Lō͘-ka 第 9 章 - 巴克禮全羅

1

Iâ-so͘ kiò cha̍p-jī ê ha̍k-seng lóng lâi, hō͘ in ū lêng-le̍k kôan-pèng, ōe chè-ap lóng-chóng ê kúi, i-hó pīⁿ-chèng.

2

Chiū chhe in khì thôan Siōng-tè ê kok, i-hó phòa-pīⁿ lâng.

3

Koh tùi in kóng, Bo̍h-tit tòa lō͘-hùi, bo̍h-tit kóaiⁿ-á, bo̍h-tit tah-liân, bo̍h-tit kan-niû, bo̍h-tit gûn, iā bo̍h-tit nn̄g niá saⁿ.

4

Kìⁿ só͘ jı̍p ê chhù, tio̍h tòa tī hia, iā tio̍h tùi hia khí-sin.

5

Hōan-nā m̄ chiap-la̍p lín ê, chhut in ê siâⁿ ê sî, tio̍h pōaⁿ-khì lín kha-nı̍h ê thô͘-hún, lâi kan-chèng in.

6

Ha̍k-seng chiū chhut-khì, piàn-kiâⁿ hiah ê hiuⁿ-siā thôan hok-im, ta̍k só͘-chāi i-pīⁿ.

7

Hun-hong ê jîn-kun Hi-lu̍t thiaⁿ-kìⁿ it-chhè ê sū, chiū put-chí tiû-tû, in-ūi ū lâng kóng, Iok-hān tùi sí-lâng tiong koh-o̍ah;

8

ū-ê kóng, Í-lī-a chhut-hiān; iā ū-ê kóng, kó͘-chá ê sian-ti chı̍t lâng koh-o̍ah.

9

Nā-sī Hi-lu̍t kóng, Iok-hān góa í-keng kā i thâi-thâu; taⁿ góa thiaⁿ-kìⁿ I chit hō sū, che sī sím-mı̍h lâng? Chiū chhē ki-hōe ài khòaⁿ-kìⁿ I.

10

Sù-tô͘ tò-lâi, chiong in só͘ kiâⁿ ê pâi-lia̍t hō͘ Iâ-so͘ thiaⁿ. Iâ-so͘ chiū chhōa in thè-khui kàu chı̍t ê siâⁿ, miâ Pek-sài-tāi.

11

Nā-sī chèng lâng chai chiū tè I; I chiap-la̍p in, tùi in káng-lūn Siōng-tè ê kok; hōan-nā khiàm-ēng i-pīⁿ, chiū kā i i.

12

Jı̍t beh lo̍h, cha̍p-jī ê ha̍k-seng lâi kā I kóng, Chhiáⁿ sì-sòaⁿ chèng lâng, hō͘ in khì sì-ûi ê hiuⁿ-siā kap soaⁿ-tiûⁿ tâu-hioh siat-hoat chia̍h; in-ūi lán chia sī khòng-iá ê só͘-chāi.

13

Iâ-so͘ tùi in kóng, Lín hō͘ in chia̍h. In kóng, Góan nā bô khì thòe chiah ê chèng lâng bóe chia̍h, chiū put-kò ū gō͘ ê piáⁿ, nn̄g bé hî nā-tiāⁿ.

14

In-ūi hiah ê lâng iok-lio̍k ū gō͘-chheng. Iâ-so͘ tùi ha̍k-seng kóng, Hō͘ chèng lâng chē kui lia̍t, múi lia̍t gō͘-cha̍p lâng.

15

Ha̍k-seng chiàu án-ni kiâⁿ, hō͘ chèng lâng lóng chē.

16

Iâ-so͘ the̍h gō͘ ê piáⁿ nn̄g bé hî, ǹg thiⁿ chiok-siā lâi peh i, hō͘ ha̍k-seng pâi tī chèng lâng ê bīn-chêng.

17

Lóng chia̍h kàu pá; khioh só͘ chhun ê sut-á cha̍p-jī kheng.

18

Iâ-so͘ ka-kī teh kî-tó, ha̍k-seng kap I tī hia; I chiū mn̄g in kóng, Chèng lâng kóng góa sī chī-chūi?

19

Ìn kóng, sī kiâⁿ sóe-lé ê Iok-hān; iā ū lâng kóng, sī Í-lī-a; koh ū lâng kóng, sī kó͘-chá ê sian-ti chı̍t lâng koh-o̍ah.

20

I kā in kóng, Nā-sī lín kóng góa sī chī-chūi? Pí-tek ìn kóng, Sī Siōng-tè ê Ki-tok.

21

I chiū kìm-kài in bo̍h-tit chiong che kā lâng kóng;

22

sòa kóng, Jîn-chú tek-khak tio̍h siū chōe-chōe kan-khó͘, hō͘ chiah ê tiúⁿ-ló, chè-si-thâu, keng-ha̍k-sū só͘ khì-sak, koh siū hāi-sí, tē saⁿ jı̍t koh-o̍ah.

23

Koh tùi chèng lâng kóng, Nā ū lâng ài tè góa, chiū tio̍h khòaⁿ-bô ka-kī, jı̍t-jı̍t giâ i ê sı̍p-jī-kè lâi tè góa.

24

In-ūi kìⁿ-nā ài kiù i ê sìⁿ-miā ê beh sit-lo̍h i; chóng-sī kìⁿ-nā ūi-tio̍h góa lâi sit-lo̍h i ê sìⁿ-miā ê teh-beh kiù i.

25

In-ūi lâng nā tit-tio̍h chôan sè-kài lâi sit-lo̍h ka-kī, sún-hōai ka-kī, ū sím-mı̍h lī-ek ah?

26

Kìⁿ-nā lia̍h góa kap góa ê ōe chòe kiàn-siàu ê, Jîn-chú ēng ka-kī kap Pē kap sèng thiⁿ-sài ê êng-kng lâi ê sî, iā beh lia̍h hit lâng chòe kiàn-siàu.

27

Góa chin-sı̍t kā lín kóng, Khiā tī chia ê, ū lâng iáu-bē sí, beh khòaⁿ-kìⁿ Siōng-tè ê kok.

28

Kóng chiah ê ōe liáu-āu chha-put-to poeh jı̍t, Iâ-so͘ tòa Pí-tek, Iok-hān, Ngá-kok saⁿ-kap chiūⁿ soaⁿ kî-tó.

29

Kî-tó ê sî I ê bīn-māu ū koh-iūⁿ, I ê saⁿ pe̍h, koh kng nà-nà.

30

Hut-jiân ū nn̄g lâng kap I kóng ōe, chiū-sī Mô͘-se, Í-lī-a.

31

In tī êng-kng chhut-hiān, tâm-lūn I ê kè-sì, chiū-sī I tī Iâ-lō͘-sat-léng só͘ beh le̍k-kè ê.

32

Pí-tek kap tâng tī-teh ê lâng ià-siān bîn-khì; kàu in cheng-sîn, chiū khòaⁿ-kìⁿ Iâ-so͘ ê êng-kng, í-kı̍p kap I khiā-teh hit nn̄g lâng.

33

Tng hit nn̄g lâng lī-pia̍t I ê sî, Pí-tek tùi Iâ-so͘ kóng, Sian-siⁿ, lán tī chia chin hó; góan lâi tah saⁿ keng liâu-á, chı̍t keng hō͘ lí, chı̍t keng hō͘ Mô͘-se, chı̍t keng hō͘ Í-lī-a; sī m̄ chai i só͘ kóng ê.

34

Kóng chiah ê ōe ê sî, ū hûn tà in; in jı̍p tī hûn-lāi chiū kiaⁿ.

35

Ū siaⁿ tùi hûn-nı̍h chhut, kóng, Chit-ê sī góa ê Kiáⁿ, góa só͘ kéng ê; lín tio̍h thiaⁿ I.

36

Hit ê siaⁿ í-keng chhut, chiū khòaⁿ-kìⁿ Iâ-so͘ ka-kī tī-teh. Ha̍k-seng chēng-chēng; hit sî bô chiong só͘ khòaⁿ-kìⁿ ê kā lâng kóng.

37

Keh jı̍t in lo̍h soaⁿ ê sî, ū kui tīn lâng lâi chih I.

38

Chiông-tiong ū chı̍t lâng tōa siaⁿ kiò kóng, Sian-siⁿ ah, kiû lí khòaⁿ góa ê kiáⁿ, i sī góa ko͘-siⁿ ê.

39

Ū sîn lia̍h i, chiū liâm-piⁿ âu-kiò, hō͘ i thiu-chhoah kàu lâu nōa, koh tāng-tāng siong i; lī-khui i sı̍t-chāi oh.

40

Góa bat kiû lí ê ha̍k-seng kóaⁿ i, iā in bōe-ōe.

41

Iâ-so͘ ìn kóng, Hàiⁿ ah, m̄ sìn koh pōe-ge̍k ê sè-tāi ah, góa kap lín tòa, thun-lún lín, beh kàu jōa kú ah? Tio̍h chhōa lí ê kiáⁿ lâi chia.

42

Lâi ê sî kúi siak hō͘ i tó, hō͘ i tōa thiu-chhoah. Iâ-so͘ chiū chek-pī siâ-sîn, i-hó hit ê gín-ná, kau hō͘ i ê lāu-pē.

43

Chèng lâng lóng gông-ngia̍h Siōng-tè ê tōa ui-giâm. Chèng lâng kî-kòai I só͘ chòe lóng-chóng ê sū, hit sî Iâ-so͘ tùi I ê ha̍k-seng kóng,

44

Chiah ê ōe lín tio̍h thiaⁿ khì lo̍h-hī; in-ūi Jîn-chú beh tú-tio̍h ké-sàng tī lâng ê chhiú.

45

Ha̍k-seng bōe hiáu-ngō͘ chit ê ōe, sī tùi in ún-ba̍t, hō͘ in bōe bêng-pe̍k; in iā m̄ káⁿ ēng chit ê ōe mn̄g I.

46

Ha̍k-seng tiong siⁿ-khí piān-lūn, khòaⁿ chī-chūi beh chòe tōa.

47

Nā-sī Iâ-so͘ khòaⁿ-chhut in sim-lāi só͘ piān-lūn, chiū khan chı̍t ê gín-ná hō͘ i khiā tī sin-piⁿ,

48

chiah kā in kóng, Kìⁿ-nā ūi-tio̍h góa ê miâ chiap-la̍p chit ê gín-ná ê chiū-sī chiap-la̍p góa; kìⁿ-nā chiap-la̍p góa ê sī chiap-la̍p chhe góa ê; in-ūi lín chèng lâng ê tiong-kan tē it bî-sòe ê, i sī chòe tōa ê.

49

Iok-hān ìn kóng, Sian-siⁿ, góan bat khòaⁿ-kìⁿ chı̍t lâng ēng lí ê miâ kóaⁿ kúi; góan chiū kìm-chí i, in-ūi i bô kap góan tè lí.

50

Iâ-so͘ tùi i kóng, Bo̍h-tit kìm-chí i, in-ūi kìⁿ-nā bô kong-kek lín ê chiū-sī ūi lín.

51

Iâ-so͘ siū chih-chiap chiūⁿ thiⁿ ê jı̍t-kî beh kàu, chiū koat-ì ǹg Iâ-lō͘-sat-léng lâi kiâⁿ, chhe sù-chiá chòe-thâu khì;

52

in khì jı̍p Sat-má-lī-a lâng chı̍t ê hiuⁿ-siā, beh kā I pī-pān.

53

Nā-sī in m̄ chiap-la̍p I, in-ūi I ǹg Iâ-lō͘-sat-léng teh kiâⁿ.

54

I ê ha̍k-seng Ngá-kok Iok-hān khòaⁿ-kìⁿ án-ni, chiū kóng, Chú ah, lí ài góan kiò hé tùi thiⁿ lo̍h-lâi bia̍t in mah?

55

Iâ-so͘ o̍at-tńg-sin chek-pī in.

56

Tāi-ke chiū khì pa̍t ê hiuⁿ-siā.

57

In kiâⁿ lō͘ ê sî ū lâng tùi Iâ-so͘ kóng, Lí bô lūn tá-lo̍h khì, góa beh tè lí.

58

Iâ-so͘ kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi.

59

Koh tùi chı̍t lâng kóng, Tè góa. Hit lâng kóng, Chú ah, hō͘ góa tò-khì, seng bâi-chòng góa ê lāu-pē.

60

Iâ-so͘ kā i kóng, Chhut-chāi sí-lâng bâi-chòng in ê sí-lâng; nā-sī lí tio̍h khì thôan-pò Siōng-tè ê kok.

61

Koh chı̍t lâng kóng, Chú ah, góa beh tè lí; chóng-sī chún góa seng khì kap ke-lāi ê lâng saⁿ-sî.

62

Iâ-so͘ tùi i kóng, Kìⁿ-nā chhiú hōaⁿ lôe-bé lâi khòaⁿ āu-bīn ê, bô ha̍p tī Siōng-tè ê kok.