Má-khó 第 13 章 - 巴克禮全羅

1

Iâ-so͘ chhut tiān ê sî ū chı̍t ê ha̍k-seng kā I kóng, Sian-siⁿ, lí khòaⁿ-leh, chit hō chio̍h, chit hō chhù-the̍h!

2

. Iâ-so͘ kā i kóng, Lí khòaⁿ chiah ê tōa chhù mah? Tī chia beh bô chı̍t tè chio̍h lâu tī chio̍h ê téng-bīn, iā bô chhia-lo̍h-khì.

3

. Iâ-so͘ tī Kaⁿ-ná soaⁿ chē tī tiān ê tùi-bīn; Pí-tek, Ngá-kok, Iok-hān kap An-tek-lia̍t àm-chīⁿ mn̄g I kóng,

4

. Chhiáⁿ kā góan kóng, sím-mı̍h sî ū chiah ê sū? Koh chiah ê sū beh chiâⁿ ê sî ū sím-mı̍h tiāu-thâu ah?

5

. Iâ-so͘ chiah kā in kóng, Lín tio̍h kín-sīn, bo̍h-tit hō͘ lâng bê-he̍k.

6

. Beh ū chōe-chōe lâng thok góa ê miâ lâi kóng, Góa chiū-sī Ki-tok, lâi bê-he̍k chōe-chōe lâng.

7

. Koh lín thiaⁿ-kìⁿ kau-chiàn kap kau-chiàn ê hong-siaⁿ ê sî, bo̍h-tit kiaⁿ; in-ūi chiah ê sū tek-khak ū, chóng-sī bo̍at-kî iáu-bē kàu.

8

. In-ūi peh-sìⁿ beh khí-lâi kong-kek peh-sìⁿ, kok iā beh kong-kek kok; ta̍k só͘-chāi beh ū tōe-tāng, iā beh ū ki-hng; chiah ê sū chiū-sī khó͘-thàng ê khí-thâu.

9

. Nā-sī lín tio̍h ka-kī kín-sīn, in-ūi lâng beh chiong lín sàng-kau kong-hōe, lín beh siū phah tī hōe-tn̂g-nı̍h; iā beh ūi-tio̍h góa ê iân-kò͘ khiā tī koaⁿ-hú kap kun-ông ê bīn-chêng, lâi tùi in chòe kan-chèng.

10

. Chóng-sī hok-im tek-khak tāi-seng thôan tī bān pang.

11

. Lâng thoa lín, chiong lín sàng-kau ê sî, bo̍h-tit tāi-seng khòa-lū beh cháiⁿ-iūⁿ kóng; tng hit sî só͘ siúⁿ-sù lín kóng ê lín tio̍h kóng i; in-ūi m̄ sī lín ka-kī kóng, chiū-sī Sèng Sîn teh kóng.

12

. Hiaⁿ-tī beh chiong hiaⁿ-tī sàng-kau khì sí; pē khóan-thāi kiáⁿ iā sī án-ni; kiáⁿ-jî beh khí-lâi kong-kek pē-bú hō͘ i sí.

13

. Iā lín in-ūi góa ê miâ beh hō͘ chèng lâng òan-hūn; to̍k-to̍k thun-lún kàu lō͘-bé ê, i beh tit-tio̍h kiù.

14

. Chóng-sī lín khòaⁿ-kìⁿ hit ê chân-hāi khó-ò͘ⁿ ê khiā tī i m̄ eng-kai khiā ê só͘-chāi (tha̍k ê lâng tio̍h hiáu-ngō͘), hit sî tī Iû-thài ê tio̍h cháu-khì soaⁿ-nı̍h;

15

. tī chhù-téng ê bo̍h-tit jı̍p-khì chhù-lāi the̍h sím-mı̍h;

16

. tī hn̂g-nı̍h ê bo̍h-tit tò-lâi hiahN i ê saⁿ.

17

. Tng hiah ê jı̍t ū sin-īn kap hō͘ eⁿ-á chia̍h lin ê hū-jîn-lâng ū chai-ē!

18

. Lín tio̍h kî-tó bián-tit tang-thiⁿ sî tú-tio̍h chit ê sū.

19

. In-ūi hiah ê jı̍t beh ū hōan-lān, chiū-sī tùi Siōng-tè chhòng-chō sè-kan ê khí-thâu, kàu chit tia̍p bē ū án-ni, āu-lâi iā bô.

20

. Nā m̄ sī Chú kiám-chió hiah ê jı̍t, chiū hōan ū jio̍k-thé ê bô chı̍t-ê tit kiù. Chóng-sī ūi-tio̍h kéng ê peh-sìⁿ, chiū-sī I só͘ kéng ê, ê iân-kò͘, I ū kiám-chió hiah ê jı̍t.

21

. Hit sî nā ū lâng kā lín kóng, Ki-tok tī chia, á-sī kóng, Tī hia, bo̍h-tit sìn.

22

. In-ūi beh ū ké Ki-tok ké sian-ti khí-lâi, kiâⁿ sîn-jiah kap tiāu-thâu; beh sī ōe, liân kéng ê peh-sìⁿ, iā bê-he̍k in.

23

. Chóng-sī lín tio̍h kín-sīn; góa í-keng tāi-seng lóng kā lín kóng.

24

. Tng hiah ê jı̍t, hit ê hōan-lān ê liáu-āu, jı̍t beh o͘-àm, ge̍h bô chhut i ê kng,

25

. chhiⁿ tùi thiⁿ ka-la̍uh, tī thiⁿ-nı̍h ê siōng beh tín-tāng.

26

. Hit sî beh khòaⁿ-kìⁿ Jîn-chú ēng tōa kôan-lêng kap êng-kng, tī hûn-tiong lîm-kàu.

27

. Hit sî I beh chhe I ê thiⁿ-sài tùi sì-hng chū-chı̍p I só͘ kéng ê peh-sìⁿ, tùi tōe-ke̍k kàu thiⁿ-piⁿ.

28

. Lín tio̍h o̍h bû-hoa-kó chhiū chit ê phì-jū; tng ki nńg hio̍h hoat ê sî, lín chiū chai hē-thiⁿ kūn lah.

29

. Án-ni lín khòaⁿ chiah ê sū, tio̍h chai sī kūn, kàu mn̂g-kháu lah.

30

. Góa sı̍t-chāi kā lín kóng, Chit sè-tāi iáu-bē kè-khì, kàu chiah ê tāi-chì lóng chiâⁿ.

31

. Thiⁿ tōe beh hòe-bô, góa ê ōe bōe hòe-bô.

32

. Nā-sī lūn hit jı̍t hit sî lâng m̄ chai, tī thiⁿ-nı̍h ê thiⁿ-sài iā m̄ chai. Kiáⁿ iā m̄ chai, to̍k-to̍k Pē chai i.

33

. Tio̍h kín-sīn kéng-séng lâi kî-tó, in-ūi lín m̄ chai hit ê kî sī tī sím-mı̍h sî.

34

. Sī chhin-chhiūⁿ chı̍t lâng lī-khui i ê ke, khì chhut-gōa, chiong kôan kau-tāi i chiah ê lô͘-po̍k, ū phài kang hō͘ ta̍k lâng chòe, koh hoan-hù kò͘-mn̂g ê tio̍h tiuⁿ-tî.

35

. Só͘-í lín tio̍h tiuⁿ-tî, in-ūi lín m̄ chai lín ê Chú sím-mı̍h sî beh lâi, he̍k-sī jı̍t-àm, he̍k-sī pòaⁿ-mî, he̍k-sī koe thî, he̍k-sī thiⁿ-kng chá;

36

. kiaⁿ-liáu I hut-jiân lâi tú-tio̍h lín teh khùn.

37

. Góa só͘ kā lín kóng ê, iā kā chèng lâng kóng, Tio̍h tiuⁿ-tî.