Má-khó 第 9 章 - 巴克禮全羅

1

Iâ-so͘ koh kā in kóng, góa sı̍t-chāi kā lín kóng, Khiā-tī chia ê ū lâng iáu-bē sí, ōe khòaⁿ-kìⁿ Siōng-tè ê kok ēng kôan-lêng lîm-kàu.

2

. Kè la̍k jı̍t Iâ-so͘ tòa Pí-tek, Ngá-kok, Iok-hān, lēng-gōa chhōa in peh-chiūⁿ kôaiⁿ soaⁿ, kan-ta in kap I tī-teh;

3

. tng in ê bīn-chêng hêng-chōng piàn-ōaⁿ, I ê saⁿ chhàn-lān, ke̍k-kî pe̍h, sè-kan phio-pò͘ ê bōe-ōe hō͘ i pe̍h kàu án-ni.

4

. Ū Í-lī-a kap Mô͘-se tùi in hián-hiān, kap Iâ-so͘ kóng ōe.

5

. Pí-tek tùi Iâ-so͘ kóng, Lia̍p-pí, lán tī chia chin hó, góan lâi tah saⁿ keng liâu-á, chı̍t keng hō͘ lí, chı̍t keng hō͘ Mô͘-se, chı̍t keng hō͘ Í-lī-a.

6

. Sī i m̄ chai tio̍h cháiⁿ-iūⁿ kóng, in-ūi in chin kiaⁿ.

7

. Chiū ū hûn tà in, koh ū siaⁿ tùi hûn-nı̍h chhut kóng, Chit-ê sī góa thiàⁿ ê Kiáⁿ, lín tio̍h thiaⁿ I.

8

. In hut-jiân sì-kòe khòaⁿ, bô khòaⁿ-kìⁿ chı̍t lâng, chí ū Iâ-so͘ kap in tī hia nā-tiāⁿ.

9

. In lo̍h soaⁿ ê sî Iâ-so͘ kìm in kóng, Jîn-chú iáu-bē tùi sí-lâng tiong koh-o̍ah, bo̍h-tit ēng só͘ khòaⁿ-kìⁿ ê kā lâng kóng.

10

. Ha̍k-seng chip chit kù ōe, saⁿ-kap gī-lūn khòaⁿ tùi sí-lâng tiong koh-o̍ah, chit kù sím-mı̍h ì-sù.

11

. Koh mn̄g Iâ-so͘ kóng, Keng-ha̍k-sū kóng, Í-lī-a tio̍h tāi-seng kàu, sī cháiⁿ-iūⁿ?

12

. I ìn kóng, Í-lī-a kó-jiân tāi-seng lâi heng-khí bān hāng sū; koh cháiⁿ-iūⁿ kì-chài kóng, Jîn-chú tio̍h siū chōe-chōe kan-khó͘, hō͘ lâng khòaⁿ-khin ah?

13

. Nā-sī góa kā lín kóng, Í-lī-a í-keng kàu, lâng iā chhut-chāi ì-sù khóan-thāi i, lóng chiàu só͘ kì-chài chí i ê ōe.

14

. Í-keng kàu ha̍k-seng ê só͘-chāi, chiū khòaⁿ-kìⁿ kui tōa tīn lâng ûi in, iā ū keng-ha̍k-sū kap in piān-lūn.

15

. Lâng khòaⁿ-kìⁿ Iâ-so͘ liâm-piⁿ tōa gông-ngia̍h, cháu lâi chiū-kūn I, kā I chhéng-an.

16

. I mn̄g in kóng, Lín kap in piān-lūn sím-mı̍h?

17

. Chèng lâng tiong chı̍t lâng ìn I kóng, Sian-siⁿ, góa ū chhōa góa ê kiáⁿ kàu lí chia, i hōan-tio̍h é-káu ê sîn;

18

. bô lūn tī sím-mı̍h só͘-chāi lia̍h i, chiū kā i siak-tó; i chiū lâu-nōa, kā-khí, koh tâ-lâ-khì; góa bat chhiáⁿ lí ê ha̍k-seng kóaⁿ i, iā in bōe-ōe.

19

. Iâ-so͘ ìn kóng, Hàiⁿ ah, m̄ sìn ê sè-tāi ah, góa beh kap lín tòa jōa kú ah? góa beh thun-lún lín jōa kú ah? Tòa i lâi chiū-kūn góa.

20

. In chiū tòa i lâi. Chı̍t ē khòaⁿ-kìⁿ Iâ-so͘, hit ê kúi liâm-piⁿ hō͘ i tōa thiu-chhoah, chiū tó tī thô͘-kha hoan-lâi hoan-khì lâu-nōa.

21

. Iâ-so͘ mn̄g i ê lāu-pē kóng, I hōan-tio̍h chit-ê jōa kú lah? Kóng, Tùi sòe-hàn ê sî.

22

. Ta̍uh-ta̍uh chiong i hiat-lo̍h hé, hiat-lo̍h chúi, beh bia̍t i. Chóng-sī lí nā ōe chòe sím-mı̍h, tio̍h lîn-bín lâi pang-chān góan.

23

. Iâ-so͘ kā i kóng, Cháiⁿ-iūⁿ kóng, Lí nā ōe ah? ū sìn ê lâng, ta̍k hāng lóng ōe.

24

. Gín-ná ê lāu-pē liâm-piⁿ âu-kiò kóng, Góa sìn lah; góa só͘ sìn bô kàu ê, lí tio̍h pang-chān góa.

25

. Iâ-so͘ khòaⁿ-kìⁿ kui tīn lâng cháu-óa lâi, chiū chek-pī hit ê siâ-sîn, kā i kóng, Lí é-káu chhàu-hī-lâng ê sîn ah, góa bēng-lēng lí lī-khui chit ê lâng, bô koh jı̍p i.

26

. Hit ê sîn âu-kiò, tōa khiú-la̍k i, chiah chhut-khì; hit ê gín-ná chhin-chhiūⁿ sí chı̍t iūⁿ, tì-kàu lâng khah chōe kóng, I í-keng sí.

27

. Nā-sī Iâ-so͘ khan i ê chhiú, hû i khí-lâi; i chiū khí-lâi.

28

. Jı̍p chhù I ê ha̍k-seng àm-chīⁿ mn̄g I kóng, Góan bōe kóaⁿ i sī cháiⁿ-iūⁿ?

29

. I kā in kóng, Nā m̄ sī ēng kî-tó, chit lūi chiū bōe tit i chhut.

30

. In tùi hia khì keng-kè Ka-lī-lī, Iâ-so͘ m̄ ài lâng chai.

31

. In-ūi I kà-sī I ê ha̍k-seng, kā in kóng, Jîn-chú beh siū kè-sàng tī lâng ê chhiú, lâng beh hāi-sí I; hāi-sí liáu-āu saⁿ jı̍t beh koh-o̍ah.

32

. In bōe hiáu-ngō͘ chit ê ōe, iā m̄ káⁿ mn̄g I.

33

. In lâi kàu Ka-pek-lông, Iâ-so͘ tī chhù-lāi mn̄g in kóng, Lín tī lō͘-nı̍h gī-lūn sím-mı̍h?

34

. Ha̍k-seng chēng-chēng, in-ūi tī lō͘-nı̍h bat cheng-lūn chī-chūi chòe tōa.

35

. I chiū chē-teh, kiò cha̍p-jī ê ha̍k-seng, kā in kóng, Nā ài chòe tāi-seng ê tio̍h chòe chèng lâng ê lō͘-bé, iā chòe chèng lâng ê chhe-ēng.

36

. Koh chhōa chı̍t ê gín-ná, hō͘ i khiā tī tiong-kan, sòa phō i;

37

. kā ha̍k-seng kóng, Kìⁿ-nā ūi-tio̍h góa ê miâ chiap-la̍p chı̍t-ê chhin-chhiūⁿ chit hō ê gín-ná ê, chiū-sī chiap-la̍p góa; kìⁿ-nā chiap-la̍p góa ê, m̄ sī chiap-la̍p góa, chiū-sī chiap-la̍p chhe góa ê.

38

. Iok-hān kā Iâ-so͘ kóng, Sian-siⁿ, góan bat khòaⁿ-kìⁿ chı̍t lâng ēng lí ê miâ kóaⁿ kúi; góan chiū kìm-chí i, in-ūi i bô tè lán.

39

. Iâ-so͘ kóng, Bo̍h-tit kìm i, in-ūi bô ū lâng hōng góa ê miâ kiâⁿ kôan-lêng, iā ōe liâm-piⁿ húi-pòng góa.

40

. Kìⁿ-nā bô kong-kek lán ê chiū-sī ūi lán.

41

. Kìⁿ-nā in-ūi lín sio̍k Ki-tok, chiū ēng chı̍t poe chúi hō͘ lín lim ê, góa sı̍t-chāi kā lín kóng, i chiong-lâi bô sit-lo̍h i ê siúⁿ.

42

. Kìⁿ-nā hō͘ chiah ê sìn góa ê bî-sòe ê chı̍t-ê khì hōan-chōe, hit lâng lêng-khó͘ siū tōa chio̍h-bō pa̍k i ê ām-kún, hiat tī hái-nı̍h.

43

. Siat-sú lí chı̍t chhiú tì-kàu lí hōan-chōe chiū tio̍h chám-tn̄g i; lí lêng-khó͘ phòa-siùⁿ jı̍p tī o̍ah, bo̍h-tit nn̄g chhiú khì tē-ge̍k, jı̍p bōe hoa ê hé.

44

.

45

. Siat-sú lí chı̍t kha tì-kàu lí hōan-chōe, chiū tio̍h chám-tn̄g i; lí lêng-khó͘ pái-kha jı̍p o̍ah, bo̍h-tit nn̄g kha siū hiat-lo̍h tē-ge̍k.

46

.

47

. Siat-sú lí chı̍t ba̍k tì-kàu lí hōan-chōe, chiū tio̍h iah-khì; lí lêng-khó͘ chı̍t ba̍k jı̍p tī Siōng-tè ê kok, bo̍h-tit nn̄g ba̍k hiat-lo̍h tē-ge̍k;

48

. tī hia in ê thâng bô sí, hé bô hoa.

49

. In-ūi ta̍k lâng beh ēng hé lâi sīⁿ i.

50

. Iâm sī hó; iâm nā sit-lo̍h i ê kiâm, beh ēng sím-mı̍h lâi ho̍k-tò i ê bī? Lín ê lāi-bīn eng-kai tio̍h ū iâm; iā tāi-ke tio̍h saⁿ hô-hó.