Lō͘-ka 第 8 章 - 巴克禮全羅

1

Kè bô kúi jı̍t, Iâ-so͘ sì-kòe kiâⁿ ta̍k ê siâⁿ ta̍k ê hiuⁿ-siā, soan-thôan lâi pò-iông Siōng-tè kok ê hok-im; cha̍p-jī ê ha̍k-seng iā kap I khì;

2

iā ū kúi-nā ê hū-jîn-lâng, ū-ê bat hōan-tio̍h kúi, ū-ê ū phòa-pīⁿ, taⁿ í-keng tit-tio̍h i-hó; kî-tiong ū Bo̍at-tāi-lia̍p ê Má-lī-a, bat ū chhit ê kúi tùi i chhut-khì;

3

koh ū Hi-lu̍t ê kóan-ke Khó͘-sat ê bó͘ Iok-a-ná; koh ū So͘-sat-ná; í-gōa iáu ū chōe-chōe hū-jîn-lâng, lóng ēng in só͘ ū ê lâi ho̍k-sāi in.

4

Ū chōe-chōe lâng chū-chı̍p, koh ū lâng tùi ta̍k ê siâⁿ lâi chiū-kūn I;

5

hit sî Iâ-so͘ siat phì-jū kā in kóng, Ū iā chéng ê chhut-khì iā chéng. Teh iā ê sî, ū-ê ka-la̍uh tī lō͘-piⁿ, hō͘ lâng só͘ ta̍h, thiⁿ-tiong ê pe-chiáu it-chīn chia̍h i.

6

Ū-ê ka-la̍uh tī chio̍h-pôaⁿ téng, hoat-khí-lâi chiū ta-khì, in-ūi bô lūn-te̍k.

7

Ū-ê ka-la̍uh tī chhì-á tiong, chhì-á pîⁿ-pîⁿ hoat-khí-lâi, jia-pè i.

8

Ū-ê ka-la̍uh tī hó ê thó͘-tōe, hoat-khí-lâi kiat-sı̍t kàu chı̍t-pah pē. Chiah ê ōe kóng-liáu, chiū kiò kóng, Ū hī-khang thang thiaⁿ ê, tio̍h thiaⁿ.

9

I ê ha̍k-seng mn̄g I chit ê phì-jū cháiⁿ-iūⁿ.

10

Iâ-so͘ kóng, Siōng-tè kok ê ò-biāu hō͘ lín chai; nā-sī tùi pa̍t lâng chiū ēng phì-jū, beh hō͘ in khòaⁿ, khòaⁿ bōe kìⁿ, thiaⁿ iā bōe hiáu-ngō͘.

11

Chit ê phì-jū chiū-sī án-ni: Chéng-chí chiū-sī Siōng-tè ê tō-lí.

12

Tī lō͘-piⁿ ê, chiū-sī lâng thiaⁿ-kìⁿ tō-lí; Mô͘-kúi chiū lâi, tùi in ê sim-lāi chiong tō-lí chhiúⁿ-khì, bián-tit in sìn lâi tit-tio̍h kiù.

13

Tī chio̍h-pôaⁿ téng ê, chiū-sī lâng thiaⁿ-liáu hoaⁿ-hí sêng-siū tō-lí; nā-sī in bô kun, sī chiām-sî sìn nā-tiāⁿ, tú-tio̍h chhì-liān ê sî chiū pōe-biū.

14

Lo̍h tī chhì-á lāi ê, chiah-ê chiū-sī lâng thiaⁿ-liáu chiū khì, hō͘ chāi-siⁿ ê khòa-lū, hè-châi, iàn-lo̍k só͘ jia-pè, chiū kiat m̄ chiâⁿ lia̍p.

15

Tī hó thó͘-tōe ê, chiah-ê chiū-sī lâng ēng hó koh siān-liông ê sim thiaⁿ tō-lí lâi chip-siú i, koh thun-lún lâi kiat-sı̍t.

16

Bô lâng tiám teng ēng khì-kū lâi khàm i, á-sī hē tī bîn-chhn̂g ē, chiū-sī hē tī teng-tâi téng, hō͘ jı̍p-lâi ê lâng khòaⁿ-kìⁿ hit ê kng.

17

In-ūi bô ū ún-ba̍t, iā chiong-lâi bô lō͘-hiān ê; bô ū pì-ba̍t, chiong-lâi bô hō͘ lâng chai koh lō͘-hiān ê.

18

Só͘-í lín tio̍h kín-sīn cháiⁿ-iūⁿ lâi thiaⁿ; in-ūi kìⁿ-nā ū ê, beh hō͘ i; bô ê, liân i ka-kī lia̍h-chòe ū ê, iā beh kā i chhiúⁿ-khì.

19

Iâ-so͘ ê lāu-bú kap hiaⁿ-tī lâi chiū-kūn I; in-ūi lâng chōe, bōe-tit kūn-óa.

20

Ū lâng kā I kóng, Lí ê lāu-bú kap lí ê hiaⁿ-tī khiā tī gōa-bīn, ài beh khòaⁿ lí.

21

I ìn kóng, Góa ê lāu-bú kap góa ê hiaⁿ-tī chiū-sī chiah ê thiaⁿ Siōng-tè ê tō-lí lâi kiâⁿ ê lâng.

22

Ū chı̍t jı̍t Iâ-so͘ kap I ê ha̍k-seng chiūⁿ chûn, kā in kóng, Lán lâi khì ô͘ ê hit pêng hōaⁿ. Chiū khui chûn.

23

Kiâⁿ ê sî Iâ-so͘ khùn-khì. Ū pò-thâu-hong phah-lo̍h-lâi ô͘-nı̍h, chûn-lāi ê chúi chha-put-to móa, chīn-chāi gûi-hiám.

24

Ha̍k-seng kūn-óa, kiò I chhíⁿ, kóng, Sian-siⁿ ah, sian-siⁿ ah, beh bô miā lah. I chiū chhíⁿ, chek-pī hong kap hái-éng, hong éng chiū soah, iā pîⁿ-tiāⁿ.

25

I chiū kā ha̍k-seng kóng, Lín ê sìn tī tá-lo̍h? In chiū kiaⁿ-hiâⁿ kî-kòai, saⁿ-kap kóng, Che sī sím-mı̍h lâng, bēng-lēng hong kap chúi, in iā sūn I?

26

Chûn kàu Keh-lah-sim lâng ê tōe-hng, chiū-sī Ka-lī-lī ê tùi-bīn.

27

Iâ-so͘ lī-khui chûn, chiūⁿ hōaⁿ; ū chı̍t lâng tùi siâⁿ-nı̍h chhut-lâi tú-tio̍h I, sī hōan-tio̍h kúi ê, kú-kú bô chhēng saⁿ bô tiàm chhù-lāi, to̍k-to̍k tiàm tī hûn-bōng tiong.

28

Khòaⁿ-kìⁿ Iâ-so͘ chiū âu-kiò, phak tī I ê bīn-chêng, tōa siaⁿ kóng, Chì-kôaiⁿ Siōng-tè ê Kiáⁿ Iâ-so͘, góa kap lí ū sím-mı̍h kan-sia̍p? kiû lí bo̍h-tit khó͘-chhó͘ góa.

29

In-ūi Iâ-so͘ ū bēng-lēng siâ-sîn tùi hit ê lâng chhut-lâi. In-ūi siâ-sîn siông-siông lia̍h i; lâng ēng thih-liān liān i, ēng kha-khàu khàu i, lâi kò͘-siú i; i chiū chhoah-tn̄g só͘ pa̍k i ê khì-kū, i hō͘ kúi kóaⁿ kàu khòng-iá.

30

Iâ-so͘ mn̄g i kóng, Lí kiò sím-mı̍h miâ? I kóng, Iâⁿ; in-ūi ū chōe-chōe kúi jı̍p i.

31

Kúi kiû Iâ-so͘ bo̍h-tit hoan-hù in jı̍p chhim-ian.

32

Tī hia ū kui tīn ti, tī soaⁿ-nı̍h teh thó-chia̍h. Kúi kiû I chún in jı̍p hiah ê ti. Chiū chún in.

33

Kúi chiū tùi hit lâng chhut-khì, jı̍p hiah ê ti; kui tīn ti chiū cháu-lo̍h soaⁿ-phiâⁿ, chông-lo̍h ô͘, kek-sí.

34

Kò͘-ti ê khòaⁿ-kìⁿ chit ê tāi-chì chiū cháu-khì, pò siâⁿ-lāi kap hiuⁿ-siā ê lâng chai.

35

In chiū chhut-lâi, ài khòaⁿ chit ê tāi-chì; chiū-kūn Iâ-so͘, tú-tio̍h kúi só͘ tùi i chhut-lâi hit lâng, chhēng saⁿ, hāi-chāi, chē tī Iâ-so͘ kha-ē; in chiū kiaⁿ.

36

Khòaⁿ-kìⁿ ê lâng chiong hōan-tio̍h kúi ê lâng cháiⁿ-iūⁿ tit-tio̍h kiù pò in chai.

37

Keh-lah-sim sì-hng ê lâng lóng kiû Iâ-so͘ lī-khui in; in-ūi in tōa kiaⁿ ê iân-kò͘; I chiū chiūⁿ chûn tò-tńg-khì.

38

Kúi só͘ tùi i chhut-khì ê lâng kiû beh kap I khì. Nā-sī Iâ-so͘ chhe i khì kóng,

39

Tò-khì lín tau, chiong Siōng-tè ūi-tio̍h lí kiâⁿ hiah tōa ê sū pâi-lia̍t hō͘ lâng chai. I chiū khì, piàn siâⁿ soan-thôan Iâ-so͘ ūi-tio̍h i só͘ kiâⁿ hiah tōa ê sū.

40

Iâ-so͘ tò-tńg-lâi ê sî chèng lâng chiap-la̍p I; in-ūi in lóng teh thèng-hāu I.

41

Ū chı̍t lâng, miâ Gâi-ló͘, chiū-sī kóan hōe-tn̂g ê, lâi phak tī Iâ-so͘ ê kha-ē, kiû I kàu i ê ke;

42

in-ūi i ū ko͘-siⁿ ê cha-bó͘-kiáⁿ iok-lio̍k cha̍p-jī hè, teh-beh sí. Iâ-so͘ khì ê sî, chèng lâng oe-khoeh I.

43

Ū chı̍t ê hū-jîn-lâng, hiat-lāu cha̍p-jī nî, in-ūi chhiáⁿ i-seng ke-hé phòa kàu liáu, bô chı̍t lâng ōe i-hó i,

44

lâi kàu Iâ-so͘ ê ka-chiah-āu, bong I saⁿ-á-ku ê chhiu; hiat-lāu chek-sî chí.

45

Iâ-so͘ kóng, Bong góa ê sī chī-chūi? Tāi-ke kóng bô; Pí-tek kap tâng kiâⁿ ê lâng kóng, Sian-siⁿ, chèng lâng pek-óa, khoeh-tio̍h lí.

46

Iâ-so͘ kóng, Ū lâng bong góa, in-ūi góa chai ū kôan-lêng tùi góa chhut.

47

Hū-jîn-lâng khòaⁿ i khǹg bōe ba̍t, ngia̍uh-ngia̍uh-chhoah lâi phak tī I kha-ē; tng chèng lâng ê bīn-chêng kóng-bêng bong I ê iân-kò͘, kap i cháiⁿ-iūⁿ liâm-piⁿ hó.

48

Iâ-so͘ kā i kóng, Hū-jîn-lâng ah, lí ê sìn ū kiù lí, chòe lí an-sim tò-khì.

49

I iáu teh kóng ê sî, ū lâng tùi kóan hōe-tn̂g ê ê ke lâi kóng, Lí ê cha-bó͘-kiáⁿ í-keng sí, bián lô-tōng sian-siⁿ.

50

Iâ-so͘ thiaⁿ-kìⁿ chiū ìn i kóng, M̄ bián kiaⁿ, chí-ū tio̍h sìn, i chiū tit-tio̍h kiù.

51

Í-keng kàu i ê ke, tī Pí-tek, Iok-hān, Ngá-kok, kap cha-bó͘ gín-ná ê pē-bú í-gōa, m̄ chún pa̍t lâng kap I jı̍p-khì.

52

Chèng lâng teh thî-khàu, ūi-tio̍h i lâi tûi heng; Iâ-so͘ kóng, Bo̍h-tit thî-khàu, in-ūi i m̄ sī sí, sī teh khùn nā-tiāⁿ.

53

In chiū thí-chhiò I, in-ūi chai i í-keng sí lah.

54

Iâ-so͘ khan cha-bó͘ gín-ná ê chhiú kiò kóng, Cha-bó͘ gín-ná, khí-lâi.

55

I ê sîn ho̍k-tò, chek-sî khí-lâi; Iâ-so͘ hoan-hù hō͘ i chia̍h.

56

I ê pē-bú gông-ngia̍h; Iâ-so͘ bēng-lēng in bo̍h-tit chiong só͘ kiâⁿ ê kā lâng kóng.