Lō͘-ka 第 17 章 - 巴克禮全羅

1

Iâ-so͘ koh tùi I ê ha̍k-seng kóng, That-gāi lâng ê sū bōe bián-tit ū; chóng-sī khòaⁿ tùi chī-chūi lâi, hit lâng ū chai-ē!

2

Siat-sú hō͘ chiah ê bî-sòe ê chı̍t-ê siū that-gāi, khah hó hō͘ lâng ēng tōa chio̍h-bō tiàu i ê ām-kún, kā i hiat-lo̍h hái.

3

Lín tio̍h ka-kī kín-sīn; nā lín ê hiaⁿ-tī hōan-chōe, tio̍h chek-pī i; i nā hóan-hóe, tio̍h sià-bián i.

4

Nā-sī i chı̍t jı̍t tek-chōe lí chhit pái, iā chhit pái o̍at-tńg kā lí kóng, Góa hóan-hóe lah, lí chiū tio̍h sià-bián i.

5

Sù-tô͘ kā Chú kóng, Ke-thiⁿ góan ê sìn.

6

Chú kóng, Lín nā ū sìn chhin-chhiūⁿ chı̍t lia̍p ê kòa-chhài chí, chiū bēng-lēng chit châng sng-châi chhiū kóng, Pu̍ih lí ê kun khì chai tī hái-nı̍h, i iā beh sūn-thàn lí.

7

Lín tiong-kan sím-mı̍h lâng ū lô͘-po̍k teh choh-hn̂g á-sī kò͘-iûⁿ, tùi hn̂g-nı̍h tò-lâi, kiám beh kā i kóng, Chek-sî chē lâi chia̍h mah?

8

Kiám bô beh kā i kóng, Pī-pān hō͘ góa chia̍h, hâ tòa lâi ho̍k-sāi góa; thèng-hāu góa lim-chia̍h soah, lí chiah thang lim-chia̍h mah?

9

Lô͘-po̍k kiâⁿ só͘ bēng-lēng ê, kiám ū kā i seh-siā mah?

10

Án-ni, lín í-keng it-chīn kiâⁿ só͘ bēng-lēng lín ê, chiū tio̍h kóng, Góan sī bô lī-ek ê lô͘-po̍k, kiâⁿ só͘ eng-kai kiâⁿ ê nā-tiāⁿ.

11

Iâ-so͘ khì Iâ-lō͘-sat-léng ê sî, tùi Sat-má-lī-a kap Ka-lī-lī kau-kài keng-kè.

12

Jı̍p chı̍t ê hiuⁿ-siā ê sî, ū cha̍p ê thái-ko ê tú-tio̍h I, hn̄g-hn̄g teh khiā,

13

chhut siaⁿ kóng, Iâ-so͘ sian-siⁿ, lîn-bín góan.

14

Iâ-so͘ khòaⁿ-kìⁿ, kā in kóng, Lín khì chiong pún-sin hō͘ chè-si giām. In khì ê sî chiū tit-tio̍h chheng-khì.

15

Kî-tiong chı̍t lâng khòaⁿ-kìⁿ ka-kī í-keng hó, chiū tò-tńg-lâi tōa siaⁿ o-ló Siōng-tè,

16

phak-lo̍h tī Iâ-so͘ ê kha-chêng, lâi kám-siā I; chit lâng sī Sat-má-lī-a lâng.

17

Iâ-so͘ ìn kóng, Cha̍p lâng kiám bô lóng tit-tio̍h chheng-khì mah? hit káu-ê tī tá-lo̍h?

18

Chit-ê pa̍t cho̍k ê lâng í-gōa, iáu bô pa̍t lâng tò-tńg-lâi kui êng-kng Siōng-tè mah?

19

Chiū kā hit lâng kóng, Khí-lâi chòe lí khì, lí ê sìn ū kiù lí.

20

Hoat-lī-sài lâng mn̄g Siōng-tè ê kok tī-sî ōe lîm-kàu. Iâ-so͘ ìn kóng, Siōng-tè ê kok lîm-kàu m̄ sī hián-jiân;

21

iā bōe kóng-tit, Tī chia, á-sī, Tī hia, in-ūi Siōng-tè ê kok sī tī lín lāi-tiong.

22

Koh tùi ha̍k-seng kóng, Sî-jı̍t beh kàu, lín chin ài khòaⁿ-kìⁿ Jîn-chú ê chı̍t jı̍t, iā bô thang khòaⁿ-kìⁿ.

23

Beh ū lâng kā lín kóng, Lí khòaⁿ, tī hia! Lí khòaⁿ, tī chia! lín bo̍h-tit khì, bo̍h-tit tè in.

24

In-ūi chhin-chhiūⁿ sih-nà tùi thiⁿ chit piⁿ teh sih, kng chiò kàu thiⁿ hit piⁿ, Jîn-chú tī I ê jı̍t iā beh án-ni.

25

Chóng-sī I tek-khak tio̍h tāi-seng siū chōe-chōe kan-khó͘, iā hō͘ chit sè-tāi khì-sak.

26

Chhin-chhiūⁿ tī Ná-a ê jı̍t cháiⁿ-iūⁿ, tī Jîn-chú ê jı̍t iā beh án-ni.

27

In teh lim-chia̍h, teh kè-chhōa, kàu Ná-a jı̍p tōa chûn ê jı̍t, tōa chúi kàu, bia̍t in chèng lâng.

28

Koh chhin-chhiūⁿ tī Lô-tek ê jı̍t, in teh lim-chia̍h, bóe-bōe, chèng-choh, khí-chhù;

29

nā-sī Lô-tek chhut Só͘-to-má ê jı̍t, tùi thiⁿ lo̍h hé kap jiû-n̂g, bia̍t chèng lâng;

30

tī Jîn-chú hián-hiān ê jı̍t iā beh án-ni.

31

Tng hit jı̍t tī chhù-téng ê, i ê mı̍h tī chhù-lāi, bo̍h-tit lo̍h-lâi the̍h i; tī hn̂g-nı̍h ê iā bo̍h-tit tò-tńg-lâi.

32

Tio̍h kì-tit Lô-tek ê bó͘.

33

Kìⁿ-nā tì-ì kò͘ i ê sìⁿ-miā ê, beh sit-lo̍h i; kìⁿ-nā sit-lo̍h i ê, beh pó-chôan i.

34

Góa kā lín kóng, Hit mî nn̄g lâng siāng chhn̂g, chı̍t-ê chhú-khì, chı̍t-ê pàng-khì.

35

Nn̄g ê hū-jîn-lâng tâng oe bō, chı̍t-ê chhú-khì, chı̍t-ê pàng-khì.

36

37

In ìn I kóng, Chú ah, tī sím-mı̍h só͘-chāi ah? I kā in kóng, Sin-si nā tī hia, eng-chiáu iā beh chū-chı̍p tī hia.