Má-khó 第 2 章 - 巴克禮全羅

1

Kè kúi-nā jı̍t Iâ-so͘ koh jı̍p Ka-pek-lông;

2

. lâng thiaⁿ-kìⁿ I tī chhù-lāi chiū chōe-chōe lâng chū-chı̍p tì-kàu bô khàng-tōe, liân mn̂g-kháu iā bô; I chiū kóng tō-lí hō͘ in thiaⁿ.

3

. Ū tòa chı̍t ê piàn-sūi ê chiū-kūn I, sī sì lâng kng i lâi.

4

. In-ūi lâng chōe, bōe-ōe kūn-óa, chiū tī Iâ-so͘ tiàm ê só͘-chāi, thiah chhù-téng hō͘ i kui khang; chiū chiong piàn-sūi ê tó tī pho͘-á tūi-lo̍h-khì.

5

. Iâ-so͘ khòaⁿ-kìⁿ in ê sìn, chiū kā piàn-sūi ê kóng, Sòe-kiáⁿ, lí ê chōe sià-bián lah.

6

. Ū kúi-nā ê keng-ha̍k-sū chē tī hia, sim-lāi gī-lūn kóng, Chit ê lâng cháiⁿ-iūⁿ án-ni kóng ah?

7

. I sī chhiàm-kôan lām-sám; tû Siōng-tè í-gōa, chī-chūi ōe sià-bián chōe ah?

8

. Iâ-so͘ sim-lāi liâm-piⁿ chai in ū chit hō ê gī-lūn, chiū kā in kóng, Lín siáⁿ-sū tī sim-lāi gī-lūn chiah-ê ah?

9

. Kā piàn-sūi ê kóng, Lí ê chōe sià lah, á-sī kóng, Khí-lâi, giâ lí ê pho͘-á lâi kiâⁿ, tá-lo̍h chı̍t hāng khah khòai?

10

. To̍k-to̍k beh hō͘ lín chai Jîn-chú tī tōe-nı̍h ū kôan thang sià chōe, (chiū kā piàn-sūi ê kóng),

11

. Góa kā lí kóng, Khí-lâi, giâ lí ê pho͘-á tò-khì lí ê chhù.

12

. I chiū khí-lâi, tī chèng lâng ê bīn-chêng sûi-sî giâ i ê pho͘-á chhut-khì; tì-kàu chèng lâng lóng gông-ngia̍h, kui êng-kng Siōng-tè kóng, Góan chiông-lâi bē bat khòaⁿ-kìⁿ án-ni-siⁿ.

13

. Iâ-so͘ koh chhut-khì kàu hái-kîⁿ; chèng lâng lóng chiū-kūn I, chiū kà-sī in.

14

. Keng-kè ê sî khòaⁿ-kìⁿ A-le̍k-hui ê kiáⁿ Lī-bī chē tī hiòng-koan, chiū kā i kóng, Tè góa. I chiū khí-lâi tè I.

15

. Iâ-so͘ chē toh tī Lī-bī ê chhù, ū chōe-chōe thiu-hiòng ê kap pháiⁿ lâng kap Iâ-so͘ chham I ê ha̍k-seng tâng chē, in-ūi hiah ê lâng sī chōe, iā teh tè I.

16

. Hoat-lī-sài ê keng-ha̍k-sū khòaⁿ-kìⁿ I kap pháiⁿ lâng í-kı̍p thiu-hiòng ê saⁿ-kap chia̍h, chiū kā I ê ha̍k-seng kóng, I kap thiu-hiòng ê í-kı̍p pháiⁿ lâng saⁿ-kap lim-chia̍h ah.

17

. Iâ-so͘ thiaⁿ-kìⁿ, chiū kā in kóng, Ióng-kiāⁿ ê bô khiàm i-seng, nā-sī phòa-pīⁿ ê chiū tio̍h; góa lâi m̄ sī beh chio gī lâng, sī beh chio pháiⁿ lâng.

18

. Iok-hān ê ha̍k-seng kap Hoat-lī-sài lâng tng teh kìm-chia̍h; in chiū-kūn lâi kā I kóng, Iok-hān ê ha̍k-seng kap Hoat-lī-sài lâng ê ha̍k-seng kìm-chia̍h, lí ê ha̍k-seng bô kìm-chia̍h, sī cháiⁿ-iūⁿ?

19

. Iâ-so͘ kā in kóng, Sin-kiáⁿ-sài kap hō-chhōa ê lâng tī-teh ê sî, in kiám ōe kìm-chia̍h mah? sin-kiáⁿ-sài iáu tâng tī-teh, in bōe-ōe kìm-chia̍h.

20

. Nā-sī sî-jı̍t beh kàu, sin-kiáⁿ-sài beh tùi in tiong-kan bô-khì, hit jı̍t in chiū beh kìm-chia̍h.

21

. Bô lâng ēng sin pò͘ pó͘ kū saⁿ; nā ū, chiū só͘ pó͘ ê hit tè ōe kiù-lı̍h i, chiū-sī sin ê kiù-lı̍h kū ê, i ê phòa-khang koh khah tōa.

22

. Iā bô lâng ēng sin chiú tóe tī kū phê-lông; nā ū, chiū sin chiú ōe piak-lı̍h phê-lông, chiú lāu, lông iā phah-pháiⁿ. To̍k-to̍k sin chiú tio̍h jı̍p tī sin phê-lông.

23

. Iâ-so͘ tī an-hioh-jı̍t tùi be̍h-hn̂g keng-kè, I ê ha̍k-seng kiâⁿ lō͘ ê sî tiah be̍h-sūi.

24

. Hoat-lī-sài lâng kā I kóng, Lí khòaⁿ, in tī an-hioh-jı̍t kiâⁿ só͘ m̄ eng-kai kiâⁿ ê, sī cháiⁿ-iūⁿ?

25

. Iâ-so͘ kā in kóng, Tāi-pı̍t kap kun-tè ê lâng, tng khiàm-kheh koh iau ê sî só͘ kiâⁿ ê, lín bē tha̍k-tio̍h mah?

26

. Chiū-sī tng A-pí-a-thah chòe chè-si-thâu ê sî i ū cháiⁿ-iūⁿ jı̍p Siōng-tè ê chhù, chia̍h pâi-lia̍t ê piáⁿ, sòa hō͘ kun-tè i ê lâng; chı̍t hō piáⁿ, nā m̄ sī chè-si, chiū m̄ thang chia̍h.

27

. Koh kā in kóng, An-hioh-jı̍t ūi-tio̍h lâng lâi siat-lı̍p, m̄ sī lâng ūi-tio̍h an-hioh-jı̍t.

28

. Só͘-í Jîn-chú iā sī an-hioh-jı̍t ê Chú.