Lō͘-ka 第 14 章 - 巴克禮全羅

1

An-hioh-jı̍t Iâ-so͘ jı̍p chı̍t ê Hoat-lī-sài thâu-lâng ê chhù, beh chia̍h; in teh tng-tán I.

2

Tú-tn̄g tī I ê bīn-chêng ū chı̍t ê kó͘-tiòng ê lâng.

3

Iâ-so͘ tùi kà lu̍t-hoat ê sian-siⁿ kap Hoat-lī-sài lâng kóng, An-hioh-jı̍t i-pīⁿ thang á m̄-thang?

4

In chēng-chēng. Iâ-so͘ khan hit ê lâng, i-hó i, hō͘ i khì.

5

Sòa tùi in kóng, Lín tiong-kan sím-mı̍h lâng ū lû á-sī gû tī an-hioh-jı̍t po̍ah-lo̍h kau-khut, iā bô liâm-piⁿ khan i khí-lâi mah?

6

Chiah ê ōe in bōe-ōe ìn.

7

Iâ-so͘ khòaⁿ hiah ê lâng-kheh kéng tōa ūi, chiū siat phì-jū tùi in kóng,

8

Lín hō͘ lâng chhiáⁿ khì hù hun-in ê iân-toh, bo̍h-tit chē tōa ūi, kiaⁿ-liáu pí lí khah chun-kùi ê iā hō͘ i chhiáⁿ, chiū chhiáⁿ lí kap chhiáⁿ i ê lâi kā lí kóng, Niū ūi hō͘ chit lâng;

9

lí chiū kiàn-siàu, thè-khì chē tī bé ūi.

10

To̍k-to̍k hō͘ lâng chhiáⁿ ê sî tio̍h khì chē bé ūi, chiū chhiáⁿ lí ê lâi kā lí kóng, Pêng-iú ah, chē khí-lâi; hit sî lí tī tâng toh ê lâng ê bīn-chêng chiū ū thé-biān.

11

In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i.

12

Iâ-so͘ iā kā chhiáⁿ I ê lâng kóng, Lí pān jı̍t-tàu tǹg á-sī ê-hng tǹg, m̄-thang chhiáⁿ lí ê pêng-iú, á-sī hiaⁿ-tī, á-sī chhin-chhek, á-sī hó-gia̍h ê chhù-piⁿ, kiaⁿ-liáu in tò chhiáⁿ lí, lí chiū siū pò-tap.

13

Nā-sī lí pān iân-toh ê sî, tio̍h chhiáⁿ sòng-hiong ê, phòa-siùⁿ ê, pái-kha ê, chhiⁿ-mî ê; lí chiū ū hok-khì;

14

in-ūi in bô thang pò-tap lí; chiū tī gī lâng koh-o̍ah ê sî lí beh tit-tio̍h pò-tap.

15

Tâng toh ê chı̍t lâng thiaⁿ-kìⁿ chiah ê ōe, chiū kā I kóng, Beh tī Siōng-tè ê kok chia̍h ê, ū hok-khì ah.

16

Nā-sī Iâ-so͘ kā i kóng, Ū chı̍t lâng pān tōa iân-sia̍h, só͘ chhiáⁿ ê chōe-chōe.

17

Kàu beh chia̍h ê sî, chhe i ê lô͘-po̍k kā só͘ chhiáⁿ ê lâng kóng, Tio̍h lâi, pah hāng mı̍h piān lah.

18

Chèng lâng chiū tâng chı̍t iūⁿ sim the-sî. Thâu-chı̍t-ê kā i kóng, Góa ū bóe hn̂g, ko͘-put-chiong tio̍h khì khòaⁿ i; chhiáⁿ hō͘ góa sî.

19

Koh chı̍t lâng kóng, Góa ū bóe gû gō͘ tùi, beh khì giām-khòaⁿ, chhiáⁿ hō͘ góa sî.

20

Koh chı̍t ê kóng, Góa ū chhōa bó͘, chiah bōe tit lâi.

21

Lô͘-po̍k tò-khì chiong chiah ê sū kā i ê chú-lâng kóng. Ke-chú siū-khì, kā i ê lô͘-po̍k kóng, Kín-kín chhut-khì kàu siâⁿ-lāi ê tōa koe sió hāng, chhōa hiah ê sòng-hiong ê, phòa-siùⁿ ê, chhiⁿ-mî ê, pái-kha ê lâi chia.

22

Lô͘-po̍k kóng, Chú ah, lí só͘ bēng-lēng ê í-keng kiâⁿ i; nā-sī iáu-kú ū chhun ūi.

23

Chú-lâng tùi i ê lô͘-po̍k kóng, Chhut-khì lō͘-nı̍h kap lî-pa piⁿ bián-kióng lâng jı̍p-lâi, hō͘ góa ê chhù móa-móa.

24

In-ūi góa kā lín kóng, Chêng só͘ chhiáⁿ ê bô chı̍t lâng ōe tit chia̍h góa ê iân-sia̍h.

25

Chōe-chōe lâng kap I tâng kiâⁿ, I chiū o̍at-kè-lâi, tùi in kóng,

26

Nā ū lâng chiū-kūn góa, iā bô òan-hūn i ê pē-bú, bó͘-kiáⁿ, hiaⁿ-tī, chí-bē, í-kı̍p ka-kī ê sìⁿ-miā, chiū bōe-ōe chòe góa ê ha̍k-seng.

27

Bô giâ ka-kī ê sı̍p-jī-kè lâi tè góa ê, iā bōe-ōe chòe góa ê ha̍k-seng.

28

Lín tiong-kan sím-mı̍h lâng beh khí thah, kiám bô tāi-seng chē-teh, lâi sǹg hit ê só͘-hùi, khòaⁿ ōe khí kàu chiâⁿ bōe?

29

Kiaⁿ-liáu kiám-chhái hē tōe-ki, iā bōe-ōe khí kàu hó; chiū khòaⁿ-kìⁿ ê lâng lóng thí-chhiò i, kóng,

30

Chit ê lâng ū tāng kang, iā bōe khí kàu hó.

31

Á-sī sím-mı̍h ông chhut-lâi beh kap pa̍t ê ông kau-chiàn, kiám bô tāi-seng chē-teh chham-bô͘; khòaⁿ ōe ēng chı̍t-bān peng tí-te̍k hit-ê chhōa nn̄g-bān peng lâi kong-kek i ê, á bōe?

32

Nā bōe, chiū thàn i iáu hn̄g, chhe sù-chiá khì kap i káng hô.

33

Án-ni, lín tiong-kan kìⁿ-nā bô pàng-sak it-chhè só͘ ū ê, bōe-ōe chòe góa ê ha̍k-seng.

34

Taⁿ iâm sī hó, iâm nā sòa sit-bī, beh ēng sím-mı̍h ho̍k-tò i ê bī?

35

Iā bōe lo̍h hn̂g tit, iā bōe chòe pûi tit; chí ū hiat tī gōa-bīn. Ū hī-khang thang thiaⁿ ê, tio̍h thiaⁿ.