Lō͘-ka 第 7 章 - 巴克禮全羅

1

Iâ-so͘ kóng hō͘ peh-sìⁿ thiaⁿ ê ōe lóng bêng-pe̍k, chiū jı̍p Ka-pek-lông.

2

Ū chı̍t ê pé-chóng só͘ tùi-tiōng ê lô͘-po̍k hōan-tio̍h pīⁿ, teh-beh sí.

3

Pé-chóng thiaⁿ-kìⁿ Iâ-so͘ ê sū, chiū chhe Iû-thài ê tiúⁿ-ló kúi-nā lâng, kiû I lâi kiù i ê lô͘-po̍k.

4

In chiū-kūn Iâ-so͘ chhiat-chhiat kiû I kóng, Chit lâng ōe kham-tit lí kā i kiâⁿ chit ê tāi-chì;

5

in-ūi i thiàⁿ lán ê peh-sìⁿ, koh pún-sin thòe lán khí hōe-tn̂g.

6

Iâ-so͘ kap in khì. Lī chhù bô jōa hn̄g, pé-chóng chhe kúi-nā ê pêng-iú chiū-kūn I, kā I kóng, Chú ah, m̄-thang lô-hôan; lí kàu góa ê chhù góa tng bōe khí;

7

góa iā lia̍h chòe ka-kī bōe kham-tit chiū-kūn lí; lí nā kóng chı̍t kù ōe, góa ê lô͘-po̍k chiū ōe hó.

8

In-ūi góa iā sī hō͘ lâng kóan ê lâng, iā ū peng hō͘ góa kóan; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni.

9

Iâ-so͘ thiaⁿ-kìⁿ chiah ê ōe chiū kî-kòai i, o̍at-tńg-sin kā tè I ê chèng lâng kóng, Góa kā lín kóng, chhin-chhiūⁿ chit hō ê sìn liân Í-sek-lia̍t tiong góa iáu-bē bat tú-tio̍h.

10

Só͘ chhe ê lâng tò-khì kàu chhù, khòaⁿ-kìⁿ lô͘-po̍k í-keng hó-hó.

11

Koh bô jōa kú, Iâ-so͘ khì chı̍t ê siâⁿ miâ kiò Ná-in; I ê ha̍k-seng kap kui tīn lâng kap I tâng kiâⁿ.

12

Beh kūn siâⁿ-mn̂g, tú-tn̄g ū lâng kng chı̍t ê sí-lâng chhut-lâi, i ê lāu-bú ko͘-ko͘ siⁿ chit ê kiáⁿ, koh sī chiú-kóaⁿ. Siâⁿ-lāi ū chōe-chōe lâng teh sàng i.

13

Chú khòaⁿ-kìⁿ chiū lîn-bín i, kā i kóng, Bo̍h-tit háu.

14

Chiū óa-khì, bong hit-ê khòa sin-si ê kè, kng ê lâng thêng-kha; I chiū kóng, Siàu-liân lâng ah, góa kā lí kóng, Khí-lâi.

15

Sí ê lâng chiū khí-lâi chē, sòa kóng ōe.

16

Iâ-so͘ chiū chiong i hō͘ i ê lāu-bú. Chèng lâng lóng kiaⁿ-hiâⁿ, kui êng-kng Siōng-tè kóng, Tōa sian-ti ū heng-khí tī lán tiong-kan; koh kóng, Siōng-tè ū khòaⁿ-kò͘ I ê peh-sìⁿ.

17

Tùi án-ni Iâ-so͘ chit ê miâ-siaⁿ piàn thôan tī Iû-thài kap chiu-ûi ê tōe-hng.

18

Iok-hān ê ha̍k-seng chiong chiah ê sū lóng-chóng pò in ê sian-siⁿ chai.

19

I chiū kiò i ê ha̍k-seng nn̄g lâng lâi, chhe in chiū-kūn Chú kóng, Só͘ beh lâi ê sī lí mah? Á-sī góan tio̍h ǹg-bāng pa̍t lâng ah?

20

Hit nn̄g lâng í-keng kàu, chiū kóng, Kiâⁿ sóe-lé Iok-hān chhe góan chiū-kūn lí, kóng, Beh lâi ê sī lí mah? Á-sī góan tio̍h ǹg-bāng pa̍t lâng ah?

21

Hit sî Iâ-so͘ i-hó chōe-chōe phòa-pīⁿ ê, thàng-thiàⁿ ê, hōan-tio̍h kúi ê, koh hō͘ chōe-chōe chhiⁿ-mî ê tit-tio̍h khòaⁿ-kìⁿ.

22

Chiū ìn kóng, Lín tio̍h khì, chiong lín só͘ khòaⁿ-kìⁿ só͘ thiaⁿ-kìⁿ ê pò Iok-hān chai; chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-o̍ah, sòng-hiong lâng tit-tio̍h thiaⁿ hok-im;

23

kìⁿ-nā bô tī góa lâi tio̍h-tak ê, ū hok-khì.

24

Iok-hān só͘ chhe ê lâng khì-liáu, Iâ-so͘ chiah thê-khí Iok-hān, tùi chèng lâng kóng, Lín chêng chhut-khì khòng-iá, beh khòaⁿ sím-mı̍h? sī lô͘-tek hō͘ hong chhe tín-tāng mah?

25

Lín chhut-khì beh khòaⁿ sím-mı̍h? sī lâng chhēng iù-nńg ê i-chiûⁿ mah? Lí khòaⁿ, chhēng saⁿ hâng-ngó͘ hióng-siū iàn-lo̍k ê sī tī ông-kiong.

26

Án-ni, lín chhut-khì beh khòaⁿ sím-mı̍h? sian-ti lâng mah? Sī lah, góa kā lín kóng, iā sī khah iâⁿ-kè sian-ti ê.

27

Chit lâng chiū-sī keng-nı̍h só͘ chí ê, kóng, Lí khòaⁿ, góa chhe góa ê sù-chiá tī lí ê bīn-chêng, I beh tī lí ê thâu-chêng pī-pān lí ê lō͘.

28

Góa kā lín kóng, Hū-jîn-lâng só͘ siⁿ bē ū khah tōa Iok-hān ê; chóng-sī tī Siōng-tè kok ê bî-sòe ê iáu khah tōa i.

29

Chèng peh-sìⁿ kap thiu-hiòng ê lâng, í-keng siū Iok-hān ê sóe-lé, chı̍t-ē thiaⁿ-kìⁿ che, chiū chheng-ho͘ Siōng-tè chòe gī.

30

Nā-sī Hoat-lī-sài lâng kap kà lu̍t-hoat ê sian-siⁿ bô siū i ê sóe-lé, ka-kī phah-bô Siōng-tè ê chí-ì.

31

Chú kóng, Chit sè-tāi ê lâng, góa beh ēng sím-mı̍h lâi pí-phēng in? In sī chhin-chhiūⁿ sím-mı̍h ah?

32

Sī chhin-chhiūⁿ gín-ná chē tī koe-chhī-nı̍h, saⁿ kiò kóng, Góan tùi lín pûn ta̍t-á, lín bô thiàu-bú; góan bat pi-ai, lín bô thî-khàu.

33

In-ūi kiâⁿ sóe-lé ê Iok-hān lâi, bô chia̍h piáⁿ bô lim chiú, lín chiū kóng, I hōan-tio̍h kúi.

34

Jîn-chú lâi iā chia̍h iā lim, lín chiū kóng, I sī tham-chia̍h hò͘ⁿ-chiú ê lâng, thiu-hiòng ê kap pháiⁿ lâng ê pêng-iú.

35

Nā-sī Tì-hūi tùi i ê chèng kiáⁿ hián-bêng i sī tio̍h.

36

Ū chı̍t ê Hoat-lī-sài lâng chhiáⁿ Iâ-so͘ saⁿ-kap chia̍h. I chiū jı̍p Hoat-lī-sài lâng ê chhù chē toh.

37

Tú-tn̄g siâⁿ-lāi ū chı̍t ê pháiⁿ hū-jîn-lâng, chai I chē toh tī Hoat-lī-sài lâng ê chhù, chiū tòa tóe hiuⁿ-iû ê ge̍k-kòan lâi;

38

khiā tī Iâ-so͘ ê āu-bīn, óa I ê kha teh thî-khàu; ū ba̍k-sái tih-tâm I ê kha, chiū ēng i ê thâu-mn̂g chhit i; koh chia̍p-chia̍p chim I ê kha, ēng hiuⁿ-iû boah i.

39

Chhiáⁿ Iâ-so͘ ê Hoat-lī-sài lâng khòaⁿ-kìⁿ án-ni, sim-lāi siūⁿ kóng, Chit lâng nā sī sian-ti, tek-khak ōe chai bong I ê lâng sī chī-chūi, koh sī sím-mı̍h hō ê hū-jîn-lâng, chiū-sī pháiⁿ lâng.

40

Iâ-so͘ ìn i kóng, Se-bûn, góa ū ōe beh kā lí kóng. Se-bûn kóng, Sian-siⁿ, chhiáⁿ lí kóng.

41

I chiū kóng, Bó͘ ê chè-chú ū nn̄g lâng khiàm i ê chè, chı̍t-ê khiàm i gō͘-pah ê gûn-á, chı̍t-ê khiàm i gō͘-cha̍p.

42

In kì-jiân bô thang hêng, chè-chú chiū sià-bián in nn̄g lâng. Án-ni, chiū tá-lo̍h chı̍t-ê khah thiàⁿ chè-chú ah?

43

Se-bûn ìn kóng, Góa phah-sǹg sī hit-ê hō͘ i sià-bián khah chōe ê. Iâ-so͘ kā i kóng, Lí só͘ tòan ê sī tio̍h.

44

Chiū o̍at thâu ǹg hū-jîn-lâng, kā Se-bûn kóng, Lí khòaⁿ-kìⁿ chit ê hū-jîn-lâng bô? Góa jı̍p lí ê chhù, lí bô ēng chúi hō͘ góa sóe kha; nā-sī i ēng ba̍k-sái tih-tâm góa ê kha, ēng thâu-mn̂g chhit i.

45

Lí bô kā góa chim; to̍k-to̍k i tùi góa jı̍p-lâi ê sî chim góa ê kha bô soah.

46

Lí bô ēng iû boah góa ê thâu-khak; nā-sī i ēng hiuⁿ-iû boah góa ê kha.

47

Só͘-í góa kā lí kóng, I chōe-chōe ê chōe-kòa í-keng sià-bián, in-ūi i ê thiàⁿ sī chōe; nā-sī tit-tio̍h sià-bián chió ê, i ê thiàⁿ iā sī chió.

48

Chiū kā hū-jîn-lâng kóng, Lí ê chōe sià lah.

49

Tâng toh ê lâng sim-lāi kóng, Chit-ê teh sià chōe ê sī sím-mı̍h lâng?

50

Iâ-so͘ tùi hū-jîn-lâng kóng, Lí ê sìn ū kiù lí; chòe lí an-sim tò-khì.