Lō͘-ka 第 2 章 - 巴克禮全羅

1

Tng hit sî Kai-sat A-kó͘-sū-tok ū chhut chiàu, bēng-lēng thiⁿ-ē lóng chō ke-kah.

2

Che thâu chı̍t pái ê ke-kah sī Ku-lí-liú chòe Sū-lī-a chóng-tok ê sî lâi chòe ê.

3

Chèng lâng khì chō ke-kah, ta̍k lâng tò-khì pún siâⁿ.

4

Iok-sek ê sè-hē sio̍k tī Tāi-pı̍t ê ke, só͘-í tùi Ka-lī-lī ê Ná-sat-le̍k siâⁿ chiūⁿ-khì Iû-thài, kàu Tāi-pı̍t ê siâⁿ, miâ kiò Pek-lī-hêng ê, beh kap i só͘ phèng-tiāⁿ ê Má-lī-a saⁿ-kap chō ke-kah;

5

hit sî Má-lī-a í-keng ū sin-īn.

6

In tī hia ê sî seng-sán ê kî kàu.

7

Chiū siⁿ thâu-chiūⁿ kiáⁿ, ēng pò͘ pau I, hō͘ I khùn tī chô-nı̍h; in-ūi kheh-kóan bô só͘-chāi thang iông-ún in.

8

Hit tōe-hng ū kò͘-iûⁿ ê tòa tī soaⁿ-nı̍h, mî-sî chiú-kiⁿ kò͘ in ê iûⁿ-kûn.

9

Chú ê thiⁿ-sài khiā tī in ê sin-piⁿ, Chú ê êng-kng ûi-lûi chiò in; kò͘-iûⁿ ê tōa kiaⁿ.

10

Thiⁿ-sài kā in kóng, Bo̍h-tit kiaⁿ; in-ūi góa pò lín tōa hoaⁿ-hí ê hó siau-sit, hō͘ peh-sìⁿ lóng ū hūn;

11

in-ūi kin-á-jı̍t tī Tāi-pı̍t ê siâⁿ í-keng ūi-tio̍h lín siⁿ chı̍t ê Chín-kiù-ê, chiū-sī Chú Ki-tok.

12

Lín beh khòaⁿ-kìⁿ chı̍t ê eⁿ-á ēng pò͘ pau, khùn tī chô-nı̍h ê, chit-ê chiū-sī hō͘ lín chòe kì-hō.

13

Hut-jiân ū chōe-chōe thian-peng kap hit ê thiⁿ-sài saⁿ-kap tī-teh, o-ló Siōng-tè, kóng,

14

Tī ke̍k kôaiⁿ ê ūi êng-kng kui tī Siōng-tè, Tōe-chiūⁿ hô-pêng tī I só͘ hoaⁿ-hí ê lâng ê tiong-kan.

15

Chiah ê thiⁿ-sài lī-khui in chiūⁿ thiⁿ ê sî, kò͘-iûⁿ ê saⁿ-kap kóng, Taⁿ lán lâi khì Pek-lī-hêng, khòaⁿ só͘ chiâⁿ ê sū, chiū-sī Chú só͘ pò lán chai ê.

16

Chiū kín-kín khì, chhē-tio̍h Má-lī-a kap Iok-sek, koh khòaⁿ-kìⁿ eⁿ-á khùn tī chô-nı̍h.

17

Khòaⁿ-liáu, chiū chiong thiⁿ-sài só͘ tùi in kóng chit ê eⁿ-á ê sū pò lâng chai.

18

Thiaⁿ-kìⁿ ê lâng lóng kî-kòai kò͘-iûⁿ ê só͘ tùi in kóng ê sū.

19

To̍k-to̍k Má-lī-a chiong chiah ê ōe kì tiâu-tiâu, sim-lāi siông-siông teh siūⁿ.

20

Kò͘-iûⁿ ê tò-khì, ūi-tio̍h só͘ thiaⁿ-kìⁿ ê, só͘ khòaⁿ-kìⁿ ê, chiū-sī thiⁿ-sài só͘ tùi in kóng ê, lâi kui êng-kng o-ló Siōng-tè.

21

Kàu tē poeh jı̍t, kā eⁿ-á kiâⁿ kat-lé ê kî, chiū hō I ê miâ kiò Iâ-so͘, chiū-sī I bē tâu-thai ê sî thiⁿ-sài só͘ hō ê.

22

Chiàu Mô͘-se ê lu̍t-lē, in chheng-khì ê jı̍t í-keng móa, chiū phō eⁿ-á chiūⁿ Iâ-lō͘-sat-léng, beh hiàn hō͘ Chú,

23

(chiàu Chú ê lu̍t-lē só͘ kì-chài kóng, Kìⁿ-nā thâu-chiūⁿ ê ta-po͘-kiáⁿ beh chheng chòe sèng, kui tī Chú),

24

iā beh hiàn-chè, chiàu Chú ê lu̍t-lē só͘ kóng, Ēng chı̍t tùi ê ka-chui, á-sī nn̄g chiah chíⁿ-á-kiáⁿ.

25

Tú-tn̄g tī Iâ-lō͘-sat-léng ū chı̍t lâng, miâ kiò Se-biān; chit lâng gī koh kèng-khiân, pêng-sî him-bō͘ hit ê an-ùi Í-sek-lia̍t ê; Sèng Sîn tiàm tī i.

26

I bat tit-tio̍h Sèng Sîn chí-sī, chai i iáu-bē sí beh tāi-seng khòaⁿ-kìⁿ Chú ê Ki-tok.

27

I hō͘ Sèng Sîn kám-tōng chiū jı̍p tiān; tú-á Iâ-so͘ ê pē-bú phō eⁿ-á jı̍p-lâi, beh kā I chiàu lu̍t-hoat ê lē lâi kiâⁿ,

28

hit sî Se-biān ēng chhiú chih eⁿ-á, o-ló Siōng-tè kóng,

29

Chú ah, taⁿ chiàu lí ê ōe teh tháu-pàng lí ê lô͘-po̍k An-jiân kè-sì.

30

In-ūi góa ê ba̍k-chiu í-keng khòaⁿ-kìⁿ lí ê chín-kiù,

31

Chiū-sī lí só͘ pī-pān tī bān peh-sìⁿ ê bīn-chêng ê,

32

Chòe kng lâi chiò gōa-pang, Koh chòe lí Í-sek-lia̍t peh-sìⁿ ê êng-kng.

33

I ê pē kap I ê bú teh kî-kòai só͘ lūn eⁿ-á ê ōe;

34

Se-biān kā in chiok-hok, koh tùi I ê lāu-bú Má-lī-a kóng, Chit ê eⁿ-á siū siat-lı̍p beh hō͘ Í-sek-lia̍t tiong chōe-chōe lâng po̍ah-tó, chōe-chōe lâng khí-lâi, iā chòe siū piān-pok ê kì-hō;

35

(koh lí ka-kī ê sim iā beh ū kiàm chha̍k thàu-kè); hō͘ chōe-chōe lâng sim-lāi ê liām-thâu ōe lō͘-chhut.

36

Koh ū A-siat ê chi-phài, Hoat-lōe-le̍k ê cha-bó͘-kiáⁿ, A-ná, i sī chòe sian-ti, (nî-hè í-keng lāu, tùi chāi-sek-lú ê sî kè hō͘ tiōng-hu chhit nî kú,

37

chiū chiú-kóaⁿ poeh-cha̍p-sì nî), lóng bô lī-khui tiān, kìm-chia̍h kî-tó, mî-jı̍t ho̍k-sāi.

38

Tú-tú hit sî i chìn-chêng, chheng-siā Siōng-tè, tùi kìⁿ-nā him-bō͘ Iâ-lō͘-sat-léng tit-tio̍h sio̍k-hôe ê lâng kóng-khí chit ê eⁿ-á ê sū.

39

In chiàu Chú ê lu̍t-hoat kiâⁿ ta̍k hāng tāi-chì bêng-pe̍k, tò-khì Ka-lī-lī, kàu pún siâⁿ Ná-sat-le̍k.

40

Eⁿ-á chiām-chiām tōa, jı̍t-jı̍t ióng-chòng, tì-hūi chhiong-móa; Siōng-tè ê un-tián kap I tī-teh.

41

Ta̍k nî pôaⁿ-kè-choeh ê sî I ê pē-bú khì Iâ-lō͘-sat-léng.

42

Kàu I cha̍p-jī hè ê sî, chiàu choeh-kî ê lē lóng chiūⁿ Iâ-lō͘-sat-léng.

43

Choeh-kî í-keng bêng-pe̍k, in tò-khì ê sî, gín-ná Iâ-so͘ iáu tòa tī Iâ-lō͘-sat-léng; I ê pē-bú m̄ chai.

44

Phah-sǹg I tī tâng kiâⁿ ê lâng ê tiong-kan, kiâⁿ chı̍t jı̍t ê lō͘-chām; chiah tī chhin-chhek kap saⁿ-bat ê lâng ê tiong-kan chhē I.

45

Chhē bô tio̍h, chiū tò-tńg khì Iâ-lō͘-sat-léng chhē I.

46

Saⁿ jı̍t āu chhē-tio̍h I tī tiān-nı̍h, chē tī hiah ê sian-siⁿ ê tiong-kan, iā teh thiaⁿ, iā teh mn̄g.

47

Thiaⁿ I ê lâng lóng kî-kòai I ê chhang-miâ kap I ê ìn-tap.

48

Pē-bú khòaⁿ-kìⁿ I chiū gông-ngia̍h; I ê lāu-bú tùi I kóng, Kiáⁿ ah, lí siáⁿ-sū án-ni khóan-thāi góan? lí khòaⁿ, lí ê pē kap góa siong-sim chhē lí.

49

I kā in kóng, Siáⁿ-sū chhē góa? Kiám m̄ chai góa eng-kai tī góa ê Pē ê chhù mah?

50

In bōe hiáu-tit I só͘ kā in kóng ê ōe.

51

Iâ-so͘ chiū kap in lo̍h-khì kàu Ná-sat-le̍k, lâi sêng-sūn in. I ê lāu-bú chiong chiah ê ōe lóng kì tī sim-nı̍h.

52

Iâ-so͘ ê tì-hūi kap nî-hè ná ke-thiⁿ, Siōng-tè kap lâng ná thiàⁿ I.