Lō͘-ka 第 23 章 - 巴克禮全羅

1

In chôan-hōe ê lâng lóng khí-lâi, tòa I kàu Pí-lia̍p-to ê bīn-chêng;

2

kò I kóng, Góan khòaⁿ chit lâng bê-he̍k góan ê peh-sìⁿ, kìm lâng la̍p sè hō͘ Kai-sat, ka-kī chheng chòe Ki-tok, chòe ông.

3

Pí-lia̍p-to mn̄g I kóng, Lí sī Iû-thài lâng ê ông mah? Ìn i kóng, Lí kóng, chiū-sī.

4

Pí-lia̍p-to tùi hiah ê chè-si-thâu kap kui tīn ê lâng kóng, Góa khòaⁿ chit lâng bô chōe.

5

Chóng-sī in ná chhut-la̍t kóng, I iô-tāng peh-sìⁿ, piàn Iû-thài thôan kàu, tùi Ka-lī-lī khí kàu chia.

6

Pí-lia̍p-to chı̍t-ē thiaⁿ-kìⁿ, chiū mn̄g khòaⁿ chit lâng sī Ka-lī-lī lâng á m̄ sī.

7

Í-keng chai I sio̍k tī Hi-lu̍t só͘ kóan-hat, chiū sàng I hō͘ Hi-lu̍t; hit sî Hi-lu̍t iā tī Iâ-lō͘-sat-léng.

8

Hi-lu̍t khòaⁿ-kìⁿ Iâ-so͘ chiū chin hoaⁿ-hí, sī kú-kú ài khòaⁿ-kìⁿ I, in-ūi bat thiaⁿ-kìⁿ I ê sū, koh ǹg-bāng khòaⁿ-kìⁿ I kiâⁿ sîn-jiah.

9

Chiū ēng chōe-chōe ōe mn̄g I; nā-sī Iâ-so͘ bô ìn i chı̍t kù.

10

Hiah ê chè-si-thâu kap keng-ha̍k-sū khiā-teh, chhut-la̍t kò I.

11

Hi-lu̍t kap i ê peng ba̍k-tē-bô I, hì-lāng I; ēng súi ê saⁿ kā I chhēng, koh sàng hêng Pí-lia̍p-to.

12

Hi-lu̍t kap Pí-lia̍p-to pêng-sî kiat-òan, hit jı̍t chiū chòe pêng-iú.

13

Pí-lia̍p-to tiàu hiah ê chè-si-thâu, kap iú-si chham peh-sìⁿ lâi,

14

tùi in kóng, Lín tòa chit ê lâng kàu góa chia, kóng I sī bê-he̍k peh-sìⁿ ê; lí khòaⁿ, góa tī lín ê bīn-chêng í-keng sím-mn̄g I; chóng-sī lūn-kàu lín só͘ kò I ê sū, góa chhâ-chhut I lóng bô chōe.

15

Hi-lu̍t iā sī án-ni; in-ūi ū chiong I sàng hêng lán; iā lí khòaⁿ, I só͘ kiâⁿ bô chı̍t hāng eng-kai sí ê sū.

16

Só͘-í góa beh phah lâi tháu-pàng I.

17

18

In chı̍t chôe âu-kiò kóng, Tio̍h tû-khì chit ê lâng, pàng Pa-lia̍p-pa hō͘ góan.

19

Chit ê Pa-lia̍p-pa, in-ūi tī siâⁿ-lāi chok-lōan koh thâi-sí lâng, chiah koaiⁿ lo̍h kaⁿ.

20

Pí-lia̍p-to ài pàng Iâ-so͘, chiū koh kap in kóng.

21

Nā-sī in kiò, Tèng I sı̍p-jī-kè, tèng I sı̍p-jī-kè.

22

Pí-lia̍p-to tē saⁿ pái tùi in kóng, Sī cháiⁿ-iūⁿ? I ū kiâⁿ sím-mı̍h pháiⁿ? Góa khòaⁿ I bô chı̍t hāng eng-kai sí ê chōe; só͘-í beh phah lâi tháu-pàng I.

23

In tōa siaⁿ pek-chhiat kiû tèng I tī sı̍p-jī-kè. In ê siaⁿ khah-iâⁿ.

24

Pí-lia̍p-to gí-tòan chiàu in só͘ kiû ê lâi kiâⁿ:

25

chiū tháu-pàng in só͘ kiû hit ê ūi-tio̍h chok-lōan sòa thâi-sí lâng koaiⁿ lo̍h kaⁿ ê; chiong Iâ-so͘ kau in, lâi sūn in ê ì-sù.

26

Tòa Iâ-so͘ khì ê sî, ū chı̍t ê Kó͘-lī-nāi ê lâng, Se-bûn, tùi hiuⁿ-ē lâi, in chiū khiú i lâi, chiong sı̍p-jī-kè khòa tī i ê keng-thâu, hō͘ i giâ lâi tè Iâ-so͘.

27

Tè I ê lâng ū peh-sìⁿ kap hū-jîn-lâng chōe-chōe, hū-jîn-lâng ūi-tio̍h I tûi heng ai-siong.

28

Iâ-so͘ o̍at thâu tùi in kóng, Iâ-lō͘-sat-léng ê hū-jîn-lâng ah, bo̍h-tit ūi-tio̍h góa thî-khàu, tio̍h ūi-tio̍h lín ka-kī kap ka-kī ê kiáⁿ-jî lâi thî-khàu:

29

in-ūi sî beh kàu, lâng beh kóng, Bōe-ōe hôai-īn ê hū-jîn-lâng, bē bat seng-sán ê thai, bē bat hō͘ gín-ná suh ê lin-thâu, ū hok-khì.

30

Hit sî lâng chiū beh tùi soaⁿ kóng, Teh góan; iā tùi soaⁿ-á kóng, Khàm góan.

31

In-ūi tī chhiⁿ ê chhiū-ba̍k nā kiâⁿ án-ni, chiū tī ta ê chhiū-ba̍k beh cháiⁿ-iūⁿ ah?

32

Koh ū nn̄g ê hōan-lâng hō͘ lâng tòa-khì, kap Iâ-so͘ tâng siū sí.

33

Kàu chı̍t só͘-chāi miâ kiò Thâu-khak-óaⁿ, chiū tī hia tèng I tī sı̍p-jī-kè; koh tèng hiah ê hōan-lâng, chı̍t-ê tī chiàⁿ pêng, chı̍t-ê tī tò pêng.

34

Iâ-so͘ kóng, Pē ah, sià-bián in, in-ūi in só͘ chòe ê, in m̄ chai. Lâng chiū liam-khau pun I ê saⁿ.

35

Hiah ê iú-si ki-chhì I kóng, I bat kiù pa̍t lâng; nā sī chòe Siōng-tè ê Ki-tok, siū kéng-sóan ê, tio̍h kiù ka-kī.

36

Peng-teng iā hì-lāng I, kūn-óa ēng chhò͘ hō͘ I,

37

kóng, Lí nā sī Iû-thài lâng ê ông, tio̍h kiù ka-kī.

38

Tī I ê téng-bīn ū chám-tiâu siá kóng, Chit-ê sī Iû-thài lâng ê ông.

39

Siū tiàu-teh ê hōan-lâng chı̍t-ê siat-to̍k I, kóng, Lí kiám m̄ sī Ki-tok mah? Tio̍h kiù ka-kī kap góan.

40

Tē jī ê ìn lâi chek-pī i, kóng, Lí kì-jiân tâng siū chōe, liân Siōng-tè iā m̄ kiaⁿ mah?

41

Lán siū chōe sī kong-tō; in-ūi lán só͘ siū ê ha̍p tī lán só͘ kiâⁿ; nā-sī chit lâng só͘ kiâⁿ ê, bô chı̍t hāng m̄ tio̍h.

42

Chiū kóng, Iâ-so͘ ah, lí tī lí ê kok lâi ê sî, tio̍h kì-tit góa.

43

Iâ-so͘ chiū kā i kóng, Góa sı̍t-chāi kā lí kóng, Kin-á-jı̍t lí beh kap góa tī Lo̍k-hn̂g.

44

Jı̍t tiong-tàu, chôan tōe o͘-àm; kàu saⁿ tiám cheng ê sî, jı̍t ê kng bô-khì;

45

tiān-lāi ê tiùⁿ tùi tiong lı̍h-khui.

46

Iâ-so͘ tōa siaⁿ kiò, chiū kóng, Pē ah, góa ê sîn kau-tāi lí ê chhiú. Chiah ê ōe kóng soah, khùi chiū tn̄g.

47

Pé-chóng khòaⁿ-kìⁿ chit ê tāi-chì, kui êng-kng Siōng-tè, kóng, Chit-ê chin-chiàⁿ sī gī ê lâng.

48

Chū-chı̍p teh khòaⁿ ê chèng lâng khòaⁿ-kìⁿ chiah ê tāi-chì, lóng tûi heng tò-khì.

49

Hiah-ê kap Iâ-so͘ saⁿ-bat ê, í-kı̍p hiah-ê tùi Ka-lī-lī tè I lâi ê hū-jîn-lâng, lóng hn̄g-hn̄g teh khiā, lâi khòaⁿ chiah ê sū.

50

Ū chı̍t lâng miâ Iok-sek, i sī gī-ôan, chòe lâng hó koh gī;

51

i bô tâng hiah ê lâng só͘ kè-bô͘ só͘ chòe ê, i sī sio̍k Iû-thài lâng ê A-lī-má-thài siâⁿ, pêng-sò͘ him-bō͘ Siōng-tè kok ê.

52

Chit lâng khì kìⁿ Pí-lia̍p-to, lâi kiû Iâ-so͘ ê sin-si.

53

Chiū siu I lo̍h-lâi, ēng iù-tōe pò͘ pau I, hē tī chio̍h chha̍k ê bōng, lóng bē bat bâi-chòng lâng ê.

54

Hit jı̍t chiū-sī pī-pān choeh ê jı̍t, an-hioh-jı̍t kūn lah.

55

Tùi Ka-lī-lī kap Iâ-so͘ saⁿ-kap lâi hiah ê hū-jîn-lâng tè tī āu-bīn, khòaⁿ I ê bōng, kap cháiⁿ-iūⁿ hē I ê sin-si.

56

Chiū tò-khì pī-pān hiuⁿ-liāu hiuⁿ-iû; tng an-hioh-jı̍t chiàu kài-bēng lâi hioh.