóng m̄-thang chòe sím-mı̍h khó͘-kang; tio̍h chiong hé-chè hiàn hō͘ Iâ-hô-hoa.

26

Iâ-hô-hoa hoan-hù Mô͘-se kóng,

27

Chhit-ge̍h chhoe-cha̍p jı̍t sī sio̍k-chōe ê jı̍t; lín tio̍h siú chòe sèng-hōe; koh tio̍h khek-khó͘ ka-kī ê sim; iā tio̍h chiong hé-chè hiàn hō͘ Iâ-hô-hoa.

28

Siâng chit-jı̍t lóng m̄-thang chòe sím-mı̍h kang, in-ūi sī sio̍k-chōe ê jı̍t; tī Iâ-hô-hoa lín ê Siōng-tè ê bīn-chêng kā lín sio̍k-chōe.

29

Siâng chit-jı̍t, kìⁿ-nā bô khek-khó͘ i ê sim ê, beh tùi peh-sìⁿ-tiong siū chián-tû.

30

Kìⁿ-nā tī chit-jı̍t chòe sím-mı̍h kang ê, Góa beh tùi peh-sìⁿ-tiong tû-bia̍t i.

31

Lín lóng m̄-thang chòe sím-mı̍h kang; che tī lín it-chhè khiā-khí ê só͘-chāi, chòe lín ta̍k sè-tāi éng-óan ê lē.

32

Lín tio̍h siú chit-jı̍t chòe tōa ê an-hioh-jı̍t; tī chit-ge̍h ê chhoe-káu jı̍t ê-hng, tùi hit ê-hng kàu keh ê-hng, tio̍h siú lín an-hioh-jı̍t.

33

Iâ-hô-hoa hoan-hù Mô͘-se kóng,

34

Lí tio̍h kā Í-sek-lia̍t lâng kóng, Chit ê chhit-ge̍h cha̍p-gō͘ jı̍t sī tah-liâu-á choeh, chhit-jı̍t kú kā Iâ-hô-hoa siú i.

35

Thâu-chı̍t-jı̍t tio̍h ū sèng-hōe, m̄-thang chòe sím-mı̍h khó͘-kang.

36

Lín chhit-jı̍t kú tio̍h chiong hé-chè hiàn-hō͘ Iâ-hô-hoa; tē-poeh jı̍t tio̍h siú sèng-hōe, tio̍h chiong hé-chè hiàn hō͘ Iâ-hô-hoa; chè sī giâm-siok-hōe, lóng m̄-thang chòe sím-mı̍h khó͘-kang.

37

Che sī Iâ-hô-hoa chiah ê choeh; lín tio̍h soan-pò͘ chòe sèng-hōe ê, tio̍h chiong hé-chè, sio-chè, sò͘-chè, chè-mı̍h, kap kòan-tiān hiàn-hō͘ Iâ-hô-hoa, koh chiàu i ê jı̍t-kî.

38

Che sī tī Iâ-hô-hoa kìⁿ an-hioh-jı̍t í-gōa, koh tī lín ê lé-mı̍h í-gōa, kap lín só͘ hē ê gōan í-gōa, kap kam-sim hiàn-ê í-gōa, chiū-sī lín só͘ hiàn hō͘ Iâ-hô-hoa ê.

39

Koh tī chhit-ge̍h cha̍p-gō͘ jı̍t, lín í-keng siu thó͘-sán ê sî, tio̍h siú Iâ-hô-hoa ê choeh chhit-jı̍t kú; thâu-chı̍t jı̍t chòe sèng ê an-hioh, tē-poeh jı̍t iā chòe sèng ê an-hioh.

40

Thâu-chı̍t-jı̍t tio̍h bán hó-chhiū ê ké-chí, kap chó-chhiū ê ki, kap ām-chhiū ê ōaiⁿ, kap hô-piⁿ ê liú, tī Iâ-hô-hoa lín Siōng-tè ê bīn-chêng hoaⁿ-hí chhit-jı̍t kú.

41

Ta̍k-nî chhit-ge̍h-kan, lín tio̍h chhit-jı̍t kú kā Iâ-hô-hoa siú chit ê choeh; che sī lín ta̍k sè-tāi éng-óan ê lē.

42

Lín tio̍h tiàm tī chháu-liâu-á-lāi chhit-jı̍t kú; kìⁿ-nā Í-sek-lia̍t pún-tōe lâng lóng tio̍h tiàm tī chháu-liâu-á-lāi.

43

Thang hō͘ lín ta̍k-tāi chai Góa chhōa Í-sek-lia̍t lâng chhut Ai-kı̍p tōe ê sî, Góa hō͘ in tiàm tī chháu-liâu-á-lāi; Góa sī Iâ-hô-hoa lín ê Siōng-tè.

44

Mô͘-se chiū chiong Iâ-hô-hoa ê choeh-kî thôan hō͘ Í-sek-lia̍t lâng.