Má-khó 第 1 章 - 巴克禮全羅

1

Siōng-tè ê Kiáⁿ Iâ-so͘ Ki-tok hok-im ê khí-thâu.

2

. Chhin-chhiūⁿ tī sian-ti Í-sài-a ê chheh só͘ kì-chài kóng, Góa chhe góa ê sù-chiá tī lí ê bīn-chêng, Lâi siu-chéng lí ê lō͘;

3

. Ū teh kiò tī khòng-iá ê, i ê siaⁿ kóng, Tio̍h pī-pān Chú ê lō͘, Siu tı̍t I ê sió lō͘.

4

. Iok-hān lâi tī khòng-iá kiâⁿ sóe-lé, thôan hóan-hóe ê sóe-lé, hō͘ lâng tit-tio̍h sià-chōe.

5

. Thong Iû-thài tōe kap Iâ-lō͘-sat-léng ê chèng lâng lóng chhut-lâi chiū-kūn i, jīn in ê chōe, tī Iok-tàn hô tùi i siū sóe-lé.

6

. Chit ê Iok-hān chhēng lo̍k-tô-mn̂g, io hâ phê-tòa, chia̍h chháu-meh kap soaⁿ-iá ê bı̍t.

7

. I thôan kóng, Ū chı̍t-ê pí góa khah ū kôan-lêng ê tè-bé góa lâi; chiū khut-lo̍h lâi tháu I ê ôe-tòa, góa iā bōe kham-tit.

8

. Góa bat ēng chúi kā lín kiâⁿ sóe-lé, I beh ēng Sèng Sîn kā lín sóe.

9

. Tng chiah ê jı̍t Iâ-so͘ tùi Ka-lī-lī ê Ná-sat-le̍k lâi, tī Iok-tàn hô tùi Iok-hān siū sóe-lé.

10

. Chek-sî tùi chúi khí-lâi, chiū khòaⁿ-kìⁿ thiⁿ lı̍h-khui, Sèng Sîn chhin-chhiūⁿ chíⁿ-á kàng-lîm tī I ê téng-bīn;

11

. koh tùi thiⁿ ū siaⁿ kóng, Lí sī góa só͘ thiàⁿ ê Kiáⁿ, góa hoaⁿ-hí lí.

12

. Sèng Sîn chek-sî pek I khì khòng-iá.

13

. Tī khòng-iá sì-cha̍p jı̍t, tú-tio̍h Sat-tàn chhì, iā kap iá-siù saⁿ-kap tòa; ū thiⁿ-sài su-hāu I.

14

. Iok-hān í-keng koaiⁿ-kaⁿ, Iâ-so͘ kàu Ka-lī-lī, thôan Siōng-tè ê hok-im, kóng,

15

. Jı̍t-kî móa lah, Siōng-tè ê kok kūn lah; lín tio̍h hóan-hóe lâi sìn hok-im.

16

. Iâ-so͘ keng-kè Ka-lī-lī ê hái-kîⁿ, khòaⁿ-kìⁿ Se-bûn kap i ê hiaⁿ-tī An-tek-lia̍t pha bāng tī hái-nı̍h; in-ūi sī thó-hî lâng.

17

. Iâ-so͘ kā in kóng, Lín lâi tè góa, góa beh hō͘ lín tit-tio̍h lâng chhin-chhiūⁿ thó-hî ê.

18

. In liâm-piⁿ lī-khui bāng, lâi tè I.

19

. Lio̍h-á chìn-chêng, khòaⁿ-kìⁿ Se-pí-thài ê kiáⁿ Ngá-kok kap i ê hiaⁿ-tī Iok-hān tī chûn-nı̍h teh pó͘ bāng.

20

. I liâm-piⁿ chio in, in chiū pài-pia̍t in lāu-pē Se-pí-thài kap chhiàⁿ-kang lâng tī chûn-nı̍h, lâi tè tī I ê āu-bīn.

21

. In jı̍p Ka-pek-lông, Iâ-so͘ tī an-hioh-jı̍t jı̍p hōe-tn̂g, kà-sī lâng.

22

. Lâng kî-kòai I ê kà-sī; in-ūi I kà-sī lâng chhin-chhiūⁿ ū kôan ê, bô chhin-chhiūⁿ keng-ha̍k-sū.

23

. Tú-á hōe-tn̂g lāi ū chı̍t ê hōan-tio̍h kúi ê lâng âu-kiò kóng,

24

. Ná-sat-le̍k lâng Iâ-so͘, góan kap lí sím-mı̍h kan-sia̍p? Lí lâi beh bia̍t góan mah? Góa chai lí sī chī-chūi, chiū-sī Siōng-tè ê Sèng ê.

25

. Iâ-so͘ chek-pī i kóng, Lí tio̍h chēng-chēng, tùi chit lâng chhut-khì.

26

. Siâ-sîn thiu-chhoah hit lâng, tōa siaⁿ kiò, chiū tùi i chhut-khì.

27

. Chèng lâng lóng gông-ngia̍h, tì-kàu saⁿ piān-lūn, kóng, Chit-ê sī cháiⁿ-iūⁿ? Sī sin ê kà-sī. I ēng kôna bēng-lēng siâ-sîn, siâ-sîn iā sūn-thàn I.

28

. I ê miâ-siaⁿ sûi-sî piàn thôan Ka-lī-lī ê sì-hng.

29

. In í-keng chhut hōe-tn̂g, sûi-sî kap Ngá-kok Iok-hān jı̍p Se-bûn kap An-tek-lia̍t ê ke.

30

. Se-bûn ê tiūⁿ-ḿ hōan-tio̍h jia̍t-pīⁿ tó-teh. Sûi-sî ū lâng chiong che kā Iâ-so͘ kóng.

31

. I kūn-óa khan i ê chhiú, hō͘ i khí-lâi, jia̍t chiū thè; hū-jîn-lâng chiū su-hāu in.

32

. Kàu hông-hun àm, jı̍t lo̍h liáu, ū lâng chhōa lóng-chóng ū phòa-pīⁿ ê, kap hōan-tio̍h kúi ê lâng chiū-kūn I.

33

. Thong siâⁿ lóng chū-chı̍p tī mn̂g-kháu.

34

. Iâ-so͘ i-hó ta̍k iūⁿ pīⁿ ê lâng chōe-chōe, koh kóaⁿ chōe-chōe kúi; in-ūi kúi bat I, só͘-í m̄ chún in kóng.

35

. Keh chá-khí, thiⁿ iáu put-chí àm, Iâ-so͘ khí-lâi chhut-khì khòng-iá ê só͘-chāi, tī hia kî-tó.

36

. Se-bûn kap tâng-phōaⁿ ê lâng tui-chhē I.

37

. Í-keng tú-tio̍h chiū kā I kóng, Chèng lâng lóng teh chhē lí.

38

. I kā in kóng, Lán lâi khì pa̍t ūi; kàu hū-kūn ê po͘-thâu, hō͘ góa thang tī hia thôan-tō; in-ūi góa ūi-tio̍h chit ê sū, chiah chhut-lâi.

39

. Chiū khì piàn Ka-lī-lī, jı̍p in ê hōe-tn̂g, soan-thôan tō-lí, koh kóaⁿ kúi.

40

. Ū chı̍t ê thái-ko ê chiū-kūn I, kiû I, kūi I, kā I kóng, Lí nā khéng, chiū ōe hō͘ góa chheng-khì.

41

. Iâ-so͘ khó-lîn, chhun chhiú bong i, kā i kóng, Góa khéng, lí thang chheng-khì.

42

. Thái-ko chek-sî tû--khì; i chiū chheng-khì.

43

. Iâ-so͘ giâm-giâm kéng-kài i, sûi-sî kah i khì; iā kā i kóng,

44

. Tio̍h kín-sīn bo̍h-tit kā lâng kóng sím-mı̍h; to̍k-to̍k tio̍h khì, chiong pún-sin hō͘ chè-si giām, ia̍h ūi-tio̍h lí tit-tio̍h chheng-khì, hiàn Mô͘-se só͘ hoan-hù ê, lâi chòe chèng-kù tī lâng.

45

. Chóng-sī i chhut-khì, chiū tōa-tōa soan-thôan, sì-kòe pò-iông chit ê sū; tì-kàu Iâ-so͘ bô thang koh hián-jiân jı̍p siâⁿ, to̍k-to̍k tòa tī gōa-bīn khòng-iá ê só͘-chāi. Lâng tùi sì-hng chiū-kūn I.