Lī-bī-kì 第 25 章 - 巴克禮全羅

1

Iâ-hô-hoa tī Se-nái soaⁿ hoan-hù Mô͘-se kóng,

2

Lí tio̍h hoan-hù Í-sek-lia̍t lâng kā in kóng, Lín kàu Góa siúⁿ-sù lín hit ê tōe ê sî; tōe chiū tio̍h kā Iâ-hô-hoa siú an-hioh.

3

La̍k-nî tio̍h chèng-choh lí ê chhân-hn̂g, la̍k-nî kú tio̍h san-koah lí ê phû-tô-hn̂g, siu tōe ê chhut-sán.

4

Kàu tē-chhit nî tōe tio̍h siú tōa ê an-hioh, chiū-sī kā Iâ-hô-hoa siú ê an-hioh, m̄-thang chèng-choh lí ê chhân-hn̂g, iā m̄-thang san phû-tô-hn̂g.

5

Siu-sêng liáu ka-kī hoat ê gō͘-kak, m̄-thang siu-koah, bô kè san-koah ê phû-tô-chhiū, iā m̄-thang bán phû-tô; chit-nî sī tōe ê an-hioh nî.

6

Tōe tī an-hioh nî só͘-chhut-ê beh hō͘ lín chòe chia̍h-mı̍h; i ê chhut-sán lóng beh hō͘ lí kap lí ê lô͘-po̍k, lí ê lú-pī, lí ê chhiàⁿ-kang-lâng, í-kı̍p kià-kha tī lí hia ê gōa-lâng,

7

kap lí ê cheng-siⁿ, í-kı̍p tī lí ê tōe ê cháu-siù chòe chia̍h-mı̍h.

8

Lí tio̍h ūi ka-kī sǹg an-hioh-nî chhit-ê, chiū-sī chhit-pái ê chhit-nî; chit chhit-pái ê an-hioh-nî, tùi tī lí sī sì-cha̍p-káu nî.

9

Hit-nî chhit-ge̍h chhoe-cha̍p jı̍t, lí tio̍h sì-kòe pûn tōa-siaⁿ ê sàu-kak; tī sio̍k-chōe ê jı̍t tio̍h chôan-tōe pûn sàu-kak.

10

Lín tio̍h ēng tē gō͘-cha̍p nî chòe-sèng, tī piàn-tōe kā it-chhè khiā-khí ê peh-sìⁿ soan-pò͘ chū-iû; chit-nî beh chòe lín ê hi-liân; lín ta̍k lâng tio̍h kui ka-kī ê sán-gia̍p, ta̍k-lâng tio̍h tò-khì i ê pún-ke.

11

Tē gō͘-cha̍p nî beh chòe lín ê hi-liân, m̄-thang chèng-choh; tōe ka-kī hoat ê, m̄-thang siu-koah; bô-san ê phû-tô-chhiū iā m̄-thang bán i.

12

In-ūi che sī hi-liân, lín tio̍h lia̍h i chòe-sèng; lín thang chia̍h tōe-nı̍h ka-kī chhut ê thó͘-sán.

13

Chit ê hi-liân, lín ta̍k-lâng tio̍h tò-khì ka-kī ê sán-gia̍p.

14

Lín bōe mı̍h hō͘ chhù-piⁿ, á-sī tùi chhù-piⁿ bóe mı̍h, lín m̄-thang saⁿ khek-khui.

15

Lí tio̍h chiàu hi-liân-āu ê nî-hān, tùi chhù-piⁿ bóe, i iā tio̍h chiàu siu-sêng ê nî-hān bōe hō͘ lín.

16

Chiàu nî-hān ê chōe, lí tio̍h ke-thiⁿ i ê kè-chîⁿ, chiàu nî-hān ê chió, lí tio̍h kiám-chió i ê kè-chîⁿ; in-ūi i chiàu siu-sêng ê siàu-gia̍h lâi bōe hō͘ lín.

17

Lín iā m̄-thang saⁿ khek-khui, to̍k-to̍k tio̍h kèng-ùi lín ê Siōng-tè; in-ūi Góa sī Iâ-hô-hoa lín ê Siōng-tè.

18

Só͘-í lín tio̍h kiâⁿ Góa ê lu̍t-lē, siú Góa ê hoat-tō͘ lâi kiâⁿ i; chiū thang tī hit ê tōe an-jiân khiā-khí.

19

Tōe iā beh chhut i ê thó͘-sán, lín chiū beh chia̍h-pá, tī hit ê tōe an-jiân khiā-khí.

20

Lín nā kóng, Khòaⁿ ah, chit ê tē-chhit nî góan bô chèng-choh, iā bô siu-sêng thó͘-sán, beh chia̍h sím-mı̍h ah?

21

Góa beh tī tē la̍k-nî bēng-lēng Góa ê hok-khì hō͘ lín, tōe chiū siⁿ saⁿ-nî ê thó͘-sán.

22

Tē-poeh nî lín tio̍h chèng-choh, iā tio̍h chia̍h tōe ê chhut-sán, chiū-sī kū ê bí-niû; thèng-hāu kàu tē-káu nî, hit-nî ê chhut-sán siu-lâi ê sî, lín iáu-kú teh chia̍h kū ê bí-niû.

23

Tōe m̄-thang éng-óan bōe-tn̄g, in-ūi tōe sī Góa ê; lín tī Góa ê bīn-chêng sī chhut-gōa lâng, sī kià-kha-ê.

24

Lín só͘ tit-tio̍h chòe-gia̍p ê chôan-tōe, tio̍h chún lâng sio̍k-hôe.

25

Lí ê hiaⁿ-tī nā pìⁿ-chòe sòng-hiong, bōe i ê gia̍p kúi-nā hūn, i ê chì-chhin tio̍h lâi, sio̍k-hôe i ê hiaⁿ-tī só͘ bōe ê.

26

Nā bô lâng thang kā i sio̍k-hôe, i pún-sin koh chiâⁿ chòe hó-gia̍h, kàu gia̍h ōe sio̍k-hôe,

27

i chiū tio̍h sǹg bōe-chhut tōe ê nî-hān, chiong só͘-chhun-ê hêng hit ê bóe-chú, pún-sin chiū thang ho̍k-tò i ê sán-gia̍p.

28

Hit ê lâng nā bōe-ōe ūi ka-kī sio̍k-hôe, chiū só͘-bōe ê iû-gôan chûn tī bóe-chú ê chhiú, tı̍t-kàu hi-liân; hi-liân í-keng kàu, sán-gia̍p tio̍h kau-chhut; hit-lâng chiū ho̍k-tò i ê gia̍p.

29

Lâng nā bōe siâⁿ-lāi ê chhù, bōe liáu-āu chı̍t-nî thang sio̍k-hôe; chı̍t-nî ka-nn̂g iā ū sio̍k-hôe ê kôan.

30

Nā chı̍t-nî í-keng móa bô sio̍k-hôe chit ê siâⁿ-lāi ê chhù, chiū tiāⁿ-tio̍h éng-óan kui bóe-chú kàu ta̍k-tāi; tī hi-liân iā bōe-tit kau-chhut.

31

To̍k-to̍k chhù tī bô siâⁿ-chhiûⁿ ê hiuⁿ-chng, tio̍h khòaⁿ i chhin-chhiūⁿ hiuⁿ-ē ê chhân chı̍t-iūⁿ, thang sio̍k-hôe; kàu hi-liân, lóng tio̍h kau-chhut.

32

Chóng-sī Lī-bī lâng ê siâⁿ, chiū-sī in só͘ tit-tio̍h chòe-gia̍p ê siâⁿ hit tiong-kan ê chhù, Lī-bī lâng thang put-kóan-sî lâi sio̍k-hôe.

33

Nā ū lâng tui Lī-bī lâng sio̍k-hôe chhù-the̍h, só͘ bōe ê chhù tī só͘ tit-tio̍h chòe-gia̍p ê siâⁿ, kàu hi-liân chiū tio̍h kau-chhut; in-ūi Lī-bī lâng siâⁿ-lāi ê chhù, sī in tī Í-sek-lia̍t lâng tiong ê sán-gia̍p.

34

Chóng-sī in ê siâⁿ-gōa kau-iá ê tōe, m̄-thang bōe, in-ūi sī in éng-óan ê sán-gia̍p.

35

Lí ê hiaⁿ-tī pìⁿ-chòe sòng-hiong soe-thè tī lí hia, lí tio̍h pó͘-chō͘ i, hō͘ i kap lí saⁿ-kap tòa, chhin-chhiūⁿ gōa-lâng kap kià-kha-ê chı̍t-iūⁿ.

36

M̄-thang the̍h i ê lī-sek, iā m̄-thang the̍h i khah-ke; to̍k-to̍k tio̍h kèng-ùi lí ê Siōng-tè, hō͘ lí ê hiaⁿ-tī kap lí tòa.

37

Lí chioh i chîⁿ m̄-thang kā i the̍h lī-sek, lí chioh i bí-niû iā m̄-thang kā i the̍h khah-ke.

38

Góa sī Iâ-hô-hoa lín ê Siōng-tè, bat chhōa lín chhut Ai-kı̍p tōe, ūi-tio̍h beh siúⁿ-sù lín Ka-lâm tōe, iā beh chòe lín ê Siōng-tè.

39

Lí ê hiaⁿ-tī nā pìⁿ sòng-hiong tī lí hia, chiong pún-sin bōe hō͘ lí, m̄-thang hō͘ i chhin-chhiūⁿ lô͘-po̍k ho̍k-sāi lí.

40

I tio̍h tī lí hia chhin-chhiūⁿ chòe-kang lâng, kap kià-kha-ê chı̍t-iūⁿ; tio̍h ho̍k-sāi lí tı̍t kàu hi-liân.

41

Hit-sî i beh lī-khui lí chhut-khì, kap i ê kiáⁿ-jî saⁿ-kap tò-khì i ê pún-ke, ho̍k-tò i chó͘-kong ê gia̍p.

42

In-ūi in sī Góa ê lô͘-po̍k, sī Góa só͘ chhōa-chhut Ai-kı̍p tōe ê; m̄-thang bōe chòe lô͘-po̍k.

43

M̄-thang giâm-giâm kóan-hat i, to̍k-to̍k tio̍h kèng-ùi lí ê Siōng-tè.

44

Lūn-kàu lí só͘ beh ū ê lô͘-po̍k lú-pī, thang tùi sì-ûi ê kok tiong bóe lâi chòe lô͘-po̍k lú-pī.

45

Koh hiah ê kià-kha tī lín tiong-kan ê gōa-lâng ê kiáⁿ-jî, í-kı̍p in kap lín tiàm hiah ê ke-kòan, tī lín ê tōe-hng só͘-siⁿ-ê, lín iā thang tùi in tiong-kan bóe lâng; in beh chòe lín ê ke-gia̍p.

46

Lín beh chhú in chòe-gia̍p, lâu hō͘ kiáⁿ-sun chòe ke-gia̍p; lín beh éng-óan tùi in tiong-kan chhú i chòe lô͘-po̍k; to̍k-to̍k lín ê hiaⁿ-tī Í-sek-lia̍t lâng, lín m̄-thang giâm-giâm saⁿ kóan-hat.

47

Tiàm tī lín hia ê gōa-lâng, á-sī kià-kha-ê, nā pìⁿ-chòe hó-gia̍h, lí ê hiaⁿ-tī tī in hia pìⁿ-chòe sòng-hiong, chiong ka-kī bōe hō͘ lín tiong-kan ê gōa-lâng, á-sī kià-kha-ê, á-sī gōa-lâng ê ke-cho̍k.

48

Bōe liáu-āu thang sio̍k-hôe i, i ê hiaⁿ-tī ê chı̍t-ê thang sio̍k-hôe i;

49

peh-chek, á-sī peh-chek ê kiáⁿ thang sio̍k-hôe i, á-sī pún-ke ê chhin-lâng, iā thang sio̍k i; i pún-sin nā chiâⁿ-chòe hó-gia̍h iā thang ka-kī sio̍k.

50

I tio̍h kap bóe-chú sǹg-siàu, tùi bōe ka-kī hit-nî khí, sǹg kàu hi-liân, só͘ bōe ê ké-chîⁿ chiàu nî-hān ê chōe-chió, tio̍h chiàu chòe-kang lâng ê nî-hān kap i sǹg.

51

Nā só͘ chhun ê nî iáu-kú chōe, chiū tio̍h chiàu hit ê nî-hān, tùi bóe-i ê kè-chîⁿ, i tio̍h hêng i sio̍k-hôe ê kè-chîⁿ.

52

Nā kàu hi-liân chhun bô kúi-nî, tio̍h kap i sǹg; chiàu hit ê nî-hān tio̍h hêng i sio̍k-hôe kè-chîⁿ.

53

I tio̍h kap i tòa, chhin-chhiūⁿ nî-nî kò͘-chhiàⁿ ê chòe-kang lâng; bóe-chú m̄-thang giâm-giâm kóan-hat i.

54

Nā bô tī chiah-ê siū-sio̍k, kàu hi-liân i kap i ê kiáⁿ-jî lóng thang chhut-khì chū-iû.

55

In-ūi Í-sek-lia̍t lâng sī Góa ê lô͘-po̍k, sī Góa chhōa-chhut Ai-kı̍p tōe ê; Góa sī Iâ-hô-hoa lín ê Siōng-tè.