Lō͘-ka 第 1 章 - 巴克禮全羅

1

In-ūi ū chōe-chōe lâng chiong lán tiong-kan í-keng chiâⁿ ê sū bat kia̍h pit lâi pâi-lia̍t chòe tōan;

2

chiū-sī chiàu hiah ê chòe tō-lí ê chhe-ēng ê lâng, tùi khí-thâu chhin-ba̍k khòaⁿ-kìⁿ, lâi thôan hō͘ lán ê;

3

góa í-keng tùi khí-thâu siông-sè chhâ-khó lóng-chóng ê sū, chiū siūⁿ tio̍h chiàu chhù-sū siá i, lâi kià hō͘ Thê-o-hui-lô tāi-jîn,

4

hō͘ lí chai só͘ ha̍k-sı̍p ê ê khak-sı̍t.

5

Tng Iû-thài ông Hi-lu̍t ê sî, ū sio̍k A-pí-a pan ê chè-si, miâ Sat-ka-lī-a; i ê bó͘ sī A-lûn ê hō͘-è, miâ kiò Í-lī-sa-pek.

6

In nn̄g lâng tī Siōng-tè ê bīn-chêng sī gī ê lâng, chiàu Chú it-chhè ê kài-bēng lé-gî lâi kiâⁿ, bô thang hiâm.

7

Chóng-sī in bô kiáⁿ, in-ūi Í-lī-sa-pek bōe hôai-īn, nn̄g lâng nî-hè iū-koh lāu.

8

Hit sî Sat-ka-lī-a chiàu i ê pan-lia̍t kiâⁿ chè-si ê chit tī Siōng-tè ê bīn-chêng,

9

chiàu chè-si chit-hūn ê lē thiu-chhiam tit-tio̍h jı̍p Chú ê tiān sio hiuⁿ;

10

tng sio hiuⁿ ê sî, peh-sìⁿ kui tīn tī gōa-bīn kî-tó.

11

Chú ê thiⁿ-sài chhut-hiān hō͘ i khòaⁿ, khiā tī hiuⁿ-tôaⁿ ê chiàⁿ-pêng.

12

Sat-ka-lī-a khòaⁿ-kìⁿ, chiū gông-ngia̍h, kiaⁿ-hiâⁿ.

13

Thiⁿ-sài tùi i kóng, Sat-ka-lī-a ah, bo̍h-tit kiaⁿ, in-ūi lí ê kî-tó í-keng thiaⁿ-kìⁿ lah; lí ê bó͘ Í-lī-sa-pek beh siⁿ kiáⁿ, lí tio̍h kā i hō miâ kiò Iok-hān.

14

Lí beh hoaⁿ-hí koh khòai-lo̍k; chōe-chōe lâng iā beh ūi-tio̍h i chhut-sì lâi hoaⁿ-hí.

15

In-ūi i tī Chú ê bīn-chêng beh chòe tōa, phû-tô chiú kap it-chhè ê chiú lóng bô lim; tùi lāu-bú ê thai chiū hō͘ Sèng Sîn chhiong-móa.

16

I beh hō͘ Í-sek-lia̍t hō͘-è chōe-chōe lâng o̍at-tńg lâi kui Chú, chiū-sī in ê Siōng-tè.

17

I beh ēng Í-lī-a ê sim-sîn kap châi-lêng kiâⁿ chòe-thâu tī Chú ê bīn-chêng, hō͘ chòe pē ê o̍at-tńg sim ǹg tī kiáⁿ, hō͘ pōe-ge̍k ê lâng thàn gī lâng ê tì-hūi, ūi-tio̍h Chú pī-pān ha̍p-ēng ê peh-sìⁿ.

18

Sat-ka-lī-a tùi thiⁿ-sài kóng, Góa tùi cháiⁿ-iūⁿ ōe chai chit ê sū ah? In-ūi góa í-keng lāu, góa ê bó͘ nî-hè iā lāu lah.

19

Thiⁿ-sài ìn i kóng, Góa chiū-sī Ka-pek-lia̍t, khiā tī Siōng-tè ê bīn-chêng ê, hōng-chhe kap lí kóng ōe, pò lí chiah ê hó siau-sit.

20

Taⁿ lí beh chēng-chēng bōe kóng ōe, kàu chiah ê sū tit-tio̍h chiâⁿ ê jı̍t, in-ūi lí m̄ sìn góa ê ōe, chiū-sī hiah-ê kàu kî beh èng-giām ê ōe.

21

Peh-sìⁿ thèng-hāu Sat-ka-lī-a, kî-kòai i kú-kú tī tiān-lāi;

22

kàu chhut-lâi bōe kap in kóng ōe, chiū chai i tī tiān-nı̍h ū khòaⁿ-kìⁿ īⁿ-siōng; i chiū tùi in pí ì-sù, kèng-jiân sī é-káu.

23

Kàu i chiàu chit-hūn ho̍k-sāi ê jı̍t móa, chiū tò-khì in tau.

24

Chiah ê jı̍t liáu-āu, i ê bó͘ Í-lī-sa-pek ū-sin, tiàm ba̍t gō͘ ge̍h jı̍t,

25

kóng, Chú tī khòaⁿ-kò͘ góa ê jı̍t khóan-thāi góa chhin-chhiūⁿ án-ni, lâi sóe góa ê kiàn-siàu tī lâng ê tiong-kan.

26

Kàu la̍k ge̍h jı̍t thiⁿ-sài Ka-pek-lia̍t hōng Siōng-tè só͘ chhe kàu Ka-lī-lī chı̍t ê siâⁿ, miâ kiò Ná-sat-le̍k,

27

chiū-kūn chı̍t ê chāi-sek-lú, sī í-keng phòe tiāⁿ-tio̍h hō͘ Tāi-pı̍t ke ê chı̍t lâng, miâ kiò Iok-sek; chit ê chāi-sek-lú miâ kiò Má-lī-a.

28

Thiⁿ-sài jı̍p-khì tùi i kóng, Tit-tio̍h tōa un ê lâng ah, pêng-an; Chú kap lí tī-teh.

29

Má-lī-a put-chí gông-ngia̍h i ê ōe, siūⁿ chit ê chhéng-an sī sím-mı̍h ì-sù.

30

Thiⁿ-sài kā i kóng, Má-lī-a ah, bo̍h-tit kiaⁿ, in-ūi lí tit-tio̍h Siōng-tè ê un-tián.

31

Taⁿ lí beh hôai-īn siⁿ kiáⁿ, tio̍h kā I hō miâ kiò Iâ-so͘.

32

I beh chòe tōa, chheng chòe Chì-kôaiⁿ-ê ê Kiáⁿ; Chú Siōng-tè beh ēng I ê chó͘ Tāi-pı̍t ê ūi hō͘ I.

33

I beh chòe ông tī Ngá-kok ê ke kàu tāi-tāi, I ê kok iā bô kiông-chīn.

34

Má-lī-a tùi thiⁿ-sài kóng, Góa bē ū kè lâng, cháiⁿ-iūⁿ beh ū chit ê sū?

35

Thiⁿ-sài ìn i kóng, Sèng Sîn beh lîm-kàu lí, Chì-kôaiⁿ-ê ê kôan-lêng beh tì-ìm lí; só͘-í tùi lí siⁿ-ê beh chheng chòe Sèng, chòe Siōng-tè ê Kiáⁿ.

36

Koh lí ê chhin-chhek Í-lī-sa-pek í-keng lāu, iā hôai-īn; pêng-sò͘ chheng chòe bōe hôai-īn ê, taⁿ ū-sin la̍k ge̍h jı̍t lah;

37

in-ūi Siōng-tè só͘ kóng ê ōe, bô chı̍t kù bô la̍t.

38

Má-lī-a kóng, Góa sī Chú ê lú-pī; gōan chiàu lí ê ōe èng-giām tī góa. Thiⁿ-sài chiū lī-khui i khì.

39

Tī chiah ê jı̍t ê tiong-kan Má-lī-a khí-sin, kóaⁿ-kín khì soaⁿ-tōe, kàu Iû-thài chı̍t ê siâⁿ,

40

jı̍p Sat-ka-lī-a ê chhù, chhéng-an Í-lī-sa-pek.

41

Í-lī-sa-pek chı̍t-ē thiaⁿ-kìⁿ Má-lī-a chhéng-an, thai-īn tī pak-tó͘ lāi chiū tiô-thiàu. Í-lī-sa-pek hō͘ Sèng Sîn chhiong-móa,

42

chiū tōa siaⁿ kóng, Chèng hū-jîn-lâng ê tiong-kan lí tit-tio̍h hok-khì, lí só͘ hôai-īn ê iā tit-tio̍h hok-khì.

43

Góa ê Chú ê lāu-bú lâi chiū-kūn góa, góa tùi tá-lo̍h ōe tit-tio̍h án-ni ah?

44

In-ūi lí chhéng-an ê siaⁿ chı̍t-ē jı̍p góa ê hī-khang, tī góa pak-tó͘ lāi ê thai chiū hoaⁿ-hí lâi tiô-thiàu.

45

Sìn ê hū-jîn-lâng ū hok-khì ah, in-ūi Chú só͘ kā i kóng ê ōe beh èng-giām.

46

Má-lī-a kóng, Góa ê sim chun-kèng Chú chòe tōa,

47

Góa ê sîn in-ūi kiù góa ê Siōng-tè lâi hoaⁿ-hí.

48

In-ūi I khòaⁿ-kò͘ lú-pī ê pi-bî; Tùi taⁿ í-āu bān sè-tāi beh kóng góa ū hok-khì.

49

In-ūi hit ê ū kôan-lêng ê ūi-tio̍h góa chòe tōa ê tāi-chì, I ê miâ sī sèng.

50

Kèng-ùi I ê lâng I lîn-bín in, Kàu tāi-tāi.

51

I bat ēng I ê chhiú chhut khùi-la̍t, Sim-chì kiau-ngō͘ ê lâng I ū kóaⁿ-sòaⁿ in.

52

Ū kôan-lêng ê lâng, I lut in ê ūi, Pi-bî ê lâng, I seng in chòe kôaiⁿ.

53

Iau ê lâng I ēng hó mı̍h hō͘ in chia̍h kàu pá, Pù ê lâng, I hō͘ in khang-khang tò-khì.

54

I hû-chō͘ I ê lô͘-po̍k Í-sek-lia̍t, Lâi kì-liām lîn-bín,

55

(Chiàu I tùi lán ê chó͘ só͘ kóng ê ōe), Lâi si-lo̍h hō͘ A-pek-la̍h-hán kap i ê hō͘-è kàu éng sè-tāi.

56

Má-lī-a kap i saⁿ-kap tòa iok-lio̍k ū saⁿ ge̍h jı̍t, chiah tò-khì in tau.

57

Í-lī-sa-pek seng-sán ê kî í-keng kàu, chiū siⁿ kiáⁿ.

58

Chhù-piⁿ chhin-chhek thiaⁿ-kìⁿ Chú tōa lîn-bín i, chiū kap i saⁿ-kap hoaⁿ-hí.

59

Kàu tē poeh jı̍t in lâi beh kā eⁿ-á kiâⁿ kat-lé, ài chiàu i ê lāu-pē ê miâ hō i chòe Sat-ka-lī-a.

60

I ê lāu-bú ìn kóng, Bô lah, tio̍h miâ i chòe Iok-hān.

61

In chiū tùi i kóng, Lí ê chhin-chhek tiong bô lâng hō chit ê miâ.

62

In chiū pí ì-sù mn̄g i ê lāu-pē, ài kā i hō sím-mı̍h miâ.

63

I ê lāu-pē thó siá-jī ê pán, siá kóng, I ê miâ sī Iok-hān. Tāi-ke kî-kòai.

64

Sat-ka-lī-a ê chhùi liâm-piⁿ khui, chı̍h iā tháu, chiū kóng ōe lâi o-ló Siōng-tè.

65

Sì-ûi khiā-khí ê lâng lóng kiaⁿ. Chiah ê it-chhè ê ōe piàn-piàn pò-iông tī Iû-thài ê soaⁿ-tōe.

66

Thiaⁿ-kìⁿ ê lâng lóng chiong chiah ê sū khǹg tī sim-nı̍h, kóng, Án-ni, chit-ê eⁿ-á chiong-lâi beh cháiⁿ-iūⁿ? In-ūi Chú ê chhiú kap i tī-teh.

67

I ê lāu-pē Sat-ka-lī-a chiū hō͘ Sèng Sîn chhiong-móa, chòe sian-ti lâi kóng,

68

Tio̍h o-ló Chú, Í-sek-lia̍t ê Siōng-tè, In-ūi I ū khòaⁿ-kò͘ I ê peh-sìⁿ lâi sio̍k-hôe i;

69

Thòe lán heng-khí chín-kiù ê kak, Tī I ê lô͘-po̍k Tāi-pı̍t ê ke.

70

Chiàu I tùi ū sè-kan í-lâi ēng I sèng ê sian-ti ê chhùi só͘ kóng ê,

71

Chiū-sī kiù lán thoat-lī tùi-te̍k kap kìⁿ-nā òan-hūn lán ê lâng ê chhiú,

72

Lâi kiâⁿ lîn-bín tī lán ê lia̍t-chó͘, Lâi kì-liām I sèng ê iok;

73

Chiū-sī kap lán ê chó͘ A-pek-la̍h-hán só͘ chiù ê chōa,

74

Hō͘ lán í-keng thoat-lī chiah ê tùi-te̍k ê chhiú,

75

Chı̍t-sì-lâng tī I ê bīn-chêng ēng sèng ēng gī bô kiaⁿ lâi ho̍k-sāi I.

76

Eⁿ-á ah, lí iā beh chheng chòe Chì-kôaiⁿ-ê ê sian-ti, In-ūi lí beh kiâⁿ tī Chú ê bīn-chêng lâi pī-pān I ê lō͘,

77

Hō͘ I ê peh-sìⁿ tùi tit-tio̍h sià-chōe, Chiū chai chín-kiù ê un,

78

Ūi-tio̍h lán ê Siōng-tè lîn-bín ê sim, Tùi án-ni hō͘ chá-khí sî ê jı̍t tùi téng-bīn lâi kàu tī lán,

79

Lâi chiò hiah-ê chē tī o͘-àm kap sí-ìm tiong ê lâng, Chhōa lán ê kha jı̍p pêng-an ê lō͘.

80

Eⁿ-á chiām-chiām tōa, sim-sîn jı̍t-jı̍t ióng-chòng; tiàm tī khòng-iá kàu hián-bêng tī Í-sek-lia̍t ê jı̍t.