Lō͘-ka 第 22 章 - 巴克禮全羅

1

Tû-kàⁿ-choeh, iā miâ pôaⁿ-kè-choeh, kūn lah.

2

Chiah ê chè-si-thâu kap keng-ha̍k-sū chhē-khòaⁿ ū sím-mı̍h hoat thang hāi-sí Iâ-so͘; in-ūi sī kiaⁿ peh-sìⁿ.

3

Sat-tàn jı̍p tī hit-ê kiò chòe Ka-lio̍k ê Iû-tāi, i sī cha̍p-jī ê ha̍k-seng ê chı̍t ê;

4

chiū khì kap chiah ê chè-si-thâu iú-si-koaⁿ saⁿ-kap chham-siông, beh ēng sím-mı̍h hoat chiong Iâ-so͘ kau in.

5

In hoaⁿ-hí, iok beh gûn hō͘ i.

6

Iû-tāi ín i; chiū chhē ki-hōe, tng peh-sìⁿ bô tī-teh ê sî, chiong Iâ-so͘ kau in.

7

Tû-kàⁿ-choeh, eng-kai thâi pôaⁿ-kè-choeh ê iûⁿ-ko, hit ê jı̍t í-keng kàu,

8

Iâ-so͘ chhe Pí-tek Iok-hān kóng, Lín khì thòe lán pī-pān pôaⁿ-kè-choeh ê iân-sia̍h, hō͘ lán thang lâi chia̍h.

9

In kā I kóng, Ài góan tī sím-mı̍h só͘-chāi pī-pān?

10

I kā in kóng, Lín khì jı̍p siâⁿ, chiū ū chı̍t lâng tòa chúi-pân beh tú-tio̍h lín, tio̍h tè i jı̍p i só͘ jı̍p ê chhù.

11

Kā hit keng chhù ê chú-lâng kóng, Sian-siⁿ mn̄g kóng, Kheh-thiaⁿ tī tá-lo̍h? góa beh tī hia kap góa ê ha̍k-seng chia̍h pôaⁿ-kè-choeh.

12

I beh ēng lâu-téng pâi-siat ê tōa thiaⁿ hō͘ lín khòaⁿ; lín tio̍h tī hia pī-pān.

13

In khì, kó-jiân tú-tio̍h chiàu I só͘ kā in kóng ê, chiū tī hia pī-pān pôaⁿ-kè-choeh.

14

Sî kàu Iâ-so͘ chē toh, sù-tô͘ iā kap I chē.

15

I tùi in kóng, Tī siū hāi ê tāi-seng góa put-chí ì-ài kap lín chia̍h chit ê pôaⁿ-kè-choeh;

16

in-ūi góa kā lín kóng, góa bô beh koh chia̍h i, kàu i èng-giām tī Siōng-tè ê kok.

17

Chiū chih poe, chiok-siā liáu kóng, Lín chiong chit-ê pun hō͘ lín ta̍k lâng;

18

in-ūi góa kā lín kóng, taⁿ liáu-āu góa bô beh lim phû-tô chiap, kàu Siōng-tè ê kok lâi.

19

Koh the̍h piáⁿ chiok-siā lâi peh hō͘ in, kóng, Chit-ê sī góa ê seng-khu, ūi-tio̍h lín lâi hiàn ê; lín kiâⁿ chit-ê lâi kì-liām góa.

20

Chia̍h liáu-āu phâng poe iā sī án-ni, kóng, Chit ê poe sī sin-iok, tī góa ê huih lâi siat-lı̍p ê, chiū-sī ūi-tio̍h lín lâu-chhut ê.

21

Nā-sī bōe góa ê lâng, i ê chhiú kap góa tī toh-nı̍h.

22

In-ūi Jîn-chú chin-chiàⁿ khì, chiàu só͘ tiāⁿ-tio̍h ê; nā-sī I hō͘ sím-mı̍h lâng bōe, hit lâng ū chai-ē!

23

In chiū saⁿ tùi-mn̄g kî-tiong sím-mı̍h lâng beh chòe chit ê tāi-chì.

24

In ū teh saⁿ-chiⁿ, khòaⁿ chiông-tiong sím-mı̍h lâng sǹg chòe tōa.

25

Iâ-so͘ chiū kā in kóng, Lia̍t-pang ê kun-ông chòe chú lâi tī-lí in; kóan-hat in ê chheng chòe Un-chú.

26

Nā-sī lín chiū m̄ sī án-ni; lín tiong-kan chòe tōa ê tio̍h chhin-chhiūⁿ sī-sòe, chòe thâu ê tio̍h chhin-chhiūⁿ chhe-ēng.

27

Sím-mı̍h hō lâng chòe tōa? sī chē toh ê, á-sī chòe chhe-ēng ê ah? kiám m̄ sī chē toh ê mah? Nā-sī góa tī lín tiong-kan chhin-chhiūⁿ chòe chhe-ēng ê.

28

Lín chiū-sī siông-siông kap góa tī chhì-liān tiong ê,

29

góa ēng kok hong lín, chhin-chhiūⁿ góa ê Pē bat ēng kok hong góa chı̍t iūⁿ;

30

hō͘ lín tī góa ê kok lim-chia̍h tī góa ê toh; lín iā beh chē tī chō-ūi, sím-phòaⁿ Í-sek-lia̍t cha̍p-jī ê chi-phài.

31

Koh kóng, Se-bûn, Se-bûn ah, lí khòaⁿ, Sat-tàn bat ài tit-tio̍h lín, ài pòa lín chhin-chhiūⁿ pòa be̍h;

32

nā-sī góa ū thòe lí kî-tó, hō͘ lí ê sìn bô sit-lo̍h; lí kui-chèng liáu-āu, tio̍h kian-kò͘ lí ê hiaⁿ-tī.

33

Pí-tek kā I kóng, Chú ah, góa piān-piān kap lí koaiⁿ lo̍h kaⁿ, iā kap lí sí.

34

I chiū kóng, Pí-tek ah, góa kā lí kóng, kin-á-jı̍t koe iáu-bē thî, lí beh saⁿ pái m̄ jīn góa.

35

Koh kā ha̍k-seng kóng, Góa chêng chhe lín bô tòa chîⁿ-tē, kap tah-liân, kap ôe, lín ū khiàm sím-mı̍h bô? In kóng, Bô.

36

I chiū kā in kóng, Nā-sī taⁿ ū chîⁿ-tē ê tio̍h tòa i, ū tah-liân ê iā tio̍h án-ni; bô to ê, tio̍h bōe i ê saⁿ, lâi bóe to.

37

In-ūi góa kā lín kóng, só͘ kì-chài ê kóng, Sǹg I kap put-hoat ê lâng tâng lia̍t, chit kù ōe tek-khak èng-giām tī góa; in-ūi kan-sia̍p góa ê taⁿ beh chiâⁿ lah.

38

In kóng, Chú ah, lí khòaⁿ, tī chia ū nn̄g ki to. I kā in kóng, Kàu-gia̍h lah.

39

Iâ-so͘ chhut-khì, chiàu-siông khì Kaⁿ-ná soaⁿ; ha̍k-seng iā tè I.

40

Kàu hit só͘-chāi chiū kā in kóng, Lín tio̍h kî-tó, bián-tit jı̍p bê-he̍k.

41

Chiū lī-khui in iok-lio̍k ū hiat chio̍h-thâu ê hn̄g, kūi-lo̍h-khì kî-tó kóng,

42

Pē ah, lí nā khéng, tio̍h chiong chit ê poe lī-khui góa; to̍k-to̍k m̄ sī góa ê ì-sù, sī lí ê ì-sù tio̍h chiâⁿ.

43

Ū chı̍t ê thiⁿ-sài tùi thiⁿ chhut-hiān, lâi chòng I ê la̍t.

44

Iâ-so͘ khó͘-thàng kàu ke̍k, kî-tó ná pek-chhiat; I ê kōaⁿ sī chhin-chhiūⁿ tōa tiám huih tih lo̍h tōe.

45

Kî-tó soah khí-lâi, khì chiū-kūn ha̍k-seng, khòaⁿ-kìⁿ in ūi-tio̍h iu-būn teh khùn;

46

chiū kā in kóng, Siáⁿ-sū khùn? khí-lâi kî-tó, bián-tit jı̍p bê-he̍k.

47

Iáu teh kóng ê sî ū kui tīn lâng kàu; cha̍p-jī ha̍k-seng ê chı̍t ê, hit ê kiò chòe Iû-tāi ê, kiâⁿ tī in ê thâu-chêng, kūn-óa Iâ-so͘ beh kā I chim.

48

Nā-sī Iâ-so͘ kā i kóng, Iû-tāi, lí ēng chim-chhùi bōe Jîn-chú mah?

49

Chó-iū ê lâng khòaⁿ-kìⁿ só͘ beh kàu ê sū chiū kóng, Chú ah, góan tio̍h ēng to lâi thâi in mah?

50

Kî-tiong chı̍t lâng thâi chè-si-thâu ê lô͘-po̍k, siah-khì i chiàⁿ pêng ê hī-á.

51

Iâ-so͘ ìn kóng, Tāi-chì kàu án-ni, chhiáⁿ iông-ún che; chiū bong i ê hī-á, lâi i-hó i.

52

Iâ-so͘ tùi hiah ê lâi kong-kek I ê chè-si-thâu, tiān-si, tiúⁿ-ló kóng, Lín kia̍h to kap thûi chhut-lâi chhin-chhiūⁿ kong-kek chha̍t mah?

53

Góa jı̍t-jı̍t kap lín tī tiān-nı̍h, lín bô chhun chhiú kong-kek góa; nā-sī chit tia̍p sī lín ê sî, kap o͘-àm ê kôan-sè.

54

In chiū lia̍h I, tòa I khì, tòa I jı̍p chè-si-thâu ê chhù. Pí-tek hn̄g-hn̄g tè I.

55

Lâng tī tiâⁿ-nı̍h khí hé, saⁿ-kap teh chē, Pí-tek iā chē tī in tiong-kan.

56

Ū chı̍t ê lú-pī khòaⁿ-kìⁿ i ǹg hé-kng teh chē, chù-ba̍k khòaⁿ i, kóng, Chit lâng iā sī kap I chòe tīn.

57

I m̄ jīn kóng, Hū-jîn-lâng ah, góa m̄ bat I.

58

Tiap-á-kú koh chı̍t lâng khòaⁿ-kìⁿ kóng, Lí iā sī in ê lâng. Pí-tek kóng, Lâng ah, góa m̄ sī.

59

Kè pòaⁿ-sî kú, koh chı̍t lâng chhut-la̍t kóng, Chit lâng chin-chiàⁿ kap I chòe tīn, in-ūi i iā sī Ka-lī-lī lâng.

60

Nā-sī Pí-tek kóng, Lâng ah, lí só͘ kóng ê, góa m̄ chai. Iáu teh kóng ê sî, koe liâm-piⁿ thî.

61

Chú o̍at thâu khòaⁿ Pí-tek. Pí-tek chiū kì-tit Chú ê ōe, ū cháiⁿ-iūⁿ kā i kóng, Kin-á-jı̍t koe thî ê tāi-seng, lí beh saⁿ pái m̄ jīn góa.

62

I chiū chhut-khì gōa-bīn, tōa thî-khàu.

63

Kò͘-siú Iâ-so͘ ê lâng hì-lāng I, phah I;

64

ng I ê bīn, mn̄g I kóng, Lí tio̍h chòe sian-ti lâi kóng, phah lí ê sī chī-chūi ah.

65

Koh kóng chōe-chōe hāng lâi siat-to̍k I.

66

Kàu thiⁿ kng, peh-sìⁿ ê tiúⁿ-ló-hōe chū-chı̍p, kî-tiong ū chiah ê chè-si-thâu kap keng-ha̍k-sū; in chiū tòa Iâ-so͘ kàu in ê kong-hōe kóng,

67

Lí nā sī Ki-tok tio̍h kā góan kóng.

68

Iâ-so͘ kā in kóng, Góa nā kā lín kóng, lín m̄ sìn; nā mn̄g lín, lín iā m̄ ìn.

69

Chóng-sī taⁿ liáu-āu Jîn-chú beh chē tī Siōng-tè kôan-lêng ê tōa pêng.

70

Tāi-ke kóng, Án-ni, chiū lí sī Siōng-tè ê Kiáⁿ mah? I tùi in kóng, Lín kóng góa chiū-sī.

71

In kóng, Mih-sái ēng pa̍t hāng ê kan-chèng? lán pún-sin ū thiaⁿ-kìⁿ I chhin-chhùi só͘ kóng ê.