Lō͘-ka 第 6 章 - 巴克禮全羅

1

Ū chı̍t ê an-hioh-jı̍t Iâ-so͘ tùi be̍h-hn̂g keng-kè, I ê ha̍k-seng tiah be̍h-sūi, ēng chhiú jê i lâi chia̍h.

2

Ū Hoat-lī-sài kúi-nā lâng kóng, An-hioh-jı̍t só͘ m̄ eng-kai kiâⁿ ê, lín siáⁿ-sū kiâⁿ i?

3

Iâ-so͘ ìn kóng, Tāi-pı̍t kap kun-tè ê lâng iau ê sî só͘ kiâⁿ ê, lín bē tha̍k-tio̍h mah?

4

I jı̍p Siōng-tè ê chhù, the̍h pâi-lia̍t ê piáⁿ lâi chia̍h, koh hō͘ i kun-tè ê lâng; chit hō piáⁿ, nā m̄ sī chè-si, chiū lóng m̄ eng-kai chia̍h.

5

Koh kā in kóng, Jîn-chú iā sī an-hioh-jı̍t ê Chú.

6

Koh chı̍t ê an-hioh-jı̍t, Iâ-so͘ jı̍p hōe-tn̂g kà-sī; tī hia ū chı̍t lâng i ê chiàⁿ chhiú ko͘-tâ.

7

Keng-ha̍k-sū kap Hoat-lī-sài lâng tng khòaⁿ I tī an-hioh-jı̍t beh i-pīⁿ á bô; ì-sù sī ài chhē phāng thang kò I.

8

Iâ-so͘ chai in ê ì-sù, chiū kā hit-ê chhiú ko͘-tâ ê lâng kóng, khí-lâi, khiā tī tiong-ng; i chiū khí-lâi khiā.

9

Iâ-so͘ chiū tùi in kóng, Góa mn̄g lín, tī an-hioh-jı̍t kiâⁿ hó sū kiâⁿ pháiⁿ sū, kiù sìⁿ-miā hāi sìⁿ-miā, tá-lo̍h chı̍t hāng khah ha̍p-gî ah?

10

Chiū sì-kòe khòaⁿ chèng lâng, kā hit lâng kóng, Chhun lí ê chhiú. I chhun-chhut-khì; chhiú chiū hó-hó.

11

Hiah ê lâng móa-sim siū-khì; saⁿ-kap gī-lūn tio̍h cháiⁿ-iūⁿ lâi pān Iâ-so͘.

12

Tng hit sî Iâ-so͘ chhut-khì soaⁿ-nı̍h kî-tó, thong mî kî-kiû Siōng-tè.

13

Kàu thiⁿ-kng chiū kiò I ê ha̍k-seng lâi; tùi in tiong-kan kéng cha̍p-jī lâng, chheng in chòe sù-tô͘;

14

ū Se-bûn, Iâ-so͘ koh hō i ê miâ chòe Pí-tek, kap i ê hiaⁿ-tī An-tek-lia̍t, koh ū Ngá-kok kap Iok-hān, Hui-le̍k kap Pa-to-lô-mái;

15

Má-thài kap To-má, A-le̍k-hui ê kiáⁿ Ngá-kok kap chheng chòe Se-lô-tí ê Se-bûn,

16

Ngá-kok ê kiáⁿ Iû-tāi, kap bōe sian-siⁿ ê Ka-lio̍k lâng Iû-tāi.

17

Iâ-so͘ kap in lo̍h-lâi khiā tī pîⁿ ê só͘-chāi, ū I chōe-chōe ê ha̍k-seng kap kui tōa tīn ê peh-sìⁿ, tùi Iû-thài chôan-tōe kap Iâ-lō͘-sat-léng í-kı̍p Chhui-lô Se-tùn iân hái-kîⁿ ê tōe lâi beh thiaⁿ I, iā beh tit-tio̍h i-hó in ê pīⁿ;

18

koh ū hō͘ siâ-sîn só͘ thiau-lân ê iā tit-tio̍h i-hó.

19

Chèng lâng lóng ài bong I, in-ūi ū kôan-lêng tùi I chhut, lâi i-hó in tāi-ke.

20

Iâ-so͘ kia̍h ba̍k khòaⁿ I ê ha̍k-seng, kóng, Lín sòng-hiong ê lâng ū hok-khì ah, in-ūi Siōng-tè ê kok sī lín ê.

21

Lín hiān-chāi teh iau ê lâng ū hok-khì ah; in-ūi lín beh tit-tio̍h pá. Lín hiān-chāi thî-khàu ê lâng ū hok-khì ah, in-ūi lín teh-beh chhiò.

22

Lâng ūi-tio̍h Jîn-chú lâi òan-hūn lín, kū-cho̍at lín, lóe-mē lín, lia̍h lín ê miâ chòe pháiⁿ lâi khì-sak i, lín chiū ū hok-khì ah.

23

Tng hit jı̍t lín tio̍h hoaⁿ-hí tiô-thiàu; in-ūi tī thiⁿ-nı̍h lín ê pò-siúⁿ sī tōa, sī in ê chó͘ khóan-thāi sian-ti iā sī án-ni.

24

Nā-sī lín hó-gia̍h lâng ū chai-ē ah! in-ūi lín í-keng siū-tio̍h lín ê an-ùi.

25

Lín hiān-chāi pá ê lâng ū chai-ē ah! in-ūi lín teh-beh iau. Lín hiān-chāi chhiò ê lâng ū chai-ē ah! in-ūi lín beh ai-siong thî-khàu.

26

Lín hō͘ chèng lâng o-ló ê ū chai-ē ah! in-ūi in ê chó͘ khóan-thāi ké ê sian-ti iā sī án-ni.

27

Nā-sī góa kā lín teh thiaⁿ ê lâng kóng, Tùi-te̍k lín ê tio̍h thiàⁿ in; òan-hūn lín ê, tio̍h hó khóan-thāi in;

28

lóe-mē lín ê, tio̍h kā in chiok-hok; lêng-jio̍k lín ê, tio̍h thòe in kî-tó.

29

Lâng siàn lí chit pêng ê chhùi-phóe, chiū tio̍h o̍at hit pêng ǹg i. Lâng the̍h lín ê gōa-saⁿ, liân lāi-saⁿ iā bo̍h-tit tòng i.

30

Hōan-nā kiû lí ê tio̍h hō͘ i; the̍h lí ê mı̍h ê, bo̍h-tit koh kā i thó.

31

Lín ài lâng cháiⁿ-iūⁿ khóan-thāi lín, iā tio̍h án-ni khóan-thāi lâng.

32

Lín nā thiàⁿ hiah-ê thiàⁿ lín ê, ū sím-mı̍h un-hūi? in-ūi pháiⁿ lâng iā sī thiàⁿ hiah-ê thiàⁿ in ê lâng.

33

Lín nā hó khóan-thāi hiah-ê hó khóan-thāi lín ê, ū sím-mı̍h un-hūi? in-ūi pháiⁿ lâng iā sī án-ni kiâⁿ.

34

Lín nā chioh hiah-ê ū thang ǹg-bāng i hêng ê, ū sím-mı̍h un-hūi? in-ūi pháiⁿ lâng iā chioh pháiⁿ lâng, ài in chiàu siàu-gia̍h lâi hêng.

35

Nā-sī lín tio̍h thiàⁿ lín ê tùi-te̍k hó khóan-thāi in; chioh lâng iā bô cho̍at-bāng; lín ê pò-siúⁿ chiū tōa, koh lín beh chòe Chì-kôaiⁿ-ê ê kiáⁿ-jî; in-ūi I hó khóan-thāi bông-un kap pháiⁿ ê lâng.

36

Só͘-í lín tio̍h ū lîn-bín, chhin-chhiūⁿ lín ê Pē ê lîn-bín chı̍t iūⁿ.

37

Bo̍h-tit phoe-phêng lâng, chiū bô tú-tio̍h phoe-phêng; bo̍h-tit chek-chōe lâng, chiū bô tú-tio̍h chek-chōe; lín pàng lâng soah, chiū beh pàng lín soah;

38

hō͘ lâng, chiū beh hō͘ lín; beh ēng chiok-gia̍h ê táu, jı̍h, iô, hō͘ i cha̍t kàu pôaⁿ-chhut-lâi, piàⁿ tī lín ê saⁿ-á-phè. In-ūi lín ēng sím-mı̍h niû lâi niû, iā beh án-ni tò niû hō͘ lín.

39

Koh ēng phì-jū kā in kóng, Chhiⁿ-mî ê ōe kā chhiⁿ-mî ê chhōa lō͘ mah? Nn̄g-ê kiám bōe lóng po̍ah-lo̍h hām-khiⁿ mah?

40

Ha̍k-seng bōe-ōe pôaⁿ-kè sian-siⁿ; chóng-sī kìⁿ-nā chiâⁿ chòe chiâu-pī ê beh chhin-chhiūⁿ i ê sian-siⁿ.

41

Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu lāi ê chháu-á-iù, iā bô siūⁿ lí ba̍k-chiu lāi ê îⁿ-á-chhâ ah?

42

Á-sī beh thài ōe kā lí ê hiaⁿ-tī kóng, Hiaⁿ-tī ah, lí ba̍k-chiu lāi ê chháu-á-iù hō͘ góa kā lí the̍h-khì, iā pún-sin bô khòaⁿ-kìⁿ lí ba̍k-chiu lāi ê îⁿ-á-chhâ ah? Ké-hó ê lâng ah, tāi-seng the̍h-khì lí ba̍k-chiu lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu lāi ê chháu-á-iù.

43

In-ūi bô ū hó chhiū kiat pháiⁿ ké-chí; iā bô ū pháiⁿ chhiū kiat hó ké-chí.

44

In-ūi ta̍k châng chhiū tùi i ka-kī ê ké-chí lâi bat i; chhì-phè lāi bô lâng bán bû-hoa-kó, chháu-chhì lāi bô lâng tiah phû-tô.

45

Hó lâng tùi i ê sim só͘ chek-chū ê hó lâi hoat-chhut hó; pháiⁿ lâng tùi i só͘ chek-chū ê pháiⁿ lâi hoat-chhut pháiⁿ; in-ūi tùi sim só͘ chhiong-móa ê, chhùi chiū kóng chhut.

46

Lín siáⁿ-sū chheng-ho͘ góa, Chú ah, Chú ah, iā bô kiâⁿ góa só͘ kóng ê ah?

47

Kìⁿ-nā chiū-kūn góa, thiaⁿ góa chiah ê ōe lâi kiâⁿ i ê lâng, góa beh pò lín chai hit ê lâng chhin-chhiūⁿ sím-mı̍h.

48

I sī chhin-chhiūⁿ lâng khí chhù, ku̍t hō͘ i chhim, hē tōe-ki tī chio̍h-pôaⁿ téng; tōa chúi chı̍t-ē kàu, khoe lâu chhiong-tio̍h chhù, bōe-ōe iô-tāng i, in-ūi i khí-tit hó.

49

Nā-sī thiaⁿ-liáu bô kiâⁿ ê lâng, sī chhin-chhiūⁿ lâng khí chhù tī thô͘-téng, bô hē tōe-ki; khoe lâu chhiong-tio̍h i, chiū tó; hit keng chhù ê tó-hōai sī siong-tiōng.