Má-khó 第 7 章 - 巴克禮全羅

1

Ū Hoat-lī-sài lâng kap kúi-nā ê keng-ha̍k-sū chū-chı̍p chiū-kūn Iâ-so͘; in sī tùi Iâ-lō͘-sat-léng lâi,

2

. iā bat khòaⁿ-kìⁿ I ê ha̍k-seng tiong ū-ê ēng sio̍k-chhiú teh chia̍h, chiū-sī bē ū sóe ê chhiú.

3

. In-ūi Hoat-lī-sài lâng kap chèng Iû-thài lâng lóng sī khu-chip kó͘-chá lâng ê liû-thôan; nā bô chhut-la̍t sóe i ê chhiú chiū bô chia̍h;

4

. tùi koe-chhī tò-lâi, nā bô sóe iā bô chia̍h; in só͘ siū lâi chip-siú ê iáu ū chōe-chōe hāng, chhin-chhiūⁿ sóe poe, kòan, tâng-khì, hiah-ê.

5

. Hoat-lī-sài lâng kap keng-ha̍k-sū mn̄g I kóng, Lí ê ha̍k-seng bô chiàu kó͘-chá lâng ê liû-thôan lâi kiâⁿ, ēng sio̍k-chhiú lâi chia̍h sī cháiⁿ-iūⁿ?

6

. I kā in kóng, Í-sài-a só͘ chhàm-gú chí lín ké-hó ê lâng chin-chiàⁿ tio̍h, chiàu só͘ kì-chài kóng, Chit ê peh-sìⁿ ēng chhùi-tûn chun-kèng góa, Nā-sī in ê sim lī-khui góa hn̄g-hn̄g;

7

. In kèng-pài góa sī khang-khang, In-ūi in ēng lâng só͘ bēng-lēng chòe kà-sī, lâi kà-sī lâng.

8

. Án-ni lín sī pàng-sak Siōng-tè ê kài-bēng, khu-chip lâng ê liû-thôan.

9

. Koh kā in kóng, Lín sı̍t-chāi sī khì-sak Siōng-tè ê kài-bēng, beh siú lín ê liû-thôan.

10

. In-ūi Mô͘-se bat kóng, Tio̍h chun-kèng lí ê lāu-pē kap lí ê lāu-bú; koh kóng, Mē pē mē bú ê lâng tek-khak tio̍h hō͘ i sí.

11

. Nā-sī lín kóng, Lâng nā tùi i ê pē á-sī i ê bú kóng, Lí pún só͘ ōe thang tùi góa tit-tio̍h ê lī-ek í-keng chòe Kok-pán, (chiū-sī kóng, Lé-mı̍h);

12

. í-āu lín chiū m̄ chún i ēng sím-mı̍h ho̍k-sāi i ê pē á-sī i ê bú;

13

. sī chiong lín só͘ thôan-siū ê liû-thôan hòe-bô Siōng-tè ê tō-lí; koh lín só͘ chòe ê chōe-chōe chhin-chhiūⁿ chit hō khóan.

14

. Chiū koh kiò chèng lâng chiū-kūn I, kā in kóng, Lín lóng tio̍h thiaⁿ góa lâi hiáu-ngō͘;

15

. kìⁿ-nā tùi lâng ê gōa-bīn jı̍p ê bōe-ōe bak lâ-sâm lâng; to̍k-to̍k tùi lâng ê lāi-bīn chhut ê, chiah-ê chiū-sī bak lâ-sâm lâng.

16

.

17

. Iâ-so͘ lī-khui chèng lâng jı̍p chhù, I ê ha̍k-seng chiong chit ê phì-jū mn̄g I.

18

. I chiū kā in kóng, Lín iā án-ni bōe hiáu-ngō͘ mah?

19

. Kiám m̄ chai kìⁿ-nā tùi gōa-bīn jı̍p tī lâng ê, bōe-ōe bak lâ-sâm lâng; in-ūi m̄ sī jı̍p i ê sim, chiū-sī jı̍p i ê pak-tó͘, lâi pàng tī chhè-tî. I kóng án-ni sī hō͘ ta̍k hāng ê chia̍h-mı̍h lóng chheng-khì.

20

. Koh kóng, Tùi lâng ê lāi-bīn chhut ê, chiū-sī bak lâ-sâm lâng.

21

. In-ūi tùi lāi-bīn, chiū-sī tùi lâng ê sim, chhut chiah ê pháiⁿ liām-thâu, su-thong, thau-the̍h, thâi lâng,

22

. kan-îm, tham-sim, siâ-ok, kan-chà, hò͘ⁿ-sek, pháiⁿ-ba̍k, húi-pòng, kiau-ngō͘, chhiong-kông;

23

. hōan-nā chia̍h ê pháiⁿ lóng sī tùi lāi-bīn chhut, iā bak lâ-sâm lâng.

24

. Iâ-so͘ tùi hia khí-sin, khì kàu Chhui-lô Se-tùn ê kau-kài, jı̍p chı̍t keng chhù, m̄ ài lâng chai; nā-sī khǹg bōe ba̍t.

25

. Liâm-piⁿ ū chı̍t ê hū-jîn-lâng, i ê sòe-hàn cha-bó͘-kiáⁿ hō͘ siâ-sîn hū-sin, thiaⁿ-kìⁿ Iâ-so͘ ê sū, chiū lâi phak tī I ê kha-ē.

26

. Chit ê hū-jîn-lâng sī Hi-lī-nî lâng, sio̍k Sū-lī-hui-nî-ki ê cho̍k; i kiû Iâ-so͘ kóaⁿ kúi lī-khui i ê cha-bó͘-kiáⁿ.

27

. Iâ-so͘ kā i kóng, Tio̍h hō͘ gín-ná tāi-seng chia̍h pá; in-ūi the̍h gín-ná ê piáⁿ hiat hō͘ káu sī m̄ hó.

28

. Hū-jîn-lâng ìn I kóng, Chú ah, sī lah; chóng-sī toh-kha ê káu iā chia̍h sòe-kiáⁿ ê piáⁿ-chhùi.

29

. Iâ-so͘ kā i kóng, In-ūi chit kù ōe lí thang tò-khì, kúi í-keng lī-khui lí ê cha-bó͘-kiáⁿ chhut-khì.

30

. Hū-jîn-lâng tò-khì in tau, khòaⁿ-kìⁿ cha-bó͘-kiáⁿ tó tī bîn-chhn̂g, kúi í-keng chhut-khì.

31

. Iâ-so͘ koh tùi Chhui-lô ê kéng-kài, keng-kè Se-tùn, tùi Te-ka-pho-lī kéng ê tiong-ng, kàu Ka-lī-lī hái.

32

. Ū lâng chhōa chı̍t ê chhàu-hī-lâng kòa tiuh-chı̍h-kun ê chiū-kūn I, kiû I kā i hōaⁿ chhiú.

33

. Iâ-so͘ chhōa hit lâng lī-khui chèng lâng kàu piⁿ-thâu, chiū ēng chńg-thâu-á thàm i siang-pêng ê hī-khang, koh phùi-hōa lâi bong i ê chı̍h,

34

. ǹg thiⁿ thó͘-khùi, kā i kóng, Í-hoat-tāi, chiū-sī kóng, Khui.

35

. I siang-pêng ê hī-khang chiū khui, chı̍h-kun iā tháu, kóng ōe bêng-bêng.

36

. Iâ-so͘ kéng-kài in bo̍h-tit kā lâng kóng; chóng-sī ná kéng-kài, in ná pò-iông.

37

. Iā put-chí kî-kòai kóng, I só͘ chòe lóng sī hó, hō͘ chhàu-hī-lâng ê thiaⁿ-kìⁿ, é-káu ê kóng ōe.