Má-khó 第 8 章 - 巴克禮全羅

1

Tng hit kúi jı̍t chèng lâng koh tōa chū-chı̍p, bô sím-mı̍h thang chia̍h, Iâ-so͘ kiò I ê ha̍k-seng lâi kā in kóng,

2

. Góa khó-lîn chèng lâng, in-ūi in í-keng kap góa tòa saⁿ jı̍t, iā bô mı̍h thang chia̍h;

3

. góa nā hō͘ in iau-iau tò-khì in chhù, in tī lō͘-nı̍h ōe ià-siān, in-ūi in tiong-kan ū-ê tùi hn̄g-hn̄g lâi.

4

. Ha̍k-seng ìn I kóng, Tī chit ê khòng-iá, tùi tá-lo̍h ōe tit-tio̍h piáⁿ hō͘ hiah ê lâng chia̍h pá?

5

. Iâ-so͘ mn̄g in kóng, Lín ū jōa chōe piáⁿ? In kóng, Chhit ê.

6

. Chiū bēng-lēng chèng lâng chē tī tōe-nı̍h; the̍h hí chhit ê piáⁿ, chiok-siā lâi peh, kau hō͘ I ê ha̍k-seng, hō͘ in pâi-lia̍t; in chiū pâi-lia̍t tī chèng lâng ê bīn-chêng.

7

. Koh ū tām-po̍h sòe bé hî; í-keng chiok-siā, iā kah in tio̍h pâi-lia̍t.

8

. Lâng lóng chia̍h kàu pá; khioh só͘ chhun ê piáⁿ-chhùi chhit nâ.

9

. Lâng-gia̍h iok-lio̍k ū sì-chheng. Chiū hō͘ in sì-sòaⁿ.

10

. Pún-sin liâm-piⁿ kap ha̍k-seng tah chûn, kàu Tāi-má-lô͘-tāi ê kéng-kài.

11

. Hoat-lī-sài lâng chhut-khì, chiū piān-pok I, tùi I kiû chı̍t-ê chhut tī thiⁿ-nı̍h ê sîn-jiah, sī beh chhì I.

12

. Iâ-so͘ sim-lāi tōa thó͘-khùi kóng, Chit sè-tāi siáⁿ-sū kiû sîn-jiah ah? Góa sı̍t-chāi kā lín kóng, Koat-tòan bô beh ēng sîn-jiah hō͘ chit sè-tāi.

13

. Chiū lī-khui in, koh tah chûn, khì hit pêng hōaⁿ.

14

. Ha̍k-seng bōe kì-tit tòa piáⁿ, chûn-lāi chí ū chı̍t ê piáⁿ, í-gōa bô pa̍t hāng ê chia̍h-mı̍h.

15

. Iâ-so͘ kéng-kài in kóng, Lín tio̍h kín-sīn, tî-hông Hoat-lī-sài lâng ê kàⁿ, kap Hi-lu̍t ê kàⁿ.

16

. Ha̍k-seng saⁿ-kap gī-lūn kóng, Sī lán bô piáⁿ.

17

. Iâ-so͘ chai, chiū kā in kóng, Siáⁿ-sū in-ūi bô piáⁿ teh saⁿ-kap gī-lūn ah? Lín iáu-kú bē chai, bē hiáu-ngō͘ mah? lín ê sim iáu-kú tūn mah?

18

. Lín ū ba̍k-chiu iā bô teh khòaⁿ, ū hī-khang iā bô teh thiaⁿ, iā bōe kì-tit mah?

19

. Góa peh gō͘ ê piáⁿ pun hō͘ gō͘-chheng lâng, lín khioh piáⁿ-chhùi móa kúi kheng ah? In kóng, cha̍p-jī.

20

. Koh chhit ê piáⁿ pun hō͘ sì-chheng lâng, lín khioh piáⁿ-chhùi móa kúi nâ ah? In kóng, Chhit nâ.

21

. Chiū kā in kóng, Lín iáu-kú bē hiáu-ngō͘ mah?

22

. Saⁿ-kap kàu Pek-sài-tāi. Ū lâng chhōa chı̍t ê chhiⁿ-mî ê chiū-kūn I, kiû I bong i.

23

. Iâ-so͘ khan chhiⁿ-mî lâng ê chhiú, chhōa i chhut hiuⁿ-lí gōa; phùi-nōa tī i nn̄g lúi ba̍k-chiu, ēng chhiú hōaⁿ i, mn̄g kóng, Lí ū khòaⁿ-kìⁿ sím-mı̍h bô?

24

. I kia̍h thâu khòaⁿ kóng, Góa khòaⁿ-kìⁿ lâng, in-ūi khòaⁿ-kìⁿ in chhin-chhiūⁿ chhiū iā teh kiâⁿ.

25

. Koh ēng chhiú hōaⁿ i nn̄g lúi ê ba̍k-chiu; i chù-ba̍k khòaⁿ, chiū chiâu-chn̂g hó, khòaⁿ ta̍k hāng mı̍h kàu bêng-bêng.

26

. Iâ-so͘ kah i tò-khì in tau, kóng, Chit ê hiuⁿ-siā lí iā bo̍h-tit jı̍p.

27

. Iâ-so͘ kap ha̍k-seng chhut-khì kàu Kai-sat-lī-a Hui-lı̍p-pí sio̍k hiah ê hiuⁿ-siā; lō͘-nı̍h mn̄g I ê ha̍k-seng kóng, Lâng kóng góa sī chī-chūi?

28

. In kā I kóng, Kiâⁿ sóe-lé ê Iok-hān; iā ū lâng kóng, Í-lī-a; koh ū lâng kóng, Sian-ti tiong ê chı̍t-ê.

29

. I koh mn̄g in kóng, Nā-sī lín kóng góa sī chī-chūi? Pí-tek ìn I kóng, Lí sī Ki-tok.

30

. I chiū kìm-kài in bo̍h-tit chiong I ê sū kā lâng kóng.

31

. Chiū kà-sī in kóng, Jîn-chú tek-khak tio̍h siū chōe-chōe khó͘-chhó͘, hō͘ chiah ê tiúⁿ-ló, chè-si-thâu, keng-ha̍k-sū khì-sak, koh siū hāi-sí, kè saⁿ jı̍t chiū koh-o̍ah.

32

. Iâ-so͘ ēng chit ê ōe bêng-bêng kā in kóng. Pí-tek khan lâi chek-pī I.

33

. Nā-sī I o̍at-tńg-sin khòaⁿ I ê ha̍k-seng, chiū chek-pī Pí-tek kóng, Sat-tàn, thè-khì góa ê āu-bīn; in-ūi lí só͘ siūⁿ m̄ sī Siōng-tè ê sū, sī lâng ê sū.

34

. Chiū kiò chèng lâng kap I ê ha̍k-seng lâi, kā in kóng, Nā ū lâng ài tè góa, chiū tio̍h khòaⁿ-bô ka-kī, giâ i ê sı̍p-jī-kè, lâi tè góa.

35

. In-ūi kìⁿ-nā ài kiù i ê sìⁿ-miā ê beh sit-lo̍h i; kìⁿ-nā ūi-tio̍h góa kap hok-im lâi sit-lo̍h i ê sìⁿ-miā ê beh kiù i.

36

. Lâng nā tit-tio̍h chôan sè-kài, lâi sòng-sit i ê sìⁿ-miā, ū sím-mı̍h lī-ek?

37

. In-ūi lâng beh chhut sím-mı̍h lâi tùi-ōaⁿ i ê sìⁿ-miā?

38

. Hōan-nā tī chit ê kan-îm ū chōe ê sè-tāi lia̍h góa kap góa ê ōe chòe kiàn-siàu ê, Jîn-chú ēng Pē ê êng-kng kap chiah ê sèng ê thiⁿ-sài lâi ê sî, iā beh lia̍h i chòe kiàn-siàu.