Má-thài 第 27 章 - 巴克禮全羅

1

Kàu thiⁿ-kng, chèng chè-si-thâu kap peh-sìⁿ ê tiúⁿ-ló saⁿ-kap kè-bô͘ kong-kek Iâ-so͘, ài hō͘ I sí.

2

Í-keng pa̍k I, chiū tòa-khì kau hō͘ chóng-tok Pí-lia̍p-to.

3

Hit sî bōe I ê Iû-tāi khòaⁿ-kìⁿ Iâ-so͘ siū tēng-chōe, chiū thè-hóe, chiong hiah ê saⁿ-cha̍p gûn hêng chiah ê chè-si-thâu kap tiúⁿ-ló,

4

kóng, Góa bōe bô chōe ê ê huih, ū chōe lah. In kóng, Kap góan siáⁿ kan-sia̍p? Lí ka-kī táⁿ-sǹg.

5

Iû-tāi hiat hiah ê gûn tī tiān-nı̍h, thè-khì ka-kī tiàu-sí.

6

Hiah ê chè-si-thâu the̍h hit ê gûn, kóng, Che sī huih ê kè, m̄-thang lok tī khò͘-pâng.

7

In chiū chham-siông, chiong hit ê gûn khì bóe sio-hûi lâng ê hn̂g, thang bâi-chòng chhut-gōa lâng.

8

Só͘-í hit khu hn̂g kàu taⁿ chheng chòe Huih-hn̂g.

9

Tùi án-ni èng-giām chá thok sian-ti Iâ-lī-bí só͘ kóng ê, kóng, In the̍h siū-kó͘-ê ê kè-gûn saⁿ-cha̍p, chiū-sī Í-sek-lia̍t ê kiáⁿ-sun tiong ū lâng só͘ kó͘ ê;

10

ēng i lâi bóe sio-hûi-ê ê hn̂g, chiàu Chú só͘ bēng-lēng góa ê.

11

Iâ-so͘ khiā tī chóng-tok ê bīn-chêng; chóng-tok mn̄g I kóng, Lí sī Iû-thài lâng ê ông mah? Iâ-so͘ kā i kóng, Lí kóng, chiū-sī.

12

I hō͘ hiah ê chè-si-thâu tiúⁿ-ló kò, I iā bô ìn.

13

Hit sî Pí-lia̍p-to kā I kóng, Hiah ê lâng kan-chèng lí kàu hiah chōe hāng, lí bô thiaⁿ-kìⁿ mah?

14

Iâ-so͘ bô ìn i chı̍t kù ōe, tì-kàu chóng-tok tōa kî-kòai.

15

Kàu choeh-kî chóng-tok chiàu-lē pàng chı̍t-ê hōan-lâng hō͘ chèng lâng, sī chiàu in só͘ ài ê.

16

Hit sî ū chhut-miâ ê hōan-lâng, miâ kiò Pa-lia̍p-pa.

17

In í-keng chū-chı̍p, Pí-lia̍p-to kā in kóng, Lín ài góa pàng chī-chūi hō͘ lín? sī Pa-lia̍p-pa, á-sī chheng chòe Ki-tok ê Iâ-so͘?

18

In-ūi chai in ūi-tio̍h òan-tò͘ chiah kè/2-sàng Iâ-so͘.

19

I chē tn̂g ê sî, i ê bó͘ chhe lâng kā i kóng, Chit ê gī lâng lí m̄-thang kan-sia̍p-tio̍h; in-ūi góa kin-á-jı̍t tī bîn-bāng tiong ūi-tio̍h I chōe-chōe kan-khó͘.

20

Chiah ê chè-si-thâu kap tiúⁿ-ló kiau-so chèng lâng, kiû pàng Pa-lia̍p-pa, bia̍t Iâ-so͘.

21

Chóng-tok ìn kóng, Chit nn̄g lâng lín ài góa pàng tá-lo̍h chı̍t-ê hō͘ lín? In kóng, Pa-lia̍p-pa. Pí-lia̍p-to kā in kóng,

22

Án-ni, chiū chheng chòe Ki-tok ê Iâ-so͘, góa tio̍h cháiⁿ-iūⁿ pān I? In lóng kóng, Tèng I sı̍p-jī-kè.

23

Chóng-tok kóng, Cháiⁿ-iūⁿ, I ū kiâⁿ sím-mı̍h pháiⁿ? In tōa siaⁿ hoah kóng, Tèng I sı̍p-jī-kè.

24

Pí-lia̍p-to khòaⁿ-kìⁿ bô chhái-kang, hóan-tńg ná jiáu-lōan, chiū phâng chúi, tī chèng lâng ê bīn-chêng sóe chhiú, kóng, Tī chit ê gī lâng ê huih góa bô chōe, lín ka-kī táⁿ-sǹg.

25

Peh-sìⁿ lóng ìn i kóng, I ê huih kui tī góan kap góan ê kiáⁿ-sun.

26

I chiū pàng Pa-lia̍p-pa hō͘ in. Í-keng piⁿ-phah Iâ-so͘, chiū hoat-kau khì tèng sı̍p-jī-kè.

27

Hit sî chóng-tok ê peng tòa Iâ-so͘ jı̍p kong-tn̂g, chū-chı̍p thong iâⁿ ûi I.

28

Thǹg I ê saⁿ, chiong âng phàu kā I chhēng;

29

ēng chhì-á pīⁿ/0 bián-liû, tì tī I ê thâu-khak, ēng lô͘-tek hē tī I ê chiàⁿ-chhiú, kūi tī I ê bīn-chêng hì-lāng I kóng, Iû-thài lâng ê ông, pêng-an.

30

Chiū kā I phùi-nōa, kia̍h hit ki lô͘-tek, lâi sut I ê thâu-khak.

31

Hì-lāng soah, hit niá phàu chiū kā I thǹg-khí-lâi, chiong I ka-kī ê saⁿ kā I chhēng, tòa I khì tèng sı̍p-jī-kè.

32

Chhut-lâi ê sî tú-tio̍h chı̍t ê Kó͘-lī-nāi lâng miâ Se-bûn, bián-kióng i saⁿ-kap khì, hō͘ i giâ Iâ-so͘ ê sı̍p-jī-kè.

33

Kàu chı̍t só͘-chāi, miâ Kok-kok-thaⁿ, chiū-sī thâu-khak-óaⁿ ê só͘-chāi, chiū ēng khó͘-táⁿ só͘ tiâu-hô ê chiú hō͘ I lim;

34

I chhì-khòaⁿ, chiū m̄ lim.

35

Í-keng tèng I tī sı̍p-jī-kè, chiū chòe-khau pun I ê i-ho̍k;

36

koh chē tī hia kò͘-siú I.

37

Chiū hē chám-tiâu tī I ê thâu-khak ê téng-bīn, siá kóng, Chit-ê sī Iû-thài lâng ê ông, Iâ-so͘.

38

Hit sî ū nn̄g ê chha̍t kap I tâng tèng tī sı̍p-jī-kè, chı̍t-ê tī chiàⁿ-pêng, chı̍t-ê tī tò-pêng.

39

Keng-kè ê lâng ki-chhì I, iô thâu kóng,

40

Lí húi-hōai tiān, saⁿ jı̍t koh khí ê, tio̍h kiù ka-kī; lí nā sī Siōng-tè ê Kiáⁿ, tio̍h tùi sı̍p-jī-kè lo̍h-lâi.

41

Hiah ê chè-si-thâu kap keng-ha̍k-sū í-kı̍p tiúⁿ-ló iā sī án-ni hì-lāng I, kóng,

42

I bat kiù pa̍t lâng, bōe-ōe kiù ka-kī. I chòe Í-sek-lia̍t ê ông, taⁿ tio̍h tùi sı̍p-jī-kè lo̍h-lâi, góan chiū beh sìn I.

43

I óa-khò Siōng-tè, Siōng-tè nā hoaⁿ-hí I, taⁿ chiū tio̍h kiù I; in-ūi I kóng, Góa chiū-sī Siōng-tè ê Kiáⁿ.

44

Kap I tâng tèng hit nn̄g ê chha̍t iā sī án-ni mē I.

45

Tùi jı̍t-tiong-tàu kàu saⁿ tiám, piàn tōe o͘-àm.

46

Chha-put-to saⁿ tiám, Iâ-so͘ tōa siaⁿ âu-kiò kóng, Í-lī, Í-lī, lia̍p-má sat-pok-tāi-nî, chiū-sī kóng, Góa ê Siōng-tè, góa ê Siōng-tè, lí siáⁿ-sū pàng-lī góa?

47

Piⁿ-thâu khiā ê ū lâng thiaⁿ-kìⁿ chiū kóng, I teh kiò Í-lī-a.

48

Tiong-kan chı̍t lâng chek-sî cháu-khì, the̍h hái-jiông, chìm chhò͘, hâ tī lô͘-tek-á bé, hō͘ I suh.

49

Kî-û ê kóng, Chhiáⁿ bān, khòaⁿ Í-lī-a lâi kiù I á bô.

50

Iâ-so͘ koh tōa siaⁿ âu-kiò, chiū tn̄g khùi.

51

Hut-jiân tiān-lāi ê tiùⁿ, tùi téng kàu ē, lı̍h chòe nn̄g pêng; tōe tāng, chio̍h-pôaⁿ lı̍h;

52

bōng khui, í-keng teh khùn ê sèng-tô͘, in ê sin-khu chōe-chōe khí-lâi, tùi in ê bōng chhut;

53

kàu Iâ-so͘ koh-o̍ah liáu-āu, in jı̍p sèng siâⁿ, chhut-hiān tī chōe-chōe lâng.

54

Pé-chóng kap saⁿ-tâng kò͘-siú Iâ-so͘ ê, khòaⁿ-kìⁿ tōe-tāng, kap só͘ keng-kè ê sū, put-chí kiaⁿ, kóng, Chit-ê kó-jiân sī Siōng-tè ê Kiáⁿ.

55

Ū chōe-chōe hū-jîn-lâng tī hia hn̄g-hn̄g teh khòaⁿ; in chiū-sī tùi Ka-lī-lī kun-tè Iâ-so͘ lâi ho̍k-sāi I ê;

56

chiông-tiong ū Bo̍at-tāi-lia̍p ê Má-lī-a, Ngá-kok Iok-se ê lāu-bú Má-lī-a, kap Se-pí-thài ê kiáⁿ ê lāu-bú.

57

Í-keng àm, ū A-lī-má-thài ê hó-gia̍h lâng lâi, miâ chòe Iok-sek, i iā sī Iâ-so͘ ê ha̍k-seng.

58

Hit lâng khì kìⁿ Pí-lia̍p-to, kiû Iâ-so͘ ê sin-si; Pí-lia̍p-to hoan-hù tio̍h hō͘ i.

59

Iok-sek siu hit ê sin-si, ēng chheng-khì ê iù-pò͘ pau i;

60

hē tī i ka-kī ê sin bōng, chiū-sī i tī chio̍h-pôaⁿ só͘ phah ê; chiū kō tōa tè chio̍h tī bōng-mn̂g, chiah khì.

61

Ū Bo̍at-tāi-lia̍p ê Má-lī-a kap pa̍t ê Má-lī-a tī hia, chē tī bōng ê tùi-bīn.

62

Keh jı̍t, chiū-sī pī-pān choeh āu ê chı̍t jı̍t, hiah ê chè-si-thâu kap Hoat-lī-sài lâng chū-chı̍p kìⁿ Pí-lia̍p-to kóng,

63

Tāi-jîn ah, góan kì-tit hit ê bê-he̍k lâng ê, o̍ah-teh ê sî bat kóng, Saⁿ jı̍t āu góa beh koh-o̍ah.

64

Só͘-í chhiáⁿ lí bēng-lēng kò͘-siú hit ê bōng, kàu tē saⁿ jı̍t; kiaⁿ-liáu I ê ha̍k-seng lâi thau I khì, ia̍h kā peh-sìⁿ kóng, I tùi sí-lâng tiong koh-o̍ah; án-ni, chiū āu-lâi ê chha-biū, pí tāi-seng khah lī-hāi.

65

Pí-lia̍p-to kā in kóng, Lín niá peng khì, chiàu lín só͘ chai-iáⁿ ê khì kò͘-siú.

66

In chiū khì, hong chio̍h kap siat peng, lâi kò͘-siú hit ê bōng.