Lō͘-ka 第 18 章 - 巴克禮全羅

1

Iâ-so͘ siat chı̍t ê phì-jū, kà-sī in tio̍h siông-siông kî-tó, m̄-thang ià, kóng,

2

Bó͘ siâⁿ ū chı̍t ê sím-phòaⁿ koaⁿ, bô kiaⁿ Siōng-tè iā bô tùi-tiōng lâng.

3

Tī hit ê siâⁿ-lāi ū chı̍t ê chiú-kóaⁿ lâng ta̍uh-ta̍uh khì kìⁿ i kóng, Ū lâng kap góa chòe tùi-te̍k, kiû lí thòe góa sin-oan.

4

I kú-kú bô beh; āu-lâi siūⁿ kóng, Góa sui-jiân bô kiaⁿ Siōng-tè, bô tùi-tiōng lâng;

5

nā-sī in-ūi chit ê chiú-kóaⁿ lâng ta̍uh-ta̍uh lâi kiáu-jiáu, góa beh thòe i sin-oan, bián-tit i éng-éng lâi khó͘-chhó͘ góa.

6

Chú koh kóng, Lín tio̍h thiaⁿ chit ê put-gī ê koaⁿ só͘ kóng ê.

7

Hô-hòng Siōng-tè kéng ê peh-sìⁿ mî-jı̍t âu-kiò I, I iā ūi-tio̍h in khoan-iông, kiám bô beh thòe in sin-oan mah?

8

Góa kā lín kóng, I beh kín-kín thòe in sin-oan. Sui-jiân án-ni, Jîn-chú kàu ê sî, kiám beh tú-tio̍h sè-kan ū sìn mah?

9

Ū óa-khò ka-kī chòe gī lâi khòaⁿ-khin pa̍t lâng ê, Iâ-so͘ siat chı̍t ê phì-jū kā in kóng,

10

Ū nn̄g lâng chiūⁿ tiān beh kî-tó, chı̍t-ê sī Hoat-lī-sài lâng, chı̍t-ê sī thiu-hiòng ê.

11

Hoat-lī-sài lâng khiā-teh, ka-kī kî-tó kóng, Siōng-tè ah, góa kám-siā lí, in-ūi góa bô chhin-chhiūⁿ pa̍t lâng, le̍k-sek, put-gī, kan-îm, iā bô chhin-chhiūⁿ chit ê thiu-hiòng ê.

12

Góa chı̍t lé-pài kìm-chia̍h nn̄g pái; koh chiong hōan só͘ tit-tio̍h ê, cha̍p hūn thiu chı̍t hūn.

13

Nā-sī hit ê thiu-hiòng ê hn̄g-hn̄g khiā-teh, liân kia̍h ba̍k ǹg thiⁿ iā m̄ káⁿ; kan-ta tûi heng kóng, Siōng-tè ah, lîn-bín góa chit-ê ū chōe ê lâng.

14

Góa kā lín kóng, Chit ê lâng tò-khì i ê chhù tit-tio̍h chheng-chòe-gī iâⁿ-kè hit ê lâng. In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i.

15

Ū lâng tòa eⁿ-á chiū-kūn Iâ-so͘, beh hō͘ I bong in; Ha̍k-seng khòaⁿ-kìⁿ chiū chek-pī in.

16

Nā-sī Iâ-so͘ kiò hiah ê eⁿ-á lâi kóng, Iông-ún sòe-kiáⁿ chiū-kūn góa, bo̍h-tit kìm i; in-ūi Siōng-tè ê kok sī chit hō lâng ê.

17

Góa sı̍t-chāi kā lín kóng, Hōan-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-tòan bōe tit thang jı̍p-khì.

18

Ū chı̍t ê chòe-koaⁿ ê mn̄g I kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-o̍ah?

19

Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chı̍t-ê hó, to̍k-to̍k Siōng-tè nā-tiāⁿ.

20

Chiah ê kài lí í-keng chai, Bo̍h-tit kan-îm, Bo̍h-tit thâi-sí lâng, Bo̍h-tit thau-the̍h, Bo̍h-tit lām-sám chòe kan-chèng, Tio̍h kèng lí ê pē-bú.

21

I chiū kóng, Chiah-ê góa tùi sòe-hàn lóng siú i lah.

22

Iâ-so͘ thiaⁿ-kìⁿ chiū kā i kóng, Lí iáu khiàm chı̍t hāng, tio̍h bōe lí it-chhè só͘ ū ê lâi hō͘ sòng-hiong lâng, chiū beh ū châi-pó tī thiⁿ-nı̍h; koh lâi tè góa.

23

Hit lâng thiaⁿ-kìⁿ chiah ê ōe chin iu-būn, in-ūi i chin hó-gia̍h.

24

Iâ-so͘ khòaⁿ-kìⁿ i chiū kóng, Pù lâng jı̍p Siōng-tè ê kok oh--ah.

25

In-ūi lo̍k-tô chhng-kè chiam-phīⁿ, pí pù lâng jı̍p Siōng-tè ê kok, iáu khah khòai.

26

Thiaⁿ-kìⁿ ê lâng kóng, Án-ni, chī-chūi ōe tit-tio̍h kiù ah?

27

Iâ-so͘ kóng, Chāi lâng só͘ bōe-ōe ê, chāi Siōng-tè sī ōe.

28

Pí-tek kóng, Góan í-keng pàng-sak ka-kī só͘ ū ê lâi tè lí.

29

Iâ-so͘ kā in kóng, Góa sı̍t-chāi kā lín kóng, Bô ū lâng ūi-tio̍h Siōng-tè ê kok lâi pàng-sak chhù-the̍h, á-sī bó͘, á-sī hiaⁿ-tī, á-sī pē-bú, á-sī kiáⁿ-jî,

30

iā bô tī chit-sì tit-tio̍h kúi-nā pē khah chōe, lâi-sè tit-tio̍h éng-o̍ah.

31

Iâ-so͘ tòa cha̍p-jī ê ha̍k-seng, tùi in kóng, Lí khòaⁿ, lán chiah-ê chiūⁿ Iâ-lō͘-sat-léng, kìⁿ-nā tùi sian-ti só͘ kì ê lóng beh èng-giām tī Jîn-chú.

32

In-ūi I beh siū ké-sàng hō͘ īⁿ-pang lâng, koh siū hì-lāng lêng-jio̍k phùi-nōa;

33

in beh piⁿ-phah lâi hāi-sí I; tē saⁿ jı̍t I beh koh-o̍ah.

34

Hiah ê tāi-chì ha̍k-seng bô chı̍t hāng ōe hiáu-tit; koh chit ê ōe tùi tī in sī ún-ba̍t, in iā m̄ chai I só͘ kóng ê.

35

Kūn Iâ-l?-ko ê sî, ū chı̍t ê chhiⁿ-mî ê chē tī lō͘-piⁿ teh khit-chia̍h;

36

thiaⁿ-kìⁿ chōe-chōe lâng keng-kè, chiū mn̄g sī sím-mı̍h tāi-chì.

37

Lâng kā i kóng, Ná-sat-le̍k Iâ-so͘ tùi chia kè.

38

I chiū âu-kiò kóng, Tāi-pı̍t ê hō͘-è, Iâ-so͘, khó-lîn góa.

39

Thâu-chêng kiâⁿ ê lâng chek-pī i, kah i tio̍h chēng-chēng; nā-sī i it-hoat tōa siaⁿ âu-kiò kóng, Tāi-pı̍t ê hō͘-è ah, khó-lîn góa.

40

Iâ-so͘ thêng-kha, kah lâng khan i lâi; í-keng kūn-óa, chiū mn̄g i kóng,

41

Ài góa kā lí chòe sím-mı̍h? I chiū kóng, Chú ah, góa ài tit-tio̍h khòaⁿ-kìⁿ.

42

Iâ-so͘ kā i kóng, Lí thang tit-tio̍h khòaⁿ-kìⁿ, lí ê sìn ū kiù lí lah.

43

I liâm-piⁿ tit-tio̍h khòaⁿ-kìⁿ, chiū tè Iâ-so͘ kui êng-kng Siōng-tè; chèng lâng khòaⁿ-kìⁿ iā lóng kui êng-kng Siōng-tè.