Lī-bī-kì 第 26 章 - 巴克禮全羅

1

Lín m̄-thang ūi pún-sin chòe sím-mı̍h sîn-pu̍t, iā m̄-thang chhāi tiau-khek ê ngó͘-siōng, á-sī thiāu-siōng; iā m̄-thang tī lín ê tōe-kài an-tì sím-mı̍h khek-siōng ê chio̍h, kūi-pài i; in-ūi Góa sī Iâ-hô-hoa lín ê Siōng-tè.

2

Lín tio̍h siú Góa chiah ê an-hioh, kèng Góa ê sèng-só͘; Góa sī Iâ-hô-hoa.

3

Lín nā chun-thàn Góa ê lu̍t-lē, siú Góa ê kài-bēng lâi kiâⁿ i,

4

Góa chiū kā lín lo̍h kı̍p-sî ê hō͘, tōe chhut i ê thó͘-sán, chhân-iá ê chhiū-ba̍k kiat ké-chí.

5

Lín phah gō͘-kak beh phah kàu bán phû-tô ê sî; bán phû-tô beh bán kàu iā-chéng ê sî; koh lín beh chia̍h lín ê bí-niû kàu pá, tī lín ê thó͘-tōe an-jiân khiā-khí.

6

Góa beh siúⁿ-sù pêng-an tī lín ê tōe; lín tó-teh khùn, bô lâng phah-kiaⁿ lín; Góa beh tī lín ê tōe tû-khì ok-siù, to-kiàm iā bô keng-kè lín ê tōe.

7

Lín beh kóaⁿ-cháu tùi-te̍k, in beh tī lín ê bīn-chêng tó tī to-ē.

8

Lín gō͘ lâng beh kóaⁿ-cháu chı̍t-pah lâng, lín chı̍t-pah lâng beh kóaⁿ-cháu chı̍t-bān lâng, tùi-te̍k beh tī lín ê bīn-chêng tó tī to-ē.

9

Góa beh khòaⁿ-kò͘ lín, hō͘ lín seng-ióng chin-chōe, iā beh kap lín kiàn-lı̍p Góa ê iok.

10

Lín beh chia̍h khǹg kú-kú ê kū ngó͘-kok, koh ūi-tio̍h sin ê, poaⁿ-chhut kū-ê.

11

Góa beh tī lín tiong-kan lı̍p Góa ê hōe-bō͘, Góa ê sim iā bô iàm-ò͘ⁿ lín.

12

Góa beh kiâⁿ tī lín tiong-kan, Góa beh chòe lín ê Siōng-tè, lín beh chòe Góa ê peh-sìⁿ.

13

Góa sī Iâ-hô-hoa lín ê Siōng-tè, bat chhōa lín chhut Ai-kı̍p tōe, bián-tit lín chòe in ê lô͘-po̍k; Góa bat chām-tn̄g lín ê taⁿ ê soh, hō͘ lín théng-sin lâi kiâⁿ.

14

Lín nā m̄ thiaⁿ-thàn Góa, m̄ siú Góa lóng-chóng ê kài-bēng,

15

lín nā khì-sak Góa ê lu̍t-lē, sim-lāi iàm-ò͘ⁿ Góa ê hoat-tō͘, tì-kàu bô kiâⁿ Góa it-chhè kài-bēng, pōe Góa ê iok,

16

Góa chiū beh án-ni khóan-thāi lín; Góa tiāⁿ-tio̍h beh hō͘ lín kiaⁿ-hiâⁿ, siau-sán, jia̍t-pīⁿ, ba̍k-chiu phah-pháiⁿ, sim iu-siong; lín beh khang-khang iā-chéng, in-ūi lín ê tùi-te̍k beh chia̍h i.

17

Góa beh tùi lín pìⁿ-bīn, lín beh pāi-tīn tī tùi-te̍k ê bīn-chêng; òan-hūn lín-ê beh kóan-hat lín; bô lâng tui-kóaⁿ, lín iā beh tô-cháu.

18

Lín in-ūi chiah ê tāi-chì nā iáu-kú m̄-thiaⁿ-thàn Góa, Góa chiū beh ūi-tio̍h lín ê chōe ke-thiⁿ chhit-pē chek-ho̍at lín.

19

Góa beh tōan-cho̍at lín ū sè-le̍k ê kiau-ngō͘; koh beh hō͘ lìn ê thiⁿ chhin-chhiūⁿ thih, lín ê tōe chhin-chhiūⁿ tâng.

20

Lín chhut-la̍t tio̍h-bôa beh khang-khang, in-ūi lín ê tōe bô chhut i ê thó͘-sán, tōe ê chhiū-ba̍k iā bô kiat i ê ké-chí.

21

Lín kiâⁿ tāi-chì nā kap Góa hóan-tùi, m̄-khéng thiaⁿ-thàn Góa, Góa chiū beh chiàu lín ê chòe ke-thiⁿ chhit-pē kàng chai-ē hō͘ lín.

22

Góa beh chhe iá-siù kàu lín ê tiong-kan, kā-chia̍h lín ê kiáⁿ-jî, thun-bia̍t lín ê cheng-siⁿ, hō͘ lín ê lâng-gia̍h kiám-chió, lín ê lō͘ pha-hng.

23

Lín in-ūi chiah-ê iáu-kú bô siū chek-tok lâi kui-ǹg Góa, kiâⁿ tāi-chì hóan-tùi Góa,

24

Góa iā beh kiâⁿ tāi-chì lâi hóan-tùi lín; Góa pún-sin beh in-ūi lín ê chōe, phah lín chhit-pē tāng.

25

Góa koh beh hō͘ to-kiàm lîm-kàu lín, pò-èng lín pōe-iok ê chōe; lín beh siū ûi-khùn tī siâⁿ-lāi; Góa beh kàng un-e̍k tī lín tiong-kan; iā beh kau lín tī tùi-te̍k ê chhiú.

26

Góa tōan-cho̍at lín só͘ óa-khò ê bí-niû; hit-sî beh ū cha̍p ê hū-jîn-lâng tī chı̍t ê lô͘ kā lín pek-piáⁿ, chhìn lín ê gia̍h ê chia̍h-mı̍h hō͘ lín, lín beh chia̍h, iā chia̍h bōe pá.

27

Lín in-ūi che it-chhè ê sū, nā iáu-kú m̄ thiaⁿ-thàn Góa, iā kiâⁿ tāi-chì hóan-tùi Góa,

28

Góa chiū beh hoat-chhut tōa siū-khì, kiâⁿ tāi-chì hóan-tùi lín; Góa pún-sin in-ūi lín ê chōe, chek-ho̍at lín chhit-pē ê tāng.

29

Koh lín beh chia̍h lín ê kiáⁿ ê bah; lín ê cha-bó͘-kiáⁿ ê bah lín iā beh chia̍h.

30

Góa iā beh húi-hōai lín ê soaⁿ-thâu-tôaⁿ, chhò lín ê jı̍t-siōng, chiong lín ê sin-si hiat tī lín ê ngó͘-siōng ê sin-chiūⁿ; Góa ê sim iā beh iàm-ò͘ⁿ lín.

31

Góa beh hō͘ lín ê siâⁿ pha-hng, hō͘ lín chiah ê sèng-só͘ hong-hòe; Góa iā bô beh phīⁿ lín ê hiuⁿ-liāu ê phang-bī.

32

Góa beh hō͘ tōe hong-hòe; lín ê tùi-te̍k khiā tī-hia ê, beh in-ūi án-ni lâi gông-ngia̍h.

33

Góa beh sì-sòaⁿ lín tī lia̍t-pang tiong; Góa iā beh pu̍ih to tui-kóaⁿ lín; lín ê tōe beh hong-hòe, lín ê siâⁿ beh pha-hng.

34

Lín tī tùi-te̍k ê tōe khiā-khí ê sî, lín ê tōe pha-hng beh hióng-siū i ê an-hioh; tī hit-sî tōe beh hioh-khùn, hióng-siū i ê an-hioh.

35

Tōe pha-hng jōa-kú, chiū beh tit-tio̍h an-hioh hiah-kú; in-ūi lín tiàm tī-hia ê jı̍t, lín chiah ê an-hioh ê kî i bô tit-tio̍h an-hioh.

36

Lūn-kàu lín só͘ chhun ê lâng, Góa beh hō͘ in tī tùi-te̍k ê tōe, sim kiaⁿ kàu hūn-khì; chhiū-hio̍h hō͘ hong chhe tín-tāng ê siaⁿ tui-kóaⁿ in, in beh tô-siám, ná chhin-chhiūⁿ tô-siám to-kiàm ê; bô lâng tui-kóaⁿ i, iā beh po̍ah-tó.

37

Bô lâng tui-kóaⁿ ê sî, in beh tāi-ke saⁿ-khoeh po̍ah-tó, chhin-chhiūⁿ tī to-kiàm ê thâu-chêng; lín tī tùi-te̍k ê bīn-chêng iā khiā bōe tiâu.

38

Lín beh bia̍t-bô tī lia̍t-pang-tiong, tùi-te̍k ê tōe beh thun-chia̍h lín.

39

Lín só͘ chhun ê lâng beh tī tùi-te̍k ê tōe, in-ūi ka-kī ê chōe lâi siau-bô; iā in-ūi chó͘-kong ê chōe kap in pîⁿ-pîⁿ siau-bô.

40

In beh jīn ka-kī ê chōe, kap in chó͘-kong ê chōe, chiū-sī in só͘ kan-hōan Góa ê chōe, koh jīn ka-kī kiâⁿ tāi-chì hóan-tùi Góa;

41

só͘-í Góa kiâⁿ tāi-chì hóan-tùi in, tòa in kàu tùi-te̍k ê tōe; hit-sî in bô siū kat-lé ê sim, nā ū khiam-pi, kam-gōan siū chōe ê hêng-ho̍at,

42

Góa beh kì-liām Góa kap Ngá-kok só͘ lı̍p ê iok, Góa beh kì-liām Góa kap Í-sat só͘ lı̍p ê iok, Góa kap A-pek-la̍h-hán só͘ lı̍p ê iok, Góa iā beh kì-liām chit ê tōe.

43

Hit ê tōe hō͘ in lī-khui, tit-tio̍h hióng-siū i ê an-hioh, tī i pha-hng, in bô tī-teh ê sî, koh in kam-gōan siū chōe ê hêng-ho̍at, in-ūi in khì-sak Góa ê hoat-tō͘, sim-lāi iàm-ò͘ⁿ Góa ê lu̍t-lē;

44

sui-jiân án-ni, in tī tùi-te̍k ê tōe ê sî, Góa iáu-kú bô khì-sak in, iā bô iàm-ò͘ⁿ in, lâi it-chīn bia̍t in, tì-kàu pōe Góa kap in só͘ lı̍p ê iok; in-ūi Góa sī Iâ-hô-hoa in ê Siōng-tè.

45

Góa iā beh ūi-tio̍h in ê iân-kò͘, kì-liām Góa kap in ê chó͘-kong só͘ lı̍p ê iok, chiū-sī Góa tī īⁿ-pang-lâng ê bīn-chêng chhōa in chhut Ai-kı̍p tōe ê, beh chòe in ê Siōng-tè-ê; Góa sī Iâ-hô-hoa.

46

Chiah ê lu̍t-lē, hoat-tō͘, kà-sī, chiū-sī Iâ-hô-hoa tī I pún-sin kap Í-sek-lia̍t lâng ê tiong-kan, tī Se-nái soaⁿ, thok Mô͘-se só͘ lı̍p ê.