Má-khó 第 10 章 - 巴克禮全羅

1

Iâ-so͘ tùi hia khí-sin kàu Iû-thài ê tōe-kài, kàu Iok-tàn hô gōa; chōe-chōe tīn ê lâng koh chū-chı̍p chiū-kūn I; I chiàu siông koh kà-sī in.

2

. Ū Hoat-lī-sài lâng chiū-kūn I, mn̄g kóng, Lâng lî-chhut i ê bó͘, thang mah? sī teh chhì I.

3

. Iâ-so͘ ìn kóng, Mô͘-se bēng-lēng lín cháiⁿ-iūⁿ?

4

. In kóng, Mô͘-se chún lâng siá lî-chu, lâi lî i.

5

. Nā-sī Iâ-so͘ kā in kóng, Mô͘-se in-ūi lín ê sim ngī, chiah siá chit ê bēng-lēng hō͘ lín;

6

. chóng-sī tùi chō-hòa ê khí-thâu, Chú chhòng-chō in ū lâm ū lú.

7

. In-ūi án-ni lâng beh lī-khui pē-bú, kiat-liân i ê bó͘, nn̄g ê beh chiâⁿ-chòe chı̍t thé;

8

. Chhin-chhiūⁿ án-ni, bô chòe nn̄g ê, sī chòe chı̍t thé.

9

. Só͘-í Siōng-tè só͘ phòe-ha̍p ê, lâng m̄ thang pun-khui i.

10

. Jı̍p chhù ha̍k-seng koh chiong chit ê tāi-chì mn̄g I.

11

. I kā in kóng, Hōan-nā lî-chhut i ê bó͘ lâi chhōa pa̍t-ê ê, sī kiâⁿ kan-îm lâi ko͘-hū i;

12

. bó͘ nā khì-sak i ê tiōng-hu lâi kè pa̍t-ê, iā sī kiâⁿ kan-îm.

13

. Ū lâng tòa sòe-kiáⁿ chiū-kūn Iâ-so͘ beh hō͘ I bong in; ha̍k-seng chek-pī in.

14

. Iâ-so͘ khòaⁿ-kìⁿ án-ni, tōa bô hoaⁿ-hí, kā ha̍k-seng kóng, Iông-ún sòe-kiáⁿ chiū-kūn góa, bo̍h-tit kìm in; in-ūi Siōng-tè ê kok sī chit hō lâng ê.

15

. Góa sı̍t-chāi kā lín kóng, Hōan-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-tòan bōe tit jı̍p-khì.

16

. Chiū phō in, kā in hōaⁿ chhiú, chiok-hok in.

17

. Iâ-so͘ chhut-khì tī lō͘-nı̍h, ū chı̍t lâng cháu chìn-chêng lâi kūi I, mn̄g kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-o̍ah?

18

. Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chı̍t-ê hó, to̍k-to̍k Siōng-tè nā-tiāⁿ.

19

. Chiah ê kài lí í-keng chai, Bo̍h-tit thâi-sí lâng, Bo̍h-tit kan-îm, Bo̍h-tit thau-the̍h, Bo̍h-tit lām-sám chòe kan-chèng, Bo̍h-tit khek-khui lâng, Tio̍h kèng lí ê pē-bú.

20

. I ìn kóng, Sian-siⁿ ah, chiah-ê góa tùi sòe-hàn lóng siú i.

21

. Iâ-so͘ khòaⁿ i, thiàⁿ i, chiū kā i kóng, Lí iáu khiàm chı̍t hāng; tio̍h khì bōe lī hōan só͘ ū ê, lâi hō͘ sòng-hiong lâng, chiū beh ū châi-pó tī thiⁿ-nı̍h, koh lâi tè góa.

22

. I thiaⁿ chit ê ōe, bīn chiū sit-sek, iu-būn chiū khì. In-ūi i sán-gia̍p chin chōe.

23

. Iâ-so͘ sì-kòe khòaⁿ, kā I ê ha̍k-seng kóng, Pù lâng jı̍p Siōng-tè ê kok oh---ah.

24

. Ha̍k-seng kî-kòai I ê ōe; Iâ-so͘ koh ìn kóng, Sòe-kiáⁿ ah, óa-khò chîⁿ-châi ê lâng jı̍p Siōng-tè ê kok oh--ah.

25

. Lo̍k-tô chhng-kè chiam-phīⁿ pí pù lâng jı̍p Siōng-tè ê kok iáu khah khòai.

26

. Ha̍k-seng it-hoat gông-ngia̍h, kā I kóng, Án-ni chī-chūi ōe tit-tio̍h kiù ah?

27

. Iâ-so͘ khòaⁿ in kóng, Chāi lâng sī bōe-ōe, chāi Siōng-tè chiū m̄ sī án-ni; in-ūi chāi Siōng-tè bān sū lóng ōe.

28

. Pí-tek chiū kā I kóng, Góan bat pàng-sak it-chhè lâi tè lí.

29

. Iâ-so͘ kóng, Góa sı̍t-chāi kā lín kóng, Bô ū lâng ūi-tio̍h góa kap hok-im ê iân-kò͘ pàng-sak chhù-the̍h, hiaⁿ-tī, chí-bē, lāu-bú, lāu-pē, kiáⁿ-jî, chhân-hn̂g,

30

. chiū tī hiān-sî bô tit-tio̍h pah pē, chiū-sī chhù-the̍h, hiaⁿ-tī, chí-bē, bú-chhin, kiáⁿ-jî, chhân-hn̂g, kiam ū khún-tio̍k, koh tī lâi-sè beh tit-tio̍h éng-o̍ah.

31

. Chóng-sī tāi-seng ê chōe-chōe beh chòe lō͘-bé, lō͘-bé ê iā beh chòe tāi-seng.

32

. In chiūⁿ Iâ-lō͘-sat-léng, tī lō͘-nı̍h Iâ-so͘ kiâⁿ tī thâu-chêng, ha̍k-seng gông-ngia̍h, tè ê lâng kiaⁿ-hiâⁿ. Iâ-so͘ koh tòa cha̍p-jī ê ha̍k-seng, chiong I só͘ beh tú-tio̍h ê sū kā in kóng,

33

. Taⁿ lán chiūⁿ Iâ-lō͘-sat-léng, Jîn-chú beh siū kè-sàng hō͘ chiah ê chè-si-thâu, kap keng-ha̍k-sū; in beh gí I sí-chōe, iā beh kè-sàng I hō͘ gōa-pang-lâng;

34

. in beh hì-lāng I, phùi-nōa I, piⁿ-phah I, hāi-sí I; kè saⁿ jı̍t I beh koh-o̍ah.

35

. Se-pí-thài ê kiáⁿ Ngá-kok kap Iok-hān chiū-kūn lâi kā I kóng, Sian-siⁿ ah, kìⁿ-nā góan só͘ tùi lí kiû ê, ài lí kā góan kiâⁿ i.

36

. I chiū kā in kóng, Ài góa kā lín kiâⁿ sím-mı̍h ah?

37

. In kā I kóng, Chún góan tī lí ê êng-kng, chı̍t-ê chē lí ê chiàⁿ-pêng, chı̍t-ê chē lí ê tò-pêng.

38

. Nā-sī Iâ-so͘ kā in kóng, Lín só͘ kiû ê, lín m̄ chai. Góa só͘ lim ê poe , lín ōe lim mah? góa só͘ siū ê sóe, lín ōe siū mah?

39

. In kóng, Ōe. I kā in kóng, Góa só͘ lim ê poe, lín beh lim i, góa só͘ siū ê sóe, lín beh siū i;

40

. chóng-sī chē góa ê chiàⁿ-pêng tò-pêng m̄ sī góa ōe thang hō͘ lâng, to̍k-to̍k ūi-tio̍h sím-mı̍h lâng pī-pān ê chiū hō͘ i.

41

. Cha̍p-ê ha̍k-seng thiaⁿ-kìⁿ, chiū siū-khì Ngá-kok kap Iok-hān.

42

. Iâ-so͘ kiò in lâi kā in kóng, Lín chai gōa-pang só͘ chun chòe jîn-kun ê chòe chú lâi tī-lí in, in ê tāi-jîn kóan-hat in.

43

. To̍k-to̍k lín tiong-kan m̄ sī án-ni; lín tiong-kan ài chòe tōa ê beh chòe lín ê chhe-ēng;

44

. lín tiong-kan ài chòe thâu ê beh chòe chèng lâng ê lô͘-po̍k.

45

. In-ūi Jîn-chú kàu m̄ sī beh chhe-ēng lâng, sī beh hō͘ lâng chhe-ēng, koh hiàn I ê sìⁿ-miā lâi sio̍k-hôe chōe-chōe lâng.

46

. In kàu Iâ-lī-ko; Iâ-so͘ kap I ê ha̍k-seng kap tōa tīn lâng chhut Iâ-lī-ko ê sî, ū Tí-mái ê kiáⁿ, Pa-tí-mái, chiū-sī chhiⁿ-mî chòe khit-chia̍h ê, chē tī lō͘-piⁿ;

47

. í-keng thiaⁿ-kìⁿ sī Ná-sat-le̍k lâng Iâ-so͘, chiū âu-kiò kóng, Tāi-pı̍t ê hō͘-è, Iâ-so͘, khó-lîn góa.

48

. Chōe-chōe lâng chek-pī i, kah i chēng-chēng; nā-sī i it-hoat tōa siaⁿ âu-kiò kóng, Tāi-pı̍t ê hō͘-è ah, khó-lîn góa.

49

. Iâ-so͘ thêng-kha kóng, Kiò i lâi. Chiū kiò chhiⁿ-mî lâng, kā i kóng, An lí ê sim, khí-lâi, I teh kiò lí ah.

50

. I chiū pàng-sak i ê saⁿ, thiàu-khí-lâi khì chiū-kūn Iâ-so͘.

51

. Iâ-so͘ ìn i kóng, Ài góa kā lí chòe sím-mı̍h? Chhiⁿ-mî lâng kā I kóng, Lia̍p-pho-nî, góa ài tit-tio̍h khòaⁿ-kìⁿ.

52

. Iâ-so͘ kā i kóng, Khì ah, lí ê sìn ū kiù lí lah. I liâm-piⁿ tit-tio̍h khòaⁿ-kìⁿ, chiū tī lō͘-nı̍h tè Iâ-so͘.