Má-thài 第 28 章 - 巴克禮全羅

1

An-hioh-jı̍t āu, chhit jı̍t ê thâu chı̍t jı̍t, thiⁿ phú-kng. Bo̍at-tāi-lia̍p ê Má-lī-a kap pa̍t ê Má-lī-a lâi beh khòaⁿ hit ê bōng.

2

Hut-jiân tōe tōa tín-tāng, in-ūi Chú ê thiⁿ-sài tùi thiⁿ lo̍h-lâi, kō khui hit tè chio̍h, lâi chē tī téng-bīn.

3

I ê bīn-māu chhin-chhiūⁿ sih-nà, saⁿ pe̍h chhin-chhiūⁿ seh.

4

Kò͘-siú ê lâng in-ūi kiaⁿ, chiū ngia̍uh-ngia̍uh-chhoah, piàn chhin-chhiūⁿ sí.

5

Thiⁿ-sài ìn hiah ê hū-jîn-lâng kóng, Lín m̄ bián kiaⁿ, in-ūi góa chai lín teh chhē tèng sı̍p-jī-kè ê Iâ-so͘.

6

I bô tī chia, in-ūi I í-keng koh-o̍ah, chiàu I só͘ kóng ê; lín lâi khòaⁿ Chú só͘ tó ê só͘-chāi.

7

Iā tio̍h kín-kín khì kā I ê ha̍k-seng kóng, I tùi sí-lâng tiong koh-o̍ah, iā beh tāi-seng lín khì Ka-lī-lī, tī hia lín beh khòaⁿ-kìⁿ I; góa í-keng kā lín kóng lah.

8

In kín-kín lī-khui bōng, iā kiaⁿ iā tōa hoaⁿ-hí, cháu khì pò I ê ha̍k-seng.

9

Hut-jiân Iâ-so͘ tú-tio̍h in, kóng, Pêng-an. In chìn-chêng, phō I ê kha, pài I.

10

Iâ-so͘ chiū kā in kóng, M̄ bián kiaⁿ, khì pò góa ê hiaⁿ-tī, kah in khì Ka-lī-lī, tī hia beh khòaⁿ-kìⁿ góa.

11

Hū-jîn-lâng khì ê sî, kò͘-siú ê peng ū-ê jı̍p siâⁿ, ēng só͘ keng-kè ê sū it-chīn pò chiah ê chè-si-thâu.

12

In chiū kap tiúⁿ-ló chū-chı̍p, saⁿ-kap chham-siông, ēng chōe-chōe gûn hō͘ peng, kóng,

13

Lín tio̍h kóng, Góan teh khùn ê sî, I ê ha̍k-seng mî-sî lâi thau-khì.

14

Siat-sú chit ê tāi-chì hō͘ chóng-tok thiaⁿ-kìⁿ, góan chiū beh khǹg i, hō͘ lín bô sū.

15

In the̍h hiah ê gûn, chiàu só͘ kà in ê khì kiâⁿ; chit ê ōe chiū piàn thôan Iû-thài lâng tiong, kàu tī kin-á-jı̍t.

16

Nā-sī cha̍p-it ê ha̍k-seng khì Ka-lī-lī, kàu Iâ-so͘ só͘ bat kā in tiāⁿ-tio̍h ê soaⁿ.

17

Khòaⁿ-kìⁿ I, chiū pài I; chóng-sī ū-ê giâu-gî.

18

Iâ-so͘ kūn-óa lâi tùi in kóng ōe, kóng, Thiⁿ-téng tōe-ē ê kôan, í-keng lóng-chóng hō͘ góa.

19

Só͘-í lín tio̍h khì chio bān peh-sìⁿ lâi chòe ha̍k-seng, kā in kiâⁿ sóe-lé, hō͘ in kui tī Pē, Kiáⁿ, Sèng Sîn ê miâ;

20

kìⁿ-nā góa só͘ ū bēng-lēng lín ê, tio̍h kà-sī in siú; koh góa jı̍t-jı̍t kap lín tī-teh, kàu sè-kan ê lō͘-bé.