Má-khó 第 15 章 - 巴克禮全羅

1

Kàu thiⁿ-kng hiah-ê chè-si-thâu, tiúⁿ-ló, keng-ha̍k-sū kap chôan kong-hōe saⁿ-kap gī-lūn, pa̍k Iâ-so͘, tòa I khì, kau hō͘ Pí-lia̍p-to.

2

. Pí-lia̍p-to mn̄g I kóng, Lí sī Iû-thài lâng ê ông mah? I ìn kóng, Lí kóng, chiū-sī.

3

. Chè-si-thâu ēng chōe-chōe hāng kò I.

4

. Pí-lia̍p-to koh mn̄g I kóng, Lí lóng bô ìn mah? Lí khòaⁿ, in kò lí hiah chōe hāng.

5

. Nā-sī Iâ-so͘ iáu-kú bô ìn; tì-kàu Pí-lia̍p-to kî-kòai.

6

. Kàu choeh-kî chóng-tok éng ū pàng chı̍t ê hōan-lâng hō͘ in, chiàu in só͘ kiû ê.

7

. Ū chı̍t lâng, miâ Pa-lia̍p-pa, kap hiah ê chok-lōan ê lâng tâng siū pa̍k, in tī chok-lōan ê sî bat thâi-sí lâng.

8

. chèng lâng chiū khí-khì, kiû Pí-lia̍p-to chiàu siông lâi kiâⁿ.

9

. Pí-lia̍p-to ìn kóng, Lín ài góa pàng Iû-thài lâng ê ông hō͘ lín mah?

10

. In-ūi chai hiah ê chè-si-thâu sī ūi-tio̍h òan-tò͘, chiah kè-sàng I.

11

. Nā-sī hiah ê chè-si-thâu sái-sō chèng lâng, lêng-khó͘ kiû pâng Pa-lia̍p-pa hō͘ in.

12

. Pí-lia̍p-to koh ìn kóng, Án-ni chiū lín só͘ kiò chòe Iû-thài lâng ê ông ê, góa tio̍h cháiⁿ-iūⁿ pān I?

13

. In koh âu-kiò kóng, Tèng I tī sı̍p-jī-kè.

14

. Pí-lia̍p-to kā in kóng, Cháiⁿ-iūⁿ ah, I chòe sím-mı̍h pháiⁿ? Chóng-sī in ná tōa siaⁿ âu-kiò kóng, Tèng I tī sı̍p-jī-kè.

15

. Pí-lia̍p-to in-ūi ài hō͘ chèng lâng hoaⁿ-hí, chiū pàng Pa-lia̍p-pa hō͘ in; í-keng piⁿ-phah Iâ-so͘, chiū hoat-kau khì tèng sı̍p-jī-kè.

16

. Peng-teng thoa I jı̍p īⁿ-lāi, chiū-sī kong-tn̂g, chiū hōe-chôe thong iâⁿ,

17

. ēng chí-sek ê phàu hō͘ I chhēng, koh pīⁿ chhì-á ê bián-liû kā I tì,

18

. chiū kā I chhéng-an, kóng, Iû-thài lâng ê ông, pêng-an!

19

. Koh ēng lô͘-tek sut I ê thâu-khak, kā I phùi-nōa, kūi-lo̍h pài I.

20

. Hì-lāng soah, hit niá chí-sek ê phàu chiū kā I thǹg-khí-lâi, chiong I ka-kī ê saⁿ kā I chhēng-lo̍h-khì; tòa I chhut, beh tèng I sı̍p-jī-kè.

21

. Ū Kó͘-lī-nāi lâng Se-bûn, chiū-sī A-le̍k-san-tāi kap Ló͘-hu ê lāu-pē, tùi soaⁿ-tiûⁿ lâi àn hia kè, in bián-kióng i saⁿ-kap khì, lâi giâ Iâ-so͘ ê sı̍p-jī-kè.

22

. In tòa Iâ-so͘ kàu Kok-kok-thaⁿ ê só͘-chāi, hoan-e̍k chiū-sī Thâu-khak-óaⁿ ê só͘-chāi;

23

. ēng kiáu bu̍t-io̍h ê chiú hō͘ I; Iâ-so͘ m̄ siū.

24

. Chiū tèng I tī sı̍p-jī-kè, pun I ê i-ho̍k, liam-khau khòaⁿ sím-mı̍h lâng tit-tio̍h sím-mı̍h.

25

. Hit sî káu tiám cheng, chiū tèng I tī sı̍p-jī-kè.

26

. Ēng chám-tiâu siá I ê chōe-chōng, kóng, Iû-thài lâng ê ông.

27

. Iā ū nn̄g ê chha̍t kap I tâng tèng sı̍p-jī-kè, chı̍t-ê tī chiàⁿ-pêng, chı̍t-ê tī tò-pêng.

28

.

29

. Keng-kè ê lâng siat-to̍k I, iô thâu kóng, Āi ah, lí húi-hōai tiān, saⁿ jı̍t khí i ê,

30

. taⁿ tio̍h kiù ka-kī, tùi sı̍p-jī-kè lo̍h-lâi.

31

. Hiah ê chè-si-thâu kap keng-ha̍k-sū iā sī án-ni thí-chhiò I, saⁿ-kap kóng, I bat kiù pa̍t lâng, iā bōe-ōe kiù ka-kī.

32

. Í-sek-lia̍t ê ông Ki-tok taⁿ tio̍h tùi sı̍p-jī-kè lo̍h-lâi hō͘ góan khòaⁿ lâi sìn I. Tâng tèng tī sı̍p-jī-kè ê iā mē I.

33

. Jı̍t tiong-tàu chôan tōe o͘-àm, kàu saⁿ tiám cheng ê sî;

34

. saⁿ tiám cheng ê sî Iâ-so͘ tōa siaⁿ kiò kóng, Í-lô-i, Í-lô-i, lia̍p-má sat-pak-tāi-nî, hoan-e̍k chiū-sī, Góa ê Siōng-tè, góa ê Siōng-tè, lí siáⁿ-sū pàng-lī góa.

35

. Piⁿ-thâu khiā ê ū lâng thiaⁿ-kìⁿ, chiū kóng, Lí khòaⁿ, I teh kiò Í-lī-a.

36

. Ū chı̍t lâng cháu-khì ēng hái-jiông chìm chhò͘, hâ tī lô͘-tek-á bé, hō͘ i suh, kóng, Chhiáⁿ bān, chhì-khòaⁿ Í-lī-a lâi kiù I lo̍h-lâi á bô.

37

. Iâ-so͘ tōa siaⁿ kiò, khùi chiū tn̄g.

38

. Tiān-lāi ê tiùⁿ-lî tùi téng kàu ē lı̍h chòe nn̄g pêng.

39

. Pé-chóng khiā tī Iâ-so͘ ê tùi-bīn, khòaⁿ-kìⁿ I án-ni khùi tn̄g, chiū kóng, Chit lâng chin-chiàⁿ sī Siōng-tè ê Kiáⁿ.

40

. Koh ū kúi-nā ê hū-jîn-lâng tùi hn̄g-hn̄g teh khòaⁿ, chiông-tiong ū Bo̍at-tāi-lia̍p ê Má-lī-a, kap sió Ngá-kok Iok-se ê lāu-bú Má-lī-a, í-kı̍p Sat-lô-bí,

41

. chiū-sī Iâ-so͘ tī Ka-lī-lī ê sî, kun-tè lâi ho̍k-sāi I ê, iā ū chōe-chōe hū-jîn-lâng kap Iâ-so͘ tâng chiūⁿ Iâ-lō͘-sat-léng ê, lóng hn̄g-hn̄g teh khòaⁿ.

42

. Í-keng àm, in-ūi hit jı̍t sī pī-pān choeh ê jı̍t, chiū-sī an-hioh-jı̍t chêng ê chı̍t jı̍t,

43

. ū A-lī-má-thài ê Iok-sek lâi, i sī chun-kùi ê gī-ôan, pún-sin iā sī him-bō͘ siōng-tè ê kok ê, hó-táⁿ jı̍p-khì kìⁿ Pí-lia̍p-to, kiû Iâ-so͘ ê sin-si.

44

. Pí-lia̍p-to kî-kòai I í-keng sí; kiò pé-chóng lâi mn̄g khòaⁿ I sí kú bē.

45

. Í-keng tùi pé-chóng tit-tio̍h chai, chiū ēng sin-si hō͘ Iok-sek.

46

. Iok-sek bóe iù-tōe pò͘, siu Iâ-so͘ lo̍h-lâi; ēng iù-tōe pò͘ pau I, hē tī chio̍h-pôaⁿ só͘ phah ê bōng; iā kō chı̍t tè chio̍h tī bōng-mn̂g.

47

. Bo̍at-tāi-lia̍p ê Má-lī-a, kap Iok-se ê lāu-bú Má-lī-a, khòaⁿ-kìⁿ I só͘ bâi-chòng ê só͘-chāi.