Lī-bī-kì 第 24 章 - 巴克禮全羅

1

Iâ-hô-hoa hoan-hù Mô͘-se kóng,

2

Tio̍h bēng-lēng Í-sek-lia̍t lâng, ēng kaⁿ-ná khoeh-chiâⁿ chheng ê iû, the̍h lâi hō͘ lí, thang tiám-teng hō͘ i siông-siông kng.

3

Tī hōe-bō͘-lāi hoat-kūi ê tiùⁿ-lî-gōa, A-lûn tio̍h liāu-lí i, tùi ê-hng kàu chá-khí, siông-siông tī Iâ-hô-hoa ê bīn-chêng; che sī chòe lín tāi-tāi éng-óan ê lē.

4

I tio̍h tī Iâ-hô-hoa ê bīn-chêng, siông-siông liāu-lí chiah ê teng tī chheng-khì ê teng-tâi-téng.

5

Lí tio̍h the̍h iù ê mī-hún, pek cha̍p-jī tè piáⁿ, múi-tè ēng i-hoat cha̍p-hūn-nn̄g.

6

Tio̍h chiong piáⁿ pâi chòe nn̄g-chōa, múi-chōa la̍k-tè tī Iâ-hô-hoa ê bīn-chêng sèng-kiat ê toh-téng.

7

Koh tio̍h ēng chheng-khì ê jú-hiuⁿ hē tī ta̍k-chōa, kā piáⁿ chòe kì-hō, chiū-sī chòe hé-chè hiàn hō͘ Iâ-hô-hoa.

8

Ta̍k ê an-hioh-jı̍t, i tio̍h siông-siông pâi tī Iâ-hô-hoa ê bīn-chêng; che sī ūi-tio̍h Í-sek-lia̍t lâng chòe éng-óan ê iok.

9

Chiah ê piáⁿ tio̍h kui hō͘ A-lûn kap i ê kiáⁿ-sun, in tio̍h tī sèng ê só͘-chāi chia̍h i; in-ūi tī Iâ-hô-hoa ê hé-chè tiong, chit-ê sī chì-sèng kui tī i, chòe éng-óan ê lē.

10

Ū chı̍t-lâng i ê lāu-bú sī Í-sek-lia̍t lâng; i ê lāu-pē sī Ai-kı̍p lâng, chhut-lâi kiâⁿ tī Í-sek-lia̍t lâng ê tiong-kan; chit ê Í-sek-lia̍t hū-jîn-lâng ê kiáⁿ, kap chı̍t ê Í-sek-lia̍t lâng tī iâⁿ-pôaⁿ-lāi oan-ke.

11

Chit ê Í-sek-lia̍t hū-jîn-lâng ê kiáⁿ siat-to̍k sèng miâ, koh chiù-chó͘; chiū ū lâng chiong i tòa kàu Mô͘-se hia; i ê lāu-bú miâ kiò Sī-lô-bı̍t, sī Tàn ê chi-phài, Tí-pek-lī ê cha-bó͘-kiáⁿ.

12

In koaiⁿ i tī khu-liû-só͘, beh thèng-hāu Iâ-hô-hoa chí-sī.

13

Iâ-hô-hoa hoan-hù Mô͘-se kóng,

14

Tio̍h chiong hit ê chiù-chó͘ ê lâng tòa kàu iâⁿ-gōa, hō͘ thiaⁿ-kìⁿ ê lâng hōaⁿ-chhiú tī i ê thâu-khak-téng; chôan-hōe chèng-lâng tio̍h ēng chio̍h-thâu tìm-sí i.

15

Lí tio̍h hoan-hù Í-sek-lia̍t lâng kóng, Kìⁿ-nā chiù-chó͘ i ê Siōng-tè ê, tio̍h tam-tng i ê chōe.

16

Lâng siat-to̍k Iâ-hô-hoa ê miâ, tio̍h hō͘ i sí; chôan-hōe ê chèng-lâng tio̍h ēng chio̍h-thâu tìm-sí i; put-kóan sī chhut-gōa lâng, á-sī pún-tōe lâng, i siat-to̍k Iâ-hô-hoa ê miâ ê sî, tio̍h hō͘ i sí.

17

Kìⁿ-nā phah-sí lâng ê, tek-khak tio̍h hō͘ i sí.

18

Phah-sí cheng-siⁿ ê, tio̍h pê i, ēng miā pê miā.

19

Lâng nā hō͘ i ê chhù-piⁿ siū sún-siong, i án-ni kiâⁿ, iā tio̍h án-ni khóan-thāi i.

20

Ēng siong pê siong, ēng ba̍k-chiu pê ba̍k-chiu, ēng chhùi-khí pê chhùi-khí, i sún-siong lâng cháiⁿ-iūⁿ, iā tio̍h án-ni pān i.

21

Phah-sí cheng-siⁿ ê, tio̍h pê i; phah-sí lâng ê, tek-khak tio̍h hō͘ i sí.

22

Put-kóan sī chhut-gōa lâng, á-sī pún-tōe lâng, tâng chı̍t-iūⁿ ê hoat-lu̍t; in-ūi Góa Iâ-hô-hoa sī lín ê Siōng-tè.

23

Mô͘-se chiū kā Í-sek-lia̍t lâng kóng, in chiū chiong hit ê chiù-chó͘ ê lâng tòa kàu iâⁿ-gōa, ēng chio̍h-thâu tìm-sí; Í-sek-lia̍t lâng chiū chiàu Iâ-hô-hoa só͘ bēng-lēng Mô͘-se ê lâi kiâⁿ.