Má-khó 第 3 章 - 巴克禮全羅

1

Iâ-so͘ koh jı̍p hōe-tn̂g; tī hia ū lâng chı̍t chhiú ko͘-tâ ê.

2

. In tng-khòaⁿ I tī an-hioh-jı̍t beh i-tī i á bô; ì-sù ài beh kò I.

3

. I chiū kā chhiú ko͘-tâ ê kóng, Khí-lâi, khiā tī tiong-ng.

4

. Chiū kā in kóng, An-hioh-jı̍t kiâⁿ hó, kiâⁿ pháiⁿ, kiù sìⁿ-miā, hāi sìⁿ-miā, tá-lo̍h chı̍t hāng sī ha̍p? In chēng-chēng.

5

. I chiū siū-khì, sì-kòe khòaⁿ in, iu-būn in ê sim ngī, kā hit ê lâng kóng, Chhun lí ê chhiú. I chiū chhun-khì, chhiú chiū hó-hó.

6

. Hoat-lī-sài lâng chhut-khì, chiū sûi-sî kap Hi-lu̍t ê tóng saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I.

7

. Iâ-so͘ kap I ê ha̍k-seng thè-khì hái-piⁿ, ū kui tōa tīn ê lâng tùi Ka-lī-lī tè I;

8

. iā ū tùi Iû-thài, Iâ-lō͘-sat-léng, Í-thó͘-mái. Iok-tàn hô gōa, kap Chhui-lô Se-tùn kéng-lāi kui tōa tīn ê lâng thiaⁿ-kìⁿ I só͘ kiâⁿ hiah-nı̍h tōa ê sū, chiū lâi chiū-kūn I.

9

. In-ūi lâng chōe, I chiū kā I ê ha̍k-seng kóng tio̍h pī-pān chûn-á lâi thèng-hāu, bián-tit in oe-khoeh I.

10

. In-ūi I bat i-hó chōe-chōe lâng, tì-kàu hōan ū phòa-pīⁿ ê pek-óa, ài beh bong I.

11

. Hiah ê siâ-sîn chı̍t ē khòaⁿ-kìⁿ I, chiū phak tī I ê bīn-chêng âu-kiò kóng, Lí sī Siōng-tè ê Kiáⁿ.

12

. I chia̍p-chia̍p kéng-kài in, bo̍h-tit kā I pò-iông.

13

. I chiūⁿ soaⁿ, chiàu ka-kī só͘ ài lâi tiàu lâng; in lâi chiū-kūn I.

14

. Chiū siat-lı̍p cha̍p-jī lâng, thang kap I siông-siông tī-teh, iā thang chhe in khì soan-thôan tō-lí,

15

. koh ū kóaⁿ kúi ê kôan.

16

. Chiū chheng Se-bûn chòe Pí-tek.

17

. Koh ū Se-pí-thài ê kiáⁿ Ngá-kok, kap Ngá-kok ê hiaⁿ-tī Iok-hān; chit nn̄g lâng I chheng in chòe Pòan-nî-kî, chiū-sī Lûi ê kiáⁿ;

18

. koh ū An-tek-lia̍t, Hui-le̍k, Pa-to-lô-mái, Má-thài, To-má, A-le̍k-hui ê kiáⁿ Ngá-kok, koh Ta̍t-thài, kap Ka-ná-nî ê Se-bûn,

19

. kap bōe I ê Ka-lio̍k lâng Iû-tāi.

20

. Iâ-so͘ jı̍p chhù. Chèng lâng koh chū-chı̍p, tì-kàu in bōe kò͘-tit chia̍h.

21

. I ê chhin-lâng thiaⁿ-kìⁿ, chiū chhut-lâi beh kā I lia̍h-teh; in-ūi kóng, I sī tian-kông.

22

. Tùi Iâ-lō͘-sat-léng lo̍h-lâi ê keng-ha̍k-sū kóng, I sī hō͘ Pia̍t-se-pok hū-sin; koh kóng, I sī óa-khò kúi-ông lâi kóaⁿ kúi.

23

. I kiò in lâi, siat phì-jū kā in kóng, Sat-tàn thái-thó ōe kóaⁿ Sat-tàn?

24

. Kok nā ka-kī cheng-piàⁿ, hit ê kok chiū khiā bōe tiâu.

25

. Ke nā ka-kī cheng-piàⁿ, hit ê ke iā khiā bōe tiâu.

26

. Sat-tàn nā khí-lâi ka-kī cheng-piàⁿ, i iā khiā bōe tiâu, tek-khak ōe bia̍t.

27

. Bô lâng ōe jı̍p béng lâng ê chhù lâi kiap i ê ke-hé; tio̍h tāi-seng pa̍k hit ê béng lâng, jiân-āu chiah beh kiap i ê chhù.

28

. Góa sı̍t-chāi kā lín kóng, Kìⁿ-nā sè-kan lâng só͘ hōan ê chōe, kap in só͘ pòng-to̍k it-chhè pòng-to̍k ê ōe, lóng beh sià-bián in;

29

. to̍k-to̍k kìⁿ-nā pòng-to̍k Sèng Sîn ê, éng-óan bô tit-tio̍h sià-bián, chiū-sī hōan-tio̍h éng sè-tāi ê chōe.

30

. Che sī in-ūi hiah ê lâng kóng, I hōan-tio̍h siâ-sîn.

31

. I ê lāu-bú kap I ê hiaⁿ-tī lâi khiā tī gōa-bīn, chhe lâng khì kiò I.

32

. Ū kui tīn ê lâng ûi I teh chē; ū lâng kā I kóng, Lí khòaⁿ, lí ê lāu-bú kap lí ê hiaⁿ-tī tī gōa-bīn teh chhē lí.

33

. I chiū ìn kóng, Sím-mı̍h lâng sī góa ê lāu-bú, góa ê hiaⁿ-tī ah?

34

. Chiū sì-kòe khòaⁿ hiah ê ûi I teh chē ê lâng kóng,

35

. Lí khòaⁿ, góa ê lāu-bú kap góa ê hiaⁿ-tī. In-ūi kìⁿ-nā kiâⁿ Siōng-tè ê chí-ì ê, chiū-sī góa ê hiaⁿ-tī chí-bē kap lāu-bú.