Lō͘-ka 第 24 章 - 巴克禮全羅

1

Chhit-jı̍t ê thâu chı̍t jı̍t, thiⁿ phú-kng, hiah ê hū-jîn-lâng tòa só͘ pī-pān hiah ê hiuⁿ-liāu kàu bōng;

2

khòaⁿ-kìⁿ chio̍h í-keng tùi bōng-mn̂g kō khui.

3

Chiū jı̍p-khì, bô khòaⁿ-kìⁿ Chú ê sin-si.

4

Ūi-tio̍h án-ni teh tiû-tû ê sî, hut-jiân ū nn̄g lâng khiā tī in sin-piⁿ, i-chiûⁿ kng nà-nà.

5

Hū-jîn-lâng kiaⁿ-hiâⁿ, bīn àⁿ-lo̍h tōe; hit nn̄g lâng kā in kóng, Siáⁿ-sū tī sí-lâng tiong chhē o̍ah-lâng ah?

6

I bô tī chia, í-keng koh-o̍ah. Lín tio̍h kì-tit I iáu tī Ka-lī-lī ê sî ū cháiⁿ-iūⁿ kā lín kóng,

7

Jîn-chú tek-khak tio̍h kau tī chōe-jîn ê chhiú, hō͘ in tèng tī sı̍p-jī-kè, tē saⁿ jı̍t koh-o̍ah.

8

In chiū kì-tit I ê ōe.

9

tùi bōng-nı̍h tò-khì, chiong chiah ê sū lóng pò hō͘ cha̍p-it ê ha̍k-seng kap kî-û ê chèng lâng chai.

10

Khì tùi sù-tô͘ kóng chiah ê tāi-chì ê, chiū-sī Bo̍at-tāi-lia̍p ê Má-lī-a, kap Iok-a-ná, kap Ngá-kok ê lāu-bú Má-lī-a, í-kı̍p kî-û kap in chòe-phōaⁿ ê hū-jîn-lâng.

11

Sù-tô͘ khòaⁿ hiah ê ōe chòe bô iáⁿ, iā m̄ sìn i.

12

Nā-sī Pí-tek khí-lâi cháu kàu bōng-nı̍h, àⁿ-lo̍h-khì khòaⁿ, chí-ū khòaⁿ-kìⁿ iù-tōe pò͘ nā-tiāⁿ; chiū tò-khì in chhù, teh kî-kòai só͘ keng-kè ê sū.

13

Siāng hit jı̍t ha̍k-seng tiong ū nn̄g lâng khì chı̍t ê hiuⁿ-siā, miâ Í-má-ngó͘, lī Iâ-lō͘-sat-léng jī-cha̍p-gō͘ lí.

14

In saⁿ-kap tâm-lūn só͘ keng-kè lóng-chóng ê sū.

15

In teh tâm-lūn saⁿ-mn̄g ê sî, Iâ-so͘ pún-sin kūn-óa, kap in saⁿ-kap kiâⁿ.

16

In nn̄g lâng bê-ba̍k, tì-kàu bōe jīn-tit I.

17

I tùi in kóng, Lín kiâⁿ ê sî, saⁿ-kap piān-lūn ê sī sím-mı̍h ōe? In chiū khiā-teh, bīn tài-iu-iông.

18

Kî-tiong chı̍t-ê, miâ Kek-liû-pa, ìn I kóng, Lí kiám toaⁿ-sin chhut-gōa tī Iâ-lō͘-sat-léng, iā m̄ chai kūn-jı̍t tī hia só͘ keng-kè ê sū mah?

19

I kā in kóng, Sím-mı̍h sū ah? In kā I kóng, Chiū-sī Ná-sat-le̍k lâng Iâ-so͘ ê sū; I sī sian-ti lâng, tī Siōng-tè kap chèng peh-sìⁿ ê bīn-chêng só͘ kóng só͘ kiâⁿ ū kôan-lêng;

20

iā hiah ê chè-si-thâu kap lán ê sī-tōa ké-sàng I khì tēng sí chōe, tèng I tī sı̍p-jī-kè.

21

Nā-sī góan pêng-sò͘ teh ǹg-bāng I chiū-sī hit-ê beh sio̍k-hôe Í-sek-lia̍t ê. M̄ nā án-ni, koh chiah ê sū chiâⁿ í-keng saⁿ jı̍t lah.

22

Koh góan tiong-kan kúi-nā ê hū-jîn-lâng hō͘ góan chin gông-ngia̍h; in-ūi in phah-phú-kng kàu bōng-nı̍h;

23

bô khòaⁿ-kìⁿ I ê sin-si, chiū lâi kóng, in ū khòaⁿ-kìⁿ thiⁿ-sài chhut-hiān, kóng I koh-o̍ah lah.

24

Góan tiong-kan kúi-nā lâng kàu bōng-nı̍h, kó-jiân khòaⁿ-kìⁿ chiàu hū-jîn-lâng só͘ kóng ê; chóng-sī bô khòaⁿ-kìⁿ I.

25

Iâ-so͘ tùi in kóng, Bû-ti ê lâng ah, sian-ti só͘ kóng it-chhè ê ōe, lín ê sim cháiⁿ-iūⁿ hiah oh sìn ah!

26

Ki-tok siū chiah ê kan-khó͘, lâi jı̍p I ê êng-kng, kiám m̄ eng-kai mah?

27

Chiū tùi Mô͘-se kap chèng sian-ti khí, kìⁿ-nā sèng-keng tiong só͘ chí I ê, lóng kā in kóe-bêng.

28

Chiong-kūn só͘ khì ê hiuⁿ-siā, Iâ-so͘ chhin-chhiūⁿ beh kiâⁿ khah hn̄g.

29

Nn̄g lâng kiông lâu I kóng, Chhiáⁿ kap góan tòa; sî í-keng òaⁿ, jı̍t beh lo̍h lah. I chiū jı̍p-khì, beh kap in tòa.

30

Saⁿ-kap chē toh ê sî, Iâ-so͘ the̍h piáⁿ chiok-siā, peh lâi hō͘ in.

31

In ê ba̍k-chiu khui, chiū jīn-tit I; liâm-piⁿ bô koh khòaⁿ-kìⁿ.

32

In chiū saⁿ-kap kóng, Lō͘-nı̍h I kap lán kóng ōe, khui-thiah sèng-keng ê sî, lán ê sim kiám bô jia̍t mah?

33

Chiū chek-sî khí-sin, tò-khì Iâ-lō͘-sat-léng, tú-tio̍h cha̍p-it ê ha̍k-seng, kap tâng tī-teh ê lâng chū-chı̍p teh kóng,

34

Chú kó-jiân koh-o̍ah, iā chhut-hiān hō͘ Se-bûn khòaⁿ-kìⁿ.

35

In nn̄g lâng iā kóng-khí tī lō͘-nı̍h só͘ tú-tio̍h ê sū, kap tī peh piáⁿ ê sî in cháiⁿ-iūⁿ jīn-tit I.

36

In teh kóng chiah ê ōe ê sî, Iâ-so͘ pún-sin khiā tī in tiong-kan, kā in kóng, Gōan lín pêng-an.

37

In gông-ngia̍h koh kiaⁿ, lia̍h-chòe só͘ khòaⁿ-kìⁿ ê sī sîn.

38

I chiū kā in kóng, Lín siáⁿ-sū jû-lōan, sim-lāi siⁿ-khí giâu-gî ah?

39

Tio̍h khòaⁿ góa ê chhiú góa ê kha, chiū-sī góa pún-sin; bong góa, chiū chai; in-ūi sîn bô kut bô bah, chiàu lín khòaⁿ-kìⁿ góa lóng sī ū.

40

Kóng án-ni, chiū chiong chhiú kap kha hō͘ in khòaⁿ.

41

Ha̍k-seng ūi-tio̍h hoaⁿ-hí ê iân-kò͘, iáu-kú bô sìn, koh teh kî-kòai, I kā in kóng, Lín tī chia ū sím-mı̍h thang chia̍h bô?

42

In chiū chiong pek ê hî chı̍t phìⁿ hō͘ I;

43

I the̍h-khì, tng in ê bīn-chêng chia̍h i.

44

Koh tùi in kóng, Chiah-ê chiū-sī góa iáu-kú kap lín tī-teh ê sî só͘ tùi lín kóng ê ōe, kóng kìⁿ-nā tī Mô͘-se ê lu̍t-hoat, kap hiah ê sian-ti, í-kı̍p Si-phian, só͘ kì-chài chí góa ê ōe lóng tek-khak tio̍h èng-giām.

45

Chiū khui in ê sim-khiàu, hō͘ in ōe hiáu-ngō͘ hiah ê sèng-keng.

46

Koh kā in kóng, Ū án-ni kì-chài, Ki-tok tio̍h siū khó͘, tē saⁿ jı̍t tùi sí-lâng tiong koh-o̍ah;

47

iā hóan-hóe kap sià-chōe ê tō-lí beh tī I ê miâ lâi thôan kàu bān pang, sī tùi Iâ-lō͘-sat-léng khí.

48

Lín chòe chiah ê tāi-chì ê kan-chèng.

49

Iā góa beh chhe góa ê Pē só͘ èng-ún ê kàu tī lín; chóng-sī lín tio̍h tiàm tī chit ê siâⁿ, thèng-hāu tùi téng-bīn lo̍h-lâi ê kôan-lêng chhin-chhiūⁿ saⁿ kā lín chhēng.

50

Chiū chhōa in chhut-khì kàu Pek-tāi-nî ê tùi-bīn, kia̍h-khí chhiú, kā in chiok-hok.

51

Chiok-hok ê sî, chiū lī-pia̍t in, siū chih-chiap chiūⁿ thiⁿ.

52

In chiū pài I; chiū tò-tńg-khì Iâ-lō͘-sat-léng, tōa-tōa hoaⁿ-hí:

53

siông-siông tī tiān-lāi, o-ló Siōng-tè.