Lō͘-ka 第 16 章 - 巴克禮全羅

1

Iâ-so͘ koh tùi ha̍k-seng kóng, Bó͘ ê hó-gia̍h lâng ū chı̍t ê kóan-ke ê; ū lâng chiong i phòa-hùi chú-lâng ê gia̍p tùi i ê chú-lâng kò i.

2

Chú-lâng kiò i lâi kā i kóng, Góa só͘ thiaⁿ-kìⁿ lí chit ê tāi-chì sī cháiⁿ-iūⁿ? Taⁿ lí kóan-ke ê sū tio̍h kap góa chheng-chhó, in-ūi lí bōe-ōe iû-gôan chòe kóan-ke.

3

Kóan-ke ê sim-lāi siūⁿ kóng, Chú-lâng lut góa kóan-ke ê chit, góa beh cháiⁿ-iūⁿ ah? kia̍h tî-thâu bô khùi-la̍t, chòe khit-chia̍h mī kiàn-siàu.

4

Taⁿ góa chai só͘ tio̍h chòe lah, kàu lut kóan-ke ê chit, hit sî lâng chiah beh chiap-la̍p góa jı̍p in ê ke.

5

I chiū kiò khiàm i chú-lâng ê chè ê, chı̍t-ê chı̍t-ê lâi; kā thâu-chı̍t-ê kóng, Lí khiàm góa ê chú-lâng jōa chōe?

6

Ìn kóng, Iû, chı̍t-pah tháng. Chiū kā i kóng, The̍h lí ê siàu, kín-kín chē, siá gō͘-cha̍p.

7

Koh kā pa̍t-ê kóng, Lí khiàm jōa chōe? I kóng, Be̍h, chı̍t-pah chio̍h. Kā i kóng, The̍h lí ê siàu, siá poeh-cha̍p.

8

Chú-lâng chiū o-ló chit ê put-gī ê kóan-ke, ūi-tio̍h i só͘ chòe ū tì-sek; in-ūi chit sè-kan ê lâng ūi-tio̍h sè-chêng lâi tô͘-bô͘, pí kng-bêng ê lâng khah ū tì-sek.

9

Góa iā kā lín kóng, Tio̍h ēng put-gī ê chîⁿ-châi kiat-kau pêng-iú, kàu chîⁿ-châi liáu-khì ê sî, in chiah beh chiap-la̍p lín jı̍p éng-óan ê tiùⁿ-pâng.

10

Tī chì sió-khóa ê sū chīn-tiong ê, tī tōa ê iā chīn-tiong; tī chì sió-khóa ê sū put-gī ê, tī tōa ê iā put-gī.

11

Tī put-gī ê chîⁿ-châi lín nā bô chīn-tiong, chī-chūi beh ēng chin-ê thok-tiōng lín?

12

Koh tī sio̍k pa̍t lâng ê, lín nā bô chīn-tiong, chī-chūi beh ēng sio̍k lín ê hō͘ lín ah?

13

Chı̍t ê lô͘-po̍k bōe-ōe ho̍k-sāi nn̄g ê chú-lâng; in-ūi i ōe òan-hūn chit-ê, thiàⁿ hit-ê; á-sī ōe tùi-tiōng chit-ê, khòaⁿ-khin hit-ê; lín bōe-ōe ho̍k-sāi Siōng-tè sòa ho̍k-sāi chîⁿ-châi.

14

Hoat-lī-sài lâng sī tham châi ê, thiaⁿ-kìⁿ chiah ê lóng-chóng ê ōe, chiū léng-chhiò I.

15

Iâ-so͘ kā in kóng, Lín sī tī lâng ê bīn-chêng ka-kī chheng-chòe-gī ê, nā-sī Siōng-tè chai lín ê sim; in-ūi tī lâng ê tiong-kan só͘ chhui-chun ê tī Siōng-tè ê bīn-chêng sī khó-ò͘ⁿ.

16

Lu̍t-hoat kap sian-ti kàu Iok-hān; tùi hit sî Siōng-tè kok ê hok-im thôan-pò, lâng chīn la̍t lâi jı̍p.

17

Thiⁿ tōe ê hòe-bô pí lu̍t-hoat chı̍t u̍ih ê sit-lo̍h sī khah khòai.

18

Kìⁿ-nā lî i ê bó͘ lâi chhōa pa̍t lâng sī kiâⁿ kan-îm; chhōa pa̍t lâng só͘ lî ê, iā sī kiâⁿ kan-îm.

19

Ū chı̍t ê pù lâng chhēng chí-sek kap iù-tōe pò͘ ê i-chiûⁿ, ta̍k jı̍t chhia-hôa iàn-lo̍k;

20

koh ū chı̍t ê khit-chia̍h miâ Lia̍p-sat-lō͘, piàn-sin siⁿ-thiàⁿ;

21

lâng hē i tī pù lâng ê tōa-mn̂g-kháu, ài chiong pù lâng toh-kha só͘ ka-la̍uh ê lâi tō͘-pá; káu iā lâi chī i siⁿ-thiàⁿ ê ūi.

22

Sòng-hiong lâng sí, hō͘ thiⁿ-sài hû i kàu A-pek-la̍h-hán ê heng-chêng; pù lâng iā sí, sòa bâi-chòng.

23

Tī im-kan, thòng-khó͘ ê tiong-kan, kia̍h ba̍k hn̄g-hn̄g khòaⁿ-kìⁿ A-pek-la̍h-hán, koh Lia̍p-sat-lō͘ tī i ê heng-chêng.

24

Chiū kiò kóng, Góa ê chó͘ A-pek-la̍h-hán ah, khó-lîn góa, chhe Lia̍p-sat-lō͘ ēng chńg-thâu-á bé ùn chúi lâi liâng góa ê chı̍h, in-ūi góa tī chit hé-iām tiong chin chhiⁿ-chhám.

25

Nā-sī A-pek-la̍h-hán kóng, Kiáⁿ ah, tio̍h kì-tit lí chāi-siⁿ hióng-siū lí ê hok-khì, Lia̍p-sat-lō͘ siū-tio̍h kan-khó͘; taⁿ i tī chia tit-tio̍h an-ùi, iā lí siū chhiⁿ-chhám.

26

M̄-nā án-ni, tī góan kap lín ê tiong-kan ū tōa chhim-ian keh-teh, tì-kàu beh tùi chia kè-khì lín hia bōe-ōe, tùi hia kè-lâi góan chia iā bōe-ōe.

27

I chiū kóng, Kì-jiân án-ni, kiû chó͘ lí chhe Lia̍p-sat-lō͘ khì góan pē ê chhù;

28

in-ūi góa ū gō͘ ê hiaⁿ-tī, hō͘ i tùi in chòe kan-chèng, bián-tit in iā kàu chit ê thòng-khó͘ ê só͘-chāi.

29

A-pek-la̍h-hán kóng, In ū Mô͘-se kap hiah ê sian-ti, thang thiaⁿ in.

30

Ìn kóng, Góa ê chó͘ A-pek-la̍h-hán ah, bōe lah; nā ū lâng tùi sí-lâng tiong khì chhē in, in chiū beh hóan-hóe.

31

A-pek-la̍h-hán kā i kóng, In nā m̄ thiaⁿ Mô͘-se kap sian-ti, chiū ū lâng tùi sí-lâng tiong koh-o̍ah, in iā m̄ siū khó͘-khǹg.