Má-khó 第 14 章 - 巴克禮全羅

1

Ké nn̄g jı̍t chiū-sī pôaⁿ-kè kap tû-kàⁿ ê choeh, chiah ê chè-si-thâu kap keng-ha̍k-sū chhē-khòaⁿ tio̍h ēng sím-mı̍h khúi-kè lia̍h Iâ-so͘ lâi hāi-sí I.

2

. In-ūi kóng, Tng choeh-kî m̄ thang, kiaⁿ-liáu peh-sìⁿ ū jiáu-lōan.

3

. Iâ-so͘ tī Pek-tāi-nî, thái-ko Se-bûn ê chhù; chē toh ê sî ū hū-jîn-lâng lâi, tòa ge̍k-pân, lāi-bīn tóe ke̍k kùi-khì chin ê ná-ta̍t hiuⁿ-iû, khà-phòa ge̍k-pân, piàⁿ tī Iâ-so͘ ê thâu-khak.

4

. Ū kúi-nā lâng siū-khì, saⁿ-kap kóng, Án-ni phòa-hùi chit ê hiuⁿ-iû ū sím-mı̍h lō͘-ēng?

5

. In-ūi chit ê hiuⁿ-iû ōe bōe-tit gûn-á saⁿ-pah gōa ê, lâi hō͘ sòng-hiong lâng. Chiū m̄ gōan i.

6

. Nā-sī Iâ-so͘ kóng, Chhut-chāi i; lín siáⁿ-sū thiau-lân i? i só͘ kiâⁿ lâi khóan-thāi góa ê sī hó sū.

7

. In-ūi siông-siông ū sòng-hiong lâng kap lín tī-teh, ài hó khóan-thāi in, put-kóan sî lóng ōe; nā-sī góa bô siông-siông kap lín tī-teh.

8

. Chit ê hū-jîn-lâng sī chīn i só͘ ōe ê lâi chòe; i tāi-seng chiong iû boah góa ê seng-khu, lâi pī-pān bâi-chòng.

9

. Góa sı̍t-chāi kā lín kóng, Phó͘ thiⁿ-ē bô lūn sím-mı̍h só͘-chāi thôan hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i.

10

. Cha̍p-jī ê ha̍k-seng ê chı̍t ê, Ka-lio̍k lâng Iû-tāi, khì kìⁿ hiah ê chè-si-thâu, beh chiong Iâ-so͘ kau hō͘ in.

11

. In thiaⁿ-kìⁿ chiū hoaⁿ-hí, koh ún beh hō͘ i gûn. I chiū chhē-khòaⁿ ū sím-mı̍h ki-hōe thang chiong Iâ-so͘ kau hō͘ in.

12

. Tû-kàⁿ-choeh ê thâu chı̍t jı̍t, chiū-sī thâi pôaⁿ-kè-choeh ê iûⁿ-ko ê jı̍t, ha̍k-seng mn̄g I kóng, Lí ài góan khì sím-mı̍h só͘-chāi pī-pān hō͘ lí chia̍h pôaⁿ-kè-choeh ah?

13

. Iâ-so͘ chhe nn̄g ê ha̍k-seng, kā in kóng, Lín jı̍p siâⁿ, chiū ū chı̍t lâng tòa chúi-pân beh tú-tio̍h lín, lín tio̍h tè i khì;

14

. tī i só͘ jı̍p ê só͘-chāi kā hit ê ke-chú kóng, Sian-siⁿ kóng, Góa ê kheh-thiaⁿ tī tá-lo̍h, góa beh tī hia kap góa ê ha̍k-seng chia̍h pôaⁿ-kè-choeh.

15

. I beh ēng lâu-téng chı̍t keng tōa thiaⁿ, pâi-siat piān-piān, hō͘ lín khòaⁿ; lín tī hia thang ūi-tio̍h lán tāi-seng pī-pān.

16

. Ha̍k-seng chhut-khì jı̍p siâⁿ; kì-jiân tú-tio̍h chiàu I só͘ kā in kóng ê; chiū pī-pān pôaⁿ-kè-choeh.

17

. Kàu jı̍t àm Iâ-so͘ kap cha̍p-jī ê ha̍k-seng lâi.

18

. Chē teh chia̍h ê sî, Iâ-so͘ kóng, Góa sı̍t-chāi kā lín kóng, Lín tiong-kan chı̍t lâng, kap góa saⁿ-kap chia̍h ê, beh bōe góa.

19

. Chèng lâng iu-būn, chı̍t-ê chı̍t-ê mn̄g I kóng, Chóng bô sī góa o͘h?

20

. I kā in kóng, Cha̍p-jī ha̍k-seng ê chı̍t-ê, kap góa saⁿ-kap ùn tī pôaⁿ-nı̍h ê, chiū-sī.

21

. In-ūi Jîn-chú tò-khì, chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó.

22

. In teh chia̍h ê sî Iâ-so͘ the̍h piáⁿ chiok-siā chiū peh-phòa hō͘ in, kóng, The̍h-khì, chit-ê sī góa ê seng-khu.

23

. Phâng poe chiok-siā hō͘ in; in lóng lim.

24

. Iâ-so͘ kā in kóng, Chit-ê sī góa ê huih, chiū-sī bêng-iok ê huih, ūi-tio̍h chōe-chōe lâng lâi lâu-chhut ê.

25

. Góa sı̍t-chāi kā lín kóng, Taⁿ liáu-āu góa bô koh lim phû-tô ê chiap, thèng-hāu hit jı̍t góa lim hit ê sin ê tī Siōng-tè ê kok.

26

. Í-keng gîm si, chiū chhut-lâi, khì Kaⁿ-ná soaⁿ.

27

. Iâ-so͘ kā in kóng, Lín lóng beh siū that-gāi; in-ūi ū kì-chài kóng, Góa beh phah bo̍k-chiá, iûⁿ chiū sì-sòaⁿ;

28

. nā-sī góa koh-o̍ah liáu-āu beh tāi-seng lín khì Ka-lī-lī.

29

. Pí-tek kā I kóng, Chèng lâng sui-jiân siū that-gāi, nā-sī góa bô án-ni.

30

. Iâ-so͘ kā i kóng, Góa sı̍t-chāi kā lí kóng, Kin-á-jı̍t chiū-sī tī kim-mî, koe thî jī lo̍h ê tāi-seng, lí beh saⁿ pái m̄ jīn góa.

31

. Pí-tek chīn-la̍t kóng, Góa chiū nā tio̍h kap lí sí, iā koat-tòan bô m̄ jīn lí. Chèng lâng iā lóng sī án-ni kóng.

32

. Saⁿ-kap kàu chı̍t só͘-chāi, miâ kiò Khek-se-má-nî, Iâ-so͘ kā I ê ha̍k-seng kóng, Lín chē tòa chia, thèng-hāu góa kî-tó.

33

. Chiū tòa Pí-tek, Ngá-kok, Iok-hān, kap I saⁿ-kap khì; Iâ-so͘ gông-ngia̍h chhám-chhoeh.

34

. Kā in kóng, Góa ê sim chin iu-būn kàu beh sí; lín tio̍h tòa chia lâi kéng-séng.

35

. Lio̍h-á chìn-chèng phak tī tōe-nı̍h, kî-kiû nā ōe chòe-tit, chiū hō͘ I bián tú-tio̍h chit ê sî.

36

. Koh kóng, A-pà Pē ah, lí bān sū lóng ōe, gōan lí hō͘ chit ê poe lī-khui góa. Chóng-sī m̄ sī chiàu góa só͘ ài; sī chiàu lí só͘ ài.

37

. Koh lâi, khòaⁿ-kìⁿ in teh khùn, chiū kā Pí-tek kóng, Se-bûn, lí teh khùn mah? Bōe-ōe kéng-séng chı̍t sî kú mah?

38

. Lín tio̍h kéng-séng kî-tó, bián-tit jı̍p tī bê-he̍k; sim-sîn kam-gōan, nā-sī jio̍k-thé nńg-chiáⁿ.

39

. Koh-chài khì kî-tó, iā sī kóng hiah ê ōe.

40

. Koh lâi khòaⁿ-kìⁿ in teh khùn, in-ūi in ê ba̍k-chiu chin siap; in iā m̄ chai tio̍h ìn cháiⁿ-iūⁿ.

41

. Tē saⁿ pái lâi kā in kóng, Taⁿ thang khùn lâi an-hioh lah; hó lah, sî kàu lah, Jîn-chú siū bōe tī chōe-jîn ê chhiú lah.

42

. Khí-lâi saⁿ-kap khì; lí khòaⁿ, bōe góa ê lâng kūn lah.

43

. Iáu teh kóng ê sî, liâm-piⁿ ū cha̍p-jī ê ha̍k-seng ê chı̍t-ê, Iû-tāi, lâi, iā ū kui tīn lâng kia̍h to kap thûi-á, tùi chè-si-thâu, keng-ha̍k-sū kap tiúⁿ-ló hia saⁿ-kap lâi.

44

. Bōe I ê bat kap in thò àm-hō kóng, Góa kā I chim ê, hit lâng chiū-sī, lín thang lia̍h I, sòe-jī thoa I khì.

45

. Í-keng kàu, chek-sî chiū-kūn Iâ-so͘; kóng, Lia̍p-pí; chiū tı̍t-tı̍t kā I chim.

46

. In chiū hē chhiú lia̍h I.

47

. Piⁿ-thâu khiā ê chı̍t lâng pu̍ih to, thâi chè-si-thâu ê lô͘-po̍k, siah-khì i chı̍t-ê hī-á.

48

. Iâ-so͘ kā in kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah?

49

. Góa jı̍t-jı̍t tī tiān-lāi kà-sī lâng, kap lín saⁿ-kap tī-teh, lín bô lia̍h góa;

50

. chóng-sī án-ni chiū-sī beh èng-giām sèng-keng. Ha̍k-seng lóng lī-khui I cháu.

51

. Ū chı̍t ê siàu-liân lâng thǹg-theh moa iù-tōe pò͘ tè Iâ-so͘; in lia̍h i;

52

. chiū khì-sak iù-tōe pò͘, thǹg-theh lâi cháu.

53

. Hiah ê lâng tòa Iâ-so͘ kàu chè-si-thâu ê só͘-chāi; iā ū chèng chè-si-thâu, tiúⁿ-ló, keng-ha̍k-sū lóng lâi kap i saⁿ-kap chū-chı̍p.

54

. Pí-tek hn̄g-hn̄g tè Iâ-so͘, kàu chè-si-thâu ê īⁿ, jı̍p lāi-bīn, kap hiah ê chhe-ia̍h chē-teh hang-hé.

55

. Chiah ê chè-si-thâu kap chôan kong-hōe chhē kan-chèng kong-kek Iâ-so͘, beh hō͘ I sí, iā bô tit-tio̍h.

56

. In-ūi lām-sám kan-chèng lâi kong-kek I ê chōe-chōe, nā-sī in só͘ kan-chèng ê bô tùi-tâng.

57

. Iā ū kúi-nā lâng khí-lâi, lām-sám kan-chèng I kóng,

58

. Góan bat thiaⁿ-kìⁿ I kóng, Góa beh húi-hōai chit keng lâng ê chhiú só͘ khí ê tiān, saⁿ-jı̍t lāi koh khí chı̍t keng, m̄-sī lâng ê chhiú só͘ khí ê.

59

. In kan-chèng án-ni iā bô tùi-tâng.

60

. Chè-si-thâu khí-lāi khiā tī tiong-kan, mn̄g Iâ-so͘ kóng, Lí lóng bô ìn mah? Chiah ê lâng só͘ kan-chèng lí ê sī sím-mı̍h?

61

. Iâ-so͘ chēng-chēng lóng bô ìn. Chè-si-thâu koh mn̄g I kóng, Lí sī thang o-ló ê ê Kiáⁿ, Ki-tok, á m̄ sī?

62

. Iâ-so͘ kóng, Góa sī; lín beh khòaⁿ-kìⁿ Jîn-chú chē tī ū kôan-lêng ê ê tōa pêng, kap thiⁿ ê hûn lâi.

63

. Chè-si-thâu thiah-lı̍h ka-kī ê saⁿ, kóng, Lán iáu khiàm sím-mı̍h kan-chèng ah?

64

. Lín í-keng thiaⁿ-kìⁿ I ê chhiàm-kôan siat-to̍k lah; lín phah-sǹg àn-cháiⁿ-iūⁿ? In lóng gí I kai sí.

65

. Hit sî ū lâng chiū phùi-nōa I, ng I ê bīn, ēng kûn-thâu-bú cheng I, kā I kóng, Lí tio̍h chòe sian-ti lâi kóng. Hiah ê chhe-ia̍h tòa-khì, ēng chhiú phah I.

66

. Pí-tek tī ē-bīn gōa īⁿ ê sî ū chè-si-thâu chı̍t ê lú-pī lâi;

67

. khòaⁿ-kìⁿ Pí-tek teh hang-hé siòng i kóng, Lí iā bat kap hit ê Ná-sat-le̍k lâng Iâ-so͘ chòe tīn.

68

. I m̄ jīn kóng, Góa m̄ chai, iā bōe hiáu-tit lí teh kóng sím-mı̍h. Chiū chhut-khì kàu chêng īⁿ. Koe chiū thî.

69

. Hit ê lú-pī khòaⁿ-kìⁿ i, koh kā piⁿ-á khiā ê lâng kóng, Chit-ê iā sī sio̍k tī in ê tóng. I koh m̄ jīn.

70

. Koh tiap-á-kú piⁿ-á khiā ê koh kā Pí-tek kóng, Lí sio̍k in ê tóng; in-ūi lí sī Ka-lī-lī lâng.

71

. I chiū chiù-chó͘ koh chiù-chōa kóng, Lín só͘ kóng hit ê lâng góa m̄ bat I.

72

. Koe chek-sî thî jī lo̍h. Pí-tek chiū kì-tit Iâ-so͘ só͘ kā i kóng ê ōe, kóng, Koe thî jī lo̍h ê tāi-seng, lí beh saⁿ pái m̄ jīn góa; siūⁿ-tio̍h chiū thî-khàu.