Má-khó 第 6 章 - 巴克禮全羅

1

Iâ-so͘ tùi hia chhut-khì, kàu I ê pún-hiuⁿ, I ê ha̍k-seng tè I.

2

. Kàu an-hioh-jı̍t chiū tī hōe-tn̂g kà-sī lâng. Chōe-chōe lâng thiaⁿ-kìⁿ chiū kî-kòai kóng, Chit ê lâng tùi tá-lo̍h ōe án-ni ah? koh Só͘ siúⁿ-sù hō͘ I ê tì-hūi sī sím-mı̍h ah? iā ū án-ni ê tōa kôan-lêng tùi I ê chhùi chhut, sī cháiⁿ-iūⁿ?

3

. Chit-ê kiám m̄ sī ba̍k-kang mah? kiám m̄ sī Má-lī-a ê kiáⁿ, Ngá-kok, Iok-se, Iû-tāi, Se-bûn ê hiaⁿ-tī mah? I ê chí-bē kiám m̄ sī kap lán tī chia mah? In chiū iàm-chiān I.

4

. Iâ-so͘ chiū kā in kóng, Sian-ti tī pún-hiuⁿ, chong-cho̍k, ka-kī ê ke í-gōa, bô m̄ chun-kùi.

5

. I tī hia bōe-tit kiâⁿ sím-mı̍h kôan-lêng, put-kò ēng chhiú hōaⁿ kúi-nā ê pīⁿ lâng, lâi i-hó in.

6

. Koh kî-kòai in m̄ sìn. Chiū sì-kòe kiâⁿ hiah ê hiuⁿ-siā, kà-sī lâng.

7

. Iâ-so͘ tiàu cha̍p-jī ê ha̍k-seng lâi, chiū chhe in chı̍t tùi chı̍t tùi chhut-khì, siúⁿ-sù in ū kôan lâi chè-ap hiah ê siâ-sîn;

8

. koh hoan-hù in bo̍h-tit tòa lō͘-hùi, to̍k-to̍k chı̍t ki kóaiⁿ-á, bo̍h-tit kan-niû, bo̍h-tit tah-liân, bo̍h-tit khǹg chîⁿ tī io-tòa;

9

. tio̍h chhēng chhut-lō͘ ê ôe; iā bo̍h-tit chhēng nn̄g niá saⁿ.

10

. Koh kā in kóng, Kìⁿ-nā lín só͘ jı̍p ê chhù, tio̍h tòa tī hia, tı̍t-kàu lī-khui hit ê tōe-hng ê sî.

11

. Bô lūn sím-mı̍h só͘-chāi m̄ chiap-la̍p lín, m̄ thiaⁿ lín ê, kàu lī-khui hia ê sî, tio̍h pōaⁿ-khì kha-chiah-tóe ê thô͘-hún, lâi tùi in chòe kan-chèng.

12

. In chiū chhut-khì soan-thôan, kóng lâng tio̍h hóan-hóe.

13

. In iā kóaⁿ-chhut chōe-chōe kúi, ēng iû boah chōe-chōe phòa-pīⁿ ê lâng, i-hó in.

14

. Hi-lu̍t ông thiaⁿ-kìⁿ, in-ūi Iâ-so͘ ê miâ-siaⁿ í-keng chhut; chiū kóng, Kiâⁿ sóe-lé ê Iok-hān tùi sí-lâng tiong koh-o̍ah, só͘-í ū chiah ê kôan-lêng tùi i hián-chhut.

15

. Nā-sī ū pa̍t lâng kóng, Sī Í-lī-a. Koh ū lâng kóng, Sī sian-ti, chhin-chhiūⁿ sian-ti tiong ê chı̍t-ê.

16

. Chóng-sī Hi-lu̍t thiaⁿ-kìⁿ chiū kóng, Góa só͘ thâi-thâu ê Iok-hān í-keng koh-o̍ah.

17

. In-ūi Hi-lu̍t ka-kī bat chhe lâng lia̍h Iok-hān, pa̍k i tī kaⁿ-nı̍h, sī ūi-tio̍h Hi-lu̍t ê hiaⁿ-tī Hui-le̍k ê bó͘ Hi-lô-tí ê iân-kò͘; in-ūi Hi-lu̍t ū chhōa i.

18

. Sī Iok-hān bat kā Hi-lu̍t kóng, Lí chhōa hiaⁿ-tī ê bó͘ sī put-kai.

19

. Hi-lô-tí chiū òan-hūn Iok-hān, ài thâi i, iā bōe tit-tio̍h.

20

. In-ūi Hi-lu̍t chai Iok-hān ê chòe-lâng gī koh sèng, só͘-í kiaⁿ-ùi, lâi pó-hō͘ i; thiaⁿ i ê ōe, chiū tōa-tōa tiû-tû, iā hoaⁿ-hí thiaⁿ i.

21

. Tn̄g-tio̍h hó ki-hōe ê jı̍t, chiū-sī Hi-lu̍t tī siⁿ-jı̍t pān-toh, chhiáⁿ hiah ê tōa koaⁿ, chhian-chóng, kap Ka-lī-lī chun-kùi ê lâng.

22

. Hi-lô-tí chhin-siⁿ ê cha-bó͘-kiáⁿ jı̍p-khì thiàu-bú, hō͘ Hi-lu̍t kap tâng-toh ê lâng lóng hoaⁿ-hí; ông chiū kā cha-bó͘ gín-ná kóng, Kìⁿ-nā lí só͘ ài ê, kiû góa, góa beh hō͘ lí.

23

. Koh kap i chiù-chōa kóng, Kìⁿ-nā lí só͘ kiû góa ê, sui-jiân góa kok ê chı̍t pòaⁿ, góa iā beh hō͘ lí.

24

. Cha-bó͘ gín-ná chhut-khì kā i ê lāu-bú kóng, Góa beh kiû sím-mı̍h? Ìn kóng, Kiâⁿ sóe-lé Iok-hān ê thâu-khak.

25

. Cha-bó͘ gín-ná liâm-piⁿ cháu jı̍p-khì, kìⁿ ông kiû kóng, Góa ài lí chiong kiâⁿ sóe-lé Iok-hān ê thâu-khak tóe tī pôaⁿ-nı̍h chek-sî hō͘ góa.

26

. Ông chiū tōa in-būn; chóng-sī ūi-tio̍h i só͘ chiù ê chōa, koh ū tâng-toh ê lâng tī-teh, só͘-í m̄ ài the-sî.

27

. Ông chek-sî chhe chı̍t ê sī-ōe, hoan-hù chhú i ê thâu-khak lâi;

28

. i chiū khì kaⁿ-nı̍h, thâi i ê thâu, tóe i ê thâu-khak tī pôaⁿ-nı̍h, phâng lâi hō͘ cha-bó͘ gín-ná, cha-bó͘ gín-ná chiū hō͘ i ê lāu-bú.

29

. Iok-hān ê ha̍k-seng thiaⁿ-kìⁿ, chiū lâi siu i ê sin-si, bâi-chòng tī bōng-nı̍h.

30

. Sù-tô͘ chū-chı̍p chiū-kūn Iâ-so͘, chiong in só͘ kiâⁿ só͘ kà-sī ê lóng kā I kóng.

31

. Iâ-so͘ kā in kóng, Lín ka-kī kap góa lâi khì khòng-iá ê só͘-chāi, hioh-khùn tiap-á-kú. In-ūi óng-lâi ê lâng chōe, liân chia̍h iā bōe kò͘-tit.

32

. In chiū chiūⁿ chûn, khì khòng-iá ê só͘-chāi, ka-kī tòa.

33

. Chèng lâng khòaⁿ-kìⁿ in khì, ū chōe-chōe lâng chai; chiū tùi ta̍k ê siâⁿ pō͘-kiâⁿ saⁿ-kap cháu, tāi-seng in kàu.

34

. Iâ-so͘ chhut-khì khòaⁿ-kìⁿ kui tōa tīn ê lâng, chiū lîn-bín i, in-ūi in chhin-chhiūⁿ iûⁿ bô bo̍k-chiá; chiah ēng chōe-chōe hāng kà-sī in.

35

. Jı̍t beh lo̍h, I ê ha̍k-seng chiū-kūn I kóng, Chia chiū-sī khòng-iá, jı̍t beh lo̍h lah;

36

. chhiáⁿ sì-sòaⁿ chèng lâng, hō͘ in khì chiu-ûi ê hiuⁿ-siā, ka-kī bóe mı̍h thang chia̍h.

37

. I ìn kóng, Lín hō͘ in chia̍h. In kā I kóng, Chóng bô góan ēng nn̄g pah ê gûn-á khì bóe piáⁿ lâi hō͘ in chia̍h mah?

38

. I kā in kóng, Lín ū piáⁿ jōa chōe, khì khòaⁿ-māi. Í-keng chai chiū kóng, Gō͘ ê piáⁿ, nn̄g bé hî.

39

. I chiū hoan-hù in hō͘ chèng lâng pâi kui-lia̍t, chē tī chhiⁿ-chhùi ê chháu-po͘.

40

. In chiū hun-tūi lâi chē, ū-ê chı̍t-pah, ū-ê gō͘-cha̍p.

41

. Iâ-so͘ the̍h hit gō͘ ê piáⁿ, nn̄g bé hî, ǹg thiⁿ lâi chiok-siā; peh piáⁿ hō͘ ha̍k-seng lâi pâi tī chèng lâng ê bīn-chêng; iā ēng nn̄g bé hî pun hō͘ chèng lâng.

42

. In lóng chia̍h kàu pá.

43

. Khioh hiah ê piáⁿ-chhùi kap hî-sut móa cha̍p-jī kheng.

44

. Chia̍h piáⁿ ê lâng ta-po͘ ê ū gō͘-chheng.

45

. Iâ-so͘ liâm-piⁿ pek I ê ha̍k-seng chiūⁿ chûn tāi-seng kè-khì hit pêng hōaⁿ, kàu Pek-sài-tāi, thèng-hāu I sì-sòaⁿ chèng lâng.

46

. Í-keng kap in lī-pia̍t, chiū khì soaⁿ-nı̍h kî-tó.

47

. Í-keng àm, chûn tī hái-tiong, chí-ū Iâ-so͘ ka-kī tī hōaⁿ-nı̍h.

48

. Khòaⁿ-kìⁿ ha̍k-seng kò-chiúⁿ, chin kan-khó͘, in-ūi sī tùi-thâu hong. Mî-sî iok-lio̍k sì kiⁿ, Iâ-so͘ tùi hái-bīn kiâⁿ chiū-kūn in, ài beh tùi in hia kè-khì.

49

. In khòaⁿ-kìⁿ I kiâⁿ tī hái-bīn, lia̍h chòe kòai mı̍h, chiū âu-kiò;

50

. in-ūi in lóng khòaⁿ-kìⁿ I, chiū chhiⁿ-kiaⁿ. Iâ-so͘ liâm-piⁿ kap in kóng ōe, kā in kóng, An lín ê sim, sī góa, m̄ bián kiaⁿ.

51

. Chiū chiūⁿ chûn chiū-kūn in; hong chiū tiāⁿ; in sim-lāi put-chí gông-ngia̍h;

52

. in-ūi in bōe hiáu-ngō͘ hit ê piáⁿ ê sîn-jiah, iā in ê sim tūn.

53

. Kè-khì liáu, chiū kàu Kek-nî-sat-le̍k tōe, chûn pha tī hōaⁿ-nı̍h.

54

. Í-keng lī-khui chûn, lâng liâm-piⁿ jīn-tit I,

55

. piàn-piàn cháu hit ê tōe-hng; thiaⁿ-kìⁿ I tī sím-mı̍h só͘-chāi, chiū chiong pho͘-á kng pīⁿ-lâng kàu hia.

56

. Kìⁿ-nā I só͘ jı̍p ê hiuⁿ-siā, siâⁿ-chhī, hiuⁿ-ē, in chiong pīⁿ-lâng hē tī koe-chhī, kiû I nā sái hō͘ in bong I ê saⁿ-á-ku ê chhiu; kìⁿ-nā bong ê lâng lóng tit-tio̍h hó.