Má-thài 第 26 章 - 巴克禮全羅

1

Iâ-so͘ kóng chiah ê ōe soah, chiū kā I ê ha̍k-seng kóng,

2

Lín chai kè nn̄g jı̍t pôaⁿ-kè-choeh chiū kàu, Jîn-chú tú-tio̍h kè/2-sàng khì tèng sı̍p-jī-kè.

3

Hit sî hiah ê chè-si-thâu kap peh-sìⁿ ê tiúⁿ-ló chū-chı̍p tī chè-si-thâu, miâ Kai-a-hoat ê īⁿ,

4

saⁿ-kap chham-siông ēng khúi-khiat ê kè lia̍h Iâ-so͘ lâi thâi I.

5

Chóng-sī kóng, Tng choeh-kî m̄-thang, kiaⁿ-liáu peh-sìⁿ ê tiong-kan ū jiáu-lōan.

6

Iâ-so͘ tī Pek-tāi-nî, thái-ko Se-bûn ê chhù,

7

ū hū-jîn-lâng tòa ge̍k-pân, lāi-bīn tóe ke̍k kùi-khì ê hiuⁿ-iû, chiū-kūn I, tng I chē toh ê sî piàⁿ tī I thâu-khak téng.

8

Ha̍k-seng khòaⁿ-kìⁿ chiū siū-khì, kóng, Án-ni phòa-hùi ū siáⁿ lō͘-ēng?

9

In-ūi chit ê iû ōe bōe-tit chōe-chōe gûn, lâi hō͘ sòng-hiong lâng.

10

Iâ-so͘ chai chiū kā in kóng, Lín siáⁿ-sū thiau-lân chit ê hū-jîn-lâng ah? in-ūi i só͘ kiâⁿ lâi khóan-thāi góa ê sī hó sū.

11

In-ūi siông-siông ū sòng-hiong lâng kap lín tī-teh, nā-sī góa bô siông-siông kap lín tī-teh.

12

In-ūi i tò chit ê iû tī góa seng-khu, chiū-sī pī-pān góa bâi-chòng lâi kiâⁿ ê.

13

Góa sı̍t-chāi kā lín kóng, Phó͘ thiⁿ-ē, bô lūn sím-mı̍h só͘-chāi thôan chit ê hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i.

14

Hit sî cha̍p-jī ê ha̍k-seng chı̍t-ê, miâ chòe Ka-lio̍k lâng Iû-tāi, khì kìⁿ hiah ê chè-si-thâu,

15

kóng, Lín beh hō͘ góa jōa chōe, góa beh chiong I kau hō͘ lín? In chiū kap i iok, hō͘ i gûn saⁿ-cha̍p.

16

Tùi hit sî i chhē ki-hōe chiong Iâ-so͘ kau hō͘ in.

17

Tû-kàⁿ-choeh ê thâu-chı̍t jı̍t, ha̍k-seng chiū-kūn Iâ-so͘ kóng, Ài góan tī sím-mı̍h só͘-chāi kā lí pī-pān chia̍h pôaⁿ-kè-choeh?

18

I kóng, Lín jı̍p siâⁿ chhē bó͘ lâng, kā i kóng, Sian-siⁿ kóng, Góa ê sî kūn lah; góa kap góa ê ha̍k-seng siú pôaⁿ-kè-choeh tī lí tau.

19

Ha̍k-seng chiàu Iâ-so͘ só͘ hoan-hù ê khì kiâⁿ: chiū pī-pān pôaⁿ-kè-choeh.

20

Kàu jı̍t àm Iâ-so͘ kap cha̍p-jī ê ha̍k-seng chē toh.

21

Chia̍h ê sî, Iâ-so͘ kóng, Góa sı̍t-chāi kā lín kóng, lín tiong-kan chı̍t lâng beh bōe góa.

22

Chèng lâng chin iu-būn, chı̍t-ê chı̍t-ê kā I kóng, Chú ah, chóng bô sī góa o͘h?

23

I ìn kóng, Kap góa chhun chhiú tī pôaⁿ-nı̍h ê, hit-ê beh bōe góa.

24

Jîn-chú tò-khì chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó.

25

Bōe I ê Iû-tāi kóng, Lia̍p-pí, chóng bô sī góa o͘h? Kā i kóng, Lí í-keng kóng lah.

26

In teh chia̍h ê sî, Iâ-so͘ the̍h piáⁿ, chiok-siā peh-phòa, pun hō͘ ha̍k-seng, kóng, The̍h-khì chia̍h; chit-ê sī góa ê seng-khu.

27

Koh phâng poe chiok-siā hō͘ in, kóng, Lín lóng tio̍h lim i;

28

chit-ê sī góa ê huih, chiū-sī bêng iok ê huih, ūi-tio̍h chōe-chōe lâng lâi lâu-chhut ê, tì-kàu chōe tit-tio̍h sià-bián.

29

Nā-sī góa kā lín kóng, taⁿ liáu-āu góa bô lim chit ê phû-tô ê chiap, thèng-hāu hit jı̍t góa kap lín lim hit ê sin-ê tī góa ê Pē ê kok.

30

Í-keng gîm si, chiū chhut-lâi, khì Kaⁿ-ná soaⁿ.

31

Hit sî Iâ-so͘ kā in kóng, Kim-mî lín lóng beh ūi-tio̍h góa lâi siū that-gāi, in-ūi ū kì-chài kóng, Góa beh phah bo̍k-chiá, chiū iûⁿ-kûn sì-sòaⁿ.

32

Nā-sī góa koh-o̍ah liáu-āu beh tāi-seng lín khì Ka-lī-lī.

33

Pí-tek ìn I kóng, Chèng lâng sui-jiân ūi-tio̍h lí lâi siū that-gāi, iā góa éng-éng bô siū that-gāi.

34

Iâ-so͘ kā i kóng, Góa sı̍t-chāi kā lí kóng, kim-mî koe iáu-bē thî, lí beh saⁿ pái m̄ jīn góa.

35

Pí-tek kā I kóng, Góa chiū nā tio̍h kap lí sí, iā koat-tòan bô m̄ jīn lí. Chèng ha̍k-seng iā lóng sī án-ni kóng.

36

Iâ-so͘ kap in kàu chı̍t só͘-chāi, miâ Khek-se-má-nî, kā I ê ha̍k-seng kóng, Lín chiah-ê chē chia, thèng-hāu góa khì hia kî-tó.

37

Chiah chhōa Pí-tek kap Se-pí-thài nn̄g ê kiáⁿ saⁿ-kap khì; chiū iu-būn, chhám-chhoeh.

38

Kā in kóng, Góa ê sim chin iu-būn kàu beh sí, lín tòa chia kap góa kéng-séng.

39

Lio̍h-lio̍h-á chìn-chêng, bīn phak tī tōe-nı̍h, kî-tó, kóng, Góa ê Pē ah, nā ōe chòe-tit, tio̍h hō͘ chit ê poe lī-khui góa; chóng-sī m̄ sī chiàu góa só͘ ài, sī chiàu lí só͘ ài.

40

Chiū lâi ha̍k-seng hia, khòaⁿ-kìⁿ in teh khùn, kā Pí-tek kóng, Án-cháiⁿ-iūⁿ, lín bōe-ōe kap góa kéng-séng pòaⁿ-sî kú ah?

41

Tio̍h kéng-séng, tio̍h kî-tó, bián-tit jı̍p tī bê-he̍k; sim-sîn kam-gōan, nā-sī jio̍k-thé nńg-chiáⁿ.

42

Tē jī pái koh khì kî-tó, kóng, Góa ê Pē ah, chit-ê poe nā bōe-tit lī-khui góa, tek-khak tio̍h góa lim i, chiū gōan lí ê chí-ì tit chiâⁿ.

43

Koh-chài lâi khòaⁿ-kìⁿ in iū teh khùn, in-ūi in ê ba̍k-chiu siap.

44

Lī-khui in koh khì, tē saⁿ pái kî-tó, iā sī kóng hiah ê ōe.

45

Hit tia̍p koh chiū-kūn ha̍k-seng, kā in kóng, Taⁿ thang khùn lâi an-hioh lah. Sî kūn lah, Jîn-chú siū bōe tī chōe-jîn ê chhiú.

46

Khí-lâi saⁿ-kap kiâⁿ; bōe góa ê lâng kūn lah.

47

Iáu teh kóng ê sî, hut-jiân cha̍p-jī ê ha̍k-seng ê chı̍t ê, Iû-tāi, lâi, iā ū kui tīn lâng kia̍h to kap thûi-á, tùi chiah ê chè-si-thâu kap peh-sìⁿ ê tiúⁿ-ló hia saⁿ-kap lâi.

48

Bōe I ê bat kap in thò àm-hō, kóng, Góa kā I chim ê, hit lâng chiū-sī, lín thang lia̍h I.

49

Chek-sî chiū-kūn Iâ-so͘, kóng, Lia̍p-pí, pêng-an; chiū tı̍t-tı̍t kā I chim.

50

Iâ-so͘ kā i kóng, Pêng-iú ah, lí beh lâi chòe ê, chiū chòe. Hiah ê lâng chiū chìn-chêng, khí chhiú lia̍h Iâ-so͘.

51

Hut-jiân ū kap Iâ-so͘ tī-teh ê chı̍t lâng chhun chhiú pu̍ih to, thâi chè-si-thâu ê lô͘-po̍k, siah-khì i chı̍t ê hī-á.

52

Iâ-so͘ chiū kā i kóng, Siu lí ê to jı̍p gôan-ūi, in-ūi hōan-nā kia̍h to ê beh tùi to sí.

53

Á-sī lí phah-sǹg góa bōe-ōe kiû góa ê Pē, chiū I tī chit tia̍p beh kā góa chhe cha̍p-jī iâⁿ khah ke ê thiⁿ-sài mah?

54

Nā án-ni, chiū sèng-keng só͘ kóng chit ê tāi-chì tek-khak ū ê, cháiⁿ-iūⁿ ōe èng-giām ah?

55

Hit sî Iâ-so͘ kā in hiah ê lâng kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah? Góa jı̍t-jı̍t chē tī tiān-lāi kà-sī lâng, iā lín bô lia̍h góa.

56

Chóng-sī chit ê sū lóng chiâⁿ, sī beh èng-giām sian-ti só͘ kì-chài ê. Hit sî ha̍k-seng lóng lī-khui I cháu.

57

Lia̍h Iâ-so͘ ê tòa I kàu chè-si-thâu Kai-a-hoat ê só͘-chāi, tī hia hiah ê keng-ha̍k-sū kap tiúⁿ-ló í-keng chū-chı̍p.

58

Pí-tek hn̄g-hn̄g tè I kàu chè-si-thâu ê īⁿ, jı̍p lāi-bīn kap hiah ê chhe-ia̍h saⁿ-kap chē, beh khòaⁿ hit ê kiat-kio̍k.

59

Chiah ê chè-si-thâu kap chôan kong-hōe chhē lām-sám ê kan-chèng kong-kek Iâ-so͘, ài hō͘ I sí.

60

Sui-jiân chōe-chōe lām-sám kan-chèng ê lâi, iā bô tit-tio̍h. Āu-lâi ū nn̄g-ê kàu, kóng,

61

Chit lâng bat kóng, Góa ōe húi-hōai Siōng-tè ê tiān, saⁿ jı̍t chiū khí i.

62

Chè-si-thâu khí-lâi kā I kóng, Lí lóng bô ìn mah? Chiah ê lâng só͘ kan-chèng lí ê sī sím-mı̍h?

63

Nā-sī Iâ-so͘ chēng-chēng. Chè-si-thâu kā I kóng, Tng chit ê chin-o̍ah Siōng-tè, góa bēng-lēng lí chiù-chōa lâi kā góan kóng, lí kó-jiân sī Siōng-tè ê Kiáⁿ, Ki-tok, á m̄ sī.

64

Iâ-so͘ kā i kóng, Lí í-keng kóng lah; nā-sī góa kā lín kóng, Tùi chit tia̍p liáu-āu lín beh khòaⁿ-kìⁿ Jîn-chú chē tī ū kôan-lêng ê ê tōa pêng, chē thiⁿ ê hûn lâi.

65

Tùi án-ni chè-si-thâu thiah-lı̍h ka-kī ê saⁿ, kóng, I kóng-chhut chhiàm-kôan siat-to̍k ê ōe; lán iáu-kú khiàm sím-mı̍h kan-chèng ah? Taⁿ lín í-keng thiaⁿ-kìⁿ I ê chhiàm-kôan siat-to̍k lah.

66

Lín phah-sǹg cháiⁿ-iūⁿ? Ìn kóng, I kai sí.

67

Chiū phùi-nōa tī I ê bīn, ēng kûn-thâu-bú cheng I; iā ū-ê ēng chhiú siàn I,

68

kóng, Ki-tok ah, lí sī sian-ti, tio̍h kā góan kóng, phah lí ê sī chī-chūi.

69

Pí-tek chē tī gōa īⁿ; ū chı̍t ê lú-pī kūn-óa i kóng, Lí iā bat kap Ka-lī-lī lâng Iâ-so͘ chòe tīn.

70

Pí-tek tng chèng lâng ê bīn-chêng m̄ jīn kóng, Góa m̄ chai lí teh kóng sím-mı̍h.

71

Chhut-khì kàu īⁿ mn̂g, koh chı̍t ê lú-pī khòaⁿ-kìⁿ i, kā tī hia ê lâng kóng, Chit-ê iā bat kap Ná-sat-le̍k lâng Iâ-so͘ chòe tīn.

72

Pí-tek koh m̄ jīn, sòa chiù-chōa kóng, Góa m̄ bat hit ê lâng.

73

Ū hiah kú, piⁿ-á teh khiā ê lâng kūn-óa kā Pí-tek kóng, Lí sı̍t-chāi iā sī in ê tóng, in-ūi tùi lí ê khiuⁿ-kháu lō͘-chhut.

74

I chiah chiù-mē, koh chiù-chōa, kóng, Góa m̄ bat hit ê lâng. Koe chiū thî.

75

Pí-tek chiū kì-tit Iâ-so͘ ê ōe kóng, Koe iáu-bē thî, lí beh saⁿ pái m̄ jīn góa. Chiū chhut-khì gōa-bīn, tōa thî-khàu.