Lō͘-ka 第 13 章 - 巴克禮全羅

1

Tng hit sî ū kúi-nā lâng tī-teh, chiong Ka-lī-lī lâng ê sū kā Iâ-so͘ kóng, chiū-sī Pí-lia̍p-to chiong in ê huih chham tī in ê seng-lé ê.

2

Iâ-so͘ ìn kóng, In-ūi chiah ê Ka-lī-lī lâng siū chit hō ê hāi, lín phah-sǹg in pí chèng Ka-lī-lī lâng khah ū chōe mah?

3

Góa kā lín kóng, M̄ sī; lín nā bô hóan-hóe, lóng beh chhin-chhiūⁿ án-ni bia̍t-bô.

4

Á-sī hit cha̍p-poeh lâng, hō͘ Se-lô-a ê thah tó-lo̍h-lâi teh-sí ê, lín phah-sǹg in pí lóng-chóng khiā-khí tī Iâ-lō͘-sat-léng ê lâng hōan-chōe khah tāng mah?

5

Góa kā lín kóng, M̄ sī; lín nā bô hóan-hóe, lóng beh chiàu án-ni bia̍t-bô.

6

I chiū siat chı̍t ê phì-jū kóng, Bó͘ lâng ū chı̍t châng bû-hoa-kó chhiū chai tī i ê phû-tô hn̂g-nı̍h; chiū lâi hit châng chhē ké-chí, chhē bô.

7

Chiah tùi kóan-hn̂g ê kóng, Lí khòaⁿ, góa liân-liân saⁿ nî lâi tùi chit châng bû-hoa-kó chhiū chhē ké-chí, chhē bô. Tio̍h kā i chhò-khí-lâi; siáⁿ-sū hō͘ i iā tìn só͘-chāi?

8

Ìn i kóng, Chú ah, kin-nî chhiáⁿ koh iông-ún i; thèng-hāu góa sì-ûi ku̍t-sang èng-pûi;

9

āu-lâi nā kiat ké-chí, chiū hó; nā bô, lí chiah kā i chhò-khí-lâi.

10

An-hioh-jı̍t Iâ-so͘ tī chı̍t ê hōe-tn̂g teh kà-sī lâng;

11

tú-tn̄g ū chı̍t ê hū-jîn-lâng, hōan-tio̍h siâ-sîn tì pīⁿ cha̍p-poeh nî kú, ún-ku lóng bōe chhun tı̍t.

12

Iâ-so͘ khòaⁿ-kìⁿ chiū kiò i kóng, Hū-jîn-lâng ah, taⁿ lí thoat-lī lí ê pīⁿ lah.

13

Chiū ēng siang-chhiú kā i hōaⁿ; i chek-sî chhun tı̍t, chiū kui êng-kng Siōng-tè.

14

Kóan hōe-tn̂g ê, in-ūi Iâ-so͘ tī an-hioh-jı̍t i-pīⁿ, chiū siū-khì, tùi chèng lâng ìn kóng, Ū la̍k jı̍t eng-kai tio̍h chòe kang, hit la̍k jı̍t kan thang lâi siū i; an-hioh-jı̍t m̄-thang.

15

Nā-sī Chú ìn i kóng, Ké-hó ê lâng ah, tī an-hioh-jı̍t lín kiám bô ta̍k lâng tùi chô-nı̍h tháu i ê gû á-sī lû, khan-khì chia̍h chúi mah?

16

Chit ê hū-jîn-lâng sī A-pek-la̍h-hán ê hō͘-è, hō͘ Sat-tàn pa̍k i í-keng cha̍p-poeh nî kú, kiám m̄ eng-kai tī an-hioh ê jı̍t tháu i ê kat mah?

17

Iâ-so͘ kóng án-ni, chiah ê tùi-te̍k lóng kiàn-siàu; chèng lâng in-ūi I só͘ kiâⁿ it-chhè êng-kng ê sū, lóng-chóng hoaⁿ-hí.

18

Iâ-so͘ chiū kóng, Siōng-tè ê kok chhin-chhiūⁿ sím-mı̍h? Góa beh ēng sím-mı̍h lâi pí-phēng i?

19

Sī chhin-chhiūⁿ chı̍t lia̍p kòa-chhài chí, lâng the̍h khì chèng tī i ka-kī ê hn̂g, chiū tōa châng chiâⁿ chòe chhiū, khong-tiong ê chiáu lâi hioh tī i ê ki.

20

Koh kóng, Góa beh ēng sím-mı̍h lâi pí-phēng Siōng-tè ê kok?

21

Sī chhin-chhiūⁿ kàⁿ, hū-jîn-lâng the̍h khì hē tī saⁿ táu ê mī-hún lāi, kàu lóng-chóng hoat-kàⁿ.

22

Iâ-so͘ keng-kè chiah ê siâⁿ chiah ê hiuⁿ-siā kà-sī lâng, iā ǹg Iâ-lō͘-sat-léng teh kiâⁿ.

23

Ū chı̍t lâng kā I kóng, Chú ah, tit-tio̍h kiù ê lâng sī chió mah?

24

Iâ-so͘ tùi in kóng, Tio̍h chīn-la̍t tùi o̍eh mn̂g jı̍p-khì; in-ūi góa kā lín kóng, beh ū chōe-chōe lâng kiû jı̍p iā bōe tit-tio̍h.

25

Kàu ke-chú khí-lâi koaiⁿ mn̂g, lín chiah khiā tī gōa-bīn, phah mn̂g, kóng, Chú ah, kā góan khui leh, I chiū beh ìn lín kóng, Lín tùi tó-ūi lâi, góa m̄ bat lín.

26

Lín chiū beh kóng, Góan bat tī lí ê bīn-chêng lim-chia̍h; lí iā bat tī góan ê koe-lō͘ kà-sī.

27

I beh kóng, Góa kā lín kóng, góa m̄ chai lín tùi tó-ūi lâi;

28

lín kiâⁿ put-gī ê lâng lóng tio̍h lī-khui góa. Lín teh-beh khòaⁿ-kìⁿ A-pek-la̍h-hán, Í-sat, Ngá-kok kap chèng sian-ti tī Siōng-tè ê kok, iā lín ka-kī siū kóaⁿ-chhut tī gōa-bīn; tng hit sî tī hia beh ū thî-khàu kā-gê chhiat-chhí.

29

Tùi tang tùi sai tùi lâm tùi pak, beh ū lâng lâi chē toh tī Siōng-tè ê kok.

30

Ū lō͘-bé ê beh chòe tāi-seng, iā ū tāi-seng ê beh chòe lō͘-bé.

31

Hit sî ū Hoat-lī-sài kúi-nā lâng lâi kā I kóng, Lí tio̍h lī-khui chia khì pa̍t ūi, in-ūi Hi-lu̍t ài beh thâi lí.

32

I kā in kóng, Lín khì kā hit chiah hô͘-lî kóng, Lí khòaⁿ, kin-á-jı̍t, bîn-á-jı̍t góa kóaⁿ kúi i-pīⁿ, kàu tē saⁿ jı̍t góa chiū ôan-chôan.

33

Sui-jiân án-ni, kin-á-jı̍t, bîn-á-jı̍t kap āu-jı̍t góa eng-kai tio̍h kiâⁿ; in-ūi put-kai ū sian-ti siū hāi-sí tī Iâ-lō͘-sat-léng ê gōa-bīn.

34

Iâ-lō͘-sat-léng ah, Iâ-lō͘-sat-léng ah, chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê, góa jōa chōe pái ài chū-chı̍p lí ê kiáⁿ-jî, chhin-chhiūⁿ koe-bú chū-chı̍p i ê koe-á tī sı̍t-ē; nā-sī lín m̄ ài.

35

Lí khòaⁿ, lín ê chhù pàng teh hō͘ lín; koh góa kā lín kóng, Lín koat-tòan bōe khòaⁿ-kìⁿ góa, thèng-hāu lín kóng, Tī Chú ê miâ lâi ê tit-tio̍h hok-khì.