Lō͘-ka 第 21 章 - 巴克禮全羅

1

Iâ-so͘ kia̍h ba̍k khòaⁿ-kìⁿ chiah ê hó-gia̍h lâng chiong in só͘ hiàn ê hiat-lo̍h khò͘-pâng.

2

Koh khòaⁿ-kìⁿ chı̍t ê sòng-hiong ê chiú-kóaⁿ lâng chiong nn̄g ê pòaⁿ-lî hiat-lo̍h-khì.

3

Chiū kóng, Góa chin-sı̍t kā lín kóng, Chit ê sòng-hiong ê chiú-kóaⁿ lâng só͘ hiat ê pí chèng lâng só͘ hiat ê khah chōe.

4

In-ūi chèng lâng sī tùi in ū chhun ê hiat-lo̍h-khì hiàn; nā-sī chit ê hū-jîn-lâng sī tùi i ê bô kàu ê it-chīn hiat i só͘ óa-khò lâi o̍ah ê.

5

Ū lâng kóng-khí tiān-tn̂g sī ēng hó chio̍h kap só͘ hiàn ê mı̍h lâi chng-thāⁿ,

6

hit sî Iâ-so͘ kóng, Lín só͘ khòaⁿ-kìⁿ hiah ê mı̍h, jı̍t-chí beh kàu, tī chia beh bô chı̍t tè chio̍h lâu tī chio̍h ê téng-bīn, iā bô chhia-lo̍h-khì.

7

In chiū mn̄g I kóng, Sian-siⁿ ah, án-ni sím-mı̍h sî beh ū hiah ê sū? Koh chiah ê sū beh chiâⁿ ê sî, ū sím-mı̍h tiāu-thâu ah?

8

Iâ-so͘ kóng, Tio̍h kín-sīn bián-tit siū bê-he̍k. In-ūi beh ū chōe-chōe lâng thok góa ê miâ lâi kóng, Góa chiū-sī Ki-tok; koh kóng, Sî kūn lah; lín m̄-thang khì tè in.

9

Lín beh thiaⁿ-kìⁿ kau-chiàn kap jiáu-lōan ê sū, hit sî m̄-bián kiaⁿ-hiâⁿ. In-ūi chiah ê tāi-chì tek-khak tāi-seng ū; chóng-sī bo̍at-kî bô liâm-piⁿ kàu.

10

Chiū kā in kóng, Peh-sìⁿ beh khí-lâi kong-kek peh-sìⁿ, kok iā beh khí-lâi kong-kek kok.

11

Tōe beh tōa tín-tāng, iā chōe-chōe só͘-chāi ū ki-hng un-e̍k; tùi thiⁿ-nı̍h iā beh ū thang kiaⁿ ê siōng kap tōa ê sîn-jiah.

12

Chiah ê sū ê tāi-seng lâng beh hē chhiú lia̍h lín, khún-tio̍k lín, chiong lín sàng-kau tī hōe-tn̂g kap kaⁿ-lô, iā ūi-tio̍h góa ê miâ tòa lín kàu tī kun-ông koaⁿ-hú ê bīn-chêng.

13

Chiah ê sū beh chiâⁿ-chòe lín ê kan-chèng.

14

Só͘-í lín ê sim-chì tio̍h koat-tòan bô tāi-seng khòa-lū beh cháiⁿ-iūⁿ hun-sò͘.

15

In-ūi góa beh siúⁿ-sù lín kháu-châi tì-hūi, chiū-sī lín ê chèng tùi-te̍k só͘ bōe-ōe tí-tng piān-pok ê.

16

Lín iā beh hō͘ pē-bú, hiaⁿ-tī, chhin-chhek, pêng-iú ké-sàng;

17

lín tiong-kan ū ê beh hō͘ in hāi-sí; lín in-ūi góa ê miâ beh hō͘ chèng lâng òan-hūn;

18

chóng-sī lín chı̍t ki thâu-mn̂g iā bōe sit-lo̍h.

19

Lín ēng thun-lún tit-tio̍h lín ê o̍ah-miā.

20

Lín khòaⁿ-kìⁿ Iâ-lō͘-sat-léng hō͘ kun-peng só͘ ûi, chiū chai i ê pha-hng kūn lah.

21

Hit sî tī Iû-thài ê tio̍h cháu-khì soaⁿ-nı̍h; tī siâⁿ-lāi ê tio̍h chhut-lâi; tī hn̂g-nı̍h ê m̄-thang jı̍p siâⁿ.

22

In-ūi chiah ê jı̍t sī sin-oan ê jı̍t, hō͘ só͘ ū kì-chài ê lóng èng-giām.

23

Tng hiah ê jı̍t ū sin-īn kap hō͘ eⁿ-á chia̍h lin ê hū-jîn-lâng ū chai-ē; in-ūi beh ū tōa ê khùn-khó͘ kàu tī hit ê tōe-hng, iā siū-khì kàu tī chit ê peh-sìⁿ;

24

in beh hō͘ to thâi-sí, siū lia̍h kàu bān pang; Iâ-lō͘-sat-léng beh hō͘ lia̍t-pang lâng thún-ta̍h, kàu lia̍t-pang ê kî móa.

25

Tī jı̍t, ge̍h, chhiⁿ-sîn teh-beh ū tiāu-thâu, tī tōe-chiūⁿ lia̍t-pang khùn-khó͘; ūi-tio̍h hái kap éng ê hōa-hōa-háu chiū hun-lōan;

26

lâng tùi kiaⁿ-hiâⁿ í-kı̍p thèng-hāu só͘ beh kàu tī thiⁿ-ē ê sū chiū hun-khì; in-ūi thiⁿ-siōng beh tín-tāng.

27

Tī hit sî beh khòaⁿ-kìⁿ Jîn-chú ēng kôan-lêng kap tōa êng-kng chē hûn lâi.

28

Tú-tú ū chiah ê sū, lín tio̍h thêng-sin khí-lâi kia̍h thâu; in-ūi lín ê sio̍k-hôe kūn lah.

29

Koh ēng phì-jū kā in kóng, Chhì-khòaⁿ bû-hoa-kó kap lóng-chóng ê chhiū,

30

in puh-íⁿ ê sî lín khòaⁿ-kìⁿ, chiū ka-kī chai hē-thiⁿ kūn lah.

31

Án-ni, lín khòaⁿ-kìⁿ chiah ê sū chiū tio̍h chai Siōng-tè ê kok kūn lah.

32

Góa sı̍t-chāi kā lín kóng, Chit sè-tāi iáu-bē kè-khì, chiah ê tāi-chì lóng beh chiâⁿ.

33

Thiⁿ kap tōe beh bô-khì, góa ê ōe bōe bô-khì.

34

Nā-sī lín tio̍h ka-kī kín-sīn, kiaⁿ-liáu lín ê sim hō͘ tham-chia̍h, chiú-chùi, kap chit sè-kan ê khòa-lū phah-lōan, chiū hit jı̍t chhin-chhiūⁿ o̍ah-tauh hut-jiân kàu tī lín;

35

in-ūi hit jı̍t beh chhin-chhiūⁿ án-ni kàu tī kìⁿ-nā khiā-khí chôan tōe-bīn ê chèng lâng.

36

Nā-sī lín tio̍h ta̍k sî kéng-séng, kî-tó, hō͘ lín ōe tit siám-pī chiong-lâi lóng-chóng ê sū, lâi khiā tī Jîn-chú ê bīn-chêng.

37

Iâ-so͘ jı̍t-sî tī tiān-nı̍h kà-sī lâng; mî-sî chhut-khì, hioh tī hit-ê miâ chòe Kaⁿ-ná ê soaⁿ.

38

Chèng peh-sìⁿ thàu-chá khì tiān-nı̍h chhē I, ài beh thiaⁿ I.