Lō͘-ka 第 5 章 - 巴克禮全羅

1

Tng chèng lâng oe-khoeh I, teh thiaⁿ Siōng-tè ê tō-lí ê sî, Iâ-so͘ khiā tī Kek-nî-sat-le̍k ô͘-piⁿ,

2

khòaⁿ-kìⁿ nn̄g chiah chûn tī ô͘-piⁿ, thó-hî lâng lī-khui chûn teh sóe bāng.

3

Kî-tiong chı̍t chiah sī Se-bûn ê, Iâ-so͘ chiūⁿ-khì, chhiáⁿ i chiong chûn pàng khah khui. Chiū chē tī chûn-nı̍h kà-sī chèng lâng.

4

Kóng soah chiū tùi Se-bûn kóng, Pàng kàu chhim ê só͘-chāi, pha bāng thó-hî.

5

Se-bûn ìn kóng, Sian-siⁿ, góan thong mî tio̍h-bôa, thó lóng bô; chóng-sī in-ūi lí ê ōe, góa chiū beh pha bāng.

6

In pha-lo̍h-khì, chiū ûi-tio̍h hî chin chōe, bāng kàu beh lı̍h;

7

chiū ia̍t pa̍t chiah chûn ê tâng-phōaⁿ lâi tàu saⁿ-kāng; in chiū lâi, khioh hî móa nn̄g chiah chûn kàu beh tîm-lo̍h-khì.

8

Se-bûn Pí-tek khòaⁿ-kìⁿ án-ni, chiū phak tī Iâ-so͘ ê kha-ē kóng, Chú ah, lī-khui góa, góa sī ū chōe ê lâng.

9

In-ūi Se-bûn kap tâng tī-teh ê lâng, ūi-tio̍h in chı̍t-ē pha-lo̍h-khì só͘ lia̍h-tio̍h ê hî, bô m̄ gông-ngia̍h;

10

Se-bûn ê tâng-phōaⁿ, Se-pí-thài ê kiáⁿ Ngá-kok, Iok-hān, iā sī án-ni. Iâ-so͘ tùi Se-bûn kóng, Bo̍h-tit kiaⁿ, tùi chit tia̍p liáu-āu lí beh tit-tio̍h lâng.

11

In í-keng thoa chûn óa hōaⁿ, chiū pàng-sak it-chhè lâi tè I.

12

Iâ-so͘ tī chı̍t ê siâⁿ, tú-tn̄g ū chı̍t lâng piàn-sin thái-ko, khòaⁿ-kìⁿ I chiū bīn phak tī tōe-nı̍h, kiû kóng, Chú ah, lí nā khéng, chiū ōe hō͘ góa chheng-khì.

13

I chhun chhiú bong i kóng, Góa khéng, lí thang chheng-khì. Thái-ko chek-sî tû-khì.

14

Iâ-so͘ hoan-hù i bo̍h-tit kā lâng kóng; to̍k-to̍k tio̍h khì, chiong pún-sin hō͘ chè-si giām, iā ūi-tio̍h lí tit-tio̍h chheng-khì hiàn Mô͘-se só͘ hoan-hù ê, lâi chòe chèng-kù tī lâng.

15

Chóng-sī I ê miâ-siaⁿ it-hoat pò-iông; kui tōa tīn ê lâng chū-chı̍p beh thiaⁿ, iā beh tit-tio̍h i-hó in ê pīⁿ.

16

Nā-sī Iâ-so͘ thè-khì, tiàm tī khòng-iá kî-tó.

17

Ū chı̍t jı̍t Iâ-so͘ teh kà-sī lâng; ū Hoat-lī-sài lâng kap kà lu̍t-hoat ê sian-siⁿ tī hia teh chē, in sī tùi Ka-lī-lī ta̍k hiuⁿ-siā kap Iû-thài kap Iâ-lō͘-sat-léng lâi ê; Chú ê kôan-lêng kap Iâ-so͘ tī-teh, hō͘ I i-hó lâng.

18

Tú-tn̄g ū lâng chiong pho͘-á kng piàn-sūi ê lâi, ài beh kng jı̍p-khì hē tī I ê bīn-chêng.

19

In-ūi lâng chōe, chhē bô phāng thang kng jı̍p-khì; chiū chiūⁿ chhù-téng, tùi chhù-kòa tiong chiong lâng liân pho͘-á tūi-lo̍h-khì, hē tī tiong-ng, tī Iâ-so͘ ê bīn-chêng.

20

Iâ-so͘ khòaⁿ-kìⁿ in ê sìn chiū kóng, Bó͘ lâng ah, lí ê chōe sià lah.

21

Keng-ha̍k-sū kap Hoat-lī-sài lâng chiū gī-lūn kóng, Chit ê kóng chhiàm-kôan lām-sám ê ōe ê sī chī-chūi ah? Siōng-tè í-gōa, chī-chūi ōe sià-chōe ah?

22

Iâ-so͘ chai in ê gī-lūn, chiū ìn kóng, Lín sim-lāi teh gī-lūn sím-mı̍h ah?

23

Kóng, Lí ê chōe sià á-sī kóng, Lí khí-lâi kiâⁿ, tá-lo̍h chı̍t hāng khah khòai?

24

Chóng-sī beh hō͘ lín chai Jîn-chú tī tōe-nı̍h ū kôan thang sià-bián chōe, (chiū kā piàn-sūi ê kóng), Góa kā lí kóng, Khí-lâi, giâ lí ê pho͘-á tò-khì lí ê chhù.

25

Hit lâng tī chèng lâng ê bīn-chêng chek-sî khí-lâi, giâ i só͘ khùn ê, tò-khì i ê chhù, kui êng-kng Siōng-tè.

26

Chèng lâng lóng gông-ngia̍h, iā kui êng-kng Siōng-tè; koh móa-sim kiaⁿ-hiâⁿ kóng, Lán kin-á-jı̍t khòaⁿ-kìⁿ ì-gōa ê sū.

27

Chiah ê tāi-chì liáu-āu, Iâ-so͘ chhut-khì, khòaⁿ-kìⁿ chı̍t ê thiu-hiòng ê, miâ kiò Lī-bī, chē tī hiòng-koan; chiū kā i kóng, Tè góa.

28

I chiū pàng-sak it-chhè, khí-lâi tè I.

29

Lī-bī ūi-tio̍h I pān tōa iân-sia̍h tī in tau; ū thiu-hiòng ê í-kı̍p pa̍t lâng chōe-chōe kap in tâng chē toh.

30

Hoat-lī-sài lâng kap in ê keng-ha̍k-sū tùi I ê ha̍k-seng nga̍uh-nga̍uh-liām, kóng, Lín siáⁿ-sū kap thiu-hiòng ê í-kı̍p pháiⁿ lâng lim-chia̍h ah?

31

Iâ-so͘ ìn kóng, Ióng-chòng ê lâng bô khiàm-ēng i-seng, nā-sī phòa-pīⁿ ê lâng chiū tio̍h;

32

góa lâi m̄ sī beh chio gī lâng, sī beh chio pháiⁿ lâng lâi hóan-hóe.

33

In tùi I kóng, Iok-hān ê ha̍k-seng ta̍uh-ta̍uh kìm-chia̍h kî-tó; Hoat-lī-sài ê ha̍k-seng iā sī án-ni; nā-sī lí ê ha̍k-seng iā lim iā chia̍h.

34

Iâ-so͘ tùi in kóng, Sin-kiáⁿ-sài kap hō-chhōa ê lâng saⁿ-kap tī-teh, kiám ōe hō͘ hō-chhōa ê lâng kìm-chia̍h mah?

35

Nā-sī jı̍t-chí beh kàu, sin-kiáⁿ-sài tùi in tiong-kan bô--khì; tī hiah ê jı̍t in chiū beh kìm-chia̍h.

36

Koh ēng phì-jū tùi in kóng, Bô lâng thiah sin saⁿ lâi pó͘ kū saⁿ; nā án-ni, chiū thiah-phòa sin saⁿ, koh só͘ pó͘ hit tè sin ê bô ha̍h tī kū ê.

37

Iā bô lâng ēng sin chiú tóe tī kū phê-lông; nā án-ni, chiū sin chiú beh piak-lı̍h phê-lông, chiú lāu, lông iā phah pháiⁿ.

38

To̍k-to̍k sin chiú tio̍h jı̍p tī sin ê phê-lông.

39

Koh bô lâng lim kū chiú iā ài hit ê sin ê; in-ūi kóng, Kū ê sī hó.