Má-khó 第 5 章 - 巴克禮全羅

1

In chiū kàu hái ê tùi-bīn hōaⁿ, kàu kek-lah-sim lâng ê tōe-hng.

2

. Iâ-so͘ lī-khui chûn; liâm-piⁿ ū chı̍t lâng tùi hûn-bōng tiong chhut-lâi tú-tio̍h I, chiū-sī hō͘ siâ-sîn hū-sin ê, pêng-sò͘ khiā-khí tī hûn-bōng tiong.

3

. Bô lâng ōe pa̍k i, sui-jiân ēng thih-liān iā bōe-ōe;

4

. in-ūi ta̍uh-ta̍uh ēng kha-khàu thih-liān pa̍k i, nā-sī thih-liān hō͘ i chhoah-tn̄g, kha-khàu hō͘ i kòng-chhùi; bô lâng ū khùi-la̍t thang chè-ap i.

5

. Mî-jı̍t siông-siông tī hûn-bōng tiong, tī soaⁿ-nı̍h, âu-kiò, chiong chio̍h-thâu ka-kī siong.

6

. Hn̄g-hn̄g khòaⁿ-kìⁿ Iâ-so͘; chiū cháu lâi pài I,

7

. tōa siaⁿ âu-kiò, kóng, Chì-kôaiⁿ Siōng-tè ê Kiáⁿ Iâ-so͘, góa kap lí sím-mı̍h kan-sia̍p? Góa kí Siōng-tè lâi khún-kiû lí bo̍h-tit khó͘-chhó͘ góa.

8

. In-ūi Iâ-so͘ bat kā i kóng, Siâ-sîn ah, tio̍h tùi hit ê lâng chhut-khì.

9

. Iâ-so͘ mn̄g i kóng, Lí hō-chòe sím-mı̍h miâ? ìn kóng, Góa miâ chòe Iâⁿ, in-ūi góan chiah-ê chin chōe.

10

. I chiū chhiat-chhiat kiû I, bo̍h-tit kóaⁿ in chhut hit ê tōe-hng.

11

. Tī hit ê soaⁿ-phiâⁿ ū tōa tīn ti teh thó-chia̍h.

12

. In chiū kiû I kóng, Chhe góan jı̍p hiah ê ti, hō͘ góan thang jı̍p-khì.

13

. Chiū ún in. Hiah ê siâ-sîn chiū chhut-khì, lâi jı̍p hiah ê ti; hit tīn ti cháu-lo̍h soaⁿ-phiâⁿ chông-lo̍h hái, iok-liōng nn̄g chheng chiah, tī hái-nı̍h kek-sí.

14

. Kò͘-ti ê lâng cháu-khì, kā siâⁿ-lāi kap hiuⁿ-siā ê lâng kóng. Lâng chiū chhut-lâi khòaⁿ só͘ tú-tio̍h ê sū sī cháiⁿ-iūⁿ.

15

. Chiū lâi chiū-kūn Iâ-so͘, khòaⁿ-kìⁿ hit ê hōan-tio̍h kúi ê chiū-sī hō͘ iâⁿ só͘ tîⁿ ê, chē-teh chhēng saⁿ, hāi-chāi; chiū kiaⁿ.

16

. Khòaⁿ-kìⁿ ê lâng chiong hōan-tio̍h kúi ê lâng só͘ tú-tio̍h ê, kap kui tīn ti ê sū lóng kā in kóng.

17

. In chiū kiû Iâ-so͘ lī-khui in ê kéng-lāi.

18

. Iâ-so͘ tú-á chiūⁿ chûn, hit ê bat hōan-tio̍h kúi ê kiû I chún i saⁿ-kap khì.

19

. Iâ-so͘ m̄ ún i, kóng, Tò-khì lí ê ke chhē lí ê chhin-lâng, chiong Chú kā lí kiâⁿ hiah tōa ê sū kap só͘ lîn-bín lí ê kā in kóng.

20

. Hit lâng khì, tī Te-ka-pho-lī pò-iông Iâ-so͘ só͘ kā i kiâⁿ ê tōa sū. Chèng lâng lóng kî-kòai.

21

. Iâ-so͘ chē chûn koh kè-khì hit pêng, kui tōa tīn ê lâng chū-chı̍p chiū-kūn I; hit sî Iâ-so͘ tī hái-piⁿ.

22

. Ū chı̍t ê kóan hōe-tn̂g ê, miâ chòe Gâi-ló͘ lâi, í-keng khòaⁿ-kìⁿ Iâ-so͘, chiū phak tī I ê kha-ē,

23

. chhiat-chhiat kiû I kóng, Góa sòe-hàn ê cha-bó͘-kiáⁿ chha-put-to beh sí; chhiáⁿ lí lâi ēng chhiú hōaⁿ i, hō͘ i tit-tio̍h kiù lâi o̍ah.

24

. Iâ-so͘ kap i khì, kui tōa tīn ê lâng tè I, chin oe-khoeh.

25

. Ū chı̍t ê hū-jîn-lâng, hiat-lāu cha̍p-jī nî,

26

. bat tùi chōe-chōe ê i-seng siū-tio̍h chōe-chōe kan-khó͘, koh it-chīn phòa-hùi i só͘ ū ê, nā-sī bô chı̍t si-á lī-ek, hóan-tńg ná siong-tiōng,

27

. thiaⁿ-kìⁿ Iâ-so͘ ê sū, chiū lâi tī chèng lâng tiong, tùi I ê āu-bīn lâi bong I ê saⁿ,

28

. in-ūi kóng, Góa kan-ta bong I ê saⁿ, chiū ōe hó.

29

. Tùi án-ni hiat-lāu liâm-piⁿ chí, pún-sin chai i ê pīⁿ-thiàⁿ í-keng hó.

30

. Iâ-so͘ chek-sî ka-kī chai ū kôan-lêng tùi I chhut, chiū o̍at-tńg-sin, tī chèng lâng tiong kóng, Chī-chūi bong góa ê saⁿ?

31

. I ê ha̍k-seng kā I kóng, Lí khòaⁿ-kìⁿ kui tīn lâng teh oe-khoeh lí, iáu-kú mn̄g Chī-chūi ū bong góa?

32

. Iâ-so͘ piàn-piàn khòaⁿ, ài khòaⁿ chòe chit ê sū ê hū-jîn-lâng.

33

. Hū-jîn-lâng chai pún-sin só͘ le̍k-kè, kiaⁿ-hiâⁿ ngia̍uh-ngia̍uh-chhoah, chiū lâi phak tī I ê bīn-chêng, lóng chiàu-sı̍t kā I kóng.

34

. I chiū kā i kóng, Hū-jîn-lâng ah, lí ê sìn í-keng kiù lí; thang an-jiân tò-khì, lí ê pīⁿ chôan-jiân hó.

35

. Teh kóng ê sî, ū tùi kóan hōe-tn̂g ê ke lâi kóng, Lí ê cha-bó͘-kiáⁿ sí lah; mih-sái iáu teh lô-hôan sian-siⁿ?

36

. Iâ-so͘ piⁿ-á thiaⁿ-kìⁿ só͘ kóng ê ōe, kā kóan hōe-tn̂g ê kóng, Bo̍h-tit kiaⁿ, chí ū tio̍h sìn.

37

. Iâ-so͘ tī Pí-tek, Ngá-kok, kap Ngá-kok ê hiaⁿ-tī Iok-hān í-gōa, m̄ chún pa̍t lâng tè I saⁿ-kap khì.

38

. Kàu kóan hōe-tn̂g ê ke, khòaⁿ-kìⁿ ū hōa-hōa-háu, iā ū thî-khàu tōa siaⁿ háu ê lâng.

39

. Í-keng jı̍p-khì chiū kā in kóng, Lín siáⁿ-sū hōa-hōa-háu teh thî-khàu ah? Gín-ná m̄ sī sí, sī teh khùn nā-tiāⁿ.

40

. In chiū thí-chhiò I. Nā-sī I kóaⁿ in chèng lâng chhut-khì, chiū chhōa gín-ná ê pē-bú í-kı̍p kap I lâi ê lâng, jı̍p gín-ná só͘ tòa ê só͘-chāi;

41

. chiū khan gín-ná ê chhiú kā i kóng, Tāi-lī-tāi-kó͘-bí, hoan-e̍k chiū-sī kóng, Cha-bó͘ gín-ná, góa bēng-lēng lí, khí-lâi.

42

. Cha-bó͘ gín-ná liâm-piⁿ khí-lâi kiâⁿ; in-ūi i cha̍p-jī hè lah. Chèng lâng chiū tōa gông-ngia̍h kî-kòai.

43

. Iâ-so͘ giâm-giâm kìm-kài in bo̍h-tit hō͘ lâng chai; chiū hoan-hù tio̍h hō͘ cha-bó͘ gín-ná chia̍h.